យុវជន​ខ្មែរ​នៅ​កូរ៉េខាងត្បូង​រួមគ្នា​ផ្សព្វផ្សាយ​អំពី​បញ្ហា​លទ្ធិ​ប្រជាធិបតេយ្យ​នៅ​កម្ពុជា

ដោយ មាន ឫទ្ធិ
2024.01.29
យុវជន​ខ្មែរ​នៅ​កូរ៉េខាងត្បូង​រួមគ្នា​ផ្សព្វផ្សាយ​អំពី​បញ្ហា​លទ្ធិ​ប្រជាធិបតេយ្យ​នៅ​កម្ពុជា ក្រុម​យុវជន​ខ្មែរ​រស់នៅ​ប្រទេស​កូរ៉េខាងត្បូង ទីក្រុង​អាន់សាន់ (Ansan) នាំគ្នា​ផ្សព្វផ្សាយ​ពី​លទ្ធិប្រជាធិបតេយ្យ និង​លើក​ពី​បញ្ហា ការរំលោភ​សិទ្ធិមនុស្ស ការ​រឹតត្បិត​សិទ្ធិ​សេរីភាព​នយោបាយ និង​ការ​ធ្វើ​ទុក្ខបុកម្នេញ​លើ​សកម្មជន​នយោបាយ និង​សកម្មជន​សង្គម កាលពីថ្ងៃទី២៨ មករា ២០២៤។
រូប៖ ហ្វេសប៊ុកលោក ឃ្លោក លាភ

ក្រុម​យុវជន​ខ្មែរ​រស់នៅ និង​ធ្វើការ​នៅ​ប្រទេស​កូរ៉េខាងត្បូង​ចង់​ឃើញ​រដ្ឋាភិបាល​កម្ពុជា​ក្រោម​ការ​ដឹកនាំ​របស់​លោក ហ៊ុន ម៉ាណែត បើក​លំហ​សិទ្ធិ​សេរីភាព និង​គោរព​លទ្ធិប្រជាធិបតេយ្យ​ឡើង​វិញ។ ការ​លើកឡើង​របស់​យុវជន​នេះ គឺ​បន្ទាប់​ពី​ពួកគាត់​បាន​ចូលរួម​សន្និសីទ​ស្ដីពី​អនាគត​ប្រជាធិបតេយ្យ (Future Democracy) និង​មើលឃើញ​ពី​ការ​រឹតត្បិត​សិទ្ធិ​សេរីភាព​ពលរដ្ឋ​នៅ​កម្ពុជា។

ក្រុម​យុវជន​ខ្មែរ​រស់នៅ​ប្រទេស​កូរ៉េខាងត្បូង ប្រមាណ ៦០​នាក់ នៅ​ទីក្រុង​អាន់សាន់ (Ansan) នាំគ្នា​ផ្សព្វផ្សាយ​អំពី​លទ្ធិប្រជាធិបតេយ្យ និង​លើក​អំពី​បញ្ហា​រំលោភ​សិទ្ធិមនុស្ស ការ​រឹតត្បិត​សិទ្ធិ​សេរីភាព​នយោបាយ និង​ការ​ធ្វើ​ទុក្ខបុកម្នេញ​លើ​សកម្មជន​នយោបាយ និង​សកម្មជន​សង្គម ដែល​ធ្វើ​ឱ្យ​ប្រជាធិបតេយ្យ​នៅ​កម្ពុជា​ដើរ​ថយក្រោយ។

អនុប្រធាន​គណបក្ស​សង្គ្រោះជាតិ អ្នកស្រី មូរ សុខហួរ ដែល​បាន​ចូលរួម​សន្និសីទ​ប្រាប់​វិទ្យុ​អាស៊ីសេរី​ នៅ​ថ្ងៃទី​២៨ ខែ​មករា ថា គោលបំណង​នៃ​ការ​ផ្សព្វផ្សាយ​អំពី​ប្រជាធិបតេយ្យ​នេះ​គឺ​ ដើម្បី​រួម​កម្លាំង​អ្នក​ស្រឡាញ់​ប្រជាធិបតេយ្យ និង​រួបរួមសាមគ្គី​គ្នា​ ដើម្បី​ការគោរព​សិទ្ធិមនុស្ស​។ អ្នកស្រី​បន្ត​ថា បើ​ទោះ​ជា​រដ្ឋាភិបាល​កម្ពុជា​ចោទប្រកាន់​អ្នកស្រី​ជា​ជន​ក្បត់ជាតិ​យ៉ាង​ក្តី ក៏​អ្នកស្រី​មិន​បោះបង់​ការ​ស្វែងរក​លទ្ធិ​ប្រជាធិបតេយ្យ​ឡើយ។

