សាលាដំបូងខេត្តបន្ទាយមានជ័យ បញ្ជូនខ្លួនប្រធានគណបក្សភ្លើងទៀនក្រុងប៉ោយប៉ែត លោក ចៅ វាសនា ទៅឃុំខ្លួនបណ្ដោះអាសន្ននៅពន្ធនាគារ នៅថ្ងៃទី២៥ កក្កដា។
លោក ចៅ វាសនា ត្រូវបានអាជ្ញាធរចាប់ ក្រោយពីលោកបានបង្ហោះរូបគូសខ្វែងសន្លឹកឆ្នោតនៅលើបណ្ដាញសង្គមហ្វេសប៊ុក។
កូនស្រីរបស់លោក ចៅ វាសនា គឺលោកស្រី ចៅ រតនៈ បានបង្ហោះសារនៅលើហ្វេសប៊ុក (Facebook) នៅថ្ងៃទី២៥ កក្កដាថា ឪពុករបស់នាង គឺលោក ចៅ វាសនា ត្រូវបានសមត្ថកិច្ចបញ្ជូនទៅពន្ធនាគារហើយ។
វិទ្យុអាស៊ីសេរីនៅពុំទាន់អាចទាក់ទង អ្នកនាំពាក្យសាលាដំបូង ខេត្តបន្ទាយមានជ័យ សំរិទ្ធ សុខុន ដើម្បីសាកសួរអំពីបទចោទប្រកាន់ លើប្រធានគណបក្សភ្លើងទៀនក្រុងប៉ោយប៉ែតបាននៅឡើយទេ នៅថ្ងៃទី២៥ កក្កដា។
ទន្ទឹមនឹងការឃុំខ្លួនមន្ត្រីគណបក្សភ្លើងទៀននេះដែរ មានមនុស្សចំនួន ៥នាក់ផ្សេងទៀត ត្រូវបានអាជ្ញាធរឃាត់ខ្លួននៅក្នុងថ្ងៃបោះឆ្នោត កាលពីថ្ងៃទី២៣ កក្កដា ក្នុងពេលចាប់ខ្លួនលោក ចៅ វាសនា ដែរ។ ក្នុងនោះ មានមន្ត្រីគណបក្សភ្លើងទៀនចំនួន ២នាក់ និង ៣នាក់ផ្សេងទៀតជាប្រជាពលរដ្ឋ។ ចំពោះមន្ត្រីគណបក្សភ្លើងទៀនទាំង ២នាក់នោះ គឺក្រុមប្រឹក្សាឃុំនៃគណបក្សភ្លើងទៀន ស្រុកចំការលើ ខេត្តកំពង់ចាម លោក ជឹម សុជាតិ និងអនុប្រធានគណៈកម្មាធិការប្រតិបត្តិគណបក្សភ្លើងទៀនខេត្តប៉ៃលិន លោក ឡោ ធន។ ប៉ុន្តែអាជ្ញាធរបានដោះលែងពួកគាត់ឲ្យមានសេរីភាពឡើងវិញហើយ។
ក្រុមប្រឹក្សាឃុំនៃគណបក្សភ្លើងទៀន ស្រុកចំការលើ ខេត្តកំពង់ចាម លោក ជឹម សុជាតិ ប្រាប់សារព័ត៌មានវីអូអេ (VOA) ថា លោកត្រូវបានអាជ្ញាធរ ឃាត់ខ្លួនពេលកំពុងឈរថតរូប ខណៈមន្ត្រី គ.ជ.ប រាប់សន្លឹកឆ្នោតកាលពីម៉ោង ៣រសៀលថ្ងៃអាទិត្យ ទី២៣ កក្កដា ប៉ុន្តែសមត្ថកិច្ចបានដោះលែងលោកវិញ នៅយប់ថ្ងៃដដែល។
ចំណែកឯអនុប្រធានគណៈកម្មាធិការប្រតិបត្តិគណបក្សភ្លើងទៀនខេត្តប៉ៃលិន លោក ឡោ ធន មានប្រសាសន៍ថា អំឡុងពេលដែលអាជ្ញាធរ ឃាត់ខ្លួនលោកនោះ គឺបានសួរលោក អំពីការណែនាំពលរដ្ឋឱ្យគូសបំផ្លាញសន្លឹកឆ្នោត តែលោកបញ្ជាក់ថា លោកមិនបានធ្វើនោះទេ។
