សកម្មជន​​បក្ស​​ប្រឆាំង​​នៅ​​បាត់ដំបង​​ប្រមាណ​ ២០​នាក់​​បន្ត​​ជួបជុំ​​ថ្លែង​​សារ​​បារម្ភ​​ពី​​អឺរ៉ុប​​ផ្ដាច់​ EBA

ដោយ វ៉ែន សុមេធ
2019-08-07
អ៊ីម៉ែល
មតិ
Share
បោះពុម្ព
សកម្មភាព​សកម្មជន​គណបក្សសង្គ្រោះជាតិ ​ប្រមាណ ២០​នាក់ នៅ​ស្រុក​រុក្ខគិរី ខេត្ត​បាត់ដំបង ជួបជុំគ្នា​សំដែង​ការ​ព្រួយ​បារម្ភ​ខ្លាច​សហគមន៍​អឺរ៉ុប ផ្ដាច់ការ​អនុគ្រោះ​ពន្ធEBA នៅ​រសៀល​ថ្ងៃ​ទី៧ សីហា ២០១៩។
សកម្មភាព​សកម្មជន​គណបក្សសង្គ្រោះជាតិ ​ប្រមាណ ២០​នាក់ នៅ​ស្រុក​រុក្ខគិរី ខេត្ត​បាត់ដំបង ជួបជុំគ្នា​សំដែង​ការ​ព្រួយ​បារម្ភ​ខ្លាច​សហគមន៍​អឺរ៉ុប ផ្ដាច់ការ​អនុគ្រោះ​ពន្ធEBA នៅ​រសៀល​ថ្ងៃ​ទី៧ សីហា ២០១៩។
Photo Provided

សកម្មជន​គណបក្សប្រឆាំង​ប្រមាណ ២០​នាក់ នៅ​ស្រុក​រុក្ខគិរី ខេត្ត​បាត់ដំបង នៅ​រសៀល​ថ្ងៃ​ទី៧ សីហា ជួបជុំគ្នា​សំដែង​ការ​ព្រួយ​បារម្ភ​ខ្លាច​សហគមន៍​អឺរ៉ុប ផ្ដាច់ការ​អនុគ្រោះ​ពន្ធEBA ធ្វើ​ឱ្យ​ប៉ះពាល់​ដល់​សេដ្ឋកិច្ច​ជាតិ ជាពិសេស​ប៉ះពាល់​ដល់​ប្រាក់ចំណូល​របស់​កម្មករ​រោងចក្រ​រាប់​សែន​នាក់។ មន្ត្រី​សង្គម​ស៊ីវិល លើកឡើង​ថា ការ​ថ្លែង​សារ​នេះ គឺជា​សិទ្ធិ​សេរីភាព​ក្នុង​ការ​បញ្ចេញមតិ​របស់​ប្រជា​ពលរដ្ឋ ដោយ​ស្របច្បាប់។

សកម្មជន​គណបក្ស​សង្គ្រោះជាតិ ស្រុក​រុក្ខគិរី ថ្លែង​សារ​រួមគ្នា​នៅ​ភូមិ​ព្រែកតាវែន ឃុំ​ព្រែកជីក ដោយ​ការ​ខ្វល់ខ្វាយ​ខ្លាច​សហគមន៍​អឺរ៉ុប​ផ្ដាច់​អនុគ្រោះ​ពន្ធEBA។ ពួកគេ​ប្រើប្រាស់​បណ្ដាញ​សង្គម ហ្វេសប៊ុក (Facebook) ដើម្បី​ផ្សព្វផ្សាយ​ក្តី​កង្វល់​ទាំងនោះ។

