លោក ហ៊ុន សែន ប្រកាស​ផ្អាក​កិច្ច​សហប្រតិបត្តិការ​ស្វែង​រក​អដ្ឋិធាតុ​ទាហាន​អាមេរិក​នៅ​កម្ពុជា

ដោយ មាន ឫទ្ធិ
2017-09-14
អ៊ីម៉ែល
មតិ
Share
បោះពុម្ព
ពិធី​បញ្ជូន​អដ្ឋិធាតុ​​ទាហាន​អាមេរិក​បាត់​ខ្លួន​ក្នុង​ប្រទេស​កម្ពុជា អំឡុង​ពេល​សង្គ្រាម​វៀតណាម នៅ​អាកាសយានដ្ឋាន​អន្តរជាតិ​ភ្នំពេញ កាល​ពី​ព្រឹក​ថ្ងៃ​ទី​២ មេសា ឆ្នាំ​២០១៤។ RFA
ពិធី​បញ្ជូន​អដ្ឋិធាតុ​​ទាហាន​អាមេរិក​បាត់​ខ្លួន​ក្នុង​ប្រទេស​កម្ពុជា អំឡុង​ពេល​សង្គ្រាម​វៀតណាម នៅ​អាកាសយានដ្ឋាន​អន្តរជាតិ​ភ្នំពេញ កាល​ពី​ព្រឹក​ថ្ងៃ​ទី​២ មេសា ឆ្នាំ​២០១៤។ RFA
Photo: RFA

លោក​នាយករដ្ឋមន្ត្រី ហ៊ុន សែន ប្រកាស​ផ្អាក​រាល់​កិច្ច​សហប្រតិបត្តិការ​ស្វែង​រក​អដ្ឋិធាតុ​ទាហាន​អាមេរិក បាត់​ខ្លួន​នៅ​កម្ពុជា កាល​ពី​សម័យ​សង្គ្រាម​នៅ​ទសវត្ស​៧០ ជា​ថ្នូរ​នឹង​ការណ៍​ដែល​រដ្ឋាភិបាល​អាមេរិក បាន​ដាក់​ទណ្ឌកម្ម​មិន​ផ្ដល់​ទិដ្ឋាការ​ធ្វើ​ដំណើរ​ដល់​មន្ត្រី​ការទូត​ជាន់​ខ្ពស់​របស់​កម្ពុជា។ ការ​ប្រកាស​របស់​លោក ហ៊ុន សែន នេះ ហាក់​ផ្ទុយ​ទៅ​នឹង​សេចក្ដី​ថ្លែងការណ៍​ចុង​ក្រោយ​របស់​ក្រសួង​ការបរទេស​កម្ពុជា ដែល​បាន​ទទូច​ឲ្យ​សហរដ្ឋអាមេរិក លុប​ចោល​ការ​ដាក់​ទណ្ឌកម្ម​នេះ។

​ថ្លែង​នៅ​ក្នុង​បទសម្ភាសន៍​ជាមួយ​នឹង​សារព័ត៌មាន​ស្និទ្ធ​នឹង​រដ្ឋាភិបាល ហ្រេ្វស ញូវ (Fresh News)  កាល​ពី​ព្រលប់​ថ្ងៃ​ព្រហស្បតិ៍ ទី​១៤ ខែ​កញ្ញា លោក​នាយករដ្ឋមន្ត្រី ហ៊ុន សែន  បាន​ប្រកាស​ផ្អាក​កិច្ច​សហប្រតិបត្តិការ​ជាមួយ​អាមេរិក ក្នុង​ការ​ស្វែងរក​អដ្ឋិធាតុ​ទាហាន​អាមេរិក ដែល​បាន​បាត់​ខ្លួន​នៅ​កម្ពុជា កាល​ពី​សម័យ​សង្គ្រាម។

លោក ហ៊ុន សែន បញ្ជាក់​ថា ក្រសួង​ការបរទេស​កម្ពុជា នឹង​ផ្ញើ​កំណត់​ទូត​ទៅ​សហរដ្ឋអាមេរិក នៅ​ពេល​ឆាប់ៗ​ខាង​មុខ​អំពី​បញ្ហា​នេះ។

លោក ហ៊ុន សែន ត្រូវ​បាន​សារព័ត៌មាន​ដដែល​នេះ​ស្រង់​ប្រសាសន៍​បន្ត​ថា កិច្ច​សហប្រតិបត្តិការ​នៃ​ការ​ស្វែង​រក​នេះ ត្រូវ​ផ្អាក​សិន រង់ចាំ​ការ​ដោះស្រាយ​បញ្ហា​ផ្សេងៗ​រវាង​កម្ពុជា និង​សហរដ្ឋអាមេរិក បាន​ប្រសើរ​មក​វិញ។ បញ្ហា​ផ្សេងៗ​ដែល​លោក ហ៊ុន សែន លើក​ឡើង​នេះ គឺ​គ្មាន​អ្វី​ក្រៅ​ពី​ការណ៍​ដែល​សហរដ្ឋអាមេរិក សម្រេច​ដាក់ទណ្ឌកម្ម​មិន​ផ្ដល់​ទិដ្ឋាការ​ធ្វើ​ដំណើរ​ដល់​មន្ត្រី​ការទូត​ជាន់​ខ្ពស់​របស់​កម្ពុជា នោះ​ឯង ដោយសារ​តែ​កម្ពុជា មិន​ទទួល​យក​ការ​បញ្ជូន​ជនជាតិ​ខ្មែរ​មាន​ពិរុទ្ធ​ពី​អាមេរិក មក​កាន់​កម្ពុជា​វិញ។ កន្លង​មក លោក ហ៊ុន សែន ធ្លាប់​បាន​ហៅ​ទង្វើ​នេះ​ថា អមនុស្សធម៌ និង​ជា​ការ​បំបែកបំបាក់​ក្រុម​គ្រួសារ។

​ភ្នាក់ងារ​សារព័ត៌មាន​អាមេរិក អេ.ភី រាយការណ៍​ថា យោង​តាម​បញ្ជី​ផ្លូវ​ការ​របស់​រដ្ឋាភិបាល​អាមេរិក បច្ចុប្បន្ន​នៅ​មាន​អដ្ឋិធាតុ​ទាហាន​អាមេរិក ចំនួន ៤៨​នាក់​ទៀត ដែល​មិន​ទាន់​ត្រូវ​បាន​គេ​រក​ឃើញ​នៅ​ឡើយ​នៅ​ក្នុង​ប្រទេស​កម្ពុជា។

ការ​ប្រកាស​អំពី​ចំណាត់​ការ​របស់​លោក ហ៊ុន សែន ប្រឆាំង​តប​នឹង​អាមេរិក​នេះ ធ្វើ​ឡើង​ភ្លាមៗ ដែល​ហាក់​ផ្ទុយ​ពី​សេចក្ដី​ថ្លែងការណ៍​របស់​ក្រសួង​ការបរទេស​កម្ពុជា ដែល​មាន​បំណង​ចង់​សម្របសម្រួល​ជាមួយ​អាមេរិក អំពី​បញ្ហា​នេះ។ ក្នុង​រយៈពេល​មិន​ដល់​ពីរ​ថ្ងៃ​ផង ក្រោយ​ពេល​សហរដ្ឋអាមេរិក​បាន​ប្រកាស​ជា​ផ្លូវការ​អំពី​ការ​ដាក់​ទណ្ឌកម្ម​មិន​ផ្ដល់​ទិដ្ឋាការ​ធ្វើ​ដំណើរ​ប្រភេទ B1 ឬ B2 ដល់​មន្ត្រី​ការទូត​នៃ​ក្រសួង​ការបរទេស​កម្ពុជា ក្រសួង​ការបរទេស បាន​ចេញ​នូវ​សេចក្ដី​ថ្លែងការណ៍​ផ្ទួនៗ​រហូត​ដល់​ទៅ​ពីរ​លើក សម្ដែង​ក្តី​សោកស្ដាយ​របស់​ខ្លួន​ចំពោះ​ចំណាត់​ការ​ដ៏​ឆាប់រហ័ស​របស់​សហរដ្ឋអាមេរិក នៅ​ពេល​នេះ។

​ក្នុង​សេចក្ដី​ថ្លែងការណ៍​ចុង​ក្រោយ​ចេញ​ផ្សាយ​កាល​ពី​ថ្ងៃ​ព្រហស្បតិ៍ ទី​១៤ ខែ​កញ្ញា រដ្ឋាភិបាល​កម្ពុជា បាន​សម្ដែង​ភាព​ភ្ញាក់ផ្អើល​របស់​ខ្លួន​ចំពោះ​ការណ៍​ដែល​សហរដ្ឋអាមេរិក​ចោទ​ថា កម្ពុជា​មិន​បាន​ផ្ដល់​កិច្ច​សហការ មិន​យល់ព្រម ឬ​ពន្យារ​ពេល​ទទួលយក​ការ​ធ្វើ​មាតុភូមិនិវត្តន៍​ពលរដ្ឋ​ខ្មែរ​ដែល​មាន​ពិរុទ្ធ ហើយ​ត្រូវ​សហរដ្ឋអាមេរិក​សម្រេច​បណ្ដេញ​ចេញ​ពី​ទឹកដី​របស់​ខ្លួន។

