ស្ថានទូត​អាមេរិក​ខក​ចិត្តនឹង​មន្ត្រី​នាំ​ពាក្យ​អគ្គបញ្ជាការ​កងទ័ព​កម្ពុជា​ដែល​និយាយ​មិន​ពិត​ជុំវិញ​ជំហរ​អាមេរិក​រឿង​មូលដ្ឋានទ័ព​ចិន​នៅ​រាម

ដោយ មួង ណារ៉េត
2019-12-06
អ៊ីម៉ែល
មតិ
Share
បោះពុម្ព
ឯកអគ្គរដ្ឋទូត​សហរដ្ឋអាមេរិក​ប្រចាំ​នៅ​កម្ពុជា​លោក ផាទ្រីក ម័រហ្វី (Patrick Murphy) (ឆ្វេង) ក្នុងជំនួប​ជាមួយ​​អគ្គ​មេបញ្ជាការ នៃ​កង​យោធពល​ខេមរភូមិន្ទ លោក វង្ស ពិសេន។
ឯកអគ្គរដ្ឋទូត​សហរដ្ឋអាមេរិក​ប្រចាំ​នៅ​កម្ពុជា​លោក ផាទ្រីក ម័រហ្វី (Patrick Murphy) (ឆ្វេង) ក្នុងជំនួប​ជាមួយ​​អគ្គ​មេបញ្ជាការ នៃ​កង​យោធពល​ខេមរភូមិន្ទ លោក វង្ស ពិសេន។
Photo courtesy of US Embassy Phnom Penh

ស្ថានទូត​អាមេរិក​ខក​ចិត្តនឹង​មន្ត្រី​នាំ​ពាក្យ​អគ្គបញ្ជាការ​កង​យោធពល​ខេមរភូមិន្ទ ដែល​និយាយ​មិន​ពិត​ប្រាប់​សារព័ត៌មាន​ក្នុងស្រុក និង​ផ្សាយ​លើ​ទំព័រ​ហ្វេសប៊ុក​របស់​អគ្គបញ្ជាការដ្ឋាន​នៃ​កង​យោធពល​ខេមរភូមិន្ទ ជុំវិញ​ជំហរ​ឯកអគ្គរដ្ឋទូត​សហរដ្ឋអាមេរិក រឿង​មូលដ្ឋានទ័ព​ចិន នៅ​ឆ្នេរសមុទ្រ​រាម។

ស្ថានទូត​អាមេរិក នៅ​ក្នុង​សេចក្ដី​ថ្លែងការណ៍​របស់​ខ្លួន ដែល​ផ្សាយ​តាម​ទំព័រ​ហ្វេសប៊ុក​របស់​ស្ថានទូត​សហរដ្ឋអាមេរិក​ប្រចាំ​នៅ​កម្ពុជា កាល​ពី​ថ្ងៃ​ទី៥ ខែ​ធ្នូ​ថា សេចក្ដី​ថ្លែង​ទៅកាន់​អ្នក​សារ​ព័ត៌មាន របស់​អ្នកនាំពាក្យ​អគ្គបញ្ជាការ​កង​យោធពល​ខេមរភូមិន្ទ​លោក ថោង សូលីម៉ូ ទាក់ទង​នឹង​កិច្ចប្រជុំ​នា​ពេល​ថ្មីៗ​នេះ រវាង​ឯកអគ្គរដ្ឋទូត​សហរដ្ឋអាមេរិក​ប្រចាំ​នៅ​កម្ពុជា​លោក ផាទ្រីក ម័រហ្វី (Patrick Murphy) ជាមួយ​អគ្គ​មេបញ្ជាការ នៃ​កង​យោធពល​ខេមរភូមិន្ទ លោក វង្ស ពិសេន គឺ​មិន​ឆ្លុះបញ្ចាំង​ត្រឹមត្រូវ តាម​ប្រសាសន៍​ពិត របស់​ឯកអគ្គរដ្ឋទូត​អាមេរិក​នោះ​ទេ។

