លោក ហ៊ុន សែន ស្នើសុំប្រទេសមហាអំណាចផ្ដល់ផែនទីខ្នាត ១/១០០.០០០
2015.07.15
លោកនាយករដ្ឋមន្ត្រី ហ៊ុន សែន ថ្លែងក្នុងសន្និសីទពាណិជ្ជកម្ម នារាជធានីភ្នំពេញ កាលពីព្រឹកថ្ងៃទី៦ តុលា ២០១៤។
ប្រមុខរដ្ឋាភិបាលកម្ពុជា លោក ហ៊ុន សែន ស្នើឲ្យប្រទេសមហាអំណាច ជួយការពារបូរណភាពទឹកដីកម្ពុជា តាមរយៈការផ្ដល់ផែនទីខ្នាត ១/១០០.០០០ ដែលប្រទេសទាំងនោះបានរក្សាទុកតាំងពីឆ្នាំ១៩៦៤ មក។
នៅក្នុងលិខិតចំនួនបីដាច់ដោយឡែកពីគ្នារបស់លោកនាយករដ្ឋមន្ត្រី ហ៊ុន សែន ចុះថ្ងៃទី១៥ ខែកក្កដា ផ្ញើទៅ លោក បារ៉ាក់ អូបាម៉ា (Barack Obama) ប្រធានាធិបតីសហរដ្ឋអាមេរិក លោក ហ្រ្វង់ស្វ័រ ហូឡង់ដ៏ (Francois Hollande) ប្រធានាធិបតីនៃសាធារណរដ្ឋបារាំង និងលោក ដេវីដ ខាម៉ឺរូន (David Cameron) នាយករដ្ឋមន្ត្រីនៃចក្រភពអង់គ្លេស។ តាមរយៈលិខិតទាំងនោះ លោកនាយករដ្ឋមន្ត្រី បានស្នើសុំបណ្ដាមេដឹកនាំនៃប្រទេសមហាអំណាចទាំងនោះ ឲ្យកម្ពុជា ខ្ចីផែនទីខ្នាត ១/១០០.០០០ ដើម្បីបញ្ជាក់ពីភាពត្រឹមត្រូវរបស់រដ្ឋាភិបាលក្នុងការរៀបចំ និងអនុវត្តការងារក្នុងការកំណត់ និងបោះបង្គោលព្រំដែនរវាងព្រះរាជាណាចក្រកម្ពុជា និងប្រទេសជិតខាង។
ស្របគ្នានេះ លោកនាយករដ្ឋមន្ត្រីបានបញ្ជាក់ថា ផែនទីខ្នាត ១/១០០.០០០ នោះ មានសារសំខាន់ក្នុងការកសាងសន្តិភាព មិត្តភាពជាមួយប្រទេសជិតខាងកម្ពុជា និងបញ្ចប់ការញុះញង់បង្កើតស្មារតីជាតិនិយមជ្រុល នាំឲ្យមានការភាន់ច្រឡំ ដែលអាចប្រែក្លាយជាគ្រោះមហន្តរាយដល់ជាតិកម្ពុជា។
ទេសរដ្ឋមន្ត្រីទទួលបន្ទុកកិច្ចការព្រំដែន លោក វ៉ា គឹមហុង មានប្រសាសន៍ថា តាមគម្រោង ផែនទីដែលទទួលបានពីប្រទេសមហាអំណាចទាំងនេះ នឹងត្រូវយកមកប្រើប្រាស់ដើម្បីផ្ទៀងផ្ទាត់បង្ហាញចំពោះការចោទប្រកាន់ថា រដ្ឋាភិបាលមិនបានប្រើផែនទីពិតប្រាកដ៖ «យកមកនឹងផ្ទៀងផ្ទាត់ និងស្នើសុំជំនួយអ្នកជំនាញពីបរទេសទាំងនោះផង ដើម្បីនឹងផ្ទៀងផ្ទាត់ឲ្យត្រឹមត្រូវ បើតែខាងជំនាញខ្មែរយើងគេមិនជឿទៀត។ ខាងគណបក្សសង្គ្រោះ ចេះតែរិះគន់អ៊ីចឹង គាត់ថាក្លែងក្លាយ យើងបង្ហាញផែនទីដែលប្រើត្រឹមត្រូវផ្លូវការ គាត់ថាបោះពុម្ពពីនេះពីនោះ។ ចឹងបានយើងទាមទារឲ្យច្បាស់ ហើយសុំជំនួយបច្ចេកទេសមកផង នេះឲ្យច្បាស់ពីជំហររបស់រដ្ឋាភិបាល»។
