ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ បានច្រានចោលបណ្ដឹងសុំនៅក្រៅឃុំជាថ្មីម្ដងទៀតហើយរបស់ លោក ហុង សុខហួរ។ ការបដិសេធដែលពុំបានបញ្ជាក់ពីមូលហេតុអ្វីទាំងអស់នេះ ត្រូវបានមេធាវីការពារក្ដីរបស់សមាជិកព្រឹទ្ធសភា មកពីគណបក្សជំទាស់ ចាត់ទុកថា ជាការផ្ដល់ភាពអយុត្តិធម៌ដល់កូនក្តីរបស់ខ្លួន។
មេធាវីការពារក្ដីឲ្យ លោក ហុង សុខហួរ បញ្ជាក់ជំហរថា នឹងរៀបចំបណ្ដឹងសាទុក្ខទៅតុលាការកំពូល បន្តទៀត ប្រឆាំងសេចក្ដីសម្រេចរបស់ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ នៅពេលនេះ ដែលសម្រេចឲ្យកូនក្ដីរបស់ខ្លួនត្រូវជាប់ឃុំបន្តទៀតនោះ។
បន្ទាប់ពីត្រូវរង់ចាំការសម្រេចអស់ពេលជាច្រើនម៉ោង មុនពេលតំណាងអយ្យការ និងក្រុមមេធាវីការពារក្តីរបស់ លោក ហុង សុខហួរ បានធ្វើសេចក្ដីសន្និដ្ឋានកាលពីព្រឹកថ្ងៃទី៤ វិច្ឆិកា។ នៅនាទីចុងក្រោយ ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ លោក ប្លង់ សំណាង បានជំទាស់បណ្ដឹងសុំនៅក្រៅឃុំរបស់ លោក ហុង សុខហួរ តាមសំណើរបស់ក្រុមមេធាវីនៃសមាជិកព្រឹទ្ធសភារូបនេះ។
បើទោះជាបែបណា ការបដិសេធសុំនៅក្រៅជាថ្មីឡើងវិញ ដែលប្រើពេលតែប៉ុន្មាននាទីនេះ មិនត្រូវបានប្រធានក្រុមប្រឹក្សាជំនុំជម្រះ លោក ប្លង់ សំណាង បញ្ជាក់ពីមូលហេតុនោះឡើយ។
លោក ជូង ជូងី មេធាវីការពារក្តីឲ្យ លោក ហុង សុខហួរ ម្នាក់ក្នុងចំណោមមេធាវីផ្សេងទៀត ឲ្យដឹងថា លោកមានការសោកស្ដាយចំពោះសេចក្ដីរបស់ក្រុមប្រឹក្សាជំនុំជម្រះ ដែលទាត់ចោលសំណើរបស់ លោក ហុង សុខហួរ នេះ។ បើទោះជាបែបណា លោកអះអាងថា នឹងបន្តនីតិវិធីជាថ្មីទៀតប្រឆាំងសេចក្ដីសម្រេចរបស់សាលាឧទ្ធរណ៍នេះទៅតុលាការកំពូល។ លោកបន្តថា «ខ្ញុំនឹងពិភាក្សាមួយ លោក ហុង សុខហួរ ពីការប្ដឹងសារទុក្ខ ប្រសិនបើ លោក ហុង សុខហួរ គាត់ត្រូវការប្ដឹងសារទុក្ខ ខ្ញុំនឹងរៀបចំបណ្ដឹងជូនគាត់»។
