មន្ត្រីជាន់ខ្ពស់គណបក្សភ្លើងទៀនបញ្ជាក់ជាថ្មីថា គណបក្សនេះគ្មានទំនាក់ទំនងជាមួយលោក សម រង្ស៊ី ទេ
2023.08.04
លោក រ៉ុង ឈុន អនុប្រធានគណបក្សភ្លើងទៀន ថ្លែងក្នុងពិធីជួបជុំសមាជិកគណបក្ស កាលពីថ្ងៃទី២២ ខែមេសា ឆ្នាំ២០២៣។
រូប៖ ហ្វេសប៊ុកគណបក្សភ្លើងទៀន
មន្ត្រីជាន់ខ្ពស់គណបក្សភ្លើងទៀន បញ្ជាក់ជំហរជាថ្មីដែលជាការឆ្លើយតបការចោទប្រកាន់របស់ថា លោកនាយករដ្ឋមន្ត្រី ហ៊ុនសែន ថា គណបក្សនេះគ្មានទំនាក់ទំនងជាមួយលោក សម រង្ស៊ី ទេ។ ការលើកឡើងនេះ ក្រោយពេលលោក ហ៊ុន សែន ព្រមានរំលាយគណបក្សនេះជាថ្មីទៀត ប្រសិនបើ លោក សម រង្ស៊ី បន្តវាយប្រហារលើលោក ហ៊ុន សែន។
មន្ត្រីជាន់ខ្ពស់គណបក្សភ្លើងទៀន លើកឡើងថា ការព្រមានរំលាយគណបក្សភ្លើងទៀន ពីសំណាក់លោកនាយករដ្ឋមន្ត្រី ហ៊ុន សែន ម្ដងហើយម្ដងទៀត គឺជាចេតនានយោបាយច្រើនជាងការអនុវត្តច្បាប់។ រីឯអ្នកឃ្លាំមើលស្ថានការណ៍នយោបាយថា គណបក្សកាន់អំណាចនៅតែចាត់ទុកគណបក្សភ្លើងទៀន ជាឧបសគ្គនៃការគ្របគ្រងអំណាចរបស់ខ្លួនទើបលោក ហ៊ុន សែន ព្រមានរំលាយគណបក្សភ្លើងទៀន និងធ្វើទុក្ខបុកម្នេញលើគណបក្សនេះជាបន្តបន្ទាប់។
អនុប្រធានគណបក្សភ្លើងទៀន លោក រ៉ុង ឈុន ឱ្យវិទ្យុអាស៊ីសេរីដឹងនៅថ្ងៃទី៤ ខែសីហាថា បើទោះជាគណបក្សភ្លើងទៀន មានប្រវត្តិចេញពីលោក សម រង្ស៊ី ដែលជាអ្នកបង្កើតគណបក្សនេះក្ដី ប៉ុន្តែរចនាសម្ព័ន្ធរបស់គណបក្សភ្លើងទៀន ដែលបានតម្កល់ទុកនៅក្រសួងមហាផ្ទៃ មិនជាប់ពាក់ព័ន្ធជាមួយលោក សម រង្ស៊ី ទេ។ លោក រ៉ុង ឈុន យល់ថា សារព្រមានរបស់លោក ហ៊ុន សែន ពេលនេះ ហាក់មិនមែនជាការអនុវត្តច្បាប់ទេ តែមានចរិតនយោបាយច្រើនជាង។ លោកបន្តទៀតថា បើទោះជាលោក ហ៊ុន សែន អាចរំលាយគណបក្សភ្លើងទៀន តាមចិត្តចង់របស់លោកក្ដី តែលោក ហ៊ុន សែន ឬរដ្ឋាភិបាលរបស់គណបក្សកាន់អំណាចក៏ត្រូវប្រឈមនឹងការថ្កោលទោសពីពលរដ្ឋ និងសហគមន៍អន្តរជាតិដែរ។
លោក រ៉ុង ឈុន៖ «សុទ្ធសឹងតែរឿងនយោបាយទាំងអស់បាទ មិនមែនការអនុវត្តច្បាប់ ហើយយើងដឹង ប្រព័ន្ធច្បាប់ ប្រព័ន្ធតុលាការគ្រាន់តែជាការលំអសម្រាប់តែអ្នកមានអំណាច មានឥទ្ធិពលនៅក្នុងស្រុកយើងទេ មិនអាចការពារយុត្តិធម៌ជូនអ្នកទន់ខ្សោយបានទេ»។
ប្រតិកម្មរបស់អនុប្រធានគណបក្សភ្លើងទៀន លោក រ៉ុង ឈុន នៅពេលនេះក្រោយពេលលោកនាយករដ្ឋមន្ត្រី ហ៊ុន សែន កាលពីថ្ងៃទី៣ ខែសីហា ព្រមាន រំលាយគណបក្សភ្លើងទៀនចោល។ លោក ហ៊ុន សែន ចោទប្រកាន់ថា គណបក្សនេះមានទំនាក់ទំនងជាមួយលោក សម រង្ស៊ី។ បើទោះជាលោក ហ៊ុន សែន តែងតែអះអាងថា លោកមានភស្តុតាងស្ដីពីទំនាក់ទំនង រវាងលោក សម រង្ស៊ី ជាមួយគណបក្សភ្លើងទៀនក្ដី ប៉ុន្តែ លោក ហ៊ុន សែន មិនដែលបង្ហាញភស្តុតាងនោះម្ដងណាឡើយ គិតមកដល់ពេលនេះ។
