មន្ត្រី​សង្គម​ស៊ីវិល និង​មន្ត្រី​បក្ស​ប្រឆាំង​ស្នើ​ឱ្យ​រដ្ឋាភិបាល​កែទម្រង់​ប្រព័ន្ធ​ដឹកនាំ

ដោយ ទីន ហ្សាការីយ៉ា
2023.12.02
មន្ត្រី​សង្គម​ស៊ីវិល និង​មន្ត្រី​បក្ស​ប្រឆាំង​ស្នើ​ឱ្យ​រដ្ឋាភិបាល​កែទម្រង់​ប្រព័ន្ធ​ដឹកនាំ កិច្ចប្រជុំគណៈរដ្ឋមន្ត្រី​ កាលពីថ្ងៃទី៣០ ខែ​វិច្ឆិកា ឆ្នាំ​២០២៣។
រូប៖ ហ្វេសប៊ុកលោក ហ៊ុន ម៉ាណែត

មន្ត្រី​សង្គម​ស៊ីវិល និង​មន្ត្រី​បក្ស​ប្រឆាំង​ស្នើ​ឱ្យ​រដ្ឋាភិបាល​ក្នុង​អាណត្តិ​ថ្មី​ពិនិត្យ​ប្រសិទ្ធភាព​ការងារ​របស់​សមាជិក​រដ្ឋាភិបាល​ដែល​មាន​ចំនួន​ច្រើន បើ​ធៀប​នឹង​ចំនួន​ប្រជាពលរដ្ឋ​ខ្មែរ​។ ពួកគេ ថា​ដើម្បី​ឱ្យ​ការងារ​របស់​រដ្ឋាភិបាល​មាន​ប្រសិទ្ធភាព រដ្ឋាភិបាល​គួរ​ដកចេញ​នូវ​មន្ត្រី​ទាំងឡាយ​ណា​ដែល​អសកម្ម និង​រក្សា​នូវ​មន្ត្រី​ទាំងឡាយ​ណា​ដែល​ស្នាដៃ​ជូន​ជាតិ។

គិត​ត្រឹម​បំណាច់​ខែវិច្ឆិកា ចំនួន​សមាជិក​រដ្ឋាភិបាល​ថ្មី​របស់​លោក ហ៊ុន ម៉ាណែត បូករួម​ទាំង​ចំនួន​ទីប្រឹក្សា និង​ជំនួយការ​ផង​កើន​ឡើង​ដល់​ជិត​៤​ពាន់ (.៩១៨)​នាក់​ហើយ​។​

ក្នុង​សមាសភាព​រដ្ឋាភិបាល​ដែល​ដឹកនាំ​ដោយ​លោកនាយ​រដ្ឋមន្ត្រី ហ៊ុន ម៉ាណែត មាន​សមាជិក​រដ្ឋាភិបាល​ជិត ១​ពាន់​៥​រយ​(.៤៨៤) នាក់ រួមមាន ឧបនាយករដ្ឋមន្ត្រី​ចំនួន​១០​រូប ទេសរដ្ឋមន្ត្រី​ចំនួន​២១​រូប រដ្ឋមន្ត្រី​ចំនួន​៣០​រូប និង​រដ្ឋលេខាធិការ ឬ​អនុរដ្ឋលេខាធិការ​ចំនួន​ជាង ១​ពាន់​៤​រយ (.៤២២) នាក់​។ ចំនួន​នេះ កើនឡើង​ជាង ២​ដង​បើ​ធៀប​នឹង​អាណត្តិ​ចុងក្រោយ​របស់​ឪពុក​លោក​គឺ​លោក ហ៊ុន សែន ដែល​មាន​សមាជិក​រដ្ឋាភិបាល​ចំនួន​ជិត ៧​រយ (៦៩៧) នាក់។

