ក្រុម​បច្ចេកវិជ្ជា​ព័ត៌មាន​ថា ហ្វេសប៊ុក​បង្ហោះ​វីដេអូ ចោទ​ប្រកាន់​ព្រះអង្គ លួន សុវ៉ាត បង្កើត​ឡើង​ដោយ​ក្រុម​បម្រើ​ការ​ក្នុង​អង្គភាព​ប្រតិកម្ម​រហ័ស

ដោយ សេក បណ្ឌិត
2020-07-08
អ៊ីម៉ែល
មតិ
Share
បោះពុម្ព
ព្រះតេជព្រះគុណ លួន សូវ៉ាត ម្ចាស់​ទទួល​ពាន​រង្វាន់​ការពារ​សិទ្ធិ​មនុស្ស Martin Ennels ប្រទេស​ស្វីស (Switzerland) បាន​ភៀស​ព្រះ​កាយ​មក​ដល់​ប្រទេស​នេះ ក្រោយ​ពេល​អាជ្ញាធរ​ប្រកាស​ចាប់​ផ្សឹក។
ព្រះតេជព្រះគុណ លួន សូវ៉ាត ម្ចាស់​ទទួល​ពាន​រង្វាន់​ការពារ​សិទ្ធិ​មនុស្ស Martin Ennels ប្រទេស​ស្វីស (Switzerland) បាន​ភៀស​ព្រះ​កាយ​មក​ដល់​ប្រទេស​នេះ ក្រោយ​ពេល​អាជ្ញាធរ​ប្រកាស​ចាប់​ផ្សឹក។
រូប៖ ហ្វេសប៊ុក​ព្រះតេជព្រះគុណ លួន សូវ៉ាត

អង្គការ​សង្គម​ស៊ីវិល​បាន​ស្នើ​ឲ្យ​អាជ្ញាធរ​ស្រាវជ្រាវ​ឡើងវិញ ចំពោះ​គណនេយ្យ​ហ្វេសប៊ុក​ចំនួន​ពីរ​ ដែល​មាន​ឈ្មោះ​ជា​ភាសា​ខ្មែរ «លួន សុវ៉ាត» និង​មួយ​ទៀត​ជា​ទំព័រ​ហ្វេសប៊ុក «Srey Da Chi Kraeng» ដែល​បង្ហោះ​វីដេអូ ​៤​ ទាក់ទង​នឹង​ការ​ចោទ​ប្រកាន់​ថា សកម្មជន​សង្ឃ​ព្រះ​អង្គ លួន សុវ៉ាត មាន​ទំនាក់​ទំនង​ស្នេហា។ ក្រុម​អ្នក​បច្ចេកវិជ្ជា​ព័ត៌មាន​រក​ឃើញ​ថា ហ្វេសប៊ុក​ទាំង​ពីរ​នេះ​បង្កើត​ឡើង​ដោយ​មនុស្ស​មួយ​ក្រុម​ធ្វើ​ការ​នៅ​ក្នុង​អង្គភាព​ព័ត៌មាន និង​ប្រតិកម្ម​រហ័ស​របស់​រដ្ឋាភិបាល។

អ្នក​ជំនាញ​ខាង​បច្ចេកវិជ្ជា​ព័ត៌មាន​ ដែល​សុំ​មិន​បញ្ចេញ​ឈ្មោះ និង​សំឡេង អះអាង​ថា វីដេអូ​យ៉ាង​តិច​ចំនួន៤ ដែល​ចោទ​ថា ជា​សំឡេង​របស់​ព្រះ​សង្ឃ លួន សុវ៉ាត បង្ហោះ​លើ​គណនេយ្យ​ហ្វេសប៊ុក​ ​ឈ្មោះ «លួន សុវ៉ាត» និង​លើ​ទំព័រ​ហ្វេសប៊ុក​មួយ​ឈ្មោះ Srey Da Chi-Kraeng គឺ​ជា​ស្នាដៃ​ប្រឌិត​របស់​ក្រុម លោក ទិត្យ សុធា អនុប្រធាន​អង្គភាព​ព័ត៌មាន​ និង​ប្រតិកម្ម​រហ័ស​នៃ​ទីស្ដីការ​គណៈរដ្ឋមន្ត្រី ដែល​បាន​បង្កើត​ឡើង កាល​​ពី​ថ្ងៃ​ទី៣០ ខែ​ឧសភា ឆ្នាំ២០២០។

ផ្អែក​លើវីដេអូ​នេះ​គណៈ​សង្ឃ​ខេត្ត​សៀមរាប កាល​ពី​ថ្ងៃ​ទី៣ មិថុនា បាន​ប្រកាស​ឱ្យ​ចាប់​ផ្សឹក​ព្រះអង្គ លួន សុវ៉ាត ដែល​គង់​មិន​អចិន្ត្រៃយ៍​នៅ​វត្ត​ស្លែង ភូមិ​ព្រីង ឃុំ​ជីក្រែង ស្រុក​ជីក្រែង​ចេញពី​បព្វជិត​ដោយ​ចោទ​ថា ព្រះអង្គ​បាន​ប្រព្រឹត្តិ​ខុស​វិន័យ​សង្ឃ​ដោយ​សេព​មេថុនធម្ម ឬ​ការ​រួម​ភេទ។ សេចក្ដី​សម្រេច​នេះ ធ្វើឡើង​ក្រោយពេល​ថេរ​សភា​សង្ឃ​ខេត្ត​សៀមរាប បាន​ពិនិត្យមើល​វីដេអូ ​និង​សារ​សំឡេង​សន្ទនា​ស្នេហា ដែល​សភា​សង្ឃ​យល់​ថា ជា​សំឡេង​របស់​ព្រះសង្ឃ លួន សុវ៉ាត ជាមួយ​ស្ត្រី​២នាក់​ជា​ម្ដាយ និង​កូនស្រី។

ចំណែក​គណៈ​សង្ឃ​នាយក​នៃ​ព្រះរាជាណាចក្រ​កម្ពុជា ក៏​បាន​គាំទ្រ​សេចក្ដី​ប្រកាស​នេះ ហើយ​ប្រគេន​ដំណឹង​នេះ​ដល់​ព្រះ​មេគណ​រាជធានី​ខេត្ត​ទាំង​អស់​ឱ្យ​សហការ​ជាមួយ​សមត្ថកិច្ច ដើម្បី​ចាប់​ផ្សឹក​ព្រះសង្ឃ លួន សុវ៉ាត។

ព្រះតេជព្រះគុណ លួន សុវ៉ាត ដែលបានភៀស​ព្រះ​កាយ គេច​ចេញ​ពី​ការ​តាម​យាយី​ពីសំណាក់​អាជ្ញាធរ​ក្រុង​ភ្នំពេញ បាន​ចោទ​ប្រកាន់​ថា អ្នក​ដែល​ព្យាយាម​ធ្វើ​បាប​ព្រះ​អង្គ ផ្តើម​ឡើង​ដោយ​ប្រើ​ប្រព័ន្ធ​បច្ចេកវិទ្យា​នោះ គឺ​ឈ្មោះ ស៊ីហា ដែល​លោក ហ៊ុន សែន តែងតែ​សរសើរ​ថា ពូកែ​ក្នុង​រឿង​ហែកហួរ លុកលុយ ចូល​ក្នុង​គណនី​សង្គម​ដោយ​សម្ងាត់ លួច​ស្ដាប់​កិច្ច​សន្ទនា​តាម​ទូរស័ព្ទ​ហើយ​បង្កើត​ឡើង​នូវ​រឿងរ៉ាវ​ផ្សេងៗ ដោយ​ខុស​ច្បាប់ ដើម្បី​វាយ​ប្រហារ​លើ​ក្រុម​អ្នក​រិះគន់ ប្រឆាំង​រដ្ឋាភិបាល និង​ក្រុម​ផ្សេងៗ ទៀត ដែល​ចេញ​ពី​បណ្ដាញ និង​ប្រព័ន្ធ​នយោបាយ​របស់​បក្ស​កាន់​អំណាច៖ «ហ្នឹង​ក្រុម​ហ្នឹង​ហើយ ១០០ភាគ ១០០ តែ​ម្តង ហើយ​មិន​បាច់​រក​ចោរ​នៅ​ណា​ទៀត​ទេ គឺ​ចោរ​នៅ​នឹង​កម្ពុជា​ហ្នឹង​ឯង មាន​ទាំង​ចោរ​ព័ត៌មាន ដូចជា ហែក​ចូល​ហ្វេសប៊ុក​អា​ត្មា​នៅ​មុន​បោះ​ឆ្នោត ២០១៧ អ៊ីចឹង​សុទ្ធតែ​ពួក​អា​ក្រុម​ហ្នឹង​ឯង ក្រុម​អា​ស៊ីហា​ហ្នឹង​ឯង ហើយ​សួរ​ថា ហេតុ​អី​បាន​ជា​វា​ហែក​បាន? ដោយ​វា​គ្រប់គ្រង​ខាង​ព័ត៌មានវិទ្យា​ទាំង​អស់ ដូច​ទូរស័ព្ទ ដូច​ជា អិនធើណិត​ជា​ដើម»