លោក ហ៊ុន សែន៖ «ភស្តុតាងមានគ្រប់គ្រាន់អំពីអ្នកណាខ្លះគេបង្កើតឆានែលសប្បាយ តេឡេក្រាម (Telegram) ខ្ញុំបានចូលខំមិន (បញ្ចេញមតិ) ផ្ទាល់នៅក្នុងហ្នឹង ហើយយើងរកឃើញមុខសញ្ញាមួយចំនួនដែលចេញពីស្រុកក្រៅចូលមកក្នុងបក្សនយោបាយមួយអ៊ីចឹងទេ តើបក្សនេះគួរត្រូវបានរំលាយឬអត់បើចៅហ្វាយរបស់បក្សនេះ ពីក្រៅលើកដៃកាប់មកលើយើង យើងក៏មិនញញើតជាមួយនឹងផ្ដាច់ឫសគល់ក្រវាត់ចោលដែរ»។
លោក សម រង្ស៊ី គឺជាស្ថាបនិកគណបក្សភ្លើងទៀន និងជាប្រធានស្ដីទីគណបក្សសង្គ្រោះជាតិ ដែលកំពុងរស់នៅប្រទេសបារាំង ត្រូវតុលាការនៃរបបក្រុងភ្នំពេញ កាត់ទោសឱ្យជាប់ពន្ធនាគារជាច្រើនសំណុំរឿង។
នេះមិនមែនជាលើកទី១ទេ ដែលលោក ហ៊ុន សែន ព្រមានរំលាយគណបក្សភ្លើងទៀន។ កាលពីខែតុលា ឆ្នាំ២០២២ លោក ហ៊ុន សែន ក៏មានរំលាយគណបក្សនេះដែរ ដោយលោកចោទប្រកាន់ករណីដូចគ្នានេះដែរ។
បើទោះជាការប្រកាសមានវិធានការផ្លូវច្បាប់លើគណបក្សភ្លើងទៀន ដែលមានពលរដ្ឋបោះឆ្នោតគាំទ្រជិត២លាននាក់នេះក្ដី តែ លោក ហ៊ុន សែន បែរបង្ហាញរបៀបអនុវត្តច្បាប់របស់លោក គឺអាស្រ័យទៅលើឥរិយាបថរបស់លោក សម រង្ស៊ី ទៅវិញ។ លោកថា បើលោក សម រង្ស៊ី នៅតែវាយប្រហារមកលោកទៀត លោក ក៏មិនទុកគណបក្សភ្លើងទៀននោះដែរ។
កាលពីឆ្នាំ២០១៧ នៅពេលគណបក្សកាន់អំណាច ដែលព្យាយាមកម្ចាត់គណបក្សសង្គ្រោះជាតិ ចេញពីឆាកនយោបាយ ពេលនោះរដ្ឋាភិបាលធ្វើឱ្យលោក ហ៊ុន សែន បានកែច្បាប់ស្ដីពីគណបក្សនយោបាយដោយហាមគ្រប់គណបក្សនយោបាយមិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយសម្រាប់គណបក្សរបស់ខ្លួនឡើយ។ ច្បាប់ដដែលនោះ ក៏ចែងដាក់ទោសទណ្ឌ ឬបិទសិទ្ធិ គណបក្សនយោបាយផងដែរ ប្រសិនបើត្រូវតុលាការ រកឃើញថា បានល្មើសច្បាប់នេះ។
អ្នកសិក្សាផ្នែកច្បាប់ លោក វ៉ន ចាន់ឡូត សង្កេតឃើញថា បើទោះជាពេលនេះ រដ្ឋាភិបាលលោក ហ៊ុន សែន មិនទាន់រំលាយគណបក្សភ្លើងទៀនក្ដី ប៉ុន្តែ ក៏ស្មើនឹងការរំលាយគណបក្សនេះ ព្រោះគ.ជ.ប បានបិទសិទ្ធិមិនឱ្យគណបក្សនេះអាចចូលរួមការបោះឆ្នោតកាលពីថ្ងៃទី២៣ កក្កដា ម្ដងរួចហើយ។ លោក វ៉ន ចាន់ឡូត បន្តទៀតថា សារព្រមានរបស់លោក ហ៊ុន សែន ពេលនេះ ស្មើនឹងយុទ្ធសាស្ត្រជីកស្មៅត្រូវជីកទាំងឫស ព្រោះដោយសារគណបក្សកាន់អំណាចនៅតែមើលឃើញថា គណបក្សភ្លើងទៀន គឺជាគណបក្សដែលមានឥទ្ធិពល។ លោកបន្តថា ប្រសិនបើគណបក្សភ្លើងទៀន អាចចូលរួមការបោះឆ្នោតអសកលនៃការជ្រើសរើសក្រុមប្រឹក្សាស្រុក ខណ្ឌខេត្តរាជធានី និង ការបោះឆ្នោតព្រឹទ្ធសភា នៅពេលខាងមុខ គណបក្សនេះនៅតែមានកម្លាំងរឹតតែខ្លាំង ដែលបញ្ហានេះ ជាការគំរាមកំហែងដល់ការកាន់អំណាចរបស់គណបក្សប្រជាជនកម្ពុជា។
លោក វ៉ន ចាន់ឡូត៖ «ដោយសារតែភ្លើងទៀន មានប្រភពចេញពីលោក សម រង្ស៊ី ទី២ អ្នកតំណាងរាស្ត្រមួយចំនួនក៏មនុស្សដែលមានភក្ដីភាពឬភាពស្និទ្ធស្នាលជាមួយនឹងលោក សម រង្ស៊ី ហើយទី៣ ភ្លើងទៀន ជាបក្សប្រឆាំងមួយដែលលេចធ្លោនៅក្នុងពេលបច្ចុប្បន្ន អ៊ីចឹងហេតុផលបីហ្នឹងដែលខ្ញុំមើលឃើញថា មិនធ្វើឱ្យអ្នកកាន់អំណាចគាត់សប្បាយចិត្ត»។
ទាក់ទងករណីគណបក្សភ្លើងទៀននេះដែរ គណបក្សភ្លើងទៀន បានដាក់លិខិតសុំជួបរដ្ឋមន្ត្រីក្រសួងមហាផ្ទៃ លោក ស ខេង ដើម្បីស្នើក្រសួងមហាផ្ទៃ ចេញលិខិតបញ្ជាក់ស្ដីពីលិខិតច្បាប់ដើមនៃការចុះបញ្ជីរបស់គណបក្សភ្លើងទៀននៅក្រសួងមហាផ្ទៃ ប៉ុន្តែ លោក ស ខេង មិនព្រមជួបនោះទេ។ លោក រ៉ុង ឈុន ប្រាប់ថា មូលហេតុដែលភាគីខាងក្រសួងមហាផ្ទៃមិនព្រមជួបក្រុមការងារគណបក្សភ្លើងទៀន ដោយក្រសួងមហាផ្ទៃអះអាងថា ត្រូវរង់ចាំការបង្កើតរដ្ឋាភិបាលថ្មីសិន។
គណបក្សភ្លើងទៀន ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) ដែលស្ថិតក្រោមឥទ្ធិពលរបស់គណបក្សកាន់អំណាចហាមមិនឱ្យចូលរួមការបោះឆ្នោតថ្ងៃទី២៣ ខែកក្កដា កន្លងទៅនេះទេ ព្រោះករណីគ្មានលិខិតចុះបញ្ជីច្បាប់ដើម។ អនុប្រធានគណបក្សភ្លើងទៀន លោក រ៉ុង ឈុន អះអាងថា គណបក្សភ្លើងទៀន នឹងស្វះស្វែងធ្វើការជាមួយអង្គទូតនានាដើម្បីស្នើទៅអង្គទូតទាំងនោះជួយអន្តរាគមន៍ទៅក្រសួងមហាផ្ទៃឱ្យចេញសេចក្ដីចម្លងលិខិតចុះបញ្ជីរបស់គណបក្សនេះនៅក្រសួងមហាផ្ទៃ សម្រាប់គណបក្សនេះយកទៅប្រើប្រាស់បម្រើការបោះឆ្នោតនាពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សិស្សជាប់បាក់ឌុបមួយចំនួន មិនទទួលស្គាល់លទ្ធផលប្រឡង
- សាច់ញាតិ និងសហជីព ទាមទារតុលាការឱ្យទម្លាក់ការចោទប្រកាន់ និងដោះលែងកញ្ញា ឈឹម ស៊ីថរ បន្ទាប់ពីឃុំខ្លួនរយៈពេល ១ឆ្នាំ
អត្ថបទពេញនិយម
នយោបាយ
- សហព័ន្ធខ្មែរក្រោមទាមទារឱ្យវៀតណាមឈប់ប្រើហិង្សាលើព្រះសង្ឃនិងពលរដ្ឋខ្មែរក្រោម
- តើការដឹកនាំរបស់នាយករដ្ឋមន្ត្រីកម្ពុជា និងថៃ ដូចឬខុសដូចម្ដេចខ្លះ ក្នុងរយៈពេល៣ខែនេះ?
- សកម្មជនភៀសខ្លួននៅម៉ាឡេស៊ី ថា ប៉ូលិសប៉ុនប៉ងចាប់ខ្លួនពួកគាត់ តាមសំណើរបស់អាជ្ញាធរខ្មែរ
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- អ្នកវិភាគចង់ឃើញអ្នកនយោបាយខ្មែរយកគំរូតាមកម្លាំងសាមគ្គីរបស់កីឡាករអុំទូក