លោក កឹម សុខា បង្ហាញ​មុខ​នៅ​តាម​វត្ត​អារាម​ក្នុង​រដូវ​ពិធី​កាន់​បិណ្ឌ

ដោយ សេក បណ្ឌិត
2020-09-09
អ៊ីម៉ែល
មតិ
Share
បោះពុម្ព
លោក កឹម សុខា ក្នុង​ពិធី​កាន់​បិណ្ឌ​វេន​ទី៧ នៅ​វត្ត​មួយ​ក្នុង​ខេត្ត​កំពង់ស្ពឺ ថ្ងៃ​ទី៩ ខែ​កញ្ញា ឆ្នាំ២០២០។
លោក កឹម សុខា ក្នុង​ពិធី​កាន់​បិណ្ឌ​វេន​ទី៧ នៅ​វត្ត​មួយ​ក្នុង​ខេត្ត​កំពង់ស្ពឺ ថ្ងៃ​ទី៩ ខែ​កញ្ញា ឆ្នាំ២០២០។
រូប៖ ហ្វេសប៊ុក Kem Sokha

ប្រធាន​គណបក្ស​សង្រ្គោះ​ជាតិ​លោក ​កឹម​ សុខា បង្ហាញ​មុខ​ជា​សាធារណៈ​កាន់​តែ​ញឹកញ៉ាប់ ជា​ពិសេស នៅ​តាម​វត្ត​អារាម​ក្នុង​រដូវ​ពិធី​កាន់​បិណ្ឌ​នេះ ហើយ​មាន​ពលរដ្ឋ​ជា​ច្រើន​បង្ហាញ​ភាព​ស្និទ្ធស្នាល​ជាមួយ​លោក​ទៀត​ផង។ អ្នកឃ្លាំមើល​សង្គម​ថា សកម្មភាព​លោក កឹម សុខា ពេល​នេះ​ជា​រឿង​ល្អ​មួយ ប៉ុន្តែ​ពួក​គេ​ចង់​ឃើញ​មេ​បក្ស​ប្រឆាំង​រូប​នេះ​ធ្វើ​សកម្មភាព​ការងារ​សង្គម​ថែម​ទៀត។

លោក កឹម សុខា បង្ហាញ​សកម្មភាព​នៅ​ទី​សាធារណៈ​ច្រើន​ជាង​មុន​នៅ​រយៈ​ពេល​ចុង​ក្រោយ​នេះ ដូច​ជា ដាំ​ដើម​ឈើ លែង​កូន​ត្រី និង​ទៅ​វត្ត​កាន់​បិណ្ឌ​ជា​ដើម។ ប្រធាន​គណបក្ស​សង្គ្រោះ​ជាតិ​រូប​នេះ​បាន​បង្ហោះ​រូបភាព​ជា​ច្រើន​សន្លឹក​នៅ​លើ​ហ្វេសប៊ុក (Facebook) ភ្ជាប់​ជាមួយ​សំណេរ កាល​ពី​ថ្ងៃ​ទី៧ កញ្ញា​ថា ក្នុង​រដូវ​ភ្ជុំ​បិណ្ឌ​នេះ​លោក និង​ភរិយា​ទៅ​ដាក់​បិណ្ឌ​បាន​ពីរ​វត្ត​ហើយ​ដើម្បី​ឧទ្ទិស​កុសល​ផល​បុណ្យ​ជូន​ដល់​អ្នក​មាន​គុណ និង​បុព្វការីជន​ដែល​បាន​ចែក​ឋាន​ទៅ។ ក្រៅ​ពី​លោក កឹម សុខា និង​ភរិយា​ក៏​ឃើញ​មាន​មន្រ្តី​សំខាន់ៗ របស់​លោក​អម​ដំណើរ​ក្នុង​ការ​ចូល​រួម​កាន់​បិណ្ឌ​នេះ​ដែរ ដូច​ជា លោក យ៉ែម បុញ្ញាឬទ្ធិ លោក ប៉ុល ហំម លោក សឺន ស៊ូបែរ្តិ៍ និង​លោក មាជ សុវណ្ណរ៉ា ជាដើម។ លោក កឹម សុខា សរសេរ​លើ​ហ្វេសប៊ុក​បន្ត​ទៀត​ថា អ្វី​ដែល​ប្រពៃ និង​រំភើប​ទៀត​នោះ គឺ​លោក​បាន​ជួប​មុខ​គ្នា​ដោយ​ផ្ទាល់​សួរ​សុខ​ទុក្ខ​គ្នា​ដោយ​ក្តី​នឹក​រលឹក​ជាមួយ​ពលរដ្ឋ​នៅ​ក្នុង​វត្ត ដែល​នេះ​ជា​សេចក្ដី​ប្រាថ្នា​របស់​លោក​ចង់​រួមរស់​នៅ និង​សាង​កុសល​ផល​បុណ្យ​ជាមួយ ប្រជាពលរដ្ឋ​ខ្មែរ​នៅ​លើ​ទឹក​ដី​កម្ពុជា។ ទន្ទឹម​ការ​ធ្វើ​បុណ្យ​នៅ​វត្ត​លោក កឹម សុខា ក៏​មិន​ភ្លេច​ធ្វើ​បុណ្យ​ជាមួយ​ម្ដាយ​លោក​ដោយ​បាន​យក​ចំណី​អាហារ​ជូន​ម្ដាយ​ពិសា​ផ្ទាល់ និង​ជូន​ទេយ្យទាន ដើម្បី​យក​ទៅ​វត្ត​ប្រគេន​ព្រះសង្ឃ​ក្នុង​រដូវ​ភ្ជុំបិណ្ឌ​នេះ។

