"ការ​បោះឆ្នោត​ក្រុមប្រឹក្សា​ខេត្ត​​ស្រុក​គួរ​បញ្ចូល​ជាមួយ​ការ​បោះឆ្នោត​ឃុំ​សង្កាត់​​ឬ​ថ្នាក់​ជាតិ​ដើម្បី​កាត់​បន្ថយ​ការ​ចំណាយ"

ដោយ មាន ឫទ្ធិ
2019-03-06
អ៊ីម៉ែល
មតិ
Share
បោះពុម្ព
លោក កន សាវាង្ស អ្នកសម្របសម្រួលផ្នែកអង្កេតរបស់​អង្គការ​ឃ្លាំមើល​ការ​បោះ​ឆ្នោត ខុមហ្វែ្រល (COMFREL) នៅ​ក្នុង​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី៣០ ខែ​សីហា ឆ្នាំ ២០១៦។
លោក កន សាវាង្ស អ្នកសម្របសម្រួលផ្នែកអង្កេតរបស់​អង្គការ​ឃ្លាំមើល​ការ​បោះ​ឆ្នោត ខុមហ្វែ្រល (COMFREL) នៅ​ក្នុង​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី៣០ ខែ​សីហា ឆ្នាំ ២០១៦។
RFA

ជុំវិញ​រឿង​របប​ក្រុងភ្នំពេញ​ត្រៀម​រៀបចំ​ការបោះឆ្នោត​ក្រុមប្រឹក្សា​រាជធានី​ខេត្ត​ក្រុង​ស្រុក​ខណ្ឌ​លើក​ទី​បី ដែល​នឹង​ប្រព្រឹត្តិ​ទៅ​នៅ​ថ្ងៃទី២៦ ឧសភា ខាងមុខនេះ អ្នក​ជំនាញ​ខាង​ឃ្លាំមើល​កិច្ចការ​បោះឆ្នោត និង​ជា​មន្ត្រី​ជាន់ខ្ពស់​របស់​អង្គការ​ខុមហ្វ្រែល (Comfrel) លោក កន សាវាង្ស ថ្លែងប្រាប់​អាស៊ី​កាលពី​យប់​ថ្ងៃទី៦ មីនា នេះ​ថា លោក​ចង់​ឃើញ​ស្ថាប័ន គ..ប និង​រដ្ឋាភិបាល ពិចារណា​ដាក់​បញ្ចូល​ការបោះឆ្នោត​ក្រុមប្រឹក្សា​រាជធានី​ខេត្ត​ក្រុង​ស្រុក​ខណ្ឌ ទៅ​ក្នុង​ការបោះឆ្នោត​ឃុំ​សង្កាត់ ឬ​ថ្នាក់​ជាតិ ចៀសជាង​រៀបចំ​ការបោះឆ្នោត​នេះ​ដាច់ដោយឡែក​តែឯង​នោះ។ លោក កន សាវាង្ស ថា ការ​ធ្វើ​ដូច្នេះ គឺ​ដើម្បី​កាត់បន្ថយ​ការ​ចំណាយ​ថវិកាជាតិ​យ៉ាង​ច្រើន ដោយសារតែ​នេះ​គ្រាន់តែ​ជា​ការ​បោះឆ្នោត​អ​សកល​តែប៉ុណ្ណោះ​។ លោក កន សាវាង្ស ក៏​មើល​ឃើញ​ដែរ​ថា ផ្អែក​តាម​ការសង្កេត​មួយរយៈ​កន្លងមក ក្រោយ​រដ្ឋាភិបាល​លោក ហ៊ុន សែន រម្លាយ​គណបក្ស​សង្គ្រោះ​ជាតិ ចោល​មក លោក​ថា ប្រជាពលរដ្ឋ​មួយ​ចំនួន ហាក់​នឿយណាយ​លែង​សូវ​ចាប់អារម្មណ៍ ឬ​ចូលរួម​សកម្ម​ក្នុង​រឿង​ដំណើរការ​បោះ​ឆ្នោត តែ​ពួកគេ​ខ្វល់ខ្វាយ​នឹង​រឿង​ប្រទេសជាតិ​ទៅវិញ៖ «ទោះបីថា មាន​ការ​បោះឆ្នោត​យ៉ាងម៉េច ក៏​គាត់​ហាក់​ដូចជា​មានការ​នឿយណាយ ហើយ​និយាយ​ឲ្យ​ចំ​គាត់​បែរជា​មាន​ការ​ព្រួយបារម្ភ​ពី​រឿង​ប្រទេសជាតិ​របស់​គាត់​ទៅវិញ ដែល​ជា​រឿង​ធំ ដូចជា​ទាក់ទង​ទៅ​ហ្នឹង​រឿង​ស្ថានភាព​ការរស់នៅ​អី​ផ្សេងៗ ... កាលណា​មាន​គំនាប​អី គាត់​គិត​យ៉ាងម៉េច។ ទាំងនេះ គឺជា​អ្វី​ដែល​ប្រជាពលរដ្ឋ​ចាប់អារម្មណ៍​។ រឿង​ទាំងអស់​នេះ សំខាន់​ដែល​ធ្វើ​ឲ្យ​ពួកគាត់​មិន​មាន​ការចាប់អារម្មណ៍​ទាក់ទង​ទៅ​នឹង​រឿង​ការ​បោះ​ឆ្នោត​​ហ្នឹង គាត់​លើក​ហេតុផល​មួយ គឺ​ទាក់ទង​នឹង​រឿង​ថា អ្វី​ដែល​គាត់​ខំប្រឹង​បញ្ចេញ​សំឡេង អ្វី​ដែល​គាត់​ខំប្រឹង​យកចិត្តទុកដាក់​ទៅលើ​តំណាង​របស់​ពួកគាត់ បែរជា​អត់​មាន ហើយ​បែរជា​សំឡេង​នោះ​ត្រូវ​បាន ... អាសនៈ​ដែល​គាត់​ខំប្រឹង​ស្រឡាញ់​​យក​​ទៅ​​ចែក​តំណាង​របស់​គាត់ បែរជា​ត្រូវ​យក​ទៅ​ចែក​អ្នក​ផ្សេង​។ នេះ​ហើយ​ជា​អ្វី​ដែល​ពួកគាត់​មានការ​បញ្ចេញ​យោបល់​បែប​ហ្នឹង»

យ៉ាងណាក៏ដោយ លោក កន សាវាង្ស ថា យោបល់​ទាំងនេះ​មិនមែន​ឆ្លុះបញ្ចាំង​ឲ្យ​ឃើញ​ពី​ការយល់ឃើញ​របស់​ពល​រដ្ឋ​ទាំងអស់​ជាទូទៅ​នោះ​ទេ ព្រោះ​ពុំ​ទាន់​មានការ​សិក្សា​ស្រាវជ្រាវ ច្បាស់លាស់​នោះ​ទេ​។ លោក កន សាវាង្ស មាន​ប្រសាសន៍ សំណូមពរ​របស់​លោក​ពី​ខាងដើម​នេះ គឺ​ដោយ​លោក​មិន​និយាយ​ដល់​ពី​រឿងរ៉ាវ​នៃ​វិបត្តិ​នយោបាយ និង​ការ​ទាមទារ​ឲ្យ​មានការ​បោះឆ្នោត​ជាតិ​ឡើងវិញ ពី​សំណាក់​សហភាព​អឺរ៉ុប​នោះ​នៅឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល