មេធាវី​​ស្នើសុំ​ឲ្យ​តុលាការ​ពន្លឿន​នីតិវិធី​ជំនុំជម្រះ​សំណុំ​រឿង​សកម្មជន​បក្ស​ប្រឆាំង លោក គង់ ម៉ាស់

ដោយ សុជីវី
2019.08.16
គង់ ម៉ាស់ ៦២២ លោក គង់ ម៉ាស់ ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន បញ្ជូន​ទៅ​សួរ​នាំ​នៅ​នាយកដ្ឋាន​សន្តិសុខ​ផ្ទៃក្នុង​នៃ​ក្រសួង​មហាផ្ទៃ កាលពី ​ថ្ងៃ​ទី១៦ ខែ​មករា។
Provided photo

មេធាវី​ការពារ​ក្តី​ ស្នើសុំ​ឲ្យ​តុលាការ​ពន្លឿន​នីតិវិធី​ជំនុំជម្រះ​លើ​សំណុំរឿង​សកម្មជន​បក្ស​ប្រឆាំង​ លោក​ គង់​ ម៉ាស់ ​ដែល​ត្រូវ​បាន​ចាប់ខ្លួន​ឃុំខ្លួន​ជាង​៨ខែ​ហើយ​ពាក់ព័ន្ធ​នឹង​ការ​បញ្ចេញ​មតិ​រិះគន់​ការ ​គ្រប់គ្រង​របស់​លោក ​ហ៊ុន ​សែន ​នៅ​តាម​បណ្ដាញ​សង្គម​ហ្វេសប៊ុក (Facebook)។ សង្គម​ស៊ីវិល ​យល់ថា ​ការ​ឃុំ​ខ្លួន​រយៈពេល​យូរ​ដោយ​គ្មាន​ការ​ជំនុំជម្រះ​ក្ដី​បែប​នេះ គឺ​រំលោភ​ទាំង​ច្បាប់​ និង​សន្ធិ សញ្ញា​អន្តរជាតិ​ស្ដីពី​សិទ្ធិមនុស្ស។

មេធាវី​ការពារ​ក្តី​ឲ្យ​លោក គង់ ម៉ាស់ ​គឺ​លោក សំ សុគង់ ប្រាប់​អាស៊ី​សេរី​ថា​ តុលាការ ​មិនបាន​លើក ​យក​សំណុំរឿង​របស់​កូន​ក្តី​លោក ​មក​ធ្វើ​ការ​ជំនុំជម្រះ​នោះ​ទេ​ក្នុងរយៈ​ពេល​ ៨ខែ​នេះ ​ដោយ​តុលាការ​ លើក​ហេតុផល​ថា ​មិនទាន់​បញ្ចប់​ការ​ស៊ើប​អង្កេត។