ចៅក្រមជំនុំជម្រះសាលាឧទ្ធរណ៍ បានបដិសេធបណ្ដឹងសុំនៅក្រៅឃុំរបស់ លោក ហុង សុខហួរ នេះចំនួន ៣លើករួចមកហើយ។ ការជំទាស់លើកចុងក្រោយរបស់ចៅក្រមជំនុំជម្រះ សាលាឧទ្ធរណ៍កាលពីថ្ងៃទី១៧ ខែកញ្ញា នោះ គឺក្រោមហេតុផលថា ដើម្បីរក្សាជនត្រូវចោទឲ្យសាលាដំបូងរាជធានីភ្នំពេញបន្តនីតិវិធី និងកុំឲ្យមានវឹកវរកើតឡើង ក៏ប៉ុន្តែការជំទាស់ជាថ្មីទៀតលើកនេះវិញ បើទោះ លោក ហុង សុខហួរ សម្រេចតម្កល់លុយ ២០លានរៀលហើយក៏ដោយ ក៏ប្រធានក្រុមប្រឹក្សាជំនុំជម្រះ សម្រេចទាត់ចោលដូចលើកមុនដែរ ប៉ុន្តែការសម្រេចលើកនេះពុំបានបញ្ជាក់ពីមូលហេតុទេ។
បន្ទាប់ពីលោកនាយករដ្ឋមន្ត្រី ហ៊ុន សែន ប្រតិកម្ម និងចោទថាក្បត់ជាតិ ព្រោះតែលួចក្លែងឯកសារស្ដីពីសន្ធិសញ្ញាព្រំដែនកម្ពុជា-វៀតណាម ភ្លាម លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីថ្ងៃទី១៥ សីហា។ ក្រោយការចាប់ខ្លួន សមាជិកព្រឹទ្ធសភារូបនេះត្រូវបានចៅក្រមស៊ើបសួរសាលាដំបូងរាជធានីភ្នំពេញ លោក កៅ វណ្ឌី ចោទប្រកាន់ ៣បទចោទ គឺបទក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យមានការប្រព្រឹត្តបទឧក្រិដ្ឋ។
ជុំវិញបញ្ហានេះ លោក អំ សំអាត មន្ត្រីជាន់ខ្ពស់អង្គការលីកាដូ (LICADHO) បង្ហាញការសោកស្ដាយចំពោះសេចក្ដីសម្រេចរបស់តុលាការនៅពេលនេះ។ លោក អំ សំអាត យល់ឃើញថា បើផ្អែកតាមលក្ខខណ្ឌស្នើសុំនៅក្រៅឃុំ គឺពុំមានហេតុផលណាមួយដែលចៅក្រមជំនុំជម្រះ ត្រូវបដិសេធឡើយ។ លោកបន្តថា «តាមលក្ខខណ្ឌនៃការស្នើសុំនៅក្រៅឃុំ គឺវាគ្រប់គ្រាន់ហើយដែលអនុញ្ញាតឲ្យនៅក្រៅឃុំ។ មានរឿងខ្លះមិនមានលក្ខខណ្ឌគ្រប់គ្រាន់ផង ក៏គេអនុញ្ញាតឲ្យនៅក្រៅឃុំដែរ»។
នៅក្នុងបន្ទាប់សវនាការ លោក ជូង ជូងី បានជម្រាបអង្គជំនុំជម្រះថា តុលាការគប្បីផ្ដល់សិទ្ធិឲ្យកូនក្ដីរបស់ខ្លួន បាននៅក្រៅឃុំបណ្ដោះអាសន្ន ដោយសារពេលនេះពុំមានភាពចាំបាច់ទៀតឡើយ ដែលត្រូវបន្តនីតិវិធីស៊ើបសួរ។ លោកបន្ថែមថា មិនតែប៉ុណ្ណោះ បើផ្អែកលើគោលការណ៍ច្បាប់ លោក ហុង សុខហួរ ត្រូវមានសេរីភាពបាននៅក្រៅឃុំ។
មាត្រា២០៣ នៃក្រមនីតិវិធីព្រហ្មទណ្ឌចែងថា ជាគោលការណ៍ ជនត្រូវចោទត្រូវតែមានសេរីភាព។ ក្នុងករណីពិសេស ជនត្រូវចោទអាចត្រូវឃុំខ្លួនបណ្ដោះអាសន្ន ហើយអាចអនុវត្តបានតែក្នុងករណីចោទប្រកាន់ពីបទឧក្រិដ្ឋ ឬបទមជ្ឈិម ដែលច្បាប់ផ្ដន្ទាទោសដាក់ពន្ធនាគារស្មើ ឬលើសពី ១ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។