តំណាងរាស្ត្រអូស្ត្រាលីគ្រោងស្នើរដ្ឋាភិបាលខ្លួនជំរុញទៅរបបភ្នំពេញស៊ើបអង្កេតករណីបណ្ឌិត កែម ឡី
2019.07.21
សមាជិកសភាសហព័ន្ធអូស្ត្រាលីមកពីគណបក្សពលករលោក ជូលៀន ហ៊ីល (Julian Hill) (រូបឆ្វេង) ថ្លៃងក្នុងពេលលោកចូលរួមប្រារព្ធពិធីបុណ្យរម្លឹកខួប ៣ឆ្នាំបណ្ឌិត កែម ឡី នៅក្រុងម៉ែលប៊ន (Melbourne) រដ្ឋវ៉ិកតូរីយ៉ា ប្រទេសអូស្ត្រាលី នៅថ្ងៃទី២១ ខែកក្កដា ឆ្នាំ២០១៩។
រូបពីលោក តាក់ ម៉េងហ៊ាង
សមាជិកសភាអូស្ត្រាលីមកពីគណបក្សពលករលោក ជូលៀន ហ៊ីល (Julian Hill) អះអាងថា លោកនឹងទាមទារជាផ្លូវការ ទៅរដ្ឋមន្ត្រីការបរទេសអូស្ត្រាលីឱ្យជំរុញទៅរបបក្រុងភ្នំពេញ ឱ្យស៊ើបអង្កេតពេញលេញ និងយុត្តិធម៌លើករណីឃាតកម្មបណ្ឌិត កែម ឡី។ ប្រតិកម្មរបស់សមាជិកសភាអូស្ត្រាលីបែបនេះ បន្ទាប់ពីលោក បណ្ឌិត កែម ត្រូវឃាតកសម្លាប់អស់រយៈពេលបីឆ្នាំទៅហើយ ប៉ុន្តែ សមត្ថកិច្ចនៃរបបក្រុងភ្នំពេញហាក់មានការលាក់បាំងការពិតនៃឃាតកម្មនេះ។
តំណាងរាស្ត្រអូស្ត្រាលីបានកោតសរសើរបណ្ឌិត កែម ឡី ថា ជាអ្នកស្រាវជ្រាវមានសមត្ថភាពខ្ពស់ និងមានឫកពារគួរឱ្យគោរព ហើយតំណាងរាស្ត្រទាំងនោះបានទាមទារឱ្យមានការស៊ើបអង្កេតករណីឃាតកម្មលើបណ្ឌិត កែម ឡី នេះ ឱ្យមានប្រសិទ្ធភាព និងឯករាជ្យ។
សមាជិកសភា នៃរដ្ឋវ៉ិកតូរីយ៉ា (Victoria) លោក ជូលៀន ហ៊ីល ចោទប្រកាន់ថា សមត្ថកិច្ច ឬនិងព្រះរាជអាជ្ញារបស់កម្ពុជា មិនបានស៊ើបអង្កេតករណីឃាតកម្មនេះឱ្យបានពេញលេញនោះទេ។ លោកក៏ចោទសួរទៅលោក ហ៊ុន សែន ថា តើរបបនេះមានការបារម្ភអ្វីចំពោះស៊ើបអង្កេតដោយឯករាជ្យចំពោះឃាតកម្ម បណ្ឌិត កែម ឡី នេះ?៖ «តើរបបរបស់គាត់(លោក ហ៊ុន សែន) មានការខ្វល់អ្វីខ្លះនៅពេលដែលការពិតត្រូវបានបង្ហាញនោះ ដូច្នេះក្នុងពេលប៉ុន្មានអាទិត្យខាងមុខនេះខ្ញុំនឹងទាមទារជាផ្លូវការទៅដល់រដ្ឋមន្ត្រីក្រសួងការបរទេសអូស្ត្រាលីដើម្បីទាមទារដល់រដ្ឋាភិបាលនៃប្រទេសកម្ពុជាធ្វើការបើកការស៊ើបអង្កេតពេញលេញយុត្តិធម៌ជូនដល់បណ្ឌិត កែម ឡី»។