បើ​តាម​លិខិត​តែងតាំង​ដែល​បាន​ផ្សព្វផ្សាយ​ជា​សាធារណៈ​ចំនួន​ទីប្រឹក្សា និង​ជំនួយការ​មាន​ជិត​២​ពាន់ ៥​រយ​(.៤៣៤) នាក់​។ ការ​កើនឡើង​នេះ តម្រូវ​ឱ្យ​រដ្ឋាភិបាល​គ្រោង​បង្កើន​ចំណាយ​ទៅលើ​ចរន្ត ឬ ទៅលើ​ប្រាក់បៀវត្ស និង​ប្រតិបត្តិការ​ផ្សេងៗ ក្នុង​ឆ្នាំ​២០២៤ រហូត​ជិត​១៣ (១២,) ភាគរយ ខណៈ​ការ​ចំណាយ​ទៅលើ​មូលធន​ដែល​ទាក់ទង​ការ​វិនិយោគ​សាធារណៈ​សម្រាប់​កសាង​ហេដ្ឋារចនាសម្ពន្ធ​សំខាន់ៗ អាច​ធ្លាក់ចុះ​៣១ ភាគរយ បើ​ធៀប​នឹង​ឆ្នាំ​២០២៣​។​

អតីត​តំណាងរាស្ត្រ​គណបក្ស​សង្គ្រោះ​ជាតិ លោក អ៊ុំ សំអាន លើកឡើង​ថា មន្ត្រីជាន់ខ្ពស់​របស់​រដ្ឋាភិបាល​ក្នុង​អាណត្តិ​ថ្មី មាន​ចំនួន​ច្រើន​បើ​ធៀប​នឹង​បណ្ដា​ប្រទេស​ផ្សេងៗ​ដូចជា​ប្រទេស​ថៃ និង​ប្រទេស​វៀតណាម​ជាដើម​។ លោក អ៊ុំ សំអាន កត់សម្គាល់​ឃើញ​ថា មន្ត្រី​ដែល​ត្រូវ​បាន​តែងតាំង​ទាំងនោះ​ពុំបាន​បង្ហាញ​ប្រសិទ្ធភាព​ការងារ​ដែល​ពួកគេ​ធ្វើ​នោះ​ទេ ហើយ​លោក​ថា ការតែងតាំង​មន្ត្រី​ច្រើន​ស្អេកស្កះ គឺជា​ការ​ខ្ជះខ្ជាយ​ថវិកាជាតិ និង​ជា​ការ​ទម្លាក់​បន្ទុក​លើ​ប្រជាពលរដ្ឋ​ដែល​ជា​អ្នក​បង់ពន្ធ​កាន់តែ​ធ្ងន់ធ្ងរ​ស្របពេល​បច្ចុប្បន្ន​ជីវភាព​រស់នៅ​របស់​ប្រជាពលរដ្ឋ​កាន់តែ​លំបាក។

លោក អ៊ុំ សំអាន៖ «ហើយ​មន្ត្រីជាន់ខ្ពស់​របស់​រដ្ឋាភិបាល​ដ៏​ច្រើន​សន្ធឹក​សន្ធាប់​ហ្នឹង ភាគច្រើន​ក៏​គ្មាន​ការងារ​ធ្វើ​ដែរ មួយចំនួន​អត់​ការងារ​ធ្វើ​ទៅ​គប់គិត​ជាមួយ​ឈ្មួញ​លុប​បឹង កាប់​បំផ្លាញ​ព្រៃឈើ​បំផ្លាញ​ធនធានធម្មជាតិ​អ៊ីចឹង រកស៊ី​ខុសច្បាប់ ប្រព្រឹត្ត​អំពើពុករលួយ​។ ដូច្នេះ​នៅ​ពេល​ដែល​តែងតាំង​មន្ត្រីជាន់ខ្ពស់​របស់​រដ្ឋាភិបាល ទីប្រឹក្សា ហើយ​ជំនួយការ​ដ៏​ច្រើន​សន្ធឹក​សន្ធាប់​នេះ​គឺ​យើង​អាណិត​ដល់​ប្រជាពលរដ្ឋ​ដែល​ត្រូវ​បង់ពន្ធ​ដើម្បី​ទៅ​បើកប្រាក់​ខែ​ឱ្យ​មន្ត្រី​ទាំងអស់​នោះ»