អ្នកស្រី មូរ សុខហួរ៖ «ហើយ​ជា​ចុងក្រោយ​សារ​ខ្ញុំ​ជូន​ទៅ​ដល់​អ្នក​ប្រជាធិបតេយ្យ​ទាំងអស់​គឺ​យើង​ត្រូវ​តែ​មាន​ទិសដៅ​ជាមួយគ្នា ដែល​យើង​មាន​ហើយៗ​ តាំងចិត្ត​ថា ដំណើរ​នេះ​ជា​ដំណើរ​វែងឆ្ងាយ​ក៏ប៉ុន្តែ​ ប្រសិនបើ​យើង​រួម​កម្លាំង​ជាមួយគ្នា​ យើង​គិត​អំពី​ការ​ផ្សះផ្សា​ជាតិ​ យើង​គិត​អំពី​ផលប្រយោជន៍​ជាតិ​ ខ្ញុំ​យល់​ឃើញ​ថា ដំណើរ​នេះ​មិន​ឆ្ងាយ​ទេ»

អ្នកស្រី មូរ សុខហួរ នឹង​ធ្វើ​ដំណើរ​ទៅ​ប្រទេស នូវែលហ្សេឡង់ (New Zealand) អូស្ត្រាលី (Australia) និង​ជប៉ុន​(Japan ) បន្ត​ទៀត ដើម្បី​ផ្សព្វផ្សាយ និង​កៀរគរ​អ្នក​ស្រឡាញ់​ប្រជាធិបតេយ្យ។

ដោយឡែក​ប្រធាន​ចលនា​ប្រជាធិបតេយ្យ​រួបរួម​ជាតិ លោក លូន វិបុល ថ្លែង​ថា លោក​ចង់​ឃើញ​រដ្ឋាភិបាល​ដឹកនាំ​ដោយ លោក ហ៊ុន ម៉ាណែត មាន​ការ​គោរព​សិទ្ធិមនុស្ស​ពិតប្រាកដ និង​ជួយ​ដោះស្រាយ​ទុក្ខ​លំបាក​របស់​ពលរដ្ឋ​។ លោក​បន្ត​ថា បញ្ហា​សេដ្ឋកិច្ច​នៅ​កម្ពុជា​កំពុង​ប្រឈម​នឹង​វិបត្តិ​ធ្ងន់ធ្ងរ​ គឺ​ដោយសារ​តែ​កម្ពុជា​មិន​គោរព​សិទ្ធិមនុស្ស​ ដែល​ធ្វើ​ឱ្យ​បាត់បង់​អ្នក​វិនិយោគ​ធំៗ ​មក​បណ្ដាក់ទុន។

លោក លូន វិបុល៖ «យើង​ក្រឡេក​ទៅ​មើល​គណបក្ស​សង្គ្រោះ​ជាតិ​កាលពី​ឆ្នាំ​២០១៣ ២០១៧​ហ្នឹង​ កាលពី​គេ​មិនទាន់​រំលាយ​ហ្នឹង ​គឺ​ស្រុក​ខ្មែរ​យើង​ហ្នឹង​ ទាំង​សេដ្ឋកិច្ច​ក្តី​រាង​ល្អ​ប្រសើរ យើង​មិន​ថា​ល្អ​ប្រសើរ​ឥតខ្ចោះ​ ១០០​ភាគរយ​ទេ ក៏ប៉ុន្តែ​ ល្អ​ប្រសើរ​វា​ខុសពី​ឥឡូវ​។ ក៏ប៉ុន្តែ​ នៅ​ពេល​ដែល​គេ​រំលាយ​គណបក្ស​សង្គ្រោះជាតិ​ទៅ​ តំណាងរាស្ត្រ​ ក៏​គាត់​អត់​មាន​អភ័យឯកសិទ្ធិ​ក្នុង​ការ​ចូលរួម​ដោះស្រាយ​​បញ្ហា​រួម​ហ្នឹង ​អ៊ីចឹង​ ជីវ​ភាព​របស់​ប្រជាពលរដ្ឋ​ ក៏​វា​ធ្លាក់​ទៅ​តាម​ហ្នឹង ហើយ​អា​បញ្ហា​រំលោភ​សិទ្ធិមនុស្ស​ ក៏​វា​កាន់តែ​កើត​ឡើង​អាក្រក់​ឡើង»

វិទ្យុ​អាស៊ីសេរី​មិនអាច​ទាក់ទង​អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន និង​ប្រធាន​អង្គភាព​អ្នកនាំពាក្យ​រដ្ឋាភិបាល លោក ប៉ែន បូណា ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃទី​២៨ ខែ​មករា។