សមាជិក​ក្រុមប្រឹក្សា​ស្រុក​រុក្ខគិរី ជាប់ឆ្នោត​គណបក្ស​សង្គ្រោះជាតិ លោក សែម ពិរស់ ប្រាប់​អាស៊ីសេរី ក្រោយ​បញ្ចប់​ពិធី​ជួបជុំ​ថា ពួកគាត់​ធ្វើ​នេះ​ដើម្បី​ប្រយោជន៍​របស់​ពលរដ្ឋ ជាពិសេស​កម្មករ​រោងចក្រ ឱ្យ​មាន​ការងារ​ធ្វើ​រក​ប្រាក់​ចំណូល​ជួយ​ដល់​ឪពុកម្ដាយ​នៅ​ទី​ជនបទ ដោយសារ​ការ​ផ្ដាច់​ពន្ធ​EBA។ លោក​បន្ត​ថា ដើម្បី​ដោះស្រាយ​បញ្ហា​នេះ លុះត្រាតែ​រដ្ឋាភិបាល​របប​ឯក​បក្ស អនុវត្ត​តាម​សំណើ​របស់​សហគមន៍​អឺរ៉ុប ដោយ​ការ​គោរព​សិទ្ធិមនុស្ស ដោះលែង​លោក កឹម សុខា ប្រធាន​គណបក្ស​សង្គ្រោះជាតិ ឱ្យ​មាន​សេរីភាព និង​បើកផ្លូវ​ឱ្យ​គណបក្ស​សង្គ្រោះជាតិ រស់​ឡើង​វិញ ដើម្បី​ចូលរួម​ប្រកួតប្រជែង​បោះឆ្នោត​សាជាថ្មី។ មន្ត្រី​បក្ស​ប្រឆាំង​រូប​នេះ បញ្ជាក់​ថា ពួកគាត់​ធ្វើ​បែប​នេះ ដើម្បី​ធានា​ដល់​សហគមន៍​អឺរ៉ុប កុំ​ឱ្យ​ផ្ដាច់ការ​អនុគ្រោះ​ពន្ធEBAមក​លើ​កម្ពុជា ព្រោះ​ថ្ងៃ​វាយតម្លៃ​ពី ស្ថានការណ៍​នៅ​កម្ពុជា ដើម្បី​សម្រេច​ថា​ត្រូវ​បន្ត ឬ​ព្យួរ​ប្រព័ន្ធ​EBA កាន់តែ​ខិត​ជិត​មកដល់​ហើយ៖ «ដូច្នេះ​ខ្ញុំ​ក្នុងនាម​ជា​ប្រជាពលរដ្ឋ​ខ្ញុំ​ព្រួយបារម្ភ​ណាស់ បើ​សិន​ថ្នាក់ដឹកនាំ​មិនបាន​គិត​គួរ​បញ្ហា​នេះ គឺ ធ្វើ​ឱ្យ​ពួកគាត់​មានការ​លំបាក​ដោយសារ​បាត់បង់​ប្រាក់ចំណូល ព្រោះ​មិន​ប៉ះពាល់​ដល់​អ្នក​មាន​អំណាច​ធំៗ​នោះ​ទេ ព្រោះ​ពួកគេ​មាន​ជីវភាព​ធូរធារ​ហើយ ប៉ុន្តែ​ពួក​ខ្ញុំ​ដែល​ជា​កម្មករ និង​ជា​អ្នកស្រែ​ចម្ការ ដែល​មាន​បងប្អូន​ធ្វើការ​រោងចក្រ​ធ្វើ​ឱ្យ​ប៉ះពាល់​ដល់​ជីវភាព»

លោក​បន្ថែម​ថា នៅ​ពេល​ថ្លែង​សារ​នេះ​មាន​អ្នក​ស្លៀកពាក់​ស៊ីវិល​ឃ្លាំមើល​ពួកគាត់​ឱ្យ​មាន​ការ​ភ័យខ្លាច​ដែរ ប៉ុន្តែ​ពួកគាត់​នៅតែ​បន្ត​ថ្លែង​សារ​រហូត​ដល់​ចប់​កម្មវិធី។

ទាក់ទង​នឹង​បញ្ហា​នេះ អភិបាលស្រុក​រុក្ខគិរី លោក ជា សម្បត្តិ ប្រាប់​អាស៊ីសេរី​យ៉ាង​ខ្លី​ថា លោក​មិន​ចាប់​អារម្មណ៍​នឹង​ការ​សម្ដែង​មតិ​នេះ​ទេ៖ «ខ្ញុំ​អត់​បាន​ទទួល​ព័ត៌មាន​ផង។ ខ្ញុំ​អត់​យល់​ឃើញ​ថា ម៉េច​ទេ ព្រោះ​ខ្ញុំ​តាម​គាត់​មិនទាន់​ដែរ»

មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​បាត់ដំបង លោក យិន ម៉េងលី លើកឡើង​ថា ប្រជាពលរដ្ឋ​ជួបជុំ​ថ្លែង​សារ​ព្រួយបារម្ភ​អំពី​ការ​ផ្ដាច់​ការ​អនុគ្រោះ​ពន្ធEBA បង្ហោះ​ក្នុង​ហ្វេសប៊ុក (Facebook) គឺ​ជា​សិទ្ធិ​សេរីភាព​របស់​ពល​រដ្ឋ ដែល​មាន​កំណត់​ក្នុង​រដ្ឋធម្មនុញ្ញ ដោយ​មិន​មាន​ការ​ខុស​ច្បាប់​នោះ​ឡើយ។ មន្ត្រី​សង្គម​ស៊ីវិល​រូប​នេះ បញ្ជាក់​ថា សមត្ថកិច្ច​ទៅវិញ​ទេ ដែល​អនុវត្ត​ខុសច្បាប់ ដោយ​បាន​សាកសួរ​ពលរដ្ឋ​ធ្វើ​ឱ្យ​ពួកគាត់​ភ័យខ្លាច​មិន​ហ៊ាន​សម្ដែង​មតិ​ទៅ​ថ្ងៃ​ក្រោយ​ទៀត​នោះ៖ «ចំណុច​សំខាន់​នៅ​ក្នុង​រឿង​នេះ គឺ​អាជ្ញាធរ​និង​សមត្ថកិច្ច​ទេ​មានការ​ព្រួយបារម្ភ ហើយ​ដាក់​ការ​តាមដាន​រហូត​គ្រប់​សកម្មភាព​ឱ្យ​តែ​មានការ​ជួបជុំ ជាពិសេស​សកម្មជន​គណបក្ស​សង្គ្រោះជាតិ។ អ៊ីចឹង​វា​ធ្វើ​ឱ្យ​ប៉ះពាល់​ដល់​សេរីភាព​ជា​មូលដ្ឋាន ដែល​ធានា​ដោយ​រដ្ឋធម្មនុញ្ញ​ដោយ​ច្បាប់​អន្តរជាតិ ដែល​កម្ពុជា​ជា​ហត្ថលេខី​នោះ»

