សកម្មជនគណបក្សប្រឆាំងប្រចាំខេត្តបាត់ដំបងប្រមាណ៥០នាក់ កាលពីព្រឹកថ្ងៃទី៦ មករា បន្តជួបជុំគ្នាពង្រឹងសាមគ្គីភាពជាធ្លុងមួយ ហើយបានថ្លែងគាំទ្រលោក សម រង្ស៊ី ធ្វើជាប្រធានស្ដីទីគណបក្សសង្គ្រោះជាតិ ដើម្បីរួមគ្នាស្ដារប្រជាធិបតេយ្យនៅកម្ពុជាឲ្យរស់ឡើងវិញ។
នេះជាសំឡេងសកម្មជនគណបក្សប្រឆាំងថ្លែងសារគាំទ្រលោក សម រង្ស៊ី នៅឃុំខ្នាចរមាស ស្រុកបវេល ជួបជុំគ្នាប្ដេជ្ញាចិត្តរួមកម្លាំងចាំទទួលលោក សម រង្ស៊ី វិលចូលស្រុកវិញនៅពេលខាងមុខ។
អតីតសមាជិកក្រុមប្រឹក្សាខេត្តបាត់ដំបងគណបក្សសង្គ្រោះជាតិ លោក ឌឹម សារឿន ថ្លែងប្រាប់អាស៊ីសេរីនៅរសៀលថ្ងៃទី៦ មករា ថា ពួកគាត់បានប្ដេជ្ញារួចជាស្រេចក្នុងការទៅទទួលលោក សម រង្ស៊ី ចូលស្រុកវិញ បើទោះបីអាជ្ញាធរគំរាមចាប់ដាក់គុក ក៏ពួកគាត់មិនខ្លាចដែរ ព្រោះអាជ្ញាធររបបលោក ហ៊ុន សែន បានបំផ្លាញប្រជាធិបតេយ្យនៅកម្ពុជា ដោយការរំលាយគណបក្សប្រឆាំងដ៏ធំជាងគេ ហើយបានបិទសិទ្ធិសេរីភាពពួកគាត់អស់ជាមួយឆ្នាំហើយ ដើម្បីលោកហ៊ុន សែន បានបន្តទៅមុខទៀត៖ «បាទអត់ទ្រាំយូរហើយ គេចោទប្រកាន់ប្រធានខ្ញុំថាក្បត់ជាតិ បើទោះជាតុលាការនឹងអាក្រក់ដែលយើងមិនទទួលស្គាល់ក៏ដោយ រហូតដល់ពេលនេះរកភស្តុតាងដាក់បន្ទុកលោក កឹម សុខា រកមិនឃើញផង ដូច្នេះយើងទ្រាំដល់ណាទៀតត្រូវតែងើបត្រូវតែតស៊ូ ពីព្រោះជាឱកាសល្អដែលយើងត្រូវងើប យើងមើលពលរដ្ឋខ្មែរនៅក្រៅប្រទេសរាប់ម៉ឺននាក់គេងើបហើយ យើងនៅក្នុងប្រទេសរង់ចាំអីទៀតត្រូវតែងើប»។
លោកបន្ថែមថា កម្លាំងសកម្មជនគណបក្សសង្គ្រោះជាតិ ប្រចាំខេត្តបាត់ដំបងកាន់តែផុលផុស ក្នុងការជួបជុំគ្នាថ្លែងសារនយោបាយគាំទ្រ លោក សម រង្ស៊ី វិលចូលស្រុកវិញ បើទោះបីជាថ្មីនេះ នៅខេត្តមួយចំនួន មន្ត្រីប៉ូលិសបានបង្ខំឲ្យសកម្មជនធ្វើកិច្ចសន្យាឈប់ប្រមូលផ្ដុំគ្នាធ្វើសកម្មភាពបែបនេះតទៅទៀត។