ក្នុងលិខិតដដែល បានលើកឡើងពីមូលហេតុដែលប្រមុខរដ្ឋាភិបាល សម្រេចស្នើសុំខ្ចី ឬចម្លងផែនទីពីប្រទេសមហាអំណាចទាំងនេះ។ ក្នុងលិខិតផ្ញើទៅ លោក បារ៉ាក់ អូបាម៉ា លោក ហ៊ុន សែន បញ្ជាក់ថា កាលពីឆ្នាំ១៩៦៤ រដ្ឋាភិបាលកម្ពុជា ធ្លាប់បញ្ជូនផែនទីព្រំដែនកម្ពុជា ជាមួយប្រទេសជិតខាង ដោយរួមទាំងប្រទេសវៀតណាម ផង ផែនទីនោះមានខ្នាត ១/១០០.០០០។
កាលពីឆ្នាំ២០០៣ និង២០០៤ មន្ត្រីរដ្ឋាភិបាលកម្ពុជា ធ្លាប់បានថតចម្លងផែនទីទាំងនោះពីបណ្ណាល័យសភាសហរដ្ឋអាមេរិក ដែរ។ ចំពោះប្រទេសបារាំង វិញ លោកនាយករដ្ឋមន្ត្រីបញ្ជាក់ថា បារាំង គឺជាប្រទេសផលិតផែនទីបោន (Bonne) ខ្នាត ១/១០០.០០០ បោះពុម្ពដោយក្រុមភូមិសាស្ត្រឥណ្ឌូចិន ស្ដីពីព្រំដែនគោករវាងកម្ពុជា និងប្រទេសជិតខាង ជាពិសេសជាមួយប្រទេសវៀតណាម។ ចំណែកហេតុផលដែលដាក់សំណើទៅនាយករដ្ឋមន្ត្រីនៃចក្រភពអង់គ្លេស ក្រោមហេតុផលថា ព្រះករុណាព្រះបរមរតនកោដ្ឋសម្ដេចព្រះសីហនុ ធ្លាប់បានឆ្លើយឆ្លងនឹងរដ្ឋាភិបាលនៃចក្រភពអង់គ្លេស ដែលបានទទួលស្គាល់អព្យាក្រឹតភាពរបស់រដ្ឋាភិបាលកម្ពុជា កាលពីឆ្នាំ១៩៦៤ នោះដែរ។
នេះជាជំហានថ្មីមួយទៀតរបស់រដ្ឋាភិបាលកម្ពុជា ចំពោះបញ្ហាព្រំដែនដ៏ចម្រូងចម្រាស បន្ទាប់ពីបានដាក់សំណើទៅសុំខ្ចីផែនទីពីអង្គការសហប្រជាជាតិ កាលពីថ្ងៃទី៦ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- ជនភៀសខ្លួនខ្មែរ ៦នាក់ ដែលបញ្ជូនពីថៃ ត្រូវបានឃុំខ្លួននៅពន្ធនាគារផ្សេងគ្នា អំពីបទក្បត់ជាតិ
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
អត្ថបទពេញនិយម
នយោបាយ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
- កម្ពុជា និងចិនប្ដេជ្ញាបន្តរឹតចំណងមិត្តភាពដើម្បីកសាងជោគវាសនាប្រទេសជាតិរួមគ្នា
- ពលរដ្ឋ និងឥស្សរជននយោបាយថៃទាមទារឱ្យរដ្ឋាភិបាលរបស់ខ្លួនលុបចោល «MOU44» លើតំបន់ត្រួតស៊ីគ្នាជាមួយកម្ពុជា
- ពលរដ្ឋមួយចំនួនចាប់ផ្តើមធ្វើយុទ្ធនាការទាមទារឲ្យរដ្ឋាភិបាលប្តឹងរឿងកោះគជ់ទៅតុលាការអន្តរជាតិ