ជនរងគ្រោះ និងមន្ត្រីគណបក្សសង្គ្រោះជាតិ គ្មានជំនឿថា សមត្ថកិច្ចអាចរកយុត្តិធម៌ជូនជនរងគ្រោះក្នុងសំណុំរឿងជនមិនស្គាល់មុខលួចវាយសកម្មជនបក្សប្រឆាំងបានឡើយ។ សមត្ថកិច្ចអះអាងថា សំណុំរឿងទាំងនេះ កំពុងត្រូវបានស៊ើបអង្កេតដោយមន្ត្រីជំនាញ ក៏ប៉ុន្តែមិនទាន់មានលទ្ធផលដូចការចង់បានរបស់ជនរងគ្រោះ និងក្រុមសង្គមស៊ីវិលនោះទេ។
អតីតមន្ត្រីគណបក្សប្រឆាំង រិះគន់អាជ្ញាធរមានសមត្ថកិច្ចថា មិនមានឆន្ទៈក្នុងការរកយុត្តិធម៌ជូនពួកគាត់នោះទេ ព្រោះជាច្រើនខែមកនេះ សមត្ថកិច្ចមិនទាន់ចាប់បានជនដៃដល់ណាម្នាក់យកមកផ្ដន្ទាទោសនៅឡើយ។
ចៅសង្កាត់ជាប់ឆ្នោតគណបក្សសង្គ្រោះជាតិនៅសង្កាត់អូរឫស្សី៣ ខណ្ឌ៧មករា រាជធានីភ្នំពេញ លោក ស៊ិន សំអាត គឺជាជនរងគ្រោះមួយរូបក្នុងចំណោមជនរងគ្រោះជាច្រើនផ្សេងទៀតដែលត្រូវជនមិនស្គាល់មុខជិះម៉ូតូមកវាយពីក្រោយដោយដំបងដែក។ លោកឱ្យអាស៊ីសេរីដឹងថា របួសក្បាលរបស់លោកបានជាសះស្បើយហើយ ប៉ុន្តែរបួសផ្លូវចិត្តរបស់លោកវិញ មិនទាន់ជានោះទេ ព្រោះជនដៃដល់កំពុងមានសេរីភាព រួចផុតពីសំណាញ់ច្បាប់។ លោកចាត់ទុកការវាយដំលើរូបលោក និងសកម្មជនបក្សប្រឆាំងដទៃទៀត ជាអំពើហិង្សាផ្នែកនយោបាយ ហើយលោកគ្មានសង្ឃឹមថា នឹងទទួលបានយុត្តិធម៌ឡើយ៖ «ចេះតែមានអំពើហិង្សាបន្តបន្ទាប់ វាអត់មានចាប់បានជនល្មើសមួយករណីណា អ៊ីចឹងវាមានការឈឺចាប់ដែរ។ យើងនៅតែដេកគិតថា យើងសុំតែមួយសុខ អត់បានសុខ។ រស់នៅទាំងភ័យខ្លាច អត់មានសិទ្ធិសេរីភាព។ យើងចង់ជួបមិត្តភ័ក្ដិអតីតគណបក្សសង្គ្រោះជាតិហ្នឹង យើងអត់ហ៊ានជួបគ្នាទេ ខ្លាចគេចោទយើងហ្នឹងថាទៅជួបជុំគ្នាគិតរឿងគណបក្សទៀត។ ដូច្នេះយើងអត់មានបានជួបគ្នា រាល់ថ្ងៃនឹកគ្នា តែយើងអត់ហ៊ានទៅជួប ដោយសារខ្លាចមានបញ្ហាអំពើហិង្សាលើរូបយើងម្ដងទៀត»។