ទោះ​ជា​យ៉ាង​នេះ​ក្តី អ្នក​ជំនាញ​ខាង​បច្ចេកវិជ្ជា​ព័ត៌មាន​ បាន​លើក​ឡើង​ថា វីដេអូ​មួយ​ក្នុង​ចំណោម​វីដេអូ​ផ្សេង​​ ដែល​មាន​រយៈ​ពេល​ជាង ៧ ​នាទី ​ជា​វីដេអូ​ថត​ចេញ​ពី​ការ​​សន្ទនា​គ្នា​តាម​ប្រព័ន្ធ​សង្គម​ហ្វេសប៊ុក ​ដោយ​មាន​បណ្ដែត​ឈ្មោះ​ជា​ភាសា​ខ្មែរ​ «លួន សុវ៉ាត» នៅ​លើ​អេក្រង់។ កិច្ច​សន្ទនា​គ្នា​នេះ​មាន​និយាយ​គ្នា​ស៊ី​ជម្រៅ​ទាក់ទង​នឹង​ស្នេហា។ នៅ​ក្នុង​នាទី៥:០៤ នៃ​កិច្ច​សន្ទនា​នោះ បាន​បង្ហាញ​តេឡេក្រាម​ជូន​ដំណឹង( Telegram Notification) ពី​គេហទំព័រ​ខ្មែរ​ប៉ុស្តិ៍ ទៅ​គណនេយ្យ​ហ្វេសប៊ុក ​ជា​ភាសា​ខ្មែរ​ «លួន សុវ៉ាត» នៅ​លើ​អេក្រង់​ដែល​កំពុង​តែ​ថត​វីដេអូ។ ហើយ​គណនេយ្យ​តេឡេក្រាម​នោះ គឺ​ឈ្មោះ មៀច សុភាព។

អ្នក​ជំនាញ​ដដែល​បាន​លើក​ទៀត​ឡើង​ថា គណនេយ្យ​ហ្វេសប៊ុក​របស់ មៀច សុភាព (Miech Sopheap) https://www.facebook.com/miech.sopheap មាន​មិត្តភ័ក្ដិ​ចំនួន ៣.៣៤៦នាក់ ដែល​បាន​បង្កើត​ឡើង​នៅ​ក្នុង​ខែ​កញ្ញា ឆ្នាំ២០១១ មិត្តភ័ក្ដិ​ភាគ​ច្រើន​ ជា​អ្នក​សារព័ត៌មាន និង​មន្ត្រី​រាជការ។