មួយ​រយៈ​ចុងក្រោយ​នេះ សកម្មជន​គណបក្ស​សង្គ្រោះជាតិ​ខេត្ត​បាត់ដំបង​បាន​ប្ដូរ​យុទ្ធសាស្ត្រ ក្នុង​ការ​សម្ដែង​មតិ​របស់​ខ្លួន ពី​ការ​ជួប​ជុំ​គ្នា​ហូប​នំ​បញ្ចុក ទៅជា​ការ​ប្រមូល​ផ្ដុំ​គ្នា​ថ្លែង​សារ​ព្រួយបារម្ភ​អំពី​សហគមន៍​អឺរ៉ុប​ផ្ដាច់ការ​អនុគ្រោះ​ពន្ធ​EBA វិញ ។​ទន្ទឹម​គ្នា​នេះ អាជ្ញាធរ​មូលដ្ឋាន​ក៏​បាន​ដាក់​កម្លាំង​តាមដាន និង​ទៅ​សាកសួរ​ដល់​ផ្ទះ​សកម្មជន​បក្ស​ប្រឆាំង​ជា​បន្តបន្ទាប់។ កាល​ពី​ថ្ងៃ​ទី​២៩ កក្កដា អាជ្ញាធរ​ឃុំ​បវេល​ចំនួន ២​នាក់ ចូល​ទៅ​សាកសួរ​សមាជិក​ក្រុមប្រឹក្សា​ស្រុក​បវេល ជាប់ឆ្នោត​គណបក្ស​សង្គ្រោះ​ជាតិ លោក ម៉ក់ យ៉ាន ដល់​ផ្ទះ ដោយសារ​ពួកគាត់​ថ្លែង​សារ​ព្រួយបារម្ភ​ពី​ការផ្ដាច់​ការ​អនុគ្រោះ​EBA។ កាល​ថ្ងៃ​ទី​៣ សីហា ប៉ូលិស​ឃុំ​អន្លង់រុន ស្រុក​ថ្មគោល ក៏បាន​ចូល​ទៅ​សួរនាំ​ម្ចាស់ផ្ទះ​ផ្ដល់​ទីតាំង​ឱ្យ​សកម្មជន​បក្ស​ប្រឆាំង​ថ្លែង​សារ​ពាក់ព័ន្ធ​នឹង​រឿង​នេះ​ដែរ។ សកម្មជន​ទាំងនោះ អះអាង​ថា បើ​ទោះបី​ជា​មាន​ការ​គំរាមកំហែង​យ៉ាង​នេះ​ក្ដី ក៏​មិន​អាច​បំបែក​សាមគ្គីភាព​របស់​ពួកគាត់​បាន​ដែរ ដោយ​ពួកគាត់​យល់ថា ការ​ថ្លែង​សារ​ជា​សិទ្ធិ​សេរីភាព​ស្រប​ច្បាប់​របស់​ពលរដ្ឋ ដូច្នេះ​សកម្មជន​នៅ​តាម​មូលដ្ឋាន នឹង​ជួបជុំគ្នា​សម្ដែង​មតិ​ជា​បន្តបន្ទាប់​ទៀត។ សហភាព​អឺរ៉ុប​កំពុង​ចាត់វិធានការ​លើ​នីតិវិធី​ត្រួតពិនិត្យ និង​វាយតម្លៃ​ស្ថានការណ៍​កម្ពុជា រយៈពេល​ប្រាំ​មួយ​ខែ​ដំបូង ត្រូវ​បិទ​បញ្ចប់​នៅ​ថ្ងៃ​ទី​១២ ខែ​សីហា ខាងមុខនេះ​។ សហភាព​អឺរ៉ុប នឹង​ឈាន​ទៅ​ព្យួរ​ការ​អនុគ្រោះ​ពន្ធ EBA ពី​កម្ពុជា បើ​ស្ថានភាព​រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ នៅតែ​មិន​ប្រសើរ​ឡើង​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល