លោក សម រង្ស៊ី ផ្ញើសារពន្យល់អ្នកគាំទ្រពីការចូលរួមសភា
2014.07.23
លោក សម រង្ស៊ី (ស្ដាំ) ប្រធានគណបក្សសង្គ្រោះជាតិ ថ្លែងក្នុងសន្និសីទកាសែត នាស្នាក់ការកណ្ដាលគណបក្សសង្គ្រោះជាតិ នៅព្រឹកថ្ងៃទី២៩ ខែសីហា ឆ្នាំ២០១៣។
ប្រធានគណបក្សសង្គ្រោះជាតិ លោក សម រង្ស៊ី បានផ្ញើសារលួងចិត្តអ្នកគាំទ្រកុំឲ្យអន់ចិត្ត ពេលគណបក្សសង្គ្រោះជាតិ ចូលសភាជាមួយគណបក្សប្រជាជនកម្ពុជា។
លោក សម រង្ស៊ី បានផ្ញើសារនយោបាយអំពាវនាវទៅកាន់អ្នកគាំទ្របក្សសង្គ្រោះជាតិ ឲ្យទប់ចិត្តកុំអាក់អន់ចិត្ត ឬខឹងនឹងថ្នាក់ដឹកនាំបក្ស ដែលបានសម្រេចចូលរួមសភាជាមួយបក្សប្រជាជន នៅពេលថ្មីៗយ៉ាងតក់ក្រហល់ ដែលធ្វើឲ្យអ្នកគាំទ្រខ្លះមិនពេញចិត្ត។
ថ្លែងនៅក្នុងវីដេអូឃ្លីបមួយមានរយៈពេលជិត ៥នាទី លោក សម រង្ស៊ី ព្យាយាមពន្យល់ប្រាប់អ្នកគាំទ្រថា ការសម្រេចចិត្តចូលនេះ គឺជាការត្រឹមត្រូវ និងស្របតាមកាលៈទេសៈនៃសភាពការណ៍នយោបាយបច្ចុប្បន្ន ដែលអាចឲ្យបក្សសង្គ្រោះជាតិ បន្តទាមទារធ្វើការកែទម្រង់ស្ថាប័ននានា ដូចកែទម្រង់គណៈកម្មាធិការជាតិរៀបចំការបោះឆ្នោត ដែលនឹងឈានទៅដល់ការផ្លាស់ប្ដូរបានសម្រេចដូចបំណងអ្នកគាំទ្របក្សទៅអនាគត។
លោក សម រង្ស៊ី ថ្លែងដូច្នេះ៖ «មុននឹងវិនិច្ឆ័យ ឬធ្វើការថ្កោលទោសអ្វីមួយ សូមបងប្អូនជនរួមជាតិរង់ចាំបន្តិចសិន ទាល់តែពេលវេលាការងាររបស់យើង និងលទ្ធផលដែលយើងទទួលបាន បានចេញជារូបរាងច្បាស់លាស់ ទើបបងប្អូនជនរួមជាតិអាចវិនិច្ឆ័យថាត្រូវ ឬក៏មិនត្រូវ។ ចំពោះខ្ញុំយល់ថា គ្មានជម្រើសណាល្អជាងជម្រើសដែលយើងបានសម្រេចនេះទេ។ ទី១ គឺយើងបានបញ្ចប់សភាពការណ៍តានតឹង។ អ្នកដែលត្រូវបានគេចាប់ខ្លួន ហើយយកទៅដាក់ពន្ធនាគារ គឺត្រូវបានដោះលែងអស់ហើយ។ បន្តិចទៀតនេះ ទីលានប្រជាធិបតេយ្យនឹងត្រូវបើកឡើងវិញ ដើម្បីឲ្យប្រជាពលរដ្ឋ ឲ្យប្រជាពលរដ្ឋទៅជួបជុំគ្នាដូចពេលមុនៗទៀត។ បម្រាមហាមឃាត់មិនឲ្យប្រជាពលរដ្ឋធ្វើបាតុកម្មដង្ហែក្បួនតាមផ្លូវ បម្រាមនោះត្រូវលុបចោល គឺយើងនឹងមានសិទ្ធិសេរីភាពដូចដើមវិញ»។
សារនយោបាយរបស់ លោក សម រង្ស៊ី ពេលនេះ ធ្វើឡើងបន្ទាប់ពីមានពលរដ្ឋ និងអ្នកគាំទ្របក្សសង្គ្រោះជាតិ ខ្លះបានបង្ហោះមតិយោបល់អាក់អន់ចិត្ត និងបញ្ចេញកំហឹងរបស់ខ្លួន ដៀមដាមដាក់មេដឹកនាំបក្សសង្គ្រោះជាតិ តាមរយៈបណ្ដាញសង្គមហ្វេសប៊ុក ដោយសារពួកគាត់មិនពេញចិត្ត និងមិនចង់ឲ្យបក្សសង្គ្រោះជាតិ ចូលរួមរដ្ឋាភិបាលដែលដឹកនាំដោយបក្សប្រជាជន ដែលពួកគាត់យល់ថា នឹងចាញ់ល្បិចកលនយោបាយរបស់បក្សប្រជាជន ហើយបក្សប្រជាជន នឹងបំផ្លាញបក្សសង្គ្រោះជាតិ ឲ្យរលាយដូចដែលបក្សប្រជាជន បានកម្ទេចបក្សនយោបាយមួយចំនួនកន្លងមក ដូចជា បក្សសេរីនិយមព្រះពុទ្ធសាសនា ដែលដឹកនាំដោយ លោក សឺន សាន និងគណបក្សហ៊្វុនស៊ិនប៉ិច ជាដើម។
ទោះយ៉ាងណា ការសម្រេចចិត្តរបស់បក្សសង្គ្រោះជាតិ ចូលសភាជាមួួយបក្សប្រជាជន ក្នុងជំនួបកំពូលកាលពីថ្ងៃទី២២ កក្កដា បានទម្លាយភាពទាល់ច្រកនយោបាយ ដែលបានជាប់គាំងអស់ជិតមួយឆ្នាំមកហើយនោះ ត្រូវបានមជ្ឈដ្ឋានជាតិ និងអន្តរជាតិនានា អបអរសាទរ ជាពិសេសអង្គការសហប្រជាជាតិ ដែលបានទទូចឲ្យបក្សទាំងពីរចរចាគ្នា បញ្ចប់នយោបាយជាប់គាំងប្រកបដោយសន្តិវិធី និងស្ងៀមស្ងាត់ កាលពីពេលកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន ប្រើលុយដើម្បីដោះស្រាយបញ្ហាកម្មករក្នុងពេលរោងចក្រជាច្រើនបិទទ្វារ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត
អត្ថបទពេញនិយម
នយោបាយ
- សហមេធាវីប្រតិកម្មរឿងសមត្ថកិច្ចយាមផ្ទះ មិនឲ្យជួបលោក កឹម សុខា គឺជារឿងផ្ទុយពីច្បាប់
- តំណាងរាស្ត្រសភាអឺរ៉ុបព្រមានស្នើដក EBA បន្ថែមទៀតពីកម្ពុជាបើការបោះឆ្នោតមិនស្របតាមស្តង់ដារ
- មន្ត្រីបក្សប្រឆាំងថា ការធានារបស់លោក ស ខេង ឱ្យគណបក្សនយោបាយធ្វើសកម្មភាពដោយសេរីភាព នឹងបន្តគ្មានប្រសិទ្ធភាព
- លោក ហ៊ុន សែន ចំអកគោលនយោបាយឧបត្ថម្ភប្រាក់ដល់មនុស្សចាស់
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី