ពលរដ្ឋរិះគន់លោក ហ៊ុន សែន ថា ការថ្លែងសាររបស់លោកមិនបានផ្ដល់ប្រយោជន៍ដល់ជាតិឡើយ
2022.10.26
ប្រជាពលរដ្ឋ និងអ្នកតាមដានស្ថានការណ៍នយោបាយកម្ពុជារិះគន់លោក ហ៊ុន សែនថា ក្នុងរយៈពេលប៉ុន្មានថ្ងៃចុងក្រោយនេះ លោក ហ៊ុន សែនបានថ្លែងសារនយោបាយបែបគំរាមកំហែងបំផ្លាញពន្លកលទ្ធិប្រជាធិបតេយ្យ ដែលធ្វើឱ្យប្រជាជាតិខ្មែរកាន់តែបែកបាក់សាមគ្គីជាតិ។
ប្រជាពលរដ្ឋ និងក្រុមយុវជន ចាត់ទុកការថ្លែងសាររបស់មេដឹកនាំនៃរបបឯកបក្សថា មិនបានជួយជ្រំជ្រែងឱ្យប្រទេសជាតិមានការរីកចម្រើនឡើយ។ ផ្ទុយទៅវិញ ពួកគាត់មើលឃើញថា លោក ហ៊ុន សែន ការពារប្រយោជន៍បក្សកាន់អំណាចរបស់លោក និងឆ្លៀតឱកាសដើម្បីថ្លែងគំរាមកំហែងដល់គណបក្សនយោបាយណាដែលកំពុងមានប្រជាប្រិយភាព។ អ្នកតាមដានបញ្ហាសង្គមយល់ថា ការដែលមេដឹកនាំប្រទេសប្រើពាក្យសម្ដីគ្មានក្រមសីលធម៌ ព្រមទាំងមានគំរាមកំហែងអ្នកនយោបាយជាគូរប្រកួតប្រជែងបែបនេះ វានឹងជះឥទ្ធិពលអាក្រក់ដល់សង្គម ជាពិសេសជាសញ្ញាបំផ្លាញគ្រឹះនៃលទ្ធិប្រជាធិបតេយ្យនៅកម្ពុជាបន្ថែមទៀត។
ពលរដ្ឋរស់នៅខេត្តឧត្តរមានជ័យ លោក សុគន្ធ សំរឹទ្ធ លើកឡើងថា លោក ហ៊ុន សែន ដែលក្នុងនាមជាអ្នកដឹកនាំប្រទេសនោះ គួរតែគិតគូរអំពីប្រយោជន៍ជាតិជាធំ និងរកដំណោះស្រាយបញ្ហាជូនពលរដ្ឋជាច្រើនដែលកំពុងរងទុក្ខវេទនា មិនមែនឆ្លៀតឱកាសវាយប្រហារអ្នកនយោបាយដែលជាដៃគូរប្រកួតប្រជែងបែបនេះឡើយ។ លោកសង្កេតឃើញថា ការថ្លែងសាររបស់លោក ហ៊ុន សែន នៅតាមវេទិកានានា មិនបានបង្ហាញអំពីចក្ខុវិស័យណាមួយ ឬលើកឡើងនូវគោលនយោបាយ ដើម្បីដោះស្រាយបញ្ហាជាតិដូចជាវិបត្តិនយោបាយកំពុងជាប់គាំង និងពលរដ្ឋដែលកំពុងត្រូវបានអ្នកមានអំណាចរំលោភយកដីធ្លីនោះទេ។ លោករិះគន់ថា ការថ្លែងសាររបស់លោក ហ៊ុន សែន ភាគច្រើនគិតគូរផ្ដោតតែការពង្រឹងបក្សកាន់អំណាច ដោយមិនបានគិតគូរអំពីប្រយោជន៍ជាតិជាធំឡើយ៖
«ហើយការរិះគន់ ការវាយប្រហារគណបក្សប្រឆាំង ផ្សេងៗហ្នឹង ខ្ញុំគិតទៅគឺគាត់ [លោក ហ៊ុន សែន] មិនគួរមកប្រើ ឬយកមកគាបសង្កត់មកលើគណបក្សប្រឆាំងទេ ព្រោះរឿងអ្វីៗ អំណាចលើដៃគាត់ហើយ គាត់គួរតែធ្វើល្អ សម្រាប់ប្រជាពលរដ្ឋរៀងរាល់ថ្ងៃទៅខ្ញុំគិតថា ល្អបាត់ គួរតែយកផលប្រយោជន៍ជាតិជាធំ កុំយកផលប្រយោជន៍បក្សជាធំ ព្រោះវាមិនផ្ដល់ផលប្រយោជន៍ឱ្យប្រជាពលរដ្ឋ។ ប្រទេសកម្ពុជាយើងដឹងហើយរួចផុតពីភ្លើងសង្គ្រាមក៏ពិតមែន សព្វថ្ងៃទោះបីជាយើងមានសន្តិភាពក៏ពិតមែន ក៏ប៉ុន្តែ សន្តិភាពផ្លូវចិត្តពលរដ្ឋវាអត់មានពិតប្រាកដ ប្រជាធិបតេយ្យក៏វាអត់មានពិតប្រាកដទេ»។
ចំណែក ពលរដ្ឋម្នាក់ទៀតរស់នៅខេត្តកំពង់ចាម លោកស្រី ញ៉ែ សុភឿន ថ្លែងថា ការថ្លែងសារអ្នកកាន់អំណាចសព្វថ្ងៃ ឆ្លុះបញ្ចាំងអំពីការរើសអើងបក្សនយោបាយប្រឆាំង ដែលផ្ទុយពីគោលការណ៍ប្រជាធិបតេយ្យសេរីពហុបក្ស។ លើសពីនេះ លោកស្រីថារិះគន់ថា ការថ្លែងសាររបស់លោក ហ៊ុន សែន បែបគំរាម ព្រមទាំងប្រើពាក្យសម្ដីអសុរនៅតាមវេទិកាសាធារណៈ នោះវានឹងជះឥទ្ធិពលនៃការធ្លាក់ចុះសីលធម៌ក្នុងសង្គម៖
«ការនិយាយចេញមករបស់គាត់ [លោក ហ៊ុន សែន] ជូនកាលពលរដ្ឋយើងមានការភ័យខ្លាច។ គាត់ [លោក ហ៊ុន សែន] តែងតែលើកឡើងថាប្រទេសមានសន្តិភាពក្រោមការដឹកនាំរបស់គាត់ មានសន្តិភាពណាស់ តែការលើកឡើងនិយាយរបស់គាត់វាខុស។ គាត់ [លោក ហ៊ុន សែន] ថាមានលទ្ធិប្រជាធិបតេយ្យណាស់ សន្តិភាពណាស់ តែទង្វើដែលគាត់ធ្វើ កូនចៅគាត់ធ្វើក្រោមៗអី គំរាមកំហែង សម្លុតពលរដ្ឋ សូម្បីតែពលរដ្ឋតាមភូមិក៏ដោយ។ អត់ចោលទេអារឿងគំរាមកំហែងមិនថា តាំងពីថ្នាក់លើដល់ថ្នាក់ក្រោមទេ»។
នារយៈពេលមួយសប្ដាហ៍កន្លងមកនេះ លោកនាយករដ្ឋមន្ត្រី ហ៊ុន សែន បានចុះនៅតាមបណ្ដាខេត្តមួយចំនួន ដើម្បីជួបប្រជាពលរដ្ឋដែលកំពុងមានអាសន្នដោយសារទឹកជំនន់។ ទោះបីយ៉ាងណា ក្នុងគ្រាដែលពលរដ្ឋជួបគ្រោះភ័យដោយសារទឹកជំនន់នេះ លោក ហ៊ុន សែន ដែលជាមេដឹកនាំប្រទេសកម្ពុជាជិត ៤០ឆ្នាំមិនថ្លែងសារក្នុងការរកមធ្យោបាយ ដើម្បីទប់ស្កាត់បញ្ហាគ្រោះទឹកជំនន់នេះទេ។ លោក ហ៊ុន សែន បានផ្តល់អំណោយដល់ពលរដ្ឋដូចជាស្រូវពូជ មី ត្រីខ ដើម្បីជាថ្នូរឱ្យពួកគាត់អង្គុយស្ដាប់សារនយោបាយបែបគំរាមកំហែងរបស់លោក ព្រមទាំងអំពាវនាវឱ្យពលរដ្ឋថ្កោលទោសមេគណបក្សប្រឆាំង លោក សម រង្ស៊ី ដែលលោកចោទថាក្បត់ជាតិ និងបានប្រមាថព្រះមហាក្សត្រ។ ក្រៅពីនេះ លោក ហ៊ុន សែន ក៏បានឆ្លៀតឱកាសយកវេទិកាចែកស្រូវពូជជូនពលរដ្ឋប៉ុន្មានថ្ងៃចុងក្រោយនេះ ដើម្បីឃោសនារកសន្លឹកឆ្នោតខុសរដូវកាលឃោសនា ដែលទង្វើនេះផ្ទុយពីច្បាប់ និងលក្ខន្តិកនៃការឃោសនារកសន្លឹកឆ្នោតរបស់គណបក្សនយោបាយ។
សមាជិកបណ្ដាញយុវជនកម្ពុជា (CYN) លោក អួត ឡាទីន យល់ឃើញថា អ្នកនយោបាយគួរមានភាពចាស់ទុំ និងត្រូវតម្កល់ជាតិជាធំជាងបញ្ហាផ្ទាល់ខ្លួន ដើម្បីផ្តល់គំរូដល់យុវជនបន្តវេនជំនាន់ក្រោយ។ ទោះបីជាយ៉ាងណា លោកថា ស្ថានភាពនយោបាយនៅកម្ពុជានៅតែមានការរឹតត្បិត ជាពិសេសសេរីភាពពលរដ្ឋក្នុងការចូលរួមជីវភាពនយោបាយត្រូវបានអាជ្ញាធរបង្ក្រាបជាបន្តបន្ទាប់។ ក្រៅពីនេះ លោកថា ការថ្លែងសារនយោបាយរបស់អ្នកនយោបាយដែលមាននិន្នាការផ្ទុយពីបក្សកាន់អំណាច ក៏កាន់រួមតូចចង្អៀត ខណៈរដ្ឋាភិបាលអាចយកឱកាសក្នុងវេទិកាជាតិឃោសនារកសន្លឹកឆ្នោតដល់បក្សកាន់អំណាចបានដោយសេរី៖
«ក្រៅតែពីគណបក្សកាន់អំណាច គណបក្សផ្សេងៗដែលជាគណបក្សដែលអាចលទ្ធភាពក្នុងការប្រកួតប្រជែងជាមួយគណបក្សកាន់អំណាច គាត់មានតែបរិយាកាសនយោបាយហ្នឹងមិនល្អទេ ហើយសូម្បីតែសកម្មជនក៏មានបញ្ហាជាបន្តបន្ទាប់។ អ៊ីចឹងកន្លែងនេះវាឆ្លុះបញ្ចាំងថា សេរីភាពក្នុងការ ចូលរួមប្រកួតប្រជែងខាងនយោបាយហ្នឹងត្រូវបានរឹតត្បិតយ៉ាងធ្ងន់ធ្ងរ»។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីសុំប្រតិកម្មជុំវិញរឿងនេះបានទេនៅថ្ងៃទី២៦ ខែតុលា។
ចំណែក អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក យល់ថា ការថ្លែងសារនយោបាយរបស់លោក ហ៊ុន សែន កន្លងមកនេះគឺជាគំរាមកំហែងដល់អ្នកនយោបាយដែលមាននិន្នាការផ្ទុយពីបក្សកាន់អំណាច ដែលជាហេតុនាំឱ្យមានការបំផ្លាញពន្លកប្រជាធិបតេយ្យនៅកម្ពុជាបន្ថែមទៀត៖
«ជាពិសេសគឺការលើកឡើងរបស់លោកនាយករដ្ឋមន្ត្រី ហ៊ុន សែន ដែលពាក់ព័ន្ធទៅនឹងការគំរាមកំហែង មុនការបោះឆ្នោត។ ជាពិសេស ការឃោសនា មុនការបោះឆ្នោតរហូតដល់គំរាមថា ប្រសិនបើមិនបោះឆ្នោតឱ្យគណបក្សប្រជាជនកម្ពុជាទេ កើតមានសង្គ្រាម។ ខ្ញុំគិតថា អ្វីដែលលោកនាយករដ្ឋមន្ត្រី ហ៊ុន សែន លើកឡើងនៅពេលនេះ គឺវាពាក់ព័ន្ធទៅនឹងអ្វីដែលលោកព្រួយបារម្ភ អំពីស្ថានភាពនយោបាយ ជាពិសេសនោះការកើនឡើងនៃការគាំទ្រ របស់គណបក្សភ្លើងទៀន»។
ទាក់ទងនឹងរឿងនេះដែរ អ្នកវិភាគចាស់វស្សាបណ្ឌិត ឡៅ ម៉ុងហៃ បញ្ចេញទស្សនៈនៅលើហ្វេសប៊ុក (Facebook) របស់លោកថា បើនៅឡប់តប់ប្រមល់វិលវល់តែរឿងអ្នកនយោបាយព្រួតដៃវ៉ៃប្រហារគ្នាទៅវិញទៅមកនោះ នឹងនៅតែអ័ព្ទបញ្ញាមិនអាចរកគំនិតអ្វី ដើម្បីដោះស្រាយបញ្ហាក្នុងសង្គមបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។