ទាក់ទងនឹងករណីនេះកន្លងមកអ្នកនាំពាក្យរបបក្រុងភ្នំពេញលោក ផៃ ស៊ីផាន មានប្រសាសន៍ថា លោកមិនចាប់អារម្មណ៍ចំពោះការផុលផុសរបស់មន្ត្រីបក្សប្រឆាំងនេះទេ ព្រោះលោកថា បញ្ហានេះជាសិទ្ធិក្នុងការបញ្ចេញមតិរបស់ប្រជាពលរដ្ឋ៖ «កុំឲ្យគេប៉ះពាល់ដល់សន្តិសុខជាតិកុំឲ្យប៉ះពាល់ដល់ការងារប្រទេសជាតិនឹងជារឿងផ្ទៃក្នុងបោះគេ។ បាទកាលណាគាត់រៀបចំគម្រោងដែលរំខានដល់ការបោះឆ្នោត អានឹងត្រូវមានការគ្រប់គ្រងដោយដែនសមត្ថកិច្ច តែឥឡូវការបោះឆ្នោតបានកន្លែងផុតហើយ» ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តបាត់ដំបងលោក យិន ម៉េងលី លើកឡើងថា ការប្រមូលផ្ដុំគ្នានេះដោយសារសកម្មជនគណបក្សប្រឆាំងនៅថ្នាក់មូលដ្ឋានសាមគ្គីគ្នារឹងមាំ ព្រោះក្រោយពីសភាឯកបក្សធ្វើវិសោធនកម្មច្បាប់គណបក្សនយោបាយ បើកផ្លូវឲ្យមន្ត្រីគណបក្សនយោបាយដែលមានឈ្មោះក្នុងបញ្ជីខ្មៅអាចដាក់ពាក្យសុំសិទ្ធិពីនយោបាយរដ្ឋមន្ត្រីធ្វើនយោបាយឡើងវិញនោះ។ លោកបន្ថែមថា ការជួបជុំគ្នានេះមិនខុសច្បាប់នោះទេ ព្រោះជាសិទ្ធិក្នុងការបញ្ចេញមតិរបស់ពលរដ្ឋ៖ «ខ្ញុំយល់ឃើញថា បើតាមគោលការណ៍ច្បាប់កិច្ចសន្យាដែលសមត្ថកិច្ចឲ្យសកម្មជនបក្សប្រឆាំងធ្វើកន្លងមកនឹង វាអត់អាចយកទៅអនុវត្តបានពីព្រោះបើនិយាយបីកិច្ចសន្យាវាទាល់តែធ្វើឡើងដោយឆន្ទៈ ដោយការព្រមព្រៀង ហើយធ្វើឡើងដោយការបំភិតបំភ័យដោយការគំរាមកំហែង ដូច្នេះកិច្ចសន្យានេះមិនអាចយកទៅអនុវត្តន៍បានទេ។ បើនៅក្នុងក្រមព្រហ្មទណ្ឌមានមាត្រាមួយមាននិយាយពីការគំរាមកំហែង អីចឹងសកម្មភាពគំរាមកំហែងគឺជាបទល្មើសដែលមានចែងក្នុងច្បាប់ព្រហ្មទណ្ឌ ហើយមួយរយៈចុយក្រោយនេះខ្ញុំឃើញមាននៅតាមប៉ុស្តិ៍ប៉ូលិស និងនៅអធិការនគរបាលមួយចំនួន មានសកម្មភាពជាការគំរាមកំហែងប៉ុន្តែអត់មានថ្នាក់លើណាមួយមានវិធានការទេ»។
លោកបន្ថែមថា ករណីអាជ្ញាធរមិនចាត់វិធានការទៅលើសមត្ថកិច្ចដែលបានបង្ខំសកម្មជនបក្សប្រឆាំងឲ្យធ្វើកិច្ចសន្យាឈប់ធ្វើសកម្មភាពកន្លងមកនោះ អាចជាការរៀបចំជាប្រព័ន្ធពីអាជ្ញាធរថ្នាក់លើ ព្រោះបើមិនមានបញ្ជាទេ ក៏មិនអាចធ្វើសកម្មភាពនេះបានដែរ។
លោក ឌឹម សារឿន អះអាងថា បើទោះបីជាសមត្ថកិច្ចធ្វើទុក្ខបុកម្នេញមកលើពួកគាត់យ៉ាងនេះក្ដីក៏ពួកគាត់នៅតែបន្តការប្រមូលផ្ដុំសមាជិកគណបក្សខ្លួនថ្លែងសារនយោបាយទាមទារឲ្យគណបក្សសង្គ្រោះជាតិរស់ឡើងវិញ លុះត្រាមានដំណោះស្រាយនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។