អ្នក​ជំនាញ​ដដែល​ពន្យល់​ថា ឈ្មោះ មៀច សុភាព ធ្វើ​ការ​នៅ​ទីស្ដីការ​គណៈរដ្ឋមន្ត្រី ដែល​មាន​លោក​ ទិត្យ សុធារ ជា​ចៅហ្វាយ​នាយ។ មៀច សុភាព តែងតែ​ចែក​រំលែក​រាល់​ព័ត៌មាន​របស់​លោក ទិត្យ សុធា ដែល​បាន​បង្ហោះ​នៅ​លើ​ហ្វេសប៊ុក ហើយ​នៅ​ក្នុង តេឡេក្រាម ជូនដំណឹង (Telegram Notification) តាម​ទូរលេខ​នេះ បាន​បញ្ជាក់​ថា គេហទំព័រ​ខ្មែរ​ប៉ុស្តិ៍​បាន​ចូលរួម​ក្នុង​ការ​បង្កើត​វីឌីអូ​នេះ​ផង​ដែរ៖ «រឿង​ទាំង​អស់​នេះ​បង្កើត​ឡើង​ដោយ​ក្រុម​លោក ទិត្យ សុធា។ មាន​រឿង​មួយ​ទៀត គឺ​លោក ទិត្យ សុធា បាន​តាម​ទំព័រ​ហ្វេសប៊ុក (Follow Facebook page) របស់ Srey Da Chi Kraeng ពី​គណនី​ហ្វេសប៊ុក​ផ្ទាល់​ខ្លួន​របស់​លោក»

អ្នក​ជំនាញ​ដដែល​ពន្យល់​ថា គេ​អាច​បញ្ជាក់​រឿង​នេះ​បាន​ដោយ​មើល Follow Page តាម​គណនី​ហ្វេសប៊ុក​របស់ ទិត្យ សុធា។

អ្នក​នាំ​ពាក្យ​ទីស្ដីការ​គណៈរដ្ឋមន្ត្រី និង​ជា​អនុប្រធាន​អង្គភាព​ព័ត៌មាន និង​ប្រតិកម្ម​រហ័ស លោក ទិត្យ សុធា បាន​បដិសេធ​ចំពោះ​ការ​រក​ឃើញ​មក​នេះ​ថា​ ពុំ​មាន​អ្វី​ពាក់ព័ន្ធ​ជាមួយ​នឹង​រូប​លោក និង​អង្គភាព​ព័ត៌មាន​ និង​ប្រតិកម្ម​រហ័ស​នោះ​ទេ។ លោក​ថា រឿង​នោះ​ជា​រឿង​របស់​បុគ្គល​ដែល​បានបង្ហោះ​នៅ​លើ​បណ្ដាញ​សង្គម​ហ្វេសប៊ុក៖ «ទេ​ខ្ញុំ​សូម​មិន​អត្ថាធិប្បាយ​អី​ទៀត​ទេ ពីព្រោះ​អឺ ​ក្រុម​ប្រឆាំង​តែងតែ​មាន​វប្បធម៌​ចោទ​ប្រកាន់​លាប​ពណ៌​ផ្ដេសផ្ដាស​អ៊ីចឹង ខ្ញុំ​សូម​មិន​អត្ថាធិប្បាយ​ក្នុង​រឿង​ចោទ​ប្រកាន់​មូល​បង្កាច់​ ដែល​ខុស​ពី​ការ​ពិត​នេះ»

អាស៊ី​សេរី​មិន​អាច​ទាក់ទង​ម្ចាស់ ទំព័រ​ហ្វេសប៊ុក មៀច សុភាព (Miech Sopheap) https://www.facebook.com/miech.sopheap និង​ម្ចាស់​គណនី​ហ្វេសប៊ុក ឈ្មោះ សីហា ដើម្បី​ឆ្លើយ​តប បក​ស្រាយ​ជុំវិញ​រឿង​នេះ​បាន​ទេ រហូត​មក​ដល់​ម៉ោង​ផ្សាយ​នេះ  ។

កាលពីថ្ងៃទី​២៩ ខែមិថុនា​កន្លងមក ទំព័រ​ហ្វេស​ប៊ុក​ចំនួន​ ២ ​ដែល​មួយ​ជា​គណនី​ភាសា​ខ្មែរ​ឈ្មោះ​«លួន សុវ៉ាត»​និង​មួយ​ទៀត​ជា​ទំព័រ​ហ្វេសប៊ុក​ដែល​បង្ហោះ​វីដេអូ ​៤​ ទាក់ទង​នឹង​ការ​ចោទ​ប្រកាន់​ថា​ ​សកម្មជន​សង្ឃ ​ព្រះ​អង្គ លួន សុវ៉ាត​ មាន​ទំនាក់​ទំនង​ស្នេហា​នោះ ​ត្រូវ​បាន​លុប​ចោល​វិញ ហើយ​មក​ដល់​ថ្ងៃ​នេះ។​