លោក ឡោ ធន៖«គេមកហៅឆៅៗ ហ្មងហ្នឹង។ ពេលទៅដល់ហ្នឹងមើលទៅប្រធានបទហ្នឹង ឃើញថា គេសួរនាំពីរឿងករណីបំផ្លាញសន្លឹកឆ្នោតហ្នឹងហា តើយើងបាន ចង់និយាយថា បានណែនាំ ឬក៏បានបទបញ្ជាពីណាមក ហើយគេផ្ដោតលើលោក ខឹម មុនីកុសល ហាណា បានណែនាំអីៗ ទាក់ទិននឹងការគូសសន្លឹកឆ្នោតចោលអីហ្នឹង ប៉ុន្តែយើងអត់បានប្រព្រឹត្ត»។
លោក ឡោ ធន ត្រូវបានសមត្ថកិច្ចជាង ១០នាក់ ឃាត់ខ្លួនដោយគ្មានបង្ហាញដីកាពីតុលាការ និងដឹកដោយរថយន្តនាំទៅសាកសួរ នៅស្នងការដ្ឋាននគរបាលខេត្តប៉ៃលិន កាលពីព្រឹកថ្ងៃទី២៤ កក្កដា ។ ក្រោយពីសមត្ថកិច្ចសាកសួរ និងមិនមានតម្រុយដាក់បន្ទុកលោក ឡោ ធន បាន សមត្ថកិច្ចបានដោះលែងលោកវិញ នៅរសៀលថ្ងៃទី២៤ កក្កដា។
វិទ្យុអាស៊ីសេរី នៅមិនទាន់អាចទាក់ទង ស្នងការនៃស្នងការដ្ឋាននគរបាលខេត្តប៉ៃលិន លោក សេង សុគន្ធ ដើម្បីសុំការបកស្រាយជុំវិញការឃាត់ខ្លួនទៅសួរនាំដោយគ្មានដីកានេះបានទេ នៅថ្ងៃទី២៥ កក្កដា។
ទាក់ទងនឹងរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី ការឃាត់ខ្លួន និងនាំខ្លួនដោយគ្មានដីកាបង្គាប់បញ្ជាពីតុលាការ គឺជាអំពើរំលោភលើនីតិវិធីច្បាប់ និងប៉ះពាល់ដល់សិទ្ធិ និងសេចក្ដីថ្លៃថ្នូររបស់បុគ្គល។
លោក យិន ម៉េងលី៖ «យើងចាប់មនុស្សយកទៅហើយ បានយើងចាប់ផ្ដើមស្វែងរកបទល្មើស ចាប់មនុស្សយកទៅចាប់ផ្ដើមឆែកមើលទូរស័ព្ទរបស់គាត់។ យើងសួរថា ដែលចាប់គាត់ទៅហ្នឹងគាត់មានបទល្មើសអី?យើងសួរសិនណា។ ត្រូវប្រាប់ពីបទល្មើស ដល់ពេលឆែកទូរស័ព្ទទៅវាអត់មានអ្វី ឲ្យមកវិញ ឲ្យគាត់មកវិញ ទៅដកទូរស័ព្ទរបស់គាត់។ ចុះអាពាក់ព័ន្ធទៅនឹងសិទ្ធិរបស់គាត់ ពាក់ព័ន្ធទៅនឹងសេចក្ដីថ្លៃថ្នូររបស់គាត់ ដែលយើងធ្វើអញ្ចឹងថា តើគេដែលរស់នៅជិតខាង គេនាំគ្នាមានការភ្ញាក់ផ្អើល ការព្រួយបារម្ភ ។ អញ្ចឹងសមត្ថកិច្ចខ្លួនឯង ក៏ត្រូវតែអនុវត្តន៍ទៅតាមនីតិវិធីដែរ មិនមែនសមត្ថកិច្ចអត់អនុវត្តន៍តាមច្បាប់ ហើយបែរជាទៅឲ្យតែប្រជាពលរដ្ឋអនុវត្តន៍អាហ្នឹងវាធ្វើអីចឹង វាអត់ត្រឹមត្រូវទេ អាហ្នឹងវាជាការរំលោភទៅលើច្បាប់ វារំលោភទៅលើសិទ្ធិមនុស្ស»។
