លោកនាយករដ្ឋមន្ត្រី ហ៊ុន សែន បានប្រតិកម្មចំពោះសារនយោបាយរបស់មេដឹកនាំគណបក្សប្រឆាំង ដែលរិះគន់ពីការធ្វើកំណែទម្រង់របស់រដ្ឋាភិបាល គ្រាន់តែជាការធ្វើឲ្យល្អមើលនោះថា គណបក្សប្រឆាំងក៏មិនដែលឃើញផ្លាស់ប្ដូរអ្វីដែរ បើទោះជាខ្លួនចាញ់ឆ្នោតគ្រប់អាណត្តិមកហើយក៏ដោយ។
ប្រតិកម្មរបស់ លោក ហ៊ុន សែន នេះ បន្ទាប់ពីរដ្ឋាភិបាលសម្រេចរុះរើ និងធ្វើកំណែទម្រង់គណៈរដ្ឋមន្ត្រីភ្លាម ថ្នាក់ដឹកនាំគណបក្សប្រឆាំងបានរិះគន់ថា ការសម្រេចដូចនេះរបស់រដ្ឋាភិបាល គឺគ្រាន់តែជារូបភាពឲ្យល្អមើលប៉ុណ្ណោះ និងថាជាកំណែទម្រង់មិនស៊ីជម្រៅថែមទៀតផង។
អ្នកវិភាគនយោបាយយល់ឃើញថា ការដែលមេដឹកនាំកំពូលៗរបស់ប្រទេស ព្យាយាមប៉ែងជើងគ្នាដោយពុំយកកម្មវិធីនយោបាយជាតិជាធំ សម្រាប់ដំណោះស្រាយនយោបាយនោះ បញ្ហាកាន់តែបន្តចាក់ស្រែះបន្ថែមទៀត ហើយពុំបានធ្វើឲ្យប្រទេសមានភាពរីកចម្រើននោះទេ។
បណ្ឌិតវិទ្យាសាស្ត្រនយោបាយ លោក រស់ រ៉ាវុធ ចាត់ទុកថា ការឌឺដងផ្នែកនយោបាយរវាងអ្នកនយោបាយ និងអ្នកនយោបាយនៅពេលនេះ គឺពុំបានផ្ដល់ចំណេញអ្វីឡើយសម្រាប់ជាតិ ផ្ទុយទៅវិញវាជាចំណងសម្រាប់ចងរឹតខ្លួន ហើយច្រកនយោបាយក៏ត្រូវជាប់គាំងថែមទៀតផង។ លោកបន្តថា « ទិដ្ឋភាពទីមួយ អ្នកនយោបាយនៅតែវាយបកគ្នាទៅវិញទៅមក ដោយមិនរកគន្លឹះដោះស្រាយ ចងតែបញ្ហា។ ចំណុចទីពីរ គេឲ្យឈ្មោះថា អ្នកនយោបាយមិនទទួលស្គាល់ការពិតអ្វីដែលជាការបញ្ចេញមតិរបស់គណបក្សប្រឆាំង សម្រាប់ជាគន្លឹះមួយបក្សកាន់អំណាចយកទៅពិចារណា »។
ការលើកឡើងដូចនេះរបស់អ្នកវិភាគនយោបាយ នៅបន្ទាប់ពីប្រធានគណបក្សប្រជាជនកម្ពុជា បានប្រតិកម្មចំៗចំពោះប្រមុខមេដឹកនាំបក្សប្រឆាំង។ ថ្លែងក្នុងពិធីប្រកាសដាក់ឲ្យអនុវត្ត និងត្រួតពិនិត្យវាយតម្លៃវឌ្ឍនភាពប្រចាំឆ្នាំ២០១៥ នៃកំណែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ នៅសណ្ឋាគារសូហ្វីតែល (Sofitel) លោក ហ៊ុន សែន បានប្រតិកម្មចំពោះសារនយោបាយរបស់គណបក្សប្រឆាំង ដែលរិះគន់កំណែទម្រង់ និងការរុះរើគណៈរដ្ឋមន្ត្រីនៅពេលនេះ។