ចំណែក សមាជិកសភាអូស្ត្រាលីមួយរូបទៀត អ្នកស្រី ក្លៀ អូនៀល (Clare O'Neil ) បានចាត់ទុក ឃាតកម្មលើបណ្ឌិត កែម ឡី ថាជាអំពើឃោរឃៅ ហើយអ្នកស្រីមិនអាចទប់កំហឹងបានឡើយចំពោះទង្វើនេះ។ អ្នកស្រីរំលឹកថា អ្នកស្រីធ្លាប់បានសំណេះសំណាល និងជជែកគ្នាអំពីបញ្ហាកម្ពុជាជាមួយបណ្ឌិត កែម ឡី មុនឃាតកបាញ់សម្លាប់រូបលោក។ អ្នកស្រីបញ្ជាក់ថា អ្នកស្រីមកចូលរួមពិធីបុណ្យនៅពេលនេះ ដើម្បីបង្ហាញការដឹងគុណ និងគោរពវិញ្ញាណក្ខន្ធ លោកបណ្ឌិត កែម ឡី៖ «ខ្ញុំមកថ្ងៃនេះដើម្បីរម្លឹកដឹងគុណ និងគោរពវិញ្ញាណក្ខន្ធបណ្ឌិត កែម ឡី ដែលលោកបានបាត់បង់ជីវិតទៅហើយលោកបានបន្សល់ទុកអនុស្សាវរីយ៍ជាច្រើន»។
សមាជិកសភាអូស្ត្រាលីទាំងពីររូបបញ្ចេញប្រតិកម្មបែបនេះ នៅក្នុងពេលចូលរួមប្រារព្ធពិធីបុណ្យរម្លឹកខួប ៣ឆ្នាំបណ្ឌិត កែម ឡី នៅក្រុងម៉ែលប៊ន (Melbourne) រដ្ឋវ៉ិកតូរីយ៉ា ប្រទេសអូស្ត្រាលី នៅថ្ងៃទី២១ ខែកក្កដា។
កម្មវិធីបុណ្យនេះរៀបចំឡើងដោយសហព័ន្ធខ្មែរ និងសមាគមខ្មែរ នៅក្រុងម៉ែលប៊ន។
អតីតអភិបាលក្រុងស្ព្រីងវែល (Springvale) និងជាអ្នករៀបចំពិធីបុណ្យម្នាក់ គឺលោក ជា យូហន ឱ្យអាស៊ីសេរីដឹងថា ពលរដ្ឋខ្មែរអូស្ត្រាលីជាអ្នកគោរពស្រលាញ់លោកបណ្ឌិត កែម ឡី ប្រមាណ៧០០នាក់ និងសមាជិកសភាសហព័ន្ធ៣ រូបនៃរដ្ឋវ៉ិកតូរីយ៉ា បានចូលរួមក្នុងពិធីនេះ។
ពិធីបុណ្យនេះចាប់ផ្ដើមពីម៉ោង ៩ព្រឹកដល់ម៉ោង១រសៀល ម៉ោងនៅប្រទេសអូស្ត្រាលី ក្នុងវត្តពុទ្ធរង្សី ហៅវត្តធំ ព្រះសង្ឃចំនួន ១៥អង្គ ដើម្បីធ្វើពិធីសាសនាដើម្បីឧទ្ទិស ដល់វិញ្ញាណក្ខន្ធលោក បណ្ឌិត កែម ឡី។
នៅពេលពិធីសាសនាចប់រួចរាល់ ជាពេលថ្លែងសាររបស់សមាជិកសភាអូស្ត្រាលី និងភរិយាលោក បណ្ឌិត កែម ឡី អ្នកស្រី ប៊ូ រចនា។ អ្នកស្រី ប៊ូ រចនា បានថ្លែងថា អ្នកស្រីនឹងប្រែក្តីទុក្ខសោកនៃបាត់បង់ស្វាមី ទៅជាការជួយជ្រោមជ្រែងគោលបំណងស្វាមីអ្នកស្រីឱ្យបានដល់គោលដៅវិញ៖ «នាងខ្ញុំប្រែក្លាយទុក្ខសោកនេះទៅជាការព្យាយាមធ្វើបេសកកម្មគាត់(លោក កែម ឡី) ដែលជាការសង្គ្រោះខ្មែរយើងដូចដែលអ្វីគាត់បានផ្ដាំជូតទឹកភ្នែករួចបន្តដំណើរទៅមុខទៀត បណ្តាំនេះគឺជាការឆ្លុះបញ្ចាំងបំណងរបស់គាត់ឱ្យមានការផ្លាស់ប្ដូរក្នុងរបបតិរច្ឆាន»
អ្នកស្រី ប៊ូ រចនា បានឱ្យដឹងថា ក្នុងចំណោមថវិកាជាង៧០០០ដុល្លារ (ប្រាំពីពាន់)ដែលទទួលពីពិធីបុណ្យនៅពេលនេះ អ្នកស្រី និងគណៈកម្មការរៀបចំពិធីបុណ្យ នឹងចាត់ចែងមួយផ្នែកផ្តល់ជូនសកម្មជនដែលបន្តកិច្ចការងារលោកបណ្ឌិត កែម ឡី នៅប្រទេសកម្ពុជា។
