ប្រេសិតពិសេសរបស់ប្រធានអាស៊ានទទូចឱ្យរបបសឹកមីយ៉ាន់ម៉ា (Myanmar) ឬភូមា (Burma) បញ្ជូនអ្នកស្រី អ៊ុង សានស៊ូជី (Aung San Suu Kyi) ត្រឡប់ទៅលំនៅឋានវិញ។ ការទទូចស្នើសុំនេះកើតមានឡើងនៅរយៈពេលប៉ុន្មានថ្ងៃមុនដំណើរទស្សនកិច្ចលើកទីពីររបស់ប្រេសិតពិសេសអាស៊ាន លោក ប្រាក់ សុខុន ទៅកាន់ប្រទេសភូមា ដែលគ្រោងធ្វើនៅថ្ងៃពុធសប្តាហ៍នេះ។ របបសឹកភូមាកាលពីសប្តាហ៍មុនបានសម្រេចផ្ទេរអ្នកស្រី អ៊ុង សានស៊ូជី ពីការឃុំខ្លួននៅគេហដ្ឋានទៅឃុំក្នុងពន្ធនាគារដាច់ដោយឡែកមួយ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី ឱ្យដឹងតាមរយៈសេចក្តីថ្លែងការណ៍ផ្សាយកាលពីថ្ងៃទី២៧ ខែមិថុនា ថា ប្រេសិតពិសេសរបស់អាស៊ានស្ដីពីបញ្ហាមីយ៉ាន់ម៉ា លោក ប្រាក់ សុខុន បានលើកឡើងនៅក្នុងលិខិតមួយច្បាប់ផ្ញើជូនរដ្ឋមន្ត្រីការបរទេសនៃរបបសឹកភូមា គឺលោក វុណ្ណា ម៉ង វីន (Wunna Maung Lwin) ពីការទទូចរបស់សហសេវិកអាស៊ាន ដែលស្នើឱ្យរបបសឹកភូមាអនុគ្រោះ និងសម្រួលដល់ការបញ្ជូនអ្នកស្រី អ៊ុង សានស៊ូជី ទៅកាន់លំនៅឋានវិញ ជាទីដែលអ្នកស្រីត្រូវបានឃុំខ្លួនតាំងពីដំបូង។ ការធ្វើដូច្នេះ គឺដោយផ្អែកលើហេតុផលសុខភាព និងសភាពទ្រុឌទ្រោមរបស់អ្នកស្រី។ សេចក្តីថ្លែងការណ៍ដដែលពុំបានបញ្ជាក់ពីជំហរជាក់លាក់របស់កម្ពុជា ថាតើកម្ពុជាទាមទារឱ្យរបបសឹកភូមាទម្លាក់ចោលរាល់បទចោទប្រឆាំងនឹងមេដឹកនាំស្របច្បាប់ភូមា អ្នកស្រី អ៊ុង សានស៊ូជី ដែលត្រូវបានរបបសឹកភូមាធ្វើរដ្ឋប្រហារទម្លាក់ចេញពីអំណាចកាលពីដើមឆ្នាំមុន ឬយ៉ាងណានោះទេ។
លោក ប្រាក់ សុខុន បានលើកឡើងថា ការផ្សះផ្សាជាតិដោយសន្តិវិធីមិនអាចកើតឡើងបានឡើយនៅពេលដែលភាគីមួយនៃជម្លោះមិនត្រូវបានបញ្ចូលទៅក្នុងផ្នែកមួយនៃដំណោះស្រាយ។
មេដឹកនាំស្របច្បាប់ភូមា អ្នកស្រី អ៊ុង សានស៊ូជី រងនូវការផ្តន្ទាទោសពីរបបសឹកភូមាជាច្រើនករណី ហើយត្រូវបានតុលាការនៃរបបសឹកភូមាកាត់ទោសឱ្យជាប់ពន្ធនាគាររយៈពេល ១១ឆ្នាំ។ អ្នកស្រីក៏កំពុងប្រឈមនឹងបទចោទជាច្រើនករណីផ្សេងទៀត ដែលអាចឱ្យអ្នកស្រីជាប់គុករហូតដល់ទៅជាង ១៨០ឆ្នាំ។ ក្រៅពីនេះ របបសឹកភូមាក៏មានផែនការប្រហារជីវិតលើបុគ្គល និងសកម្មជននយោបាយភូមាចំនួន៤នាក់ ដែលប្រឆាំងនឹងរបបសឹក ក្នុងនោះមានមួយរូបជាអតីតៈតំណាងរាស្ត្ររបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) របស់អ្នកស្រី អ៊ុង សានស៊ូជី និងមួយរូបជាជាមេដឹកនាំនៃចលនាងើបបះបោរប្រឆាំងនឹងរបបផ្ដាច់ការយោធាភូមាកាលពីពេលអតីតកាល។ លោកនាយករដ្ឋមន្ត្រី ហ៊ុន សែន បានអំពាវនាវឱ្យរបបសឹកភូមាពិចារណាឡើងវិញ និងជៀសវាងការកាត់ទោសប្រហារជីវិតលើបុគ្គលនយោបាយភូមាទាំងនេះ។
កម្ពុជាក្នុងនាមជាប្រធានប្តូរវេនអាស៊ានឆ្នាំ២០២២ កំពុងបង្ហាញជំហរមិនច្បាស់លាស់ជុំវិញករណីវិបត្តិនយោបាយនៅប្រទេសភូមានេះ ដោយបានព្យាយាមបញ្ចូលមេដឹកនាំរបបសឹកខុសច្បាប់ភូមាឱ្យមកចូលរួមកិច្ចប្រជុំរបស់អាស៊ានឡើងវិញ។ ជាក់ស្តែងដូចជាកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំឧត្តមមន្ត្រីអាស៊ាន ដែលទើបនឹងបិទបញ្ចប់កាលពីពេលថ្មីៗ នេះជាដើម។ ទង្វើទាំងនេះ ធ្វើឱ្យកម្ពុជារងនូវការរិះគន់ខ្លាំងថា កំពុងធ្វើផ្ទុយពីគោលការណ៍នៃកិច្ចព្រមព្រៀងជាឯកច្ឆន្ទ ៥ចំណុច របស់អាស៊ានស្ដីពីការដោះស្រាយវិបត្តិនយោបាយនៅភូមា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។