ស្នងការ​នគរបាល​ខេត្ត​សៀមរាប លោក ទិត្យ ណារ៉ុង បាន​ឲ្យ​ដឹង​ថា សមត្ថកិច្ច​របស់​លោក​ នៅ​តែ​បន្ត​ស្វែង​រក​ព្រះ​តេជគុណ លួន សុវ៉ាត​ ដោយ​យោង​ទៅ​តាម​ដីកា​របស់​តុលាការ​ខេត្ត​សៀមរាប​ ដើម្បី​ចាប់​ផ្សឹក​ព្រះ​អង្គ«អ៊ីចឹង​យើង​កំពុង​តែ​រក​លោក​អត់​ទាន់​ឃើញ​ទេ យើង​កំពុង​តែ​ស្រាវជ្រាវ​រក​បាទ បាទ​សមត្ថកិច្ច​ខ្ញុំ​នៅ​តែ​បន្ត​នីតិវិធី​ តាម​ដីកា​របស់​តុលាការ​ហ្នឹង​ហើយ បាទ»

នៅ​ថ្ងៃ​សមត្ថកិច្ច​ខេត្ត​សៀមរាប​ចុះ​ស្វែងរក​ចាប់​ផ្សឹក​ព្រះ​អង្គ​នៅ​ផ្ទះ សមត្ថកិច្ច​​បាន​ដក​ហូត​ទូរស័ព្ទ ២គ្រឿង​របស់​ក្មួយ​ប្រុស​ព្រះ​អង្គ និង​រឹប​អូស​​កម្មសិទ្ធិ​ផ្ទាល់​របស់​ព្រះ​អង្គ​ ក្នុង​នោះ​មាន​​រថយន្ត​ឡិចស៊ីស (Lexus 470) មួយ​គ្រឿង កាមេរ៉ា​ជិត ១០គ្រឿង ទូរទស្សន៍ ១គ្រឿង ទូរ​ទឹក​កក ធុង​ទឹក​កក និង​ឯកសារ​ផ្សេងៗ ទៀត។

ព្រះតេជព្រះគុណ លួន សុវ៉ាត មាន​ថេរ​ដីកា ប្រាប់​អាស៊ី​សេរី នៅ​ថ្ងៃ​ទី៧ កក្កដា​ថា ព្រះតេជព្រះគុណ​បាន​ភៀស​ព្រះ​កាយ​មក​ដល់​ប្រទេស​ស្វីស (Switzerland) ដោយ​សុវត្ថិភាព កាល​ពី​ថ្ងៃ​ទី៤ មិថុនា ដើម្បី​គេច​ពី​ការ​ចាប់​ផ្សឹក​ទាំង​បង្ខំ​ពីសំណាក់​អាជ្ញាធរ​របប​ក្រុង​ភ្នំពេញ។ បច្ចុប្បន្ន​ព្រះតេជព្រះគុណ​កំពុង​គង់​នៅ​វត្ត​មួយ​ខ្មែរ​មួយ​ឈ្មោះ​វត្ត​ស្វីសខេមរារាម (Wat Swiss Khemraram)