លោក ហ៊ុន សែន ហៅការដៀមដាមរបស់គណបក្សប្រឆាំងថា មុននឹងរិះគន់ឲ្យគេ ត្រូវមើលខ្លួនឯងជាមុនសិន។ ជាងនេះទៀត មន្ត្រីបក្សប្រឆាំង ក៏មិនដែលឃើញដូរមុខដែរ បើទោះជាចាញ់ឆ្នោតគ្រប់អាណត្តិមកហើយក្ដី។ លោកបន្តថា « អ្នកក៏មុខដដែលដែរតើអាអ្នកដែលនិយាយហ្នឹង ! ម៉េចក៏ចាំបាច់ថាឲ្យគេមុខដដែលៗ ឲ្យគ្នាយកមុខទៅទុកនៅឯណា ? បើមុខវានៅហ្នឹង ហើយលោកឯងអាបក្សប្រឆាំងមេបក្សប្រឆាំង វាក៏មុខដដែល វានិយាយហ្នឹង »។
ប្រតិកម្មរបស់លោកនាយករដ្ឋមន្ត្រីនៅពេលនេះ ទំនងជា លោក ហ៊ុន សែន ចង់សំដៅការថ្លែងជាសាធារណៈរបស់ លោក កឹម សុខា នៅខេត្តពោធិ៍សាត់ កាលពីថ្ងៃទី២០ មីនា។ ថ្លែងទៅកាន់អ្នកគាំទ្ររាប់ពាន់នាក់នៅខេត្តពោធិ៍សាត់ ប្រធានស្ដីទីគណបក្សសង្គ្រោះជាតិ រិះគន់ថា ការធ្វើកំណែទម្រង់ និងការដោះដូរមន្ត្រីខ្លះក្នុងជួររដ្ឋាភិបាលនេះ គឺមិនមានអ្វីដែលប្លែកឡើយ ពោលជាការរុះរើដែលធ្វើឡើងសើៗប៉ុណ្ណោះ។ លោកបន្តថា « ដូចជាគេថាកែទម្រង់ជាដើម វាជាចំណុចវិជ្ជមាន។ យើងទទួលស្គាល់ ប៉ុន្តែផលយ៉ាងណាមិនទាន់ឃើញទេ មិនទាន់ច្បាស់ទេ ពីព្រោះមិនបានដោះស្រាយជាប្រព័ន្ធ »។
ស្ថិតក្នុងស្ថានភាពដែលលោកនាយករដ្ឋមន្ត្រីអះអាងថា លោកកំពុងគ្រុន ៣យប់ជាប់ៗគ្នា លោក ហ៊ុន សែន ប្រកាសថា លោកនៅតែធ្វើជាប្រមុខដឹកនាំរដ្ឋាភិបាលរហូតដល់លោកនឿយណាយ បើប្រជាពលរដ្ឋនៅបន្តគាំទ្រ និងបោះឆ្នោតឲ្យលោកធ្វើជានាយករដ្ឋមន្ត្រីដូចនៅពេលនេះ។ ផ្ទុយទៅវិញ លោក ហ៊ុន សែន ដៀមដាមថា បើលោកជាមន្ត្រីក្នុងបក្សប្រឆាំងវិញ ហើយបោះឆ្នោតចាញ់តែរហូតដូចនេះ លោកនឹងមិនត្រដរប្រកួតប្រជែងអ្វីទៀតឡើយ។ លោកបន្តថា « និយាយអ៊ីចឹងថាខ្ញុំមិនចង់ផ្លាស់ទេ ឲ្យខ្ញុំទៅណា ? បើប្រជាជនបោះឆ្នោតឲ្យខ្ញុំនៅតែធ្វើ ធ្វើទាល់តែខ្ញុំខ្ជិលធ្វើ។ ឯងធ្វើបក្សប្រឆាំង ធ្វើមួយជីវិតហើយនៅតែប្រឆាំង ហើយឈ្នះហ្នឹងឈ្នះតាំងពីសតវត្សទី២០ រហូតដល់ដើមសតវត្សទី២១ វានៅតែមិនឈ្នះ ហើយដើរស្រែកថាវាឈ្នះតែរហូតហើយ »។
វិទ្យុអាស៊ីសេរី ពុំទាន់អាចសុំការបំភ្លឺពីមន្ត្រីគណបក្សប្រឆាំងបានភ្លាមៗនៅឡើយទេ ជុំវិញប្រតិកម្មរបស់ លោក ហ៊ុន សែន នៅថ្ងៃទី២១ មីនា។
បណ្ឌិតវិទ្យាសាស្ត្រនយោបាយ លោក រស់ រ៉ាវុធ យល់ឃើញថា ការអត់ឱនផ្នែកនយោបាយនៅតែជាចំណុចរសើប និងអន់ថយនៅឡើយសម្រាប់កម្ពុជា បើទោះជាប្រទេសកំពុងអភិវឌ្ឍមួយនេះមានបទពិសោធន៍ពីការបែកបាក់គ្នាគ្រប់គ្រាន់ហើយក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។