អ្នក​ស្រាវជ្រាវ​ការ​អភិវឌ្ឍ​ន៍សង្គម​បណ្ឌិត សេង សារី​ សង្កេត​ឃើញ​ថា ការ​ធ្វើ​សកម្មភាព​របស់​លោក កឹម សុខា មិន​ស្ថិត​ក្នុង​បម្រាម​របស់​តុលាការ​ទេ ។ ទោះ​យ៉ាង​ណា​អ្នកឃ្លាំមើល​សង្គម​រូប​នេះ​ចង់​ឃើញ​ថា លោក កឹម សុខា អាច​ធ្វើ​សកម្មភាព​សង្គម​ផ្សេង​ទៀត ដែល​ច្បាប់​អនុញ្ញាត។ លោក​បន្ត​ថា លោក កឹម សុខា គួរ​ធ្វើ​សកម្មភាព​សំខាន់​ពីរ គឺ​រក្សា​កម្លាំង​ចាស់ និង​បង្កើត​កម្លាំង​ថ្មី។ អ្នក​ឃ្លាំមើល​សង្គម​រូប​នេះ​យល់​ថា ដ្បិត​មក​ដល់​ស្ថាន​ពេល​នេះ​ទោះ​លោក កឹម សុខា កំពុង​ជាប់​ក្នុង​បម្រាម​របស់​តុលាការ​មិន​ឱ្យ​ធ្វើ​សកម្មភាព​នយោបាយ​ក្ដី ប៉ុន្តែ​គណបក្ស​សង្រ្គោះ​ជាតិ​អាច​រក្សា​ជំហរ​រួបរួម និង​បង្ហាញ​ចេតនា​ឱ្យ​យុវជន​ជំនាន់​ថ្មី​អាច​ចូលរួម​ជាមួយ​ខ្លួន​បាន៖ «មក​ដល់​ពេល​នេះ​យើង​រូបភាព​ខាង​ក្រៅ​យើង​មិន​ដឹង​ថា មាន​យុទ្ធសាស្ត្រ​យ៉ាង​ណា​ទេ នៅ​ក្នុង​បក្ស​ហ្នឹង ព្រោះ​យើង​មិន​អាច​ដឹង ប៉ុន្តែ​យើង​ឃើញ​សកម្មភាព​ដូច​មាន​ការ​បែក​បាក់។ ការ​បង្កើត​កម្លាំង​ថ្មី​គណបក្ស​សង្គ្រោះ​ជាតិ​រក្សា​ជំហរ​រួបរួម​ទី២ បង្ហាញ​ចេតនា ដើម្បី​ឱ្យ​មាន​យុវជន​ជំនាន់​ថ្មី​អាច​ចូលរួម​បាន​ទៅ​តាម​មធ្យោបាយ​ផ្សេងៗ»