វិទ្យុ​អាស៊ីសេរី​មិនទាន់​អាច​សុំ​ការ​ឆ្លើយតប​រឿង​នេះ​ពី​ប្រធាន​អង្គភាព​អ្នកនាំពាក្យ​រដ្ឋាភិបាល លោក ប៉ែន បូណា និង​អ្នកនាំពាក្យ​នាយករដ្ឋមន្ត្រី​លោក មាស សោភ័ណ្ឌ ដើម្បី​សាកសួរ​អំពី​បញ្ហា​នេះ​បាន​ទេ នៅ​ថ្ងៃ​ទី២៩ វិច្ឆិកា។

ទោះជា​យ៉ាងណា​លោកនាយក​រដ្ឋមន្ត្រី ហ៊ុន ម៉ាណែត លើកឡើង​កាល​ថ្ងៃទី​២២ វិច្ឆិកា ថា រដ្ឋាភិបាល​ក្រោម​ការដឹកនាំ​របស់​លោក​បាន​ធ្វើ​ការងារ​ជាច្រើន​ជួយ​ឱ្យ​សេដ្ឋកិច្ចជាតិ​រីក​ចម្រើន​តាមរយៈ​ការងារ​លេចធ្លោ​មាន​ដូចជា គម្រោង​កម្ចី​ដើម្បី​អភិវឌ្ឍន៍ ការ​ទាក់ទាញ​វិនិយោគ​ពី​ក្រៅ​ស្រុក​តាមរយៈ​ក្រុមហ៊ុន​ផ្សេងៗ ការចរចា​ជាមួយ​បណ្ដា​ប្រទេស​មួយចំនួន​បើក​ច្រក ដើម្បី​ទាក់ទាញ​ភ្ញៀវ​ទេសចរ​ឱ្យ​ចូល​មក​ទស្សនា​កម្ពុជា​ជាដើម។

នាយក​ប្រតិបត្តិ​នៃ​អង្គការ​តម្លាភាព​កម្ពុជា លោក ប៉ិច ពិសី មាន​ប្រសាសន៍​ថា ការ​រៀបចំ​សមាសភាព​រដ្ឋាភិបាល​ធំ​មិនមែន​ជា​រចនាសម្ព័ន្ធ​ល្អ​ឡើយ​សម្រាប់​ជាតិ​នោះ​ទេ។ លោក ប៉ិច ពិសី បន្ត​ថា កាលណា​មាន​មន្ត្រី​នយោបាយ ថ្នាក់ដឹកនាំ ទីប្រឹក្សា និង​មន្ត្រី​ជំនាញ ច្រើន​នោះ ការ​ចំណាយ​ទៅលើ​ប្រាក់បៀវត្ស និង​ប្រតិបត្តិការ​ផ្សេងៗ ដែល​ជំរុញ​លើ​ដំណើរការ​ដឹកនាំ​រដ្ឋ​ក៏​ច្រើន ដែល​ធ្វើ​ឱ្យ​ប៉ះពាល់​ដល់​ការ​វិនិយោគ សាធារណៈ ខណៈ​រដ្ឋ​គ្មាន​ថវិកា​គ្រប់គ្រាន់ សម្រាប់​កសាង ហេ​ដ្ឋា​រចនា​សម្ពន្ធ​សំខាន់ៗ និង​ការ​កសាង​ខឿន​សេដ្ឋកិច្ច​ជាតិ។

លោក ប៉ិច ពិសី បន្ត​ថា នៅ​ពេល​ដែល​ការតែងតាំង​មន្ត្រីជាន់ខ្ពស់​ក្នុង​ចំនួន​ច្រើន​ពេក អាច​ធ្វើ​ឱ្យ​តួនាទី​របស់​មន្ត្រី​ទាំងនោះ​ជាន់គ្នា ដែល​ធ្វើ​ឱ្យ​ប៉ះពាល់​ប្រសិទ្ធភាព​ការងារ និង​ដំណើរ​ការងារ​មាន​ដំណើរការ​ស្មុគស្មាញ​ទៅវិញ។

លោក ប៉ិច ពិសី៖ «ហើយ​មែនទែន​ទៅ យើង​អាច​ពិនិត្យមើល​លើ​ប្រសិទ្ធភាព​នៃ​ការ​អនុវត្ត​ការងារ​របស់​ពួកគាត់ ប្រសិនជា​មន្ត្រី​ដែល​សកម្ម មន្ត្រី​ដែល​មាន​សមត្ថភាព​ធ្វើការ យើង​គួរតែ​ទុក​ឱ្យ​ពួកគាត់​ធ្វើ​កិច្ច​ការសំខាន់ៗ សម្រាប់​ជាតិ ប៉ុន្តែ​បើ​មន្ត្រី​ដែល​ស្អុយ ដែល​មិន​បំពេញ​ភារកិច្ច ឬ​ប្រើប្រាស់​តួនាទី​ដើម្បី​តែ​ធ្វើ​កិច្ចការ​ផ្សេង ដែល​នាំ​មាន​ទំនាស់​ផលប្រយោជន៍​យើង​គួរ​កាន់​បន្ថយ»

ចាប់តាំងពី​ឆ្នាំ​២០១៧ រដ្ឋាភិបាល​បាន​ដំឡើង​ប្រាក់ខែ នាយករដ្ឋមន្ត្រី​ឡើង​ដល់ ១០​លាន​រៀល ប្រាក់ខែ​រដ្ឋមន្ត្រី ឬ​ទេសរដ្ឋមន្ត្រី ឡើង​ដល់ ៤​លាន ៥​សែន​រៀល ប្រាក់ខែ​រដ្ឋលេខាធិការ​ឡើង​ឡើង ៣​លាន ៥​សែន​រៀល ប្រាក់​ខែ​អនុរដ្ឋលេខាធិការ​ឡើង​ដល់ ២​លាន ៨​សែន​រៀល។

ការ​តែងតាំង​មន្ត្រី​ទាំងអស់​នោះ​ក៏​រង​នូវ​ការ​រិះគន់​ថា អាច​ជាប់​ពាក់ព័ន្ធ​អំពើពុករលួយ និង​ការ​ជាប់​សាច់ឈាម​គ្នា​នោះ​ដែរ​។ វិទ្យុ​អាស៊ីសេរី រក​ឃើញ​ថា ឧបនាយករដ្ឋមន្ត្រី​៧​នាក់​ក្នុង​ចំណោម​ឧបនាយករដ្ឋមន្ត្រី​ទាំង ១០​នាក់ សុទ្ធ​តែ​មាន​ចំណង​សម្ពន្ធភាព​ជាមួយគ្នា​ទៅវិញទៅមក និង​ជាមួយ​លោក ហ៊ុន ម៉ាណែត តាមរយៈ​ចំណង​ជំនួញ​អាជីវកម្ម​ក្ដី ចំណងអាពាហ៍ពិពាហ៍​ក្តី ឬ​ចំណង​សាច់​ឈាម​នឹង​គ្នា​ក្ដី​។ អំណាច និង​ញាតិសន្តាន​ដ៏​ជិតដិត​ហ៊ុមព័ទ្ធ​ចាក់​ស្រេះ​បែប​នេះ គឺជា​ប្រផ្នូល​អាក្រក់​សម្រាប់​កម្ពុជា ដែល​មាន​មេដឹកនាំ​នាំ​បង្កើត​បក្សពួក សាច់ឈាម​និង​គ្នា ហើយ​ការពារ​អំណាច​ឱ្យ​គ្នា​ទៅវិញទៅមក ដែល​ជា​ឱកាស​ធ្វើ​ឱ្យ​ពួកគេ​ប្រព្រឹត្តិ​អំពើពុករលួយ​កាន់តែ​ងាយស្រួល​ជាង​មុន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
ស្នងការ​រាជធានី​ភ្នំពេញ​ច្រាន​ចោល​ការ​លើកឡើង​របស់​ស្ថានទូត​រុស្ស៊ី​ពី​អសន្តិសុខ​នៅ​ក្រុង​ភ្នំពេញ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។