ករណីអំពើហិង្សាលើមន្ត្រីមូលដ្ឋានគណបក្សសង្គ្រោះជាតិប្រព្រឹត្តដោយជនមិនស្គាល់មុខ បានកើតឡើងជាបន្តបន្ទាប់នៅក្នុងភូមិសាស្ត្ររាជធានីភ្នំពេញ ទីដែលគណបក្សសង្គ្រោះជាតិបានឈ្នះអាសនៈក្រុមប្រឹក្សា និងចៅសង្កាត់ ច្រើនជាងគណបក្សប្រជាជនកម្ពុជារបស់លោក ហ៊ុន សែន ក្នុងការបោះឆ្នោតឃុំសង្កាត់ឆ្នាំ២០១៧ កន្លងទៅ ។ ករណីហិង្សាទាំងនេះកើតឡើងខ្លាំងនៅស្របពេលយុទ្ធនាការធ្វើទុក្ខបុកម្នេញ និងចាប់ចងមន្ត្រីបក្សប្រឆាំង ដែលគាំទ្រដំណើរមាតុភូមិនិវត្តន៍របស់លោក សម រង្ស៊ី និងថ្នាក់ដឹកនាំមួយចំនួនទៀតនៃគណបក្សសង្គ្រោះជាតិ។ ករណីចុងក្រោយបង្អស់បានកើតឡើងនៅថ្ងៃទី២០ មករា ថ្មីៗនេះ ដោយអតីតមន្ត្រីគណបក្សសង្គ្រោះជាតិខណ្ឌពោធិ៍សែនជ័យ លោក ខៀវ ឌីន ត្រូវជនមិនស្គាល់មុខពីរនាក់ជិះម៉ូតូលួចវាយពីក្រោយបណ្តាលឱ្យរងរបួសបែកក្បាលជាទម្ងន់។
ករណីអំពើហិង្សាលើមន្ត្រីគណបក្សសង្គ្រោះជាតិ ច្រើនមានលក្ខណៈប្រហាក់ប្រហែលគ្នា គឺជនដៃដល់ជិះម៉ូតូពាក់មួកសុវត្ថិភាព លួចវាយជនរងគ្រោះពីក្រោយខ្នង ហើយប្រើដំបងដែកវាយសំដៅក្បាលរបស់ជនរងគ្រោះ។ ចំណែកជនរងគ្រោះវិញ គឺសុទ្ធសឹងតែជាមន្ត្រី និងសកម្មជនគណបក្សសង្គ្រោះជាតិ ដែលមានការគាំទ្រច្រើនពីប្រជាពលរដ្ឋនៅក្នុងមូលដ្ឋាន ហើយពួកគាត់សុទ្ធតែបានអះអាងថា ពួកគាត់បានបញ្ឈប់សកម្មភាពនយោបាយតាំងពីគណបក្សសង្គ្រោះជាតិត្រូវបានរំលាយមកម្ល៉េះថែមទៀតផង។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន អះអាងថា ការស៊ើបអង្កេតរកជនដៃដល់ដែលលួចវាយសកម្មជនគណបក្សសង្គ្រោះជាតិនាពេលកន្លងទៅនោះ មិនទាន់មានលទ្ធផលជាដុំកំភួនអ្វីនោះទេ តែយ៉ាងណាលោកថា សមត្ថកិច្ចនៅតែបន្តស្រាវជ្រាវករណីនេះ។ លោកបដិសេធមតិចោទប្រកាន់ដែលថា សមត្ថកិច្ចមិនអើពើស៊ើបអង្កេតរឿងនេះ ប៉ុន្តែជាមួយគ្នានេះ លោកក៏មិនប្រាប់ពីមូលហេតុដែលសមត្ថកិច្ចត្រូវប្រើពេលយូរក្នុងការស្រាវជ្រាវករណីនេះដែរ៖ «ពេលរឿងខ្លះ យើងរកឃើញភ្លាមៗ រឿងខ្លះយើងប្រើពេលវេលា។ ដោយឡែក សម្រាប់អ្នករងគ្រោះ ឈឺចាប់ និងទន្ទឹងរង់ចាំលទ្ធផល តែអ្នកនៅខាងក្រៅចេះតែវាយតម្លៃ ព្រោះគាត់ឆក់ឱកាសហើយពេលហ្នឹង។ ក៏ប៉ុន្តែ ត្រូវយល់ថា រឿងអ្វីគាត់ហ៊ានវាយតម្លៃមុនពេលគេរកឃើញហេតុផល»។