​បើ​​ទោះ​ជា​លើក​នេះ រដ្ឋាភិបាល​ថា ការ​ដាក់​កំហិត​ទិដ្ឋាការ​គឺ​ជា «សិទ្ធិ​សម្រេច​របស់​រដ្ឋាភិបាល​សហរដ្ឋអាមេរិក» ក៏ដោយ ហើយ​ថា ការ​ផ្សារភ្ជាប់​បញ្ហា​នេះ​ជាមួយ​នឹង​បញ្ហា​ការ​បញ្ជូន​ពលរដ្ឋ​ខ្មែរ​ដែល​មាន​ពិរុទ្ធ​ត្រឡប់​មក​កម្ពុជា​វិញ ជា «ការ​មិន​សម​ហេតុ​សម​ផល និង​ផ្ទុយ​ពី​កិច្ច​សហប្រតិបត្តិការ​ល្អ​ប្រសើរ​រវាង​សហរដ្ឋអាមេរិក និង​កម្ពុជា​លើ​បញ្ហា​នេះ» លើក​នេះ រដ្ឋាភិបាល​កម្ពុជា ហាក់​បន្ទន់​ឥរិយាបថ​របស់​ខ្លួន ដោយ​សម្ដែង​កាយវិការ​ចង់​សម្រុះសម្រួល​ជាមួយ​រដ្ឋាភិបាល​អាមេរិក លើ​បញ្ហា​នេះ​។ រដ្ឋាភិបាល​បញ្ជាក់​ច្បាស់ៗ​ហើយ​ថា កម្ពុជា មិន​ដែល​បាន​ផ្តាច់​កិច្ចសហការ មិន​បាន​បដិសេធ ហើយក៏​មិន​បាន​ពន្យារ​ពេល​ដោយ​មិន​សម​ហេតុផល​ចំពោះ​ការ​ទទួល​ពលរដ្ឋ​របស់​ខ្លួន ដែល​សហរដ្ឋអាមេរិក បាន​សម្រេច​បណ្ដេញ​ចេញ​នោះ​ទេ។

​ជំហរ​ច្បាស់លាស់​របស់​កម្ពុជា គឺ​នៅ​តែ​ត្រៀមលក្ខណៈ​ទទួល​យក​ពលរដ្ឋ​របស់​ខ្លួន ដែល​អាមេរិក​នឹង​បញ្ជូន​មក ហើយ​ថែមទាំង​អះអាង​ថា កម្ពុជា​នឹង​ខិតខំ​ធ្វើ​អ្វីៗ​គ្រប់​យ៉ាង ដើម្បី​ឲ្យ​ពលរដ្ឋ​ខ្មែរ​ទាំង​នោះ​ធ្វើ​សមាហរណកម្ម​ក្នុង​សង្គម​ជាតិ​ដោយ​ជោគជ័យ និង​ចាប់​ផ្ដើម​ជីវិត​ថ្មី​របស់​ពួកគេ​ប្រកបដោយ​ភាព​សមរម្យ និង​ថ្លៃថ្នូរ​បំផុត។ ក្រៅ​ពី​​ជំហរ​ខាង​លើ​នេះ កូនប្រុស​លោក ហ៊ុន សែន គឺ​លោក ហ៊ុន ម៉ាណែត ក៏​បាន​សរសេរ​នៅ​លើ​ទំព័រ​ហ្វេសប៊ុក​របស់​ខ្លួន​ផង​ដែរ ដោយ​លើក​ឡើង​ថា៖ «យើង​ជួយ​ខ្មែរ​សោះ បែរ​ជា​អាមេរិកាំង​ដាក់​ទណ្ឌកម្ម​យើង»

បន្ថែម​ពី​លើ​នេះ ថ្លែង​ក្នុង​ពិធី​បាឋកថា​ស្ដីពី​ការ​យល់​ដឹង​ពី​ស្ថានការណ៍​ពិភពលោក​បច្ចុប្បន្ន និង​ការ​រៀបចំ​នយោបាយ​ការបរទេស​របស់​កម្ពុជា នៅ​សាលា​ភូមិន្ទ​រដ្ឋបាល កាល​ពី​ថ្ងៃ​ទី​១៤ ខែកញ្ញា ​នេះ រដ្ឋមន្ត្រី​ក្រសួង​ការបរទេស លោក ប្រាក់ សុខុន អះអាង​ថា កម្ពុជា​មាន​មន្ត្រី​ក្រសួង​មហាផ្ទៃ ដែល​ទទួល​បន្ទុក​រឿង​នេះ ត្រៀម​ខ្លួន​រួច​ជា​ស្រេច​ដើម្បី​សម្ភាស​ពលរដ្ឋ​ខ្មែរ​ចំនួន ២៦​នាក់​ដែល​រង់ចាំ​សម្ភាស ក្នុង​គោលបំណង​ចង់​ដឹង​ថា អ្នក​ទាំងនោះ​ជា​ពលរដ្ឋ​ខ្មែរ ឬ​មិន​មែន។ ជាង​នៅ​ទៀត ប្រមុខ​ការទូត​កម្ពុជា រូប​នេះ​ឲ្យ​ដឹង​ទៀត​ថា លោក​ក៏​ធ្លាប់​ស្នើ​ទៅ​សហរដ្ឋអាមេរិក ឲ្យ​មាន​ការ​យោគយល់ ដោយ​មុន​បញ្ជូន​អ្នក​ទាំង​នោះ​មក​គួរ​បណ្ដុះបណ្ដាល​ជំនាញ និង​ស្នើ​សុំ​គោលការណ៍​ស្ម័គ្រចិត្ត​ដែល​មិន​មែន​ជា​ការ​ចាប់​បង្ខំ ប៉ុន្តែ​សហរដ្ឋអាមេរិក ទាត់​ចោល​រាល់​សំណើ​របស់​លោក។