ដោយឡែកករណីពលរដ្ឋ ៣នាក់ផ្សេងទៀត ដែលត្រូវបានឃាត់ខ្លួន កាលពីថ្ងៃ២៣ កក្កដា គឺមាន ២នាក់ ត្រូវបានអាជ្ញាធរឃាត់ខ្លួននៅរាជធានីភ្នំពេញ ក្នុងនោះយុវជនម្នាក់ ត្រូវបានមន្ត្រី គ.ជ.ប ឆែកទូរស័ព្ទរកឃើញរូបភាពគូសខ្វែងសន្លឹកឆ្នោត ហើយបានឃាត់ខ្លួនបញ្ជូនទៅប៉ុស្តិ៍នគរបាលស្ទឹងមានជ័យទី២ និងពលរដ្ឋម្នាក់ទៀតត្រូវបានសមត្ថកិច្ចឃាត់ខ្លួន បញ្ជូនទៅអធិការដ្ឋាននគរបាលខណ្ឌបឹងកេងកង ក្រោយពីពលរដ្ឋម្នាក់នោះ មិនបានយកសន្លឹកឆ្នោតដាក់ចូលទៅក្នុងហិបឆ្នោត។ រីឯពលរដ្ឋម្នាក់ទៀតនៅស្រុកមេមត់ ខេត្តត្បូងឃ្មុំ ត្រូវបានអាជ្ញាធរឃាត់ខ្លួន ក្រោយពីគាត់មិនព្រមជ្រលក់ដៃ ក្រោយបោះឆ្នោតរួច។
វិទ្យុអាស៊ីសេរីនៅពុំទាន់អាចទាក់ទងអ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា និងអ្នកនាំពាក្យ និងជាប្រធានលេខាធិការដ្ឋានសាលាដំបូងរាជធានីភ្នំពេញ លោក អ៊ី រិន្ទដើម្បីសាកសួរពីការឃាត់ខ្លួនពលរដ្ឋទាំងនោះបាននៅឡើយទេ នៅថ្ងៃទី២៥ កក្កដា។
ទន្ទឹមនឹងនេះ អាជ្ញាធរក៏បានគំរាមចាត់វិធានការច្បាប់ ចំពោះអ្នកបង្ហោះសារគូសខ្វែងលើសន្លឹកឆ្នោត ឬអំពាវនាវឲ្យពលរដ្ឋទៅគូសខ្វែងលើសន្លឹកឆ្នោត។
ប្រតិកម្មរបស់អាជ្ញាធរនេះ គឺបន្ទាប់ពីអ្នកទៅបោះឆ្នោតដែលបានគូសខ្វែងលើសន្លឹកឆ្នោត និងបានផ្ញើសារឲ្យពលរដ្ឋដទៃ ចូលទៅគូសខ្វែងលើសន្លឹកឆ្នោតនៅក្នុងបណ្ដាញសង្គមតេលេក្រាម (Telegram) ដែលមានឈ្មោះថា សប្បាយ (Sbai)។ អាជ្ញាធរចោទប្រកាន់អ្នកទាំងនោះថា ជាអ្នកធ្វើសកម្មភាពញុះញង់ពលរដ្ឋឱ្យបំផ្លាញសន្លឹកឆ្នោត ជាមួយលោក សម រង្ស៊ី គឺមានចំនួន ៤៤នាក់។
គិតត្រឹមថ្ងៃទី២៣ កក្កដា អាជ្ញាធរបានកំណត់មុខសញ្ញា ដែលអាជ្ញាធរអះអាងថា ជាអ្នកបានធ្វើសកម្មភាពញុះញង់ឲ្យពលរដ្ឋបំផ្លាញសន្លឹកឆ្នោតជាមួយប្រធានស្ដីទីគណបក្សសង្គ្រោះជាតិ លោក សម រង្ស៊ី មានចំនួន ៤៤នាក់។
ទោះបីជាបែបនេះក្ដី អគ្គលេខាធិការ គ.ជ.ប លោកទេព នីថា ថ្លែងថា គ.ជ.ប មិនមានវិធីស្វែងរកអ្នកគូសសន្លឹកឆ្នោតចោលនោះទេ ប៉ុន្តែអ្នកគូសសន្លឹកឆ្នោតចោល ហើយយកទៅបង្ហោះ ទើបសមត្ថកិច្ចរកឃើញបុគ្គលនោះ។
ទោះជាយ៉ាងណា ក្រុមអ្នកជំនាញការបោះឆ្នោតថា ការគូសសន្លឹកឆ្នោតចោល និងការបង្ហោះសន្លឹកឆ្នោត ការគូសខ្វែងសន្លឹកឆ្នោត ជាសិទ្ធិសេរីភាពរបស់ពលរដ្ឋ ពុំបំពានច្បាប់អ្វីទេ។
ជុំវិញរឿងនេះដែរ គណៈកម្មាធិការជាតិរៀបចំការបោះឆ្នោតរាជធានីភ្នំពេញ បើកសវនាការលើសំណុំរឿងចំនួន២១ ពីបទណែនាំ និងញុះញង់ពលរដ្ឋឲ្យបំផ្លាញសន្លឹកឆ្នោត នៅថ្ងៃទី២៥ កក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។