មន្ត្រីសង្គមស៊ីវិលចង់ឃើញតុលាការចេញដីកាឲ្យស្ថាបនិកគណបក្សបេះដូងជាតិ គឺ លោក សៀម ភ្លុក ចូលខ្លួនបំភ្លឺនិងលុបចោលដីកាបង្គាប់នាំខ្លួនលើអ្នកនយោបាយរូបនេះ។ ការលើកឡើងបែបនេះ នៅពេលដីកាបង្គាប់ឲ្យនាំខ្លួនលោក សៀម ភ្លុក ត្រូវផុតកំណត់ កាលពីថ្ងៃទី២៥ ខែមេសាកន្លងទៅដែលតុលាការអាចនឹងចេញដីកាថ្មី។
មន្ត្រីសិទ្ធិមនុស្សយល់ថា សំណុំរឿងស្ថាបនិកគណបក្សបេះដូងជាតិ លោក សៀម ភ្លុក គឺ តុលាការគួរពិនិត្យឡើងវិញ នូវដីការបស់ខ្លួន ព្រោះការចេញដីកាឲ្យនាំខ្លួន លោក សៀម ភ្លុក ធ្វើឲ្យសាមីខ្លួនមានការភ័យខ្លាច មិនហ៊ានទៅបំភ្លឺនៅតុលាការ។
អ្នកនាំពាក្យសមាគមការពារសិទ្ធិមនុស្ស អាដហុក យល់ថា តាមនីតិវិធីនៅពេលដីកាបង្គាប់ឲ្យនាំខ្លួនលោក សៀម ភ្លុក ត្រូវផុតកំណត់ កាលពីថ្ងៃទី២៥ ខែមេសាកន្លងទៅ តុលាការអាចចេញដីកាថ្មី។ លោក ស៊ឹង សែនករុណា សង្កេតឃើញថា ស្ថាបនិកគណបក្សបេះដូងជាតិ លោក សៀម ភ្លុក នៅតែមានឆន្ទៈក្នុងការចូលបំភ្លឺនៅតុលាការ ដូច្នេះលោកថា តុលាការគួរបង្កបរិយាកាសឲ្យធូរស្រាលជាងនេះ ដោយប្រែពីដីកាបង្គាប់ឲ្យនាំខ្លួនមកជាដីកាឲ្យចូលបំភ្លឺវិញ៖ «គោលការណ៍ច្បាប់ អ្នកណា មានទោសទាល់តែមានសវនាការ ឬក៏សាលក្រមចូលជាស្ថាពរ ដូច្នេះនៅក្នុងនីតិវិធីយើងចង់ឃើញ អ្នកពាក់ព័ន្ធ ជាពិសេស សាមីខ្លួនអាចចូលបំភ្លឺ នូវអ្វីដែលការចោទប្រកាន់ ដើម្បីជម្រះមន្ទិល ទៅដល់សាធារណៈ ក៏ដូច សំណុំរឿងរបស់ខ្លួនផងដែរបាទ »។
ការលើកឡើងរបស់មន្រ្តីសង្គមស៊ីវិលបែបនេះ ខណៈមេធាវីការពារក្ដីឲ្យលោក សៀម ភ្លុក កំពុងរង់ចាំការឆ្លើយតបពីតុលាការនៃការសំណើរបស់ខ្លួន កាលពីថ្ងៃទី២២ ខែមេសាកន្លងទៅ ដោយសុំសាលាដំបូងរាជធានីភ្នំពេញឱ្យបញ្ឈប់ដីកាបង្គាប់ឲ្យសមត្ថកិច្ចនាំខ្លួនលោក សៀម ភ្លុក ទៅតុលាការ។
មេធាវីការពារក្ដីឱ្យ លោក សៀម ភ្លុក គឺលោក ជូង ជូងី ប្រាប់វិទ្យុអាស៊ីសេរី នៅថ្ងៃទី២៦ ខែមេសា ថា តុលាការមិនទាន់ឆ្លើយតប នូវសំណើរបស់លោកនៅឡើយទេ មកដល់ពេលនេះ។ លោកមេធាវី ឲ្យដឹងទៀតថា កូនក្ដីរបស់លោកត្រៀមខ្លួនចូលបំភ្លឺនៅតុលាការជានិច្ច នៅពេលទទួលបានដីកាកោះហៅថ្មី៖ «បាទត្រឹមត្រូវហើយគាត់ (លោក សៀម ភ្លុក ) ប្រាប់ថា គាត់នឹងចូលបំភ្លឺនៅតុលាការនៅពេលមានដីកាកោះហៅចូលតាមអាស័ដ្ឋានរបស់គាត់។ អ្វីដែលខ្ញុំមានការកត់សម្គាល់ហ្នឹងពាក់ព័ន្ធនឹងការចោទប្រកាន់ក្លែងបន្លំពាក់ព័ន្ធនឹងការចុះបញ្ជីគណបក្សនយោបាយអ៊ីចឹងប្រជាពលរដ្ឋចូលរួមផ្ដិតមេដៃគាំទ្រឲ្យបង្កើតគណបក្ស គឺជាឆន្ទៈនយោបាយក្នុងករណីមានការខុសឆ្គង ពាក់ព័ន្ធស្នាមមេដៃនោះ អត់មានធ្វើខូចខាតដល់អ្នកណាធ្វើឲ្យប៉ះពាល់ដល់វិស័យច្បាប់ណាទេ »។