ជុំវិញ​បញ្ហា​នេះ​អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក ស៊ឹង សែនករុណា កត់សម្គាល់​ថា កម្ពុជា​មិន​ទាន់​មាន​ការគោរព​សិទ្ធិមនុស្ស​ពេញលេញ​នៅឡើយ​ទេ​។ លោក​បន្ត​ថា ការ​រឹតត្បិត​សិទ្ធិ​សេរីភាព​បញ្ចេញមតិ និង​សិទ្ធិ​ទទួល​បាន​ព័ត៌មាន ការ​បំបិទ​សិទ្ធិ​គណបក្ស​ភ្លើងទៀន​មិន​ឱ្យ​ចូលរួម​ការបោះឆ្នោត​សុទ្ធតែ​ជា​បញ្ហា​ប្រឈម​ដែល​ធ្វើ​ឱ្យ​កម្ពុជា​ឆ្ពោះ​ទៅ​រក​ការ​បែកបាក់​ជាតិ។

លោក ស៊ឹង សែនករុណា៖ «ហើយ​យើង​ចង់ឱ្យ​ប្រទេស​យើង​ដោយ​មិន​ប្រើការ​កាប់សម្លាប់​គ្នា យកគ្នា​ជា​សត្រូវ​ទេ​អ៊ីចឹង​កាលណា​យកគ្នា​ជា​សត្រូវ​យក​ជា​ខ្មាំង យក​ជា​ពួក​ឧទ្ទាម យក​អីចេះ​វា​មិនមែន​ជា​គោលការណ៍​ដើម​នៅក្នុង​រដ្ឋធម្មនុញ្ញ​ទេ អ៊ីចឹង​គួរតែ​ងាក​មកវិញ​ពលរដ្ឋ​កម្ពុជា​យើង​ គឺ​ចង់​ឃើញ​ចង់បាន​នូវ​ប្រជាធិបតេយ្យ​ ចង់បាន​ការប្រកួតប្រជែង​មួយ​ដោយ​សេរី ត្រឹមត្រូវ និង​យុត្តិធម៌​ ចង់បាន​ការ​ចូលរួម​គ្នា​សហការ​គ្នា​មក​អភិវឌ្ឍន៍​ប្រទេស​កម្ពុជា​យើង​ឱ្យ​ជឿនលឿន»

កាលពី​ថ្ងៃទី​១១ ខែ​មករា អង្គការ​ឃ្លាំមើល​សិទ្ធិមនុស្ស​អន្តរជាតិ (Human Rights Watch) បាន​ចេញ​របាយការណ៍​ពិភពលោក​បង្ហាញថា​ កម្ពុ​ជា​បាន​ផ្លាស់ប្ដូរ​នាយករដ្ឋមន្ត្រី​ថ្មី​ក៏​ពិតមែន ប៉ុន្តែ​មិនបាន​ផ្លាស់ប្ដូរ​របៀប​ដឹកនាំ ​ដែល​គោរព​សិទ្ធិមនុស្ស និង​ប្រជាធិបតេយ្យ​ឡើយ។ អង្គការ​ឃ្លាំមើល​សិទ្ធិមនុស្ស​បញ្ជាក់​ថា រដ្ឋាភិបាល​កម្ពុជា នៅតែ​ប្រើប្រាស់​ប្រព័ន្ធ​តុលាការ​យាយី​លើ​អ្នក​រិះគន់ រារាំង​គណបក្ស​ភ្លើងទៀន​មិន​ឱ្យ​ចូលរួម​ការបោះឆ្នោត រឹតត្បិត​ប្រព័ន្ធ​ផ្សព្វផ្សាយ​ឯករាជ្យ និង​ប្រើ​អំពើ​ហិង្សា​ចាប់​ចង​ក្រុម​អ្នក​រិះគន់​ឥត​ស្រាកស្រាន្ត​ជាដើម។

ក្រុម​យុវជន​ខ្មែរ​នៅ​កូរ៉េខាងត្បូង​នៅតែ​ទទូច​ដល់​​រដ្ឋាភិបាល​ដឹកនាំ​ដោយ លោក ហ៊ុន ម៉ាណែត ស្ដារ​លទ្ធិ​ប្រជាធិបតេយ្យ​ឡើងវិញ មាន​ប្រព័ន្ធ​នយោបាយ​ប្រជាធិបតេយ្យ​សេរី​ពហុបក្ស និង​តុលាការ​ឯករាជ្យ​ពិតប្រាកដ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
ពលករខ្មែរនៅប្រទេសកូរ៉េខាងត្បូងត្រៀមធ្វើបាតុកម្មប្រឆាំងលោក ហ៊ុន ម៉ាណែត
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។