កូនៗរបស់អ្នកនយោបាយបក្សប្រឆាំងដែលភៀសខ្លួននៅថៃបាត់បង់ឱកាសរៀនសូត្រ
2022.11.20
លោក ដួង ចន្ត្រា អនុប្រធានគណបក្សសង្គ្រោះជាតិខេត្តកំពង់ឆ្នាំង ដែលរស់នៅភៀសខ្លួនក្នុងប្រទេសថៃ៥ឆ្នាំមកហើយ និងមានកូន៤នាក់ក្នុងបន្ទុក។
រូប៖ RFA
កូនៗរបស់អ្នកនយោបាយ គណបក្សសង្គ្រោះជាតិ ដែលរស់នៅភៀសខ្លួនក្នុងប្រទេសថៃបាត់បង់ឱកាសរៀនសូត្រ ព្រោះឪពុកម្ដាយរវល់តែលាក់ខ្លួនក្នុងទីសុវត្ថិភាព និងផ្លាស់ប្តូរទីកន្លែងរស់នៅញឹកញាប់ដើម្បីគេចពីការធ្វើទុក្ខបុកម្នេញរបស់រដ្ឋាភិបាលខ្មែរ។ ពួកគាត់សង្ឃឹមលើអង្គការសហប្រជាជាតិទទួលបន្ទុកជនភៀសខ្លួននៅប្រទេសថៃ បញ្ជូនគ្រួសារពួកគាត់ទៅប្រទេសទី៣ ដើម្បីឲ្យកូនៗមានឱកាសចូលរៀន។
សកម្មជនគណបក្សសង្គ្រោះជាតិ ដែលកំពុងរស់នៅលាក់ខ្លួនក្នុងប្រទេសថៃមិនហ៊ានបញ្ជូនកូនទៅ រៀននោះទេ ព្រោះបារម្ភពីសុវត្ថិភាព និងដោយសារតែបញ្ហាសេដ្ឋកិច្ចគ្រួសារ។ ពួកគាត់រង់ចាំអង្គការសហប្រជាជាតិទទួលបន្ទុកជនភៀសខ្លួនបញ្ជូនទៅរស់នៅប្រទេសទី៣ ដើម្បីឲ្យកូនបានចូលរៀនទៀងទាត់។
លោក ដួង ចន្ត្រា អនុប្រធានគណបក្សសង្គ្រោះជាតិខេត្តកំពង់ឆ្នាំង ដែលរស់នៅភៀសខ្លួនក្នុងប្រទេសថៃ ៥ឆ្នាំមកហើយ និងមានកូន៤នាក់ក្នុងបន្ទុក ប្រាប់វិទ្យុអាស៊ីសេរីកាលថ្ងៃទី១៩ ខែវិច្ឆិកាថា ចាប់ពីថ្ងៃដែលរដ្ឋាភិបាលលោក ហ៊ុន សែន រម្លាយគណបក្សសង្គ្រោះជាតិមក លោកត្រូវតុលាការខេត្តកំពង់ឆ្នាំងចោទប្រកាន់ពីបទរួមគំនិតក្បត់ ផ្ដួលរំលំរដ្ឋាភិបាល ហើយលោកក៏នាំប្រពន្ធកូនរត់គេចមកថៃ។ លោកបន្តថា នៅទីនេះកូនគាត់មិនបានទៅរៀននៅសាលាថៃនោះទេ ដោយកូនបងរបស់គាត់ជាអ្នកបង្រៀនប្អូនៗ ហើយម្យ៉ាងទៀតលោកក៏កំពុងជួបប្រទះបញ្ហាជីវភាពប្រចាំថ្ងៃផងដែរ។ ទោះបីយ៉ាងណា លោកមិនបោះបង់ការតស៊ូក្នុងឆាកនយោបាយ ដើម្បីធ្វើឲ្យប្រទេសកម្ពុជាមានលទ្ធិប្រជាធិបតេយ្យឡើងវិញនោះទេ៖
«អ៊ីចឹងទេយើងនៅតែស៊ូទ្រាំបន្ត ដើម្បីជាមេរៀនមួយសម្រាប់ឲ្យកូនចៅយើងជំនាន់ក្រោយឲ្យគាត់មើលឃើញ ហើយត្បិតតែយើងមកដល់ពេលនេះទោះបីធ្វើកើត ឬមិនកើតយ៉ាងណាក៏ដោយ យើងជាអ្នកនាំផ្លូវក្មេងជំនាន់ក្រោយឲ្យមានការតស៊ូដូចយើង ដើម្បីឈានទៅរកប្រជាធិបតេយ្យពិតប្រាកដនៅកម្ពុជា។ បើយើងនាំគ្នាបោះចោលមានបញ្ហាជួបការលំបាក ហើយយើងបោះចោលធ្វើឲ្យក្មេងជំនាន់ក្រោយធ្វើតាម ដូច្នេះធ្វើឲ្យការតស៊ូដើម្បីលទ្ធិប្រជាធិបតេយ្យត្រូវបរាជ័យរហូតបាទ!។
លោក ដួង ចន្រ្តា ត្រូវតុលាការខេត្តកំពង់ឆាំងចោទប្រកាន់ពីបទ រួមគំនិតក្បត់ តាមមាត្រា៤៥៣ នៃក្រមព្រហ្មទណ្ឌរបស់កម្ពុជា ពាក់ព័ន្ធនឹងករណីផ្ដួលរំលំរដ្ឋាភិបាលលោក ហ៊ុន សែន។ លោកបដិសេធការចោទប្រកាន់នេះ។
ស្រដៀងគ្នានេះដែរ សកម្មជនគណបក្សប្រឆាំងម្នាក់ទៀត ដែលរស់នៅភៀសខ្លួនក្នុងប្រទេសថៃកន្លះឆ្នាំ មានកូន ៥នាក់ក្នុងបន្ទុក លោក ជា ជីវ ប្រាប់ថា លោកចង់ឲ្យកូនៗទៅរៀនដែរ តែពួកគាត់មិនព្រមទៅ ព្រោះពិបាកក្នុងការទំនាក់ទំនងជាមួយគ្រូជនជាតិថៃ ហើយ គ្រួសារលោកតែងផ្លាស់កន្លែងរស់នៅ ទើបធ្វើឲ្យកូនៗលោកមិនចង់ទៅសាលា។ លោកព្រួយខ្លាចកូនៗរៀនមិនទាន់គេ ពេលបានចូលរៀននៅថ្ងៃមុខ ព្រោះពួកគាត់ឈប់រៀនយូរពេក៖
«បាទ! ខ្ញុំពិតជាបារម្ភបាទ បារម្ភហើយខ្ញុំខ្លាចអនាគតរបស់ក្មេងៗអត់ទទួលបានការសិក្សាអប់រំល្អ។ ទាល់តែយើងទៅដល់ប្រទេសដែលយូអិន (អង្គការសហប្រជាជាតិ) គាត់បានបញ្ជូនស្នើទៅដាក់ទៅស្ថានទូត ទូតគេ បានយើងឲ្យគាត់ទៅរៀនសូត្រ ហើយទទួលការអប់រំដិតដល់ចំពោះការសិក្សារបស់គាត់បាទ! គឺប្រទេសទី៣បាទ»។
លោក ជា ជីវ ក៏ត្រូវសាលាដំបូងរាជធានីភ្នំពេញ បានផ្ដន្ទាទោសឲ្យជាប់ពន្ធនាគារ៦ឆ្នាំ ទាក់ទងបទចោទរួមគំនិតក្បត់ដែរ។លោក ជា ជីវ ក៏បដិសេធការចោទប្រកាន់នេះដែរ។
ជុំវិញរឿងនេះដែរ ប្រធានផ្នែកប្រយុទ្ធប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ លោក ឌី ថេហូយ៉ា លើកឡើងថា កុមារគឺជាពន្លកនៃការអភិវឌ្ឍប្រទេស បើពួកគាត់មិនបានទទួលការអប់រំត្រឹមត្រូវ នោះធនធានមនុស្សរបស់ជាតិនឹងបាត់បង់៖
«នេះប្រសិនបើមិនទទួលបានការរៀនសូត្រនៅប្រទេសថៃទេ វាបង្កឲ្យមានគេហៅផលប៉ះពាល់យូរអង្វែងសម្រាប់ប្រទេសជាតិយើងផ្នែកធនធានមនុស្ស។ ហើយវាផ្ដល់ផលប៉ះពាល់យូរអង្វែងយ៉ាងម៉េច គឺជាទូទៅក្មេងត្រូវការលូតលាស់ទាំងកាយសម្បទា ទាំងចំណេះដឹងគេហៅថា ការវិវឌ្ឍផ្នែកខួរក្បាលអីហ្នឹង»។
សមាជិករបស់គណបក្សសង្គ្រោះជាតិ ដែលបានចុះក្នុងបញ្ជីជនភៀសខ្លួននយោបាយនៅថៃមានជិត ៤០នាក់សព្វថ្ងៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