ទាក់ទងបញ្ហានេះ វិទ្យុអាស៊ីសេរីមិនអាចសុំបំភ្លឺ ប្រធានលេខាធិការដ្ឋានសាលាដំបូងរាជធានីភ្នំពេញ លោក អ៊ី រិន្ទ បានទេ។ វិទ្យុអាស៊ីសេរីក៏មិនអាចសុំការអត្ថាធិប្បាយណាមួយពីស្ថាបនិកគណបក្សបេះដូងជាតិលោក សៀម ភ្លុក បានទេនៅថ្ងៃទី២៦ ខែមេសា។
មេធាវីការពារក្ដីឱ្យស្ថាបនិកគណបក្សបេះដូងជាតិលោក សៀម ភ្លុក បានស្នើសុំសាលាដំបូងរាជធានីភ្នំពេញឱ្យបញ្ឈប់ដីកាតាមចាប់ខ្លួន ដោយជំនួសមកវិញនូវដីកាបង្គាប់ឱ្យចូលខ្លួនវិញ ដោយសំអាងហេតុផលថា សមត្ថកិច្ចបានបញ្ជូនដីកាទៅកូនក្តីរបស់លោកដោយខុសអាស័យដ្ឋានស្នាក់នៅ។ លិខិតដាក់ទៅតុលាការលើកឡើងថាហេតុដែលធ្វើតុលាការចេញដីកាបង្គាប់នាំខ្លួនលោក សៀម ភ្លុក ព្រោះមានការបញ្ជូនដីកាកោះហៅលោក សៀម ភ្លុក ខុសអាស័យដ្ឋាន។
ស្ថាបនិកគណបក្សបេះដូងជាតិ សៀម ភ្លុក ត្រូវបានក្រសួងមហាផ្ទៃបដិសេធមិនព្រមចុះបញ្ជីឲ្យគណបក្សរបស់លោក និងប្ដឹងលោកទៅតុលាការ ពីបទចោទ «ក្លែងបន្លំ និងប្រើប្រាស់លិខិតក្លែង» ក្នុងការបង្កើតគណបក្សបេះដូងជាតិកាលពីឆ្នាំ២០២១។ ក្រោយក្រសួងមហាផ្ទៃប្ដឹងបែបនេះ ចៅក្រមស៊ើបសួរសាលាដំបូងរាជធានីភ្នំពេញលោក លិ សុខា បានចេញដីកាបង្គាប់ឱ្យនាំខ្លួនលោក សៀម ភ្លុក ប្រគល់ជូនសាលាដំបូងរាជធានីភ្នំពេញឱ្យបានមុនថ្ងៃទី២៥ ខែមេសា ។
ជុំវិញរឿងនេះអ្នកវិភាគនយោបាយ ដែលកំពុងភៀសខ្លួននៅ ប្រទេសហ្វាំងឡង់ (Finland) លោក គឹម សុខ សង្កេតឃើញថា ករណីនេះជារឿងនយោបាយមិនមែនជាការអនុវត្តច្បាប់ឡើយ។ លោកបន្តថា នៅពេលគណបក្សអំណាច មើលឃើញថា គណបក្សបេះដូងជាតិ ឬគណបក្សនយោបាយណាមួយមានបំណងប្រឆាំង ឬមានទស្សនៈនយោបាយស្របនឹងគណបក្សកាន់អំណាច គឺគណបក្សនេះ នឹងត្រូវលោក ហ៊ុន សែន បិទខ្ទប់មិនឲ្យធ្វើសកម្មភាពបានឡើយ៖ «ក្នុងការធ្វើចលនាប្រឆាំងទោះក្នុងគណបក្សនយោបាយ ឬសង្គមស៊ីវិល ព្រោះថា ក្ដីបារម្ភរបស់គាត់ (លោក ហ៊ុន សែន ) បើកាលណាមានចលនាប្រឆាំងជាមួយគាត់ស្របច្បាប់ ពេលនោះប្រជាពលរដ្ឋគាំទ្រ ហើយចូលរួមពេលនោះ លោក ហ៊ុន សែន គាត់ដឹងថា ពិបាកទប់ខ្លាំងណាស់ ម៉្លោះហើយលោក ខ្ទប់ពីចរន្តតូចៗ ឲ្យហើយ »។
មេធាវីការពារក្ដីឱ្យ លោក សៀម ភ្លុក លោក ជូង ជូងី រិះគន់ថា ក្រសួងមហាផ្ទៃ មានការប្រកាន់ និងចាប់ទោសអូសដំណើរលើលោក សៀម ភ្លុក ខ្លាំងពេកហើយ។ លោកថា ករណីចុះបញ្ជីគណបក្ស ក្រសួងតម្រូវឲ្យមានស្នាមមេដៃគាំទ្រចំនួន ៤ពាន់ (៤.០០០មេដៃ)។ លោកបន្តថា ស្នាមមេដៃដែលគាំទ្រគណបក្សបេះដូងជាតិមានជាង ៤ពាន់ស្នាមមេដៃ (៤.០០០មេដៃ) ហើយក្នុងនោះមានស្នាមមេដៃ ដែលមានកំហុសជាង ២០០សំឡេងនោះ ប៉ុន្តែលោកថា ទោះដកស្នាមមេដៃមានបញ្ហាទាំងនោះចេញ ក៏គណបក្សនេះនៅតែមានស្នាមមេដៃគ្រប់គ្រាន់ក្នុងការចុះបញ្ជីដែរ ប៉ុន្តែ ក្រសួងបែរជាមិនចុះបញ្ជី ហើយថែមទាំងប្ដឹងលោក សៀម ភ្លុក ទៅតុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។