អ្នកជំនាញថា សមាគមអ្នកសារព័ត៌មានកម្ពុជា-ចិន អាចផ្សាយតែពីរឿងវិជ្ជមានរបស់ប្រទេសទាំងពីរ
2019.05.07
សមាគមអ្នកសារព័ត៌មានកម្ពុជា-ចិន (CCJA) ត្រូវបានសម្ពោធដំណើរការជាផ្លូវការនៅកម្ពុជាក្នុងគោលបំណងជំរុញការផ្លាស់ប្ដូរប្រព័ន្ធផ្សព្វផ្សាយ និងទំនាក់ទំនងរវាងកម្ពុជានិងចិន។ អ្នកជំនាញយល់ថា ការបង្កើតសមាគមនេះអាចផ្សព្វផ្សាយតែពីរឿងវិជ្ជមានរបស់ប្រទេសទាំងពីរប៉ុន្តែប្រហែលជាមិនផ្សព្វផ្សាយអំពីរឿងអវិជ្ជមាននានា ដូចជា ផលប៉ះពាល់នៃការវិនិយោគរបស់ចិន និងបញ្ហា អសន្តិសុខបង្កឡើងដោយជនជាតិចិននោះទេ។
សហប្រធានសមាគមអ្នកសារព័ត៌មានកម្ពុជា-ចិនលោក សយ សុភាព ប្រាប់អាស៊ីសេរីថាសមាគម នេះ បង្កើតឡើងដោយក្រុមអ្នកកាសែតជើងចាស់កម្ពុជា និងចិន ក្នុងគោលបំណងជំរុញការផ្សព្វផ្សាយឱ្យកាន់តែទូលំទូលាយថែមទៀតដើម្បីលើកកម្ពស់មិត្តភាព និងកិច្ចសហប្រតិបត្តិការរវាងប្រទេសទាំងពីរ។ លោក បញ្ជាក់ថាសមាគមអ្នកសារព័ត៌មានកម្ពុជា-ចិននេះក៏នឹងចូលរួមបណ្ដុះបណ្ដាលដល់អ្នកសារព័ត៌មានកម្ពុជាដើម្បីបង្កើនសមត្ថភាពធ្វើសេចក្ដីរាយការណ៍ឱ្យបានត្រឹមត្រូវពាក់ព័ន្ធនឹងផលប្រយោជន៍របស់ប្រទេសទាំងពីរផងដែរ៖ «ពិសេសក្នុងពេលបច្ចុប្បន្ននេះយើងកំពុងតែមានទំនាក់ទំនងល្អតាំងពីមេដឹកនាំកំពូលរហូតដល់ក្រោមហើយផ្ដោតការយកចិត្តទុកដាក់ទៅលើការផ្សព្វផ្សាយស្អីដែលជាផលប្រយោជន៍ប្រទេសទាំងពីររាប់តាំងពីនយោបាយរហូតដល់សង្គមសេដ្ឋកិច្ចវប្បធម៌។ល។ រួមទាំងវិនិយោគជាអីជាដើម។ទី២ ទៀត គឺយើងធ្វើម៉េចអ្នកសារព័ត៌មានរវាងប្រទេសទាំងពីរឱ្យកាន់តែស្គាល់ និងយល់ចិត្តគ្នាក្នុងការផ្លាស់ប្ដូរព័ត៌មានគ្នាទៅវិញទៅមក»។
លោកសយ សុភាព ដែលមានតួនាទីជាអគ្គនាយកមជ្ឈមណ្ឌលដើមអំពិលនិងជាពិធីព័ត៌មាននៅទូរទស្សន៍បាយ័នរបស់កូនស្រីលោកនាយករដ្ឋមន្ត្រី ហ៊ុន សែន ផងនោះ លើកឡើងថា សមាគមអ្នកសារព័ត៌មានកម្ពុជា-ចិននេះមិនមានជំនួយឬពឹងផ្អែកលើជំនួយរបស់ចិន ឬភាគីណានោះទេ។
ការបង្កើតសមាគមអ្នកសារព័ត៌មានកម្ពុជា-ចិនទទួលបានការគាំទ្រយ៉ាងខ្លាំងពីរបបក្រុងភ្នំពេញនិង រដ្ឋាភិបាលចិន ដោយពួកគេលើកឡើងថា សមាគមនេះ នឹងដើរតួនាទីសំខាន់ដើម្បីផ្សព្វផ្សាយព័ត៌មានទាំងឡាយដែលវិជ្ជមានអំពីទំនាក់ទំនងកម្ពុជា-ចិនទៅកាន់ប្រជាពលរដ្ឋនៃប្រទេសទាំងពីរ។
ទីប្រឹក្សានយោបាយរបស់ស្ថានទួតចិនប្រចាំកម្ពុជាលោកស្រី ចូវ វិនស៊ីង (ZouWenxing) មានប្រសាសន៍ក្នុងពិធីសម្ពោធសមាគមអ្នកសារព័ត៌មានកម្ពុជា-ចិនកាលពីថ្ងៃទី៦ ខែឧសភាថា សមាគមនេះ នឹងដើរតួយ៉ាងសំខាន់ក្នុងការផ្សព្វផ្សាយព័ត៌មានវិជ្ជមានអំពីប្រទេសកម្ពុជា-ចិនហើយនឹងចូលរួមក្នុងការប្រយុទ្ធប្រឆាំងនឹងព័ត៌មានក្លែងក្លាយដែលធ្វើឱ្យមានផលប៉ះពាល់អវិជ្ជមានលើទំនាក់ទំនងរវាងប្រទេសទាំងពីរ។
នាយកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ណុបវី មានប្រសាសន៍ ថា វាជាសិទ្ធិរបស់សមាគមនេះក្នុងការគ្រាន់តែដើម្បីផ្សព្វផ្សាយព័ត៌មានសេដ្ឋកិច្ចពាណិជ្ជកម្ម និងទំនាក់ទំនងល្អរវាងប្រទេស កម្ពុជា-ចិន។ ប៉ុន្តែលោកយល់ថា សមាគមនេះគួរតែជួយធ្វើឱ្យអ្នកសារព័ត៌មានធ្វើការដោយឯករាជ្យមានសេរីភាពក្នុងការសរសេរមានវិជ្ជាជីវៈត្រឹមត្រូវសរសេរពីអភិបាលកិច្ចល្អប្រឆាំងអំពើពុករលួយដើម្បីជួយកសាងសង្គមកម្ពុជាឱ្យល្អប្រសើរ៖ «វាលុះត្រាតែមានស្ថាប័នមួយដែលឯករាជ្យ ហើយនឹងដាច់ស្រឡះដើម្បីធ្វើកិច្ចការមួយបម្រើឱ្យផលប្រយោជន៍វិជ្ជាជីវៈអ្នកសារព័ត៌មាន ហើយការពង្រឹងឬក៏ការបម្រើផលប្រយោជន៍ការពារដល់អ្នកសារព័ត៌មានក៏ជួយសម្រួលដល់អ្នកសារព័ត៌មានដើម្បីឱ្យពួកគេ អាចធ្វើការងាររបស់ពួកគេដោយសេរីក្នុងន័យដើរតួនាទីជាអ្នកជួយឃ្លាំមើលជាអ្នកតាមដាន ការងារសង្គម»។
លោកណុប វី លើកឡើងដែរថាដើម្បីផ្ដល់ព័ត៌មានពិត និងមានប្រយោជន៍ដល់ប្រជាពលរដ្ឋ និង រដ្ឋាភិបាលនៃប្រទេសទាំងពីរនោះសមាគមនេះ គួរតែចូលរួមលើកកម្ពស់សេរីភាពសារព័ត៌មាន និងអាចឱ្យអ្នកសារព័ត៌មានសរសេរព័ត៌មានទាំងព័ត៌មានវិជ្ជមាននិងទាំងអវិជ្ជមាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។