ព្រះតេជព្រះគុណ​មាន​ថេរ​ដីកា​បន្ត​ថា កិច្ច​បន្ទាប់ និង​ជា​បន្ទាន់​នោះ គឺ​ស្វែងរក​មេធាវី ដើម្បី​ជួយ​រៀបចំ​ឯកសារ​ប្ដឹង​រក​យុត្តិធម៌​ជុំវិញ​ជន​ខិលខូច​ប្រើ​បច្ចេកវិទ្យា​ទំនើប​បង្កើត ឬ​ប្រឌិត​រឿង​មិន​ពិត ដើម្បី​មួល​បង្កាច់ បង្ខូច​កេរ្តិ៍ឈ្មោះ​ព្រះ​អង្គ ទៅ​សហគមន៍​អន្តរជាតិ ប្តឹង​ទៅ​ក្រុមហ៊ុន​ហ្វេសប៊ុក និង Youtube សូម​ឲ្យ​មាន​វិធានការ​ទៅ​លើ​ក្រុម​ជន​ខិលខូច​អស់​ទាំង​នោះ៖ «បន្ទាប់​ពី​អាត្មា​មក​ដល់​ទឹក​ដី ដែល​គេ​មាន​សេរីភាព យើង​នឹង​ពិភាក្សា និង​ស្វែងរក​ដៃគូ អង្គការ​អន្តរជាតិ និង​មេធាវី រៀបចំ​ដាក់​ពាក្យ​បណ្ដឹង គឺ​កម្ទេច​វិញ​តែ​ម្តង គឺ​កម្ទេច​ក្រុម​ចោរ​ទុច្ចរិត ដែល​យក​ព័ត៌មាន​ក្លែងក្លាយ​ទៅ​ផ្សព្វផ្សាយ​នោះ បើ​ទោះ​ជា​មិន​បាន​ឲ្យ​ពួក​គេ​មក​ជាប់​ទោស ក៏​យើង​បាន​កម្ទេច​ព័ត៌មាន​មិន​ពិត ប្លុក​នូវ​អាខោន ហ្វេសប៊ុក និង Youtube នោះ​ចោល​តែ​ម្ដង»

អ្នកនាំពាក្យ​សមាគម​ការពារ​សិទ្ធិ​មនុស្ស អាដហុក (Adhoc) លោក ស៊ឹង សែនករុណា ឲ្យ​ដឹង​ថា​ លោក​គាំទ្រ​ទៅ​ដល់​ក្រុម​បច្ចេកវិជ្ជា​ព័ត៌មាន​ដែល​មាន​សមត្ថភាព​រក​ឃើញ​អំពី​ការ​បង្កើត​វីដេអូ​របស់​មនុស្ស​មួយ​ក្រុម ដើម្បី​បង្ខូច​ព្រះ​កិត្តិសព្ទ​របស់​ព្រះតេជព្រះគុណ លួន សុវ៉ាត៖ «សមត្ថកិច្ច​គួរ​ស្រាវជ្រាវ​ក្រុម​ដែល​ធ្វើ​វីដេអូ​ទៅ​ប៉ះពាល់​នូវ​ព្រះ​កិត្តិនាម​របស់​អង្គ​ទៅ​វិញ ដើម្បី​ធ្វើ​ អឺ​ការ​ស្ដារ​នូវ​ព្រះ​កិត្តិនាម​ព្រះអង្គ​ឡើង​វិញ ដោយ​បញ្ហា​បង្កើត​វីដេអូ​ មិនមែន​ជា​រឿង​ពិត ហើយ​ធ្វើ​ឲ្យ​ ប៉ះពាល់​ទៅ​ដល់​កិត្តិយស​ព្រះ​អង្គ​ទៅទៀត អ៊ីចឹង​គួរ​តែ​សមត្ថកិច្ច​ស្រាវជ្រាវ​រក​ក្រុម​ទាំង​អស់​ហ្នឹង ហើយ​ផ្ដន្ទាទោស​ទៅ​តាម​ផ្លូវ​ច្បាប់​របស់​ប្រទេស​កម្ពុជា»

កាល​ពី​ខែ​តុលា ឆ្នាំ២០១២ ព្រះតេជព្រះគុណ​ លួន សូវ៉ាត បាន​ទទួល​ពាន​រង្វាន់​​ការពារ​សិទ្ធិ​មនុស្ស Martin Ennels ពី​​ប្រទេស​ស្វីស​​ជា​ពាន​រង្វាន់​ដ៏​សំខាន់​មួយ ​សម្រាប់​ផ្ដល់​ជូន​ដល់​បុគ្គល​ណា ​ដែល​បាន​ចូល​រួម​ការពារ និង​លើក​តម្កើង​សិទ្ធិ​មនុស្ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល