មន្ត្រីសង្គមស៊ីវិលស្នើឱ្យរដ្ឋសភា អនុម័តថវិកាជំនួយបានមកពីសប្បុរសជន មុននឹងអនុញ្ញាតឱ្យរដ្ឋាភិបាលចំណាយដោះស្រាយវិបត្តិជំងឺកូវីដ-១៩ (Covid-19)។ លោកនាយករដ្ឋមន្ត្រី ហ៊ុន សែន បានកៀរគរដល់មន្ត្រីរដ្ឋាភិបាល និងទីប្រឹក្សារដ្ឋាភិបាលទាំងអស់ត្រូវតែកាត់ប្រាក់ខែរបស់ខ្លួនដើម្បីដាក់ចូលគណៈកម្មការជាតិប្រយុទ្ធប្រឆាំងនឹងជំងឺកូវីដ-១៩។
លោក ហ៊ុន សែន បញ្ជាក់នៅក្នុងសារសំឡេងបែកធ្លាយមួយថា រហូតមកដល់ពេលនេះមានថវិកាចំនួនជាង១១លានដុល្លារ បានមកពីជំនួយសប្បុរសជន ត្រូវបានរដ្ឋាភិបាលបញ្ចូលទៅគណៈកម្មការជាតិប្រយុទ្ធប្រឆាំងនិងជំងឺកូវីដ-១៩ហើយ។
លោក ហ៊ុន សែន បានបញ្ជាក់ថា សម្រាប់ខ្លួនលោកបានផ្តល់ប្រាក់ខែទាំងអស់ចំនួន១០លានរៀលគឺស្មើនឹងជាង២៥០០ដុល្លារដើម្បីចូលរួមប្រយុទ្ធប្រឆាំងនឹងជំងឺកូវីដ-១៩ នៅកម្ពុជា។
លោក ហ៊ុន សែន បានបញ្ជាឱ្យមន្ត្រីរដ្ឋាភិបាល និងទីប្រឹក្សារដ្ឋាភិបាលទាំងអស់ត្រូវតែបរិច្ចាគថវិកាដែលបានមកពីប្រាក់ខែរដ្ឋាភិបាលផ្តល់ជូនក្រសួងសុខាភិបាល តាមរយៈលោក ម៉ម ប៊ុនហេង ដើម្បីប្រើប្រាស់ថវិកានេះ ក្នុងការបង្កើនជំនឿទុកចិត្តមួយសម្រាប់ប្រជាពលរដ្ឋ និងក្រុមគ្រូពេទ្យក្នុងការព្យាបាលតាមរយៈសកម្មភាពជាក់ស្ដែងដែលរំលែកថវិកាចេញពីថវិការបស់ខ្លួនជូនទៅផ្នែកប្រឆាំងនឹងកូវីដ១៩នេះ៖ «មន្ត្រីនីមួយៗមានលទ្ធភាពមិនដូចគ្នាទេ អ៊ីចឹងមន្ត្រីខ្លះគឺគេមានលទ្ធភាពគេអាចនឹងបរិច្ចាគរាប់ខែបានទាំងស្រុងតែមន្ត្រីខ្លះទៀតអាចលទ្ធភាពថា ២០ ឬ ៣០ ឬ ៤០ ឬ ៥០ភាគរយទៅតាមលទ្ធភាពដែលខ្លួនអាចធ្វើទៅបាន»។
ក្រោយពីការប្រកាសរបស់លោក ហ៊ុន សែន មិនបានប៉ុន្មានម៉ោងផងមានមន្ត្រីរដ្ឋាភិបាលជាច្រើននាក់មានអ្នកខ្លះជាប់ឈ្មោះក្នុងបញ្ជីពុករលួយនិងរងការចោទប្រកាន់ថា បានគេចពន្ធពីប្រទេសអូស្ត្រាលីដូចជាប្រតិភូរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារគឺលោកគង់ វិបុល បានបរិច្ចាគប្រាក់ខែរបស់លោកចំនួន៦ខែជូនដល់គណៈកម្មការជាតិប្រយុទ្ធប្រឆាំងនឹងជំងឺកូវីដ-១៩។
ក្រៅពីលោក គង់ វិបុល ក៏មានមន្ត្រីជាច្រើនរូបផ្សេងទៀតបានបរិច្ចាគប្រាក់ខែ ៥០ភាគរយ ពីចំនួន ៧ខែដល់៩ខែ ខ្លះទៀត ៧ពាន់ដុល្លារ រហូតដល់១ម៉ឺនដុល្លា និងព្រះតេជព្រះគុណ ណយ ច្រឹក ក៏មាន។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការអំពាវនាវពីរដ្ឋាភិបាលក្នុងទម្រង់បែបស្ម័គ្រចិត្តនេះគ្មានអ្វីអាក្រក់ទេ នៅពេលដែលមានបញ្ហាជួបឧបសគ្គដូចជាជំងឺកូវីដ១៩។ ប៉ុន្តែលោក សន ជ័យ ចង់ឃើញវិធានការរបស់រដ្ឋាភិបាលក្នុងការប្រើប្រាស់ថវិកាជាតិគួរតែមានការអនុម័តឆ្លងកាត់ពីរដ្ឋសភាដែរ ដើម្បីឱ្យអនុម័តកញ្ចប់ថវិកាពិសេសណាមួយសម្រាប់តៀមបង្ការ ហើយនឹងជួយទៅដល់ក្រុមដែលត្រូវការជំនួយនៅក្នុងរដូវកាលនៃវិបត្តិកូវីដ១៩នេះ៖ «យើងមើលបញ្ហាកូវីដ១៩នេះទៅពេលខាងមុខគឺជាបញ្ហារបស់ជាតិ របស់ប្រជាពលរដ្ឋ អ៊ីចឹងអំណាចនីតិប្បញ្ញត្តិហ្នឹងគឺគេមានតួនាទីរបស់គេក្នុងការជួយពលរដ្ឋតាមរយៈការងាររបស់ខ្លួន។ អ៊ីចឹងប្រសិនបើរដ្ឋាភិបាលត្រូវការកញ្ចប់ថវិកាពិសេសក្នុងចំនួនទឹកប្រាក់ដ៏ច្រើន តាមនីតិវិធីគឺត្រូវតែឆ្លងកាត់ការអនុម័តពីសភា ទោះបីជាសភានោះឯកបក្សក៏ដោយ ហើយម្យ៉ាងវិញទៀតខ្ញុំគិតថា ថវិកានេះមិនមែនតិចតួចទេ គឺជាថវិកាមួយដែលមានចំនួនច្រើនដែរ»។
អ្នកវិភាគនយោបាយលោក គឹម សុខ បញ្ជាក់ថា លោក ហ៊ុន សែននិយាយថាមិនបានចាប់បង្ខំឱ្យមន្ត្រីរដ្ឋាភិបាលបង់លុយមែន ប៉ុន្តែលោកនិយាយថា ត្រូវធ្វើលិខិតផ្ទាល់ខ្លួនទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាលនេះបង្ហាញឱ្យឃើញថា ជាការចាប់បង្ខំមន្ត្រីថ្នាក់ខ្ពស់ដល់កំពូលឱ្យនាំគ្នាចេញលុយចាំបាច់ដោយខានមិនបាន ហើយចលនានេះអាចរាលដាលដល់មន្ត្រីរាជការតូចតាចទៀតផង៖ «ស្ដាប់សំឡេងបែកធ្លាយរបស់លោក ហ៊ុន សែន ស្តាប់ទៅលោកគ្រោងនឹងកាត់បន្ថយប្រាក់ខែមន្ត្រីរាជការសាធារណៈគ្រប់កម្រិតទាំងអស់។ ប៉ុន្តែគាត់មិនហ៊ានធ្វើឱ្យចំៗពីព្រោះខ្លាចប្រតិកម្មពីមន្ត្រីរាជការនៅទូទាំងប្រទេសហើយគាត់ទប់មិនបាន ម្ល៉ោះហើយលោក ហ៊ុន សែន ក៏រៀបចំបង្កើតល្បែងចលនាចាប់បង្ខំបែបបំភ្លៃថា មន្ត្រីរាជការមានទឹកចិត្តចូលរួមគឺថ្នាក់លើសិនទាំងថ្នាក់ដឹកនាំក្រសួងមន្ទីរ រដ្ឋាភិបាល រដ្ឋសភាព្រឹទ្ធសភា ទម្រាំដល់មានវិធានការសសៀរដល់មន្ត្រីរាជការថ្នាក់ក្រោមជាកងកម្លាំងប្រដាប់អាវុធ មន្ត្រីរាជការស៊ីវិល និងគ្រូបង្រៀនជាដើម»។
ការប្រកាសកៀរគរប្រមូលថវិការបស់លោកនាយករដ្ឋមន្ត្រី ហ៊ុន សែន នេះបានកើតមានឡើងក្រោយពីធនាគារពិភពលោកព្យាករណ៍ថា កំណើនសេដ្ឋកិច្ចកម្ពុជា នឹងធ្លាក់ចុះយ៉ាងគំហុក មិនធ្លាប់មានពីមុន មកពី៧%ក្នុងឆ្នាំ២០១៩ នៅត្រឹមតែ ២,៥% ក្នុងឆ្នាំ២០២០នេះ បណ្ដាលមកពីវិបត្តិ នៃការផ្ទុះរីករាលដាលជាសាកលនៃជំងឺកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។