អ្នកស្រាវជ្រាវខាងការអភិវឌ្ឍសង្គម និងជាអ្នកវិភាគនយោបាយដ៏មានប្រជាប្រិយភាព បណ្ឌិត កែម ឡី ត្រូវឃាតកបាញ់សម្លាប់នៅក្នុងហាងលក់ទំនិញ ស្តារ ម៉ាត (Star Mart) នៃស្ថានីយលក់ប្រេងឥន្ធនៈកាល់តិច (Caltex) ក្បែរស្តុបបូកគោ រាជធានីភ្នំពេញ កាលពីព្រឹកថ្ងៃទី១០ ខែកក្កដា ឆ្នាំ២០១៦ កន្លងទៅ។
មជ្ឍដ្ឋានជាតិ អន្តរជាតិ និងអ្នកឃ្លាំមើលសង្គម សង្កេតឃើញថា សមត្ថកិច្ចកម្ពុជា ហាក់គ្មានឆន្ទៈស៊ើបអង្កេតការពិតនៃឃាតកម្មនេះទេ ពីព្រោះគិតមកដល់ពេលនេះ តុលាការបានចោទប្រកាន់មនុស្សតែម្នាក់គត់ គឺ អឿត អាង ដែលហៅខ្លួនឯងថា ជួប សម្លាប់។ តុលាការបានកាត់ទោសជននេះ បន្ទាប់ពីរូបគេបានសារភាពថា ខ្លួនជាអ្នកបាញ់សម្លាប់លោក កែម ឡី។ ក្រៅពីនេះ តុលាការនៅមិនទាន់រកឃើញអ្នកពាក់ព័ន្ធណាផ្សេងទៀតយកមកសួរនាំបន្ថែមនោះទេ។ សាធារណជន និងគ្រួសារលោក កែម ឡី លើកឡើងដូចៗគ្នាថា ពួកមិនជឿលើចម្លើយសារភាពរបស់ ជួប សម្លាប់ នេះទេ និងចាត់ទុកបុគ្គលរូបនេះថា ជាឃាតកសិប្បនិម្មិតប៉ុណ្ណោះ។
អង្គការសិទ្ធិមនុស្សចំនួន ២៤ស្ថាប័ន បានចេញសេចក្ដីថ្លែងការណ៍រួមគ្នាមួយកាលពីនៅថ្ងៃទី១០ ខែកក្កដា ឆ្នាំ២០១៩ ដោយអំពាវនាវឱ្យមានការស៊ើបអង្កេតឯករាជ្យមួយក្នុងការធ្វើឃាតលោក កែម ឡីនេះ។ ពួកគេសង្កេតឃើញថា រយៈពេល ៣ឆ្នាំហើយនៅតែមិនទាន់មានការស៊ើបអង្កេតប្រកបដោយប្រសិទ្ធភាពចំពោះឃាតកម្មនេះទេ។
កាលនៅមានជីវិតលោក កែម ឡី បានធ្វើយុទ្ធនាការ ១០០រាត្រីនៃគ្រួសារខ្មែរ។ ក្នុងយុទ្ធនាការនេះ លោកបានចុះស្នាក់នៅជាមួយប្រជាពលរដ្ឋនៅស្រុកស្រែចម្ការដោយផ្ទាល់ ដោយពេលខ្លះលោកបានស្នាក់នៅផ្ទះប្រជាពលរដ្ឋក្នុងតំបន់ដាច់ស្រយាល និងភូមិជនជាតិដើមភាគតិច ដូចជានៅខេត្តមណ្ឌលគិរី រតនគិរី ដើម្បីស្វែងយល់អំពីស្ថានភាពរស់នៅរបស់ប្រជាពលរដ្ឋ។ ក៏ប៉ុន្តែ លោកទើបតែបំពេញបានត្រឹម១៥រាត្រីប៉ុណ្ណោះ ក៏ត្រូវឃាតកបាញ់សម្លាប់។
ទោះជាបែបនេះក្តី សព្វថ្ងៃមានយុវជនមួយចំនួនកំពុងធ្វើកិច្ចការនេះបន្តពីលោក កែម ឡី ដោយអនុវត្តតាមពាក្យស្លោកមួយឃ្លាដែលលោកធ្លាប់បាននិយាយ គឺ "ជូតទឹកភ្នែករួចហើយបន្តដំណើរទៅមុខ"៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
អត្ថបទពេញនិយម
នយោបាយ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- បទសម្ភាសន៍អ្នកស្រី ធិត គឹមហ៊ុន អំពីការធ្វើសមាជរបស់ពលរដ្ឋខ្មែរ-អាម៉េរិកាំងរឿងកោះគជ់
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