​​លោក ប្រាក់ សុខុន៖ «អ៊ីចឹង​យើង​ឃើញ​ថា ទៅ​មុខ​មិន​រួច​ទេ យើង​បញ្ជាក់​អះអាង​ថា ដើម្បី​កុំ​ឲ្យ​រអាក់រអួល​កម្មវិធី​ហ្នឹង យើង​ប្រកាស​ថា យើង​មាន​មន្ត្រី​ក្រសួង​មហាផ្ទៃ ដែល​ត្រៀមខ្លួន​ជាស្រេច​ដើម្បី​ទៅ​សម្ភាស ២៦​នាក់​ដែល​កំពុង​រក​រង់ចាំ យើង​មិន​ដែល​បដិសេធ​ទេ ព្រោះ​ចង់​ដឹង​ថា ជា​ខ្មែរ​មែន​អត់។ កន្លង​មក​មាន​អ្នក​ខ្លះ​ជា​វៀតណាម ជា​ឡាវ»

​អាស៊ីសេរី កំពុង​ព្យាយាម​សុំ​ប្រតិកម្ម​តប​ពី​មន្ត្រី​នាំ​ពាក្យ​ស្ថានទូត​សហរដ្ឋអាមេរិក ជុំវិញ​ការវិវត្តន៍​នៃ​បញ្ហា​នេះ ប៉ុន្តែ​មិនទាន់​ទទួល​បាន​នូវ​ការ​ឆ្លើយ​តប​ណា​មួយ​នៅ​ឡើយ គិត​មក​ត្រឹម​ម៉ោង​ផ្សាយ​នេះ។

​យ៉ាង​ណា​ក៏ដោយ សហរដ្ឋអាមេរិក ធ្លាប់​បាន​បញ្ជាក់​ថា ការ​សម្រេច​ដាក់ទណ្ឌកម្ម​មិន​ផ្តល់​ទិដ្ឋាការ​នេះ គឺ​ដោយសារតែ​កម្ពុជា «​រឹង​ទទឹង» មិន​ព្រម​ទទួល​យក ឬ​ព្យាយាម​ពន្យារ​ពេល​ការ​ធ្វើ​មាតុភូមិ​និវត្តន៍​ពលរដ្ឋ​របស់​ខ្លួន​ជាប់​ពិរុទ្ធ ដែល​ត្រូវ​សហរដ្ឋអាមេរិក បណ្ដេញ​ចេញ។ ក្រោម​កិច្ច​ព្រមព្រៀង​រវាង​រដ្ឋាភិបាល​កម្ពុជា និង​សហរដ្ឋអាមេរិក ស្ដីពី​ការ​ធ្វើ​មាតុភូមិនិវត្តន៍​ពលរដ្ឋ​ខ្មែរ​ពី​សហរដ្ឋអាមេរិក មក​កម្ពុជា​វិញ ដែល​បាន​អនុវត្ត​អស់​រយៈពេល​ជិត ១៥​ឆ្នាំ​មក​នេះ មាន​ពលរដ្ឋ​ដើម​កំណើត​ខ្មែរ​មិន​តិច​ជាង ៥៥០​នាក់​ឡើយ ដែល​ជាប់​ពិរុទ្ធ​នៅ​សហរដ្ឋអាមេរិក ត្រូវ​រដ្ឋាភិបាល​សហរដ្ឋអាមេរិក ចាប់​បញ្ជូន​មក​កម្ពុជា​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

ពិមុន​ខ្លាច​គេថាយកពង​មាន់​ជល់​នឹង​ថ្ម ដល់​បាន​រឹង​ខ្លួន​បន្តិច​ក៏សាក​ជល់​ថ្ម​ម្ដង​ទៀត តាម​ពិត​ទើប​តែ​ពងខ្លាយ​ជាពងទា​សោះ៕

Sep 15, 2017 03:13 PM

គេហទំព័រ​ទាំងមូល