លោក​មេធាវី សំ ​សុគង់ បញ្ជាក់​ថា ​លើកទីមួយ​ តុលាការ​ បានសម្រេច​ឃុំខ្លួន​កូន​ក្តី​របស់​លោក​រយៈ​ពេល៦ខែ ​បន្ទាប់មក​ពន្យារ​ពេល​ឃុំខ្លួន៣​ ខែ​បន្ថែម​ទៀត ​ហើយ​មកទល់​ពេលនេះ​ជិត​គ្រប់ ៩ខែ​ហើយ តែ​តុលាការ ​នៅ​មិន​ទាន់​បញ្ចប់​ការ​ស៊ើប​អង្កេត​នៅ​ឡើយ។ លោក ​ថ្លែង​ថា​ លោក​ គង់ ​ម៉ាស់​ ត្រូវ​ បាន​ចោទប្រកាន់​ក្នុង​បទ​ល្មើស​មជ្ឈិម ដូច្នេះ​តាម​នីតិវិធី​ច្បាប់​ គឺ​តុលាការ​មិន​អាច​ឃុំខ្លួន​លើស​ពី ៦ខែ​ដោយ​មិន​កាត់​ទោស​នោះ​ទេ ​ព្រោះ​ខុស​នឹង​ការ​កំណត់​នៃ​ច្បាប់​។ មេធាវី​រូប​នេះ​បន្ត​ថា​ លោក​ កំពុង សិក្សា​ផ្លូវ​ច្បាប់​បន្ថែម ​ដើម្បី​ដាក់ពាក្យ​ស្នើសុំ​ឲ្យ​តុលាការ​ បិទ​បញ្ចប់​ការ​ស៊ើប​សួរ និង​លើក​យក​​សំណុំ​រឿង​ទៅ​ជំនុំជម្រះ​ឲ្យឆាប់ ​ឬក៏​នឹង​ដាក់​ពាក្យ​ស្នើសុំ​ឲ្យ​តុលាការ​ទម្លាក់​ចោល​ការ​ចោទ​ប្រកាន់​លើ​កូន​ក្តី ​តែ​ម្ដង​ប្រសិនបើ​ក្នុងរយៈ​ពេល​ជិត១ឆ្នាំនេះ ​រក​មិន​ឃើញ ​ភស្តុតាង ឬ​បទល្មើស ​ដាក់​បន្ទុក​លើ កូន​ក្តី​នោះ​ទេ៖ «សិទ្ធិ​របស់​ជនជាប់ចោទ គឺ​ត្រូវ​តែ​ទទួល​បាន​នូវ​សវនាការ​ មួយ​ត្រឹមត្រូវ និង​យុត្តិធម៌​ហើយ​ដើម្បី​ឲ្យ​មាន​សវនាការ​ត្រឹមត្រូវ និង​យុត្តិធម៌ គឺ​ការ​ឃុំ​ខ្លួន​ជន​ត្រូវ​ចោទ​ត្រូវ​តែ​មាន​រយៈ​ពេល​មួយ​សមរម្យ​ ហើយ​ធ្វើ​យ៉ាង​ណា​ឲ្យ​ខ្លី។ ចំពោះ​ការ​ឃុំ​ខ្លួន​ជន​ត្រូវ​ចោទ ដើម្បី​គ្រាន់​តែ​ទុក​សម្រាប់​បើក​សវនាការ​ គឺ​បញ្ញត្តិ​នៃ​ច្បាប់​អន្តរជាតិ​ក៏​ដូចជា​ច្បាប់​ជាតិ​ក៏​មិន​អនុញ្ញាត​ដែរ ដោយសារ​គេ​គិត​ពី​គោល​ការណ៍​សេរីភាព​ដូច្នេះ​ការ​ឃុំ​ខ្លួន​ដោយ​មិន​បាន​ធ្វើការ​ស៊ើប​អង្កេត​ឬមួយ​ការ​ឃុំ​ខ្លួន​ម្ដង​ហើយ​ម្ដង​ទៀត​នេះ​ គឺ​ជា​ការ​រំលោភ​សិទ្ធិ​ជន​ត្រូវ​ចោទ​ធ្ងន់ធ្ងរ»

អាស៊ី​សេរី ​មិន​អាច​សុំ​ការ​ឆ្លើយតប​ពី​អ្នក​នាំ​ពាក្យ​សាលា​ដំបូង​រាជធានី​ភ្នំពេញ លោក អ៊ី រិន្ទ បាន​ទេ​ ដោយ​ទូរស័ព្ទ​ចូល​ពុំ​មាន​អ្នក​ទទួល។

របប​ក្រុង​ភ្នំពេញ បាន​ចាប់​ខ្លួន​លោក​ គង់ ម៉ាស់ ដែល​ជា​អនុ​ប្រធាន​នាយកដ្ឋាន​កិច្ចការ​បោះ​ឆ្នោត និង​នីតិកម្ម និង ជា​សមាជិក​ក្រុម​ការងារ​គណបក្ស​សង្គ្រោះ​ជាតិ​ខេត្ត​ស្វាយរៀង ​ដែល​របប​ក្រុង ភ្នំពេញ រំលាយ​ចោល​នោះ កាល​ពី​ថ្ងៃ​ទី១៦ ខែ​មករា ឆ្នាំ២០១៩ ចោទប្រកាន់​ពី​បទ​ប្រមាថ ​និង ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជា​អាទិ៍ ​តាម​មាត្រា​៤៩៥​ និង​មាត្រា​ ៥០២​នៃ​ក្រម​ព្រហ្មទណ្ឌ ពាក់ព័ន្ធ​នឹង​ករណី​សរសេរ​សារ​បង្ហោះ​នៅ​តាម​បណ្ដាញ​សង្គម​ហ្វេសប៊ុក។ សារ​ដែល​លោក គង់ ម៉ាស់ បង្ហោះ​នោះ រួម​មាន យុទ្ធនា​ការ​ម្រាម​ដៃ​ស្អាត​កាល​ពី​មុន​បោះ​ឆ្នោត ការ​បង្ហោះ​រូបភាព​ជួបជុំ​សកម្មជន​តាម​មូលដ្ឋាន ​និង​សារ​រិះគន់​បែប​ស្ថាបនា​អំពី​ភាព​អសកម្ម​មួយ​ចំនួន​របស់ ​របប​លោក ​ហ៊ុន​ សែន ​រួម​មាន បញ្ហា​ព្រំដែន​កម្ពុជា-វៀតណាម ​និង​ករណី​ចុង​ក្រោយ​តម្លៃ​កសិផល​ចុះ​ថោក​ក្រោយ​ពី​សហភាព​អឺរ៉ុប​យក​ពន្ធ​អង្ក​កម្ពុជា​ជា​ដើម។ លោក ​អាច​ប្រឈម​ជាប់​ពន្ធនាគារ​ពី ៦ខែទៅ ២ឆ្នាំ និង​អាច ពិន័យ​ជា​ប្រាក់​ជាង ៤លាន​រៀល។

អ្នកច្បាប់​និង​មន្ត្រី​សិទ្ធិ​មនុស្ស ​យល់ថា ​ការ​បង្ហោះ​សារ​ផ្សេងៗ ​របស់​លោក គង់ ម៉ាស់ គឺ​គ្រាន់​តែ​ជា​ការ​ប្រើ​ប្រាស់​​សិទ្ធិ​បញ្ចេញ​មតិ​ដែល​ធានា​ដោយ​រដ្ឋ​ធម្មនុញ្ញ​និង​កតិកា​សញ្ញា​ស្ដីពី​សិទ្ធិ​ពលរដ្ឋ​ និង​សិទ្ធិ​នយោបាយ​ ហើយ​កា​រិះគន់​នោះ ​គឺជា​ការរិះគន់​បែប​ស្ថាបនា គ្មាន​ន័យ​ប្រមាថ​រដ្ឋាភិបាល​ឡើយ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ លីកាដូ លោក​អំ​ សំអាត​ មានប្រសាសន៍ថា ការ​ឃុំឃាំង​ក្នុង​គុក​រយៈពេល​យូរ​ ឬ​ហួស​ពេល​នៃ​ច្បាប់​កំណត់ ហើយ​មិន​មាន​ការ​កាត់​ទោស គឺ​ប៉ះ​ពាល់​ដល់​សិទ្ធិ​ជន​ជាប់​ចោទ​ និង​រំលោភ​ច្បាប់​ជាតិ ព្រម​ទាំង​សន្ធិសញ្ញា​អន្តរជាតិ​ស្ដីពី​សិទ្ធិ​មនុស្ស។ លោក​យល់​ ថា ​ករណី​សកម្មជន​បក្ស​ប្រឆាំង​នេះ​ តុលាការ​គួរតែ​ពន្លឿន​នីតិវិធី​ជំនុំជម្រះ​ឲ្យបាន​ឆាប់ ព្រោះ​វា​ជា​បទល្មើស​មជ្ឈិម៖ «អ៊ីចឹង​បទល្មើស​មជ្ឈិម​នៅ​ក្នុង​ផ្លូវច្បាប់​យើង​ឃើញ​ហើយ​ថា​ គេ​អាច​ឃុំខ្លួន​ពី ៤​ខែ ហើយ​អាច​ទៅ​ ៦ខែ​ហើយ​បើសិនជា​រក​ភស្តុតាង​មិន​ឃើញ​ទេ គឺ​ត្រូវ​ដោះ​លែង​ ដោយ​ស្វ័យប្រវត្តិ​ ហើយ​បើ​សិន​ជា​ការ​ស៊ើបអង្កេត​ចប់​បញ្ជូន​ទៅ​ជំនុំ​ជម្រះ​នោះ​គួរតែ​ពន្លឿន​ជំនុំ​ជម្រះ​ឲ្យ​បាន​ឆាប់»

មាត្រា២០៩ ក្រម​នីតិវិធី​ព្រហ្មទណ្ឌ ចែង​ថា ​ថិរវេលា​នៃ​ការ​ឃុំ​ខ្លួន​បណ្ដោះអាសន្ន ចំពោះ​នីតិជន​ដែល​ត្រូវ​ចោទប្រកាន់​ពី​បទ​មជ្ឈិម មិន​អាច​លើស​ពី​៤​ខែ​បាន​ទេ។ ប៉ុន្តែ​នៅ​ពេល​ផុត​ថិរវេលា​នេះ ចៅក្រម​ស៊ើបសួរ​អាច​ពន្យារ​ពេល ការ​ឃុំ​ខ្លួន​បណ្ដោះអាសន្ន បាន​តែ​ម្ដង​គត់ មិន​ឲ្យ​លើស​ពី​២​ខែ ដោយ​ដីកា​មាន​សំអាង​ហេតុ​ត្រឹមត្រូវ និង​ច្បាស់លាស់។ ថិរវេលា​នៃ​ការ​ឃុំ​ខ្លួន​ខាង​លើ​នេះ​មិន​ត្រូវ​លើស​ពី​ពាក់ កណ្ដាល​នៃ​ទោស​អប្បបរមា​ដែល​ច្បាប់​បាន​កំណត់​នោះ​ឡើយ តែ​បើ​កាលណា​ឃុំ​ខ្លួន​លើស គឺ​ជា​ការ​ឃុំខ្លួន​ខុស​ច្បាប់។

លោក គង់ ម៉ាស់ ក៏​ធ្លាប់​ដាក់​បណ្ដឹង​ស្នើសុំ​នៅ​ក្រៅ​ឃុំ​បណ្ដោះអាសន្ន​ដែរ ប៉ុន្តែ​ត្រូវ​បាន​តុលាការ​ទាំង​ បី​ថ្នាក់​បដិសេធ​សំណើ​របស់​លោក។

អង្គការ​សង្គម​ស៊ីវិល​ជាតិ​ និង​អន្តរជាតិ​ ធ្លាប់​បាន​ចេញ​សេចក្ដី​ថ្លែង​ការណ៍ ​ទាមទារ​ឲ្យ​របប​ក្រុង​ភ្នំពេញ​ដោះ​លែង​ លោក​គង់ ​ម៉ាស់​ ជាបន្ទាន់​ដោយ​ឥត​លក្ខខណ្ឌ។ ពួកគេ​លើក​ឡើង​ថា​ វា​គឺ​ជា​រឿង ឈឺចាប់ និង​ស្អប់​ខ្ពើម​បំផុត ដែល​ដឹង​ថា មនុស្ស​ម្នាក់​អាច​ប្រឈម​មុខ​ជាប់​ពន្ធនាគារ​ជា​ច្រើន​ឆ្នាំ ដោយ​គ្មាន​កំហុស​អ្វី​សោះ​គ្រាន់​តែ​បង្ហោះ​សារ​នៅ​លើ​បណ្ដាញ​សង្គម​ដោយ​សន្តិវិធី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។