សមត្ថកិច្ចចាប់មន្ត្រីបក្សភ្លើងទៀនម្នាក់ទៀត បញ្ជូនទៅឃុំខ្លួន នៅពន្ធនាគារខេត្តកំពង់ស្ពឺ
2024.07.30
លោក តុ តារា ជំទប់ទី២ឃុំកក់ ស្រុកបសេដ្ឋ ខេត្តកំពង់ស្ពឺ មកពីគណបក្សភ្លើងទៀន ដែលកម្លាំងអាជ្ញាធរចាប់ខ្លួន នៅថ្ងៃទី២៩ ខែកក្កដា ឆ្នាំ២០២៤។
រូប៖ កម្មជនផ្តល់ឱ្យ
សមត្ថកិច្ចខេត្តកំពង់ស្ពឺបានចាប់ខ្លួនជំទប់ទី២ ឃុំកក់ ស្រុកបសេដ្ឋ មកពីគណបក្សភ្លើងទៀន គឺលោក តុ តារា នៅព្រឹកនៅថ្ងៃទី២៩ ខែកក្កដា។
ប្រពន្ធរបស់លោក តុ តារា គឺលោកស្រី ឈួន ចាន់រី ប្រាប់វិទ្យុអាស៊ីសេរីថា ប៉ូលិសជាច្រើននាក់ឃាត់ខ្លួនប្ដីលោកស្រី អំឡុងពេលចូលរួមបុណ្យសពសាច់ញាតិនៅឃុំកក់ ស្រុកបសេដ្ឋ ដោយមិនបញ្ជាក់ពីមូលហេតុអ្វីនោះទេ។ លោកស្រីបន្តថា សមត្ថកិច្ច បានរុញប្ដីលោកស្រីបញ្ចូលឡានដឹកទៅសាកសួរនៅតុលាការ ហើយបន្ទាប់មកបញ្ជូនទៅឃុំខ្លួននៅពន្ធនាគារខេត្តកំពង់ស្ពឺនៅល្ងាចថ្ងៃទី២៩ ខែកក្កដា។ អ្នកស្រីចាត់ទុកការចាប់ខ្លួនប្ដីលោកស្រី ដែលជាមន្ត្រីបក្សប្រឆាំងនេះជារឿងនយោបាយ ហើយទាមទារឱ្យតុលាការដោះលែងប្ដីឱ្យមានសេរីភាពឡើងវិញ ព្រោះប្តីលោកស្រីគ្មានកំហុសនោះទេ។
ជុំវិញរឿងនេះ អ្នកនាំពាក្យតុលាការខេត្តកំពង់ស្ពឺលោក ផេង ស៊ីភ័ណ ប្រាប់វិទ្យុអាស៊ីសេរីតាមប្រព័ន្ធតេឡេក្រាមថា លោក តុ តារា ត្រូវបានសមត្ថកិច្ចចាប់ខ្លួនក្នុងសំណុំរឿងជាមួយលោក អ៊ុក សុវណ្ណឆន លោក ប៊ុន សារុំ និងលោក ចែម សាវឿន ដែលកំពុងជាប់ឃុំ អំពីបទ «បរិហារកេរ្តិ៍ជាសាធារណៈ ញុះញង់ឱ្យមានការរើសអើង រំលោភលើលំនៅឋាន និងបទប៉ុនប៉ងគំរាមយកមានស្ថានទម្ងន់ទោសទាក់ទងនឹងជនរងគ្រោះ»។
សេចក្ដីប្រកាសព័ត៌មាន របស់អយ្យការនៃតុលាការខេត្តកំពង់ស្ពឺកាលពីថ្ងៃទី២៨ ខែកក្កដាឱ្យដឹងថា ការចោទប្រកាន់លើសមាជិកបក្សជំទាស់ទាំងនេះធ្វើឡើងតាមម្ចាស់ដើមបណ្ដឹង លោក ញ៉ែម ឈឿន លោក ញី សីហា និងលោក ចាន់ វត្តនា។
សមត្ថកិច្ចខេត្តកំពង់ស្ពឺ កាលពីថ្ងៃទី២៦ ខែកក្កដា បានឃាត់ខ្លួនមន្ត្រីគណបក្សប្រឆាំងបីនាក់ គឺជំទប់ទី២ ឃុំពោធិអង្ក្រង មកពីគណបក្សភ្លើងទៀន ខេត្តកំពង់ស្ពឺ លោក អ៊ុក សុវណ្ណឆន និង២នាក់ទៀតជាសមាជិកក្រុមប្រឹក្សាស្រុកបសេដ្ឋ មកពីគណបក្សឆន្ទៈខ្មែរ គឺលោក ប៊ុន សារុំ និងលោក ចែម សាវឿន។
ទោះជាយ៉ាងណាក្ដី គណបក្សប្រឆាំង ក្រុមអង្គការសិទ្ធិមនុស្សជាតិ និងអន្តរជាតិ បានថ្កោលទោសរឿងទាំងនេះថា ជាការធ្វើទុក្ខបុកម្នេញផ្នែកនយោបាយ ហើយទាមទារឱ្យរដ្ឋាភិបាលលោក ហ៊ុន ម៉ាណែត បើកលំហប្រជាធិបតេយ្យ បញ្ឈប់ការធ្វើទុក្ខបុកម្នេញគ្រប់រូបភាព ដោយទម្លាក់ចោលការចោទប្រកាន់ និងដោះលែងអ្នកទោសនយោបាយទាំងអស់ឱ្យមានសេរីភាពឡើងវិញដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- ស្តូបមិត្តភាពកម្ពុជាវៀតណាមនៅខេត្តសៀមរាបរងការបំផ្លាញដោយគ្រាប់បែក ក្នុងពេលពលរដ្ឋបារម្ភបាត់បង់ដីទៅវៀតណាម ដោយសារគម្រោង CLV
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
អត្ថបទពេញនិយម
នយោបាយ
- សាលាដំបូងរាជធានីភ្នំពេញ ផ្ដន្ទាទោសមន្ត្រីគណបក្សកម្លាំងជាតិ លោក គា វិសាល ឲ្យជាប់ពន្ធនាគារ ២ឆ្នាំកន្លះ
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី
- គណបក្សកម្លាំងជាតិ ថាការបន្តចាប់ខ្លួនមន្ត្រីជាន់ខ្ពស់របស់គណបក្សនេះ ធ្វើឲ្យប៉ះពាល់ដំណើរការប្រជាធិបតេយ្យ