ស្ថានទូត​អាមេរិក​បន្ថែម​ថា ថ្វីបើ​លោក​ឯកអគ្គរដ្ឋទូត មានការ​ផ្លាស់ប្ដូរ​យោបល់​គ្នា​ល្អ ជាមួយ​អគ្គ​មេបញ្ជាការ នៃ​កង​យោធពល​ខេមរភូមិន្ទ​លោក វង្ស ពិសេន ក្តី តែ​អ្នកនាំពាក្យ​អគ្គបញ្ជាការ​កង​យោធពល​ខេមរភូមិន្ទ​លោក ថោង សូលីម៉ូ មិន​បាន​និយាយ​ត្រឹមត្រូវ នៅ​ក្នុង​សេចក្ដី​ថ្លែងការណ៍ អំពី​មូលដ្ឋាន​យោធា​បរទេស​នោះ​ទេ។ ស្ថានទូត​បញ្ជាក់​ខ្លឹមសារ​ពិត​នៃ​ជំនួប​នោះ ថា​លោក​ឯក​អគ្គ​រដ្ឋ​ទូត និង​សហរដ្ឋអាមេរិក នៅតែ​ព្រួយ​បារម្ភ ចំពោះ​ព័ត៌មាន​ចុះផ្សាយ​នៅ​ក្នុង​ប្រព័ន្ធ​ផ្សព្វផ្សាយ ស្ដីពី​លទ្ធភាព​ដែល​អាច​មាន​មូលដ្ឋាន​យោធា​បរទេស​នៅ​កម្ពុជា ព្រោះ​បើ​មាន​ដូច្នេះ​មែន គឺ​អាច​គំរាម​កំហែង​ដល់​អធិបតេយ្យ​របស់​កម្ពុជា និង​ស្ថិរភាព​ក្នុង​តំបន់។

ជាង​នេះ​ទៅ​ទៀត ស្ថានទូត​អាមេរិក ថា ការ​និយាយ​ខុស​ពី​ខ្លឹមសារ​ពិត នៃ​ជំហរ​របស់​មន្ត្រី​ការ​ទូត​អាមេរិក គឺ​ធ្វើ​ឱ្យ​ខូច​ដល់​ការ​ប្ដេជ្ញា​ចិត្ត ក្នុង​ការ​ស្ដារ​ទំនាក់ទំនង​ល្អ​ឡើងវិញ រវាង​សហរដ្ឋអាមេរិក និង​កម្ពុជា ដែល​ស្ថានទូត​នេះ បញ្ជាក់​ថា ខ្លួន​មានបំណង​មុតមាំ​ក្នុង​ការ​ចៀសវាង​ការ​និយាយ​ខុស​នេះ។

ឯកអគ្គរដ្ឋទូត​សហរដ្ឋអាមេរិក ប្រចាំ​នៅ​កម្ពុជា​លោក ផាទ្រីក ម័រហ្វី បាន​ជួប​ជាមួយ​អគ្គ​មេបញ្ជាការ នៃ​កង​យោធពល​ខេមរភូមិន្ទ លោក វង្ស ពិសេន នៅ​អគ្គបញ្ជាការដ្ឋាន​កង​យោធពល​ខេមរភូមិន្ទ កាលពី​ថ្ងៃ​ទី៣ ខែ​ធ្នូ ដែល​ពិភាក្សា​គ្នា អំពី​កិច្ច​សហប្រតិបត្តិការ​ទ្វេភាគី និង​ភាព​ជឿនលឿន​ចាំបាច់​សម្រាប់​ពង្រីក​កិច្ចសហការ​ផ្នែក​សន្តិសុខ ដែល​រួមមាន​ការ​លើក​កម្ពស់​សិទ្ធិ​មនុស្ស និង​លទ្ធិ​ប្រជាធិបតេយ្យ និង​ការពារ​អធិបតេយ្យភាព​របស់​កម្ពុជា ពី​ការ​តាំង​មូលដ្ឋាន​យោធា​បរទេស។

ក្នុង​ថ្ងៃ​ដដែល​នោះ ទំព័រ​ហ្វេសប៊ុក​របស់​អគ្គបញ្ជាការដ្ឋាន​នៃ​កង​យោធពល​ខេមរភូមិន្ទ បាន​ចុះផ្សាយ ដោយ​អះអាង​ជំនួស​លោក ផាទ្រីក ម័រហ្វី ថា ឯកអគ្គរដ្ឋទូត​អាមេរិក​រូប​នេះ បាន​ចាត់​ទុក​ការផ្សាយ​ព័ត៌មាន​កន្លងទៅ ដែល​ថា កម្ពុជា​បាន​អនុញ្ញាត ឱ្យ​មាន​មូលដ្ឋាន​យោធា​ចិន នៅ​លើ​ទឹកដី​កម្ពុជា​នោះ ថា​ជា​ការ​មិន​ពិត​នោះ​ទេ ហើយ​អះអាង​បន្ថែម​ថា ឯកអគ្គរដ្ឋទូត​រូប​នេះ យល់ស្រប​ថា ការ​ចុះផ្សាយ​ព័ត៌មាន​បែប​នោះ គឺ​ចង់​ធ្វើ​ឱ្យ​បាត់បង់​ស្ថិរភាព​តែប៉ុណ្ណោះ។

ក្រោយ​ការ​ចុះផ្សាយ​តាម​ទំព័រ​ហ្វេសប៊ុក​របស់​អគ្គបញ្ជាការដ្ឋាន នៃ​កង​យោធពល​ខេមរភូមិន្ទ​នេះ​រួច កាលពី​ថ្ងៃ​ទី៥ ខែ​ធ្នូ អ្នកនាំពាក្យ​អគ្គបញ្ជាការ​កង​យោធពល​ខេមរភូមិន្ទ​លោក ថោង សូលីម៉ូ ក៏​បាន​ផ្ដល់​សម្ភាសន៍​ដល់​សារព័ត៌មាន​ក្នុងស្រុក the Khmer Times ដោយ​បញ្ចេញយោបល់​ជំនួស​ឯកអគ្គរដ្ឋទូត​អាមេរិក ជុំវិញ​ជំហរ​សហរដ្ឋអាមេរិក រឿង​មូលដ្ឋានទ័ព​ចិន​នៅ​លើ​ដី​ខ្មែរ​នេះ​ដែរ​។ លោក ថោង សូលីម៉ូ អះអាង​ថា លោក ផាទ្រីក ម័រហ្វ៊ី យល់ស្រប​ថា ព័ត៌មាន ដែល​ចុះផ្សាយ​អំពី​មូលដ្ឋានទ័ព​ចិន​នៅ​កម្ពុជា​នោះ ជា​ព័ត៌មាន​ប្រឌិត។

ស្ថានទូត​អាមេរិក ក៏​រម្លឹក​ដល់​ផ្នែក​សារព័ត៌មាន ថា​ស្ថានទូត​មាន​ផ្នែក​ទទួលបន្ទុក​លើ​ផ្នែក​សារព័ត៌មាន សម្រាប់​ផ្ដល់​ព័ត៌មាន​ត្រឹមត្រូវ ស្ដីពី​គោល​នយោបាយ សេចក្ដី​ថ្លែងការណ៍ និង​កិច្ច​ការងារ​ទំនាក់ទំនង​របស់​សហរដ្ឋ​អាមេរិក។

អាស៊ីសេរី នៅ​មិនទាន់​អាច​សុំ​ការ​បំភ្លឺ​ពី​អ្នកនាំពាក្យ​អគ្គបញ្ជាការ​កង​យោធពល​ខេមរភូមិន្ទ​លោក ថោង សូលីម៉ូ បាន​នៅឡើយ​ទេ គិត​ត្រឹម​ម៉ោង​ផ្សាយ​នេះ ដោយសារ​ទូរស័ព្ទ​ចូល​ជាច្រើន​ដង តែ​គ្មាន​អ្នកទទួល។

ទោះ​ជា​យ៉ាង​នេះ​ក្តី សហរដ្ឋអាមេរិក បាន​បង្ហាញ​ជំហរ​របស់​ខ្លួន​ជាប្រចាំ​ថា ​ខ្លួន​ព្រួយបារម្ភ​អំពី​លទ្ធភាព នៃ​ការ​ដាក់​មូលដ្ឋាន​ទ័ព​របស់​ចិន នៅ​លើ​ទឹកដី​កម្ពុជា​។ នៅ​ក្នុង​លិខិត​របស់​ប្រធានាធិបតី​អាមេរិក​លោក ដណាល់ ត្រាំ ទៅ​លោក ហ៊ុន សែន នា​ពេល​ថ្មីៗ​នេះ ក៏​លោក ដូណាល់ ត្រាំ បញ្ជាក់​ជំហរ​នេះ​ជាថ្មី ដោយ​រម្លឹក​ឱ្យ​ប្រទេស​កម្ពុជា រក្សា​របប​ប្រជាធិបតេយ្យ​សេរី​ពហុបក្ស​របស់​ខ្លួន និង​រក្សា​អធិបតេយ្យ​ជាតិ​របស់​ខ្លួន។

ក្រោយ​ការ​បោះឆ្នោត​ឆ្នាំ​២០១៨ ដែល​ផាត់​ចោល​គណបក្ស​សង្គ្រោះ​ជាតិ ដែល​មាន​អាសនៈ​ក្នុង​រដ្ឋសភា របប​លោក ហ៊ុន សែន រង​ការ​ថ្កោលទោស​ជុំ​ទិស ពី​សហគមន៍​អន្តរជាតិ ដែល​ចាត់​ទុក​ការ​បោះឆ្នោត​នោះ ថា ជា​ការ​បោះឆ្នោត​ក្លែងក្លាយ។

ក្នុង​រយៈពេល​ជាង​មួយ​ឆ្នាំ​ចុងក្រោយ​នេះ របប​ក្រុងភ្នំពេញ​ព្យាយាម​បង្ហាញ​ភាព​ស្រប​ច្បាប់​របស់​ខ្លួន តាម​រូបភាព​នៃ​ជំនួប​ជាមួយ​មន្ត្រី​រដ្ឋាភិបាល​បរទេស។ ជំនួប​ជាច្រើន ធ្វើឡើង​ញឹកញាប់​ជា​មួយ​​មន្ត្រី​រដ្ឋាភិបាល​នៃ​ប្រទេស​កុម្មុយនិស្ត ដូចជា​ប្រទេស​ចិន និង​វៀតណាម និង​ប្រទេស​អឺរ៉ុប​ខាងកើត ដែល​ជា​អតីត​ប្លុក​កុម្មុយនិស្ត។

ដោយឡែក ជំនួប​ជាមួយ​តំណាង​ប្រទេស​ប្រជាធិបតេយ្យ​សេរី​វិញ ជា​ញឹកញយ នៅក្រោយ​ជំនួប​ទាំងនោះ ខ្លឹមសារ​ពិត​នៃ​ជំនួប ច្រើនតែ​ត្រូវ​បាន​មន្ត្រី​របប​ក្រុងភ្នំពេញ និង​ប្រព័ន្ធ​ឃោសនា​របស់​លោក ហ៊ុន សែន និយាយ ឬ​ផ្សាយ​លើស ឬ​ផ្ទុយ​ពី​ការពិត​ទាំងស្រុង។

ឧទាហរណ៍ ដូច​កាលពី​ខែ​តុលា ឆ្នាំ​២០១៨ មន្ត្រី​ជាន់ខ្ពស់​នៃ​សហភាព​អន្តរ​សភា (IPU) ហួស​ចិត្តនឹង​ការ​បន្លំ​សារ​របស់​ប្រធាន​ស្ថាប័ន​អន្តរជាតិ​មួយ​នេះ ដោយ​មន្ត្រី​រដ្ឋសភា​ឯក​បក្ស នៃ​របប​លោក ហ៊ុន សែន ដែល​កាលណោះ អ្នកស្រី ឃួន សុដារី អនុប្រធាន​ទី​២​រដ្ឋសភា បាន​ប្រាប់​ប្រព័ន្ធ​ឃោសនា​របស់​របប​លោក ហ៊ុន សែន ជាពិសេស​សារព័ត៌មាន the Fresh News ថា ប្រធាន​សហភាព​អន្តរ​សភា អ្នកស្រី ហ្កាប្រ៊ីឡា គូអេវ៉ាស បារ៉ុន (Gabriela Cuevas Barron) អបអរ​សាទរ​យ៉ាង​ពេញទំហឹង ហើយ​វាយតម្លៃ​ខ្ពស់ ជាពិសេស​លទ្ធផល​ដ៏​ជោគជ័យ នៃ​ការបោះឆ្នោត​ឆ្នាំ​២០១៨ នៅ​កម្ពុជា ដែល​បាន​បង្ហាញ​អំពី​លទ្ធិប្រជាធិបតេយ្យ​យ៉ាង​ពិត​ប្រាកដ។

ភ្លាមៗ​នោះ អ្នកស្រី​ប្រធាន​សហភាព​អន្តរ​សភា បាន​សរសេរ​សារ​បដិសេធ​យ៉ាង​ដាច់​អហង្កា នៅ​លើ​បណ្ដាញ​សង្គម ធ្វីតទ័រ (Twitter) របស់​អ្នកស្រី ដោយ​អ្នកស្រី បញ្ជាក់​ថា អ្នកស្រី​ពិតជា​មិន​បាន​​អបអរសាទរ​លទ្ធផល​បោះឆ្នោត​នៅ​កម្ពុជា​នោះ​ទាល់តែសោះ។ ផ្ទុយទៅវិញ អ្នកស្រី​ថែមទាំង​បាន​ចោទ​ជា​សំណួរ ទៅកាន់​គណៈប្រតិភូ​រដ្ឋ​សភា​ឯក​បក្ស​នៃ​របប​លោក ហ៊ុន សែន អំពី​ករណី​រំលោភ​សិទ្ធិ​មនុស្ស ដែល​សហភាព​អន្តរ​សភា​បាន​កត់​ត្រាទុក​ថែម​ទៀត​ផង។

ក្នុង​ជំនួប​មួយទៀត​កាលពី​ខែ​កញ្ញា រវាង​មន្ត្រី​​ការទូត​ជាន់ខ្ពស់​អង់គ្លេស​អ្នកស្រី ហិតឌ័រ វីល័រ (Heather Wheeler) ដែល​ជា រដ្ឋមន្ត្រី​ទទួលបន្ទុក​កិច្ចការ​អាស៊ី និង​ប៉ាស៊ីហ្វិក នៃ​ក្រសួង​ការបរទេស​អង់គ្លេស ជាមួយ​នឹង​លោក ប្រាក់ សុខុន ត្រូវ​បាន​មន្ត្រី​ក្រសួង​ការបរទេស​របប​លោក ហ៊ុន សែន គឺ​លោក មាស គឹមសេង យក​មក​បកស្រាយ​ប្រាប់​ប្រព័ន្ធ​ឃោសនា​របប​នេះ ថា អ្នកស្រី ហិតឌ័រ វីល័រ សន្យា​ថា ប្រទេស​អង់គ្លេស នឹង​នៅតែ​ផ្ដល់​ការ​អនុគ្រោះ​ពន្ធ EBA ដល់​កម្ពុជា និង​ប្រទេស​ក្រីក្រ​ដទៃ​ទៀត ពេល​អង់គ្លេស​ដក​ខ្លួន​ចេញពី​សហភាព​អឺរ៉ុប។

សារ​នេះ​ធ្វើ​ឱ្យ​មាន​ប្រតិកម្ម​តប​ពី​អង្គការ​យុទ្ធនាការ​សិទ្ធិ​កម្មករ​រោងចក្រ​កាត់ដេរ​ពិភពលោក នៅ​អង់គ្លេស (Labour Behind the Label) និង​សភា​សហជីព​ពាណិជ្ជកម្ម (Trade Union Congress) ដែល​សរសេរ​ញត្តិ​កាលពីដើម​ខែ​តុលា អំពាវនាវ​ឱ្យ​រដ្ឋាភិបាល​អង់គ្លេស បញ្ឈប់​ធ្វើ​សេចក្ដី​ថ្លែងការណ៍​ណាមួយ ដែល​ត្រូវ​ផ្សព្វផ្សាយ​ជា​សាធារណៈ នាំ​ឱ្យ​ប៉ះពាល់​ដល់​ការសម្រេចចិត្ត​ព្យួរ​ការ​អនុគ្រោះ​ពន្ធ EBA របស់​សហភាព​អឺរ៉ុប ព្រោះ​សហភាព​អឺរ៉ុប​កំពុង​ពិចារណា​ព្យួរ​ការ​អនុគ្រោះ​ពន្ធ​ពី​កម្ពុជា ដោយសារ​បញ្ហា​រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​ធ្ងន់ធ្ងរ។

បើ​ទោះ​បី​ជា​មន្ត្រី​របប​លោក ហ៊ុន សែន អះអាង​ថា អង់គ្លេស​បញ្ជាក់​ថា នឹង​នៅតែ​បន្ត​ផ្ដល់​ប្រព័ន្ធ​អនុគ្រោះ​ពន្ធ EBA ដល់​កម្ពុជា ក្រោយ​អង់គ្លេស​ចាកចេញ​ពី​សហ​ភាព​អឺរ៉ុប​យ៉ាង​ណា​ក្តី ក៏​មន្ត្រី​ការបរទេស​អង់គ្លេស បង្ហើប​ប្រាប់​អាស៊ីសេរី ថា មន្ត្រី​ជាន់ខ្ពស់​រូប​នេះ មិន​បាន​សន្យា​ដូច្នេះ​នោះ​ឡើយ ព្រោះ​ការ​បន្ត​ផ្ដល់​ការ​អនុគ្រោះ​ពន្ធ EBA ឬ​មិន​ផ្ដល់​ឱ្យ​កម្ពុជា គឺ​អាស្រ័យ​លើ​សេចក្ដី​សម្រេច​របស់​គណៈកម្មការ​អឺរ៉ុប ដែល​កំពុង​ពិនិត្យ និង​វាយតម្លៃ​ស្ថានភាព​រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​នៅ​កម្ពុជា ដែល​នៅ​ពេល​នេះ ប្រទេស​អង់គ្លេស ក៏​កំពុង​នៅ​ជា​សមាជិក​មួយ​ក្នុង​គណៈកម្មការ​នេះ​ដែរ។

មន្ត្រី​ដដែល​រូប​នេះ បញ្ជាក់​បន្ថែម​ថា ប្រទេស​កម្ពុជា ស្ថិត​ក្នុង​ស្ថានភាព​ពិសេស ខុសគ្នា​ពី​ស្ថានភាព​ប្រទេស​ក្រីក្រ​ដទៃ​ទៀត។ ពិសេស​ត្រង់​ថា កម្ពុជា​កំពុង​រង​ការ​ត្រួត​ពិនិត្យ ជុំវិញ​ស្ថានភាព​សិទ្ធិ​មនុស្ស និង​ប្រជាធិបតេយ្យ​នេះ។ ដូច្នេះ ការសម្រេច បើ​ទោះ​បី​ក្រោយ​ចាក​ចេញពី​សហភាព​អឺរ៉ុប ចក្រភព​អង់គ្លេស​មាន​សិទ្ធិ​ស្វ័យ​សម្រេច ដោយ​ឯករាជ្យ​ខ្លួនឯង​យ៉ាង​ក្ដី ក៏​ការសម្រេច​នេះ គឺ​ចៀស​មិន​ផុត​ពី​ស្របតាម​អ្វី​ដែល​គណៈកម្មការ​អឺរ៉ុប នឹង​សម្រេច​រឿង​សិទ្ធិមនុស្ស និង​ប្រជាធិបតេយ្យ​នេះ​ដែរ។

មន្ត្រី​អង្គការ​សង្គម​ស៊ីវិល និង​អ្នកឃ្លាំមើល​សង្គម តែងតែ​លើកឡើង​អំពី​ក្ដី​ព្រួយបារម្ភ ចំពោះ​ការ​ខ្វះ​ប្រភព​ព័ត៌មាន​ឯករាជ្យ ក្រោយ​របប​ក្រុងភ្នំពេញ បិទ​ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា។ ប្រព័ន្ធ​ផ្សព្វផ្សាយ​ក្នុងស្រុក ភាគ​ច្រើន​រង​ការរិះគន់ ថា ជា​ឧបករណ៍​ឃោសនា​ឱ្យ​បក្ស​កាន់​អំណាច និង​ផ្សព្វផ្សាយ​ព័ត៌មាន​ប្រជាភិថុតិ ជា​ជាង​ព័ត៌មាន​ពិត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

The u.s must keep eyes and ears closely on 3 amigos commies...no trust them all

We wishing the u.s Ambassador Mr.Patrick Murphy must takes a serious consequence with all these fascist communism,most are"crooks,thieves,lies,liars,cheater,scheme,barbarism,piracy,inhuman,criminal minds,no mutual respect to other and etc".We would like Mr.Ambassador just keep eye and ear closely on these radical commies movement.Please don't trust with these fascist communism ideology especially like China/Viet and HSen all are the same boat"very dangerous scheme out there".

Dec 06, 2019 05:54 PM

គេហទំព័រ​ទាំងមូល