ប្រធានប្រតិបត្តិគណបក្សសង្គ្រោះជាតិរាជធានីភ្នំពេញ លោក ម៉ន ផល្លា ចាត់ទុកការបកស្រាយរបស់សមត្ថកិច្ចនេះថា ជារឿងលេងសើច និងមិនអាចទទួលយកបាន។ លោកបញ្ជាក់ថា ជាច្រើនខែមកនេះ មន្ត្រីមូលដ្ឋានគណបក្សសង្គ្រោះជាតិនៅភ្នំពេញចំនួន ១៤នាក់ហើយ ដែលត្រូវបានជនមិនស្គាល់មុខលួចវាយ ប៉ុន្តែសមត្ថកិច្ចរកមិនឃើញជនដៃដល់ណាម្នាក់យកមកកាត់ទោសនោះឡើយ។ លោកនៅតែចោទប្រកាន់ថា ករណីហិង្សាទាំងនេះ ត្រូវបានរៀបចំដោយរបបដឹកនាំបច្ចុប្បន្ន ព្រោះអ្នកនាំពាក្យបក្សកាន់អំណាចគឺលោក សុខ ឥសាន ធ្លាប់អះអាងថា បក្សនេះបានចិញ្ចឹមឆ្កែដើម្បីទុកខាំក្រុមអ្នកប្រឆាំងដែលលោកចោទថា ជាក្រុមឧទ្ទាម។
មន្ត្រីជាន់ខ្ពស់គណបក្សសង្គ្រោះជាតិរូបនេះ គ្មានជំនឿថា សមត្ថកិច្ចនឹងរកយុត្តិធម៌ជូនជនរងគ្រោះនោះឡើយ ព្រោះមានករណីហិង្សា និងឃាតកម្មជាច្រើនដែលជាប់ពាក់ព័ន្ធរឿងនយោបាយ មិនដែលត្រូវបានអាជ្ញាធរនាំខ្លួនជនប្រព្រឹត្តយកមកផ្ដន្ទាទោសនោះឡើយ៖ «មកឆ្លើយបែបជាដោះសារថា កំពុងតែយកចិត្តទុកដាក់រកជនដៃដល់ ហើយថា ឱ្យយល់ពីទុក្ខលំបាករបស់អាជ្ញាធរ។ អ៊ីចឹងនេះគឺលេសដោះសារមួយ មិនទទួលខុសត្រូវចំពោះអ្វីដែលខ្លួនកំពុងតែអនុវត្តមុខងារ និងកាតព្វកិច្ចធានាសន្តិសុខសណ្ដាប់ធ្នាប់ជាសាធារណៈជូនប្រជាពលរដ្ឋ ហើយថែមទាំងជួយបិទបាំងតទៅទៀត។ អ៊ីចឹងខ្ញុំមិនអាចទទួលយកបានទេ ទាក់ទងនឹងការលើកឡើងរបស់អគ្គស្នងការ និងសមត្ថកិច្ចនៅក្នុងរបបក្រុងភ្នំពេញទាំងមូល»។
ចំណែក នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត ថ្លែងថា ការមិនអាចនាំខ្លួនជនដៃដល់យកមកផ្ដន្ទាទោសបែបនេះ ជាការបង្កើតវប្បធម៌និទ្ទណ្ឌភាព និងឆ្លុះបញ្ចាំងពីការរើសអើងផ្នែកនយោបាយលើសកម្មជនគណបក្សប្រឆាំង។ លោកបន្ថែមថា សមត្ថកិច្ចមិនអាចលើកហេតុផលថា សំណុំរឿងកំពុងត្រូវបានស៊ើបអង្កេត តែមិនមានលទ្ធផលបែបនេះទេ បើពុំដូច្នេះទេ សាធារណជននឹងវាយតម្លៃថា សមត្ថកិច្ចដែលមានតួនាទីការពារសន្តិសុខសុវត្ថិភាពជូនពលរដ្ឋនោះ គ្មានឆន្ទៈក្នុងការរកយុត្តិធម៌ជូនជនរងគ្រោះ ហើយអំពើហិង្សានេះគឺជាការបំភិតបំភ័យសកម្មជនគណបក្សប្រឆាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។