រីឯ​អ្នក​វិភាគ​នយោបាយ លោក គឹម សុខ​ លើក​ឡើង​ថា ការ​បង្ហាញ​វត្តមាន​ច្រើន​ទី​កន្លែង​របស់​លោក កឹម សុខា នៅ​រយៈ​ពេល​ចុង​ក្រោយនេះ​ទំនង​លោក​រង់ចាំ​ការ​ប្រែប្រួល​នៃ​ស្ថានការណ៍​នយោបាយ​ចុង​ក្រោយ ដែល​អាច​នឹង​កើត​ឡើង​នៅ​ចុង​ឆ្នាំ​នេះ។ ប៉ុន្តែ​លោក​ថា ការ​ប្រែប្រួល​នោះ​គឺ ស្ថិត​ក្នុង​ភាព​ស្រពិចស្រពិល និង​ចម្រូងចម្រាស​ក្នុង​ចំណោម​អ្នក​ប្រជាធិបតេយ្យ​នៅ​កម្ពុជា៖ «គ្មាន​លក្ខណៈ​ការ​ប្រកួត​ប្រជែង​ដោយ​ស្មើ​មុខ​រវាង​ម្ខាង ដែល​ជា​ក្រុម​អ្នក​ប្រជាធិបតេយ្យ និង​ម្ខាង​លោក ហ៊ុន សែន មេ​ដឹក​នាំ​កម្អែល​កុម្មុយនិស្ត​ទេ វា​គ្រាន់​តែ​ជា​ការ​ប្រែប្រួល​ក្នុង​រូបភាព​មួយ ដែល​យើង​គិត​ថា មាន​ការ​ប្រកួត​ប្រជែង​ថ្មី​មួយ​ពី​ក្រុម​អ្នក​ប្រឆាំង​ក្នុង​ស្ថានការណ៍ ដែល​ជា​ការ​បើក​លំហ​សេរី​ចង្អៀត​បំផុត»

ជុំវិញ​សកម្មភាព​លោក កឹម សុខា និង​ការ​លើក​ឡើង​របស់​ក្រុម​អ្នក​វិភាគ​បែប​នេះ  អាស៊ី​សេរី​បាន​ព្យាយាម​សុំ​ការ​បំភ្លឺ​ពី​ក្រុម​មេធាវី លោក កឹម សុខា គឺ​លោក ចាន់ ចេន និង​អ្នកស្រី ម៉េង សុធារី ចាប់​ពី​ថ្ងៃ​ទី៧ ដល់​ថ្ងៃ​ទី៨ ខែ​កញ្ញា តែ​មិន​ទទួល​បាន​ការ​ឆ្លើយ​តប​ទេ ដោយសារ​ទូរស័ព្ទ​ហៅ​ចូល​គ្មាន​អ្នក​ទទួល។

ទោះ​យ៉ាង​ណា មេធាវី​របស់​លោក កឹម សុខា គឺលោក ​ ចាន់​ ចេន ធ្លាប់​ឱ្យ​អាស៊ី​សេរី​ដឹង​ថា លោក​ កឹម សុខា​ នៅតែ​ប្រើប្រាស់​សិទ្ធិ​របស់​ខ្លួន​​រួម​ទាំង​សិទ្ធិ​ធ្វើ​ដំណើរ​ក្នុង​ប្រទេស​ដដែល​​​លើក​លែង​តែ​ការ​ចេញ​ក្រៅ​ប្រទេស ​និង​សិទ្ធិ​ធ្វើ​នយោបាយ​ដែល​តុលាការ​បាន​ហាមឃាត់​។​

រីឯ​មនុស្ស​ជំនិត​របស់​លោក កឹម សុខា គឺលោក មុត ចន្ថា បាន​សរសេរ​លើ​ហ្វេសប៊ុក​ថា ទោះ​បី​លោក កឹម សុខា មាន​ភាព​ក្លាហាន លោក​ក៏​ត្រូវ​ស្ថិត​នៅ​ក្រោម​ច្បាប់​ក្នុង​នាម​ជា​ពលរដ្ឋ​និង​មេ​ដឹក​នាំ​នយោបាយ​ដែល​គោរព​ច្បាប់។ លោក​បន្ត​ថា ភាព​ក្លាហាន​របស់​លោក កឹម ​សុខា គឺ​ស្វែង​រក​ដំណោះ​ស្រាយ​ដោយ​អហិង្សា និង​សន្តិវិធី​មិន​មែន​បង្កើត​បញ្ហា​បន្ថែម ឬ​បង្ក​ជម្លោះ ដែល​ជា​ឧបសគ្គ​ដល់​ការ​ស្វែងរក​ដំណោះ​ស្រាយ​ឡើយ។

លោក កឹម សុខា ​ត្រូវ​សមត្ថកិច្ច​ចាប់​ខ្លួន និង​ឃុំ​ដាក់​ពន្ធនាគារ និង​បន្ត​ឃុំ​ខ្លួន​ក្នុង​ផ្ទះ​ក្រោយ​រង​ការ​ចោទ​ប្រកាន់​ពី​ទោស​ក្បត់​ជាតិ កាល​ពី​ឆ្នាំ២០១៧ ប៉ុន្តែ​កាល​ពី​ចុង​ឆ្នាំ២០១៩ តុលាការ​បាន​បន្ធូរ​បន្ថយ​ការ​ត្រួត​ពិនិត្យ​តាម​ផ្លូវ​តុលាការ​ដោយ​អនុញ្ញាត​ធ្វើ​ដំណើរ​ក្នុង​ប្រទេស​តែ​ហាម​ឃាត់​ធ្វើ​សកម្មភាព​នយោបាយ។​ ទោះ​យ៉ាង​ណា​ប្រធាន​គណបក្ស​ប្រឆាំង​រូប​នេះ​ទើប​ធ្វើ​សកម្មភាព​តាម​បណ្ដា​ខេត្ត​ញឹកញាប់​កាល​ពី​ខែ​កក្កដា ឆ្នាំ២០២០។ ទន្ទឹម​គ្នា​នោះ​ដែរ តុលាការ​ក្រុង​ភ្នំពេញ​បាន​ចេញ​លិខិត​ព្រមាន​ថា សកម្មភាព​ចុះ​តាម​បណ្តា​ខេត្ត​នានា​របស់​លោក កឹម សុខា អាច​នឹង​ឈាន​ទៅ​ហួស​ព្រំដែន​ដែល​តុលាការ​​បាន​​កំណត់។ ទោះ​មាន​ការ​ព្រមាន​បែប​នេះ​ក្តី ប៉ុន្តែ​លោក កឹម សុខា នៅ​តែ​បន្ត​ធ្វើ​សកម្មភាព​ដដែល​រហូត​មក​ដល់​ពេល​នេះ។

ក្នុង​ខួប​បី​ឆ្នាំ​នៃ​ការ​ឃាត់​ខ្លួន កាល​ពី​ថ្ងៃ​ទី២ ខែ​កញ្ញា លោក កឹម សុខា បាន​សរសេរ​លើ​ហ្វេសប៊ុក​លោក​ថា ឆ្លង​តាម​សវនាការ​នាពេល​កន្លងទៅ តុលាការ​គ្មាន​ភស្តុតាង​ដាក់​បន្ទុក​ជាក់​លាក់ និង​គ្រប់គ្រាន់​ដែល​អាច​បន្ត​ចោទប្រកាន់​លោក​បាន​នោះ​ទេ។ លោក កឹម សុខា អំពាវនាវ​ដល់​តុលាការ​ទម្លាក់​បទ​ចោទ និង​ផ្តល់​សិទ្ធិ​ពេញលេញ​ដល់​រូបលោក​វិញ។ មេ​បក្ស​ប្រឆាំង​រូប​នេះ​ក៏​ស្នើសុំ​ឱ្យ​មាន​ការ​ផ្សះផ្សា​ជាតិ និង​ឯកភាព​ជាតិ។ លោក​ថា លោក​ចង់​ចូល​រួម​រក​ដំណោះ​ស្រាយ​ចំពោះ​បញ្ហា​ប្រឈម​របស់​ជាតិ រួម​មាន បញ្ហា​ជីវភាព​ប្រជាពលរដ្ឋ និង​បញ្ហា​សេដ្ឋកិច្ច​ជា​ដើម៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល