មន្ត្រី​បក្ស​ភ្លើង​ទៀន ថា​បេក្ខជន និង​ភ្នាក់​ងារ​សង្កេត​ការ​បក្ស​ភ្លើង​ទៀន​ ចោទ​បក្ស​កាន់​អំណាច​បន្ត​ធ្វើ​ទុក្ខបុកម្នេញ​ដល់​ពួក​គាត់​តាម​ឃុំ​សង្កាត់​ទូទាំង​ប្រទេស

ដោយ មាន រិទ្ធិ
2022.05.26
Share on WhatsApp
Share on WhatsApp
មន្ត្រី​បក្ស​ភ្លើង​ទៀន ថា​បេក្ខជន និង​ភ្នាក់​ងារ​សង្កេត​ការ​បក្ស​ភ្លើង​ទៀន​ ចោទ​បក្ស​កាន់​អំណាច​បន្ត​ធ្វើ​ទុក្ខបុកម្នេញ​ដល់​ពួក​គាត់​តាម​ឃុំ​សង្កាត់​ទូទាំង​ប្រទេស ថ្ងៃទី២៤ខែ​ឧសភា​ឆ្នាំ២០២២ពិធី​ជួប​ជុំ​ដង្ហែរ​ក្បួន​ក្នុង​យុទ្ធនាការ​ឃោសនា​បោះឆ្នោត​នៅ​ក្នុង​ទីក្រុង​សៀមរាប។
រូប៖ ហ្វេសប៊ុក លោក ថាច់ សេដ្ឋា

មន្ត្រី​ជាន់​ខ្ពស់​បក្ស​ភ្លើង​ទៀន​លើក​ឡើង​ថា​បេក្ខជន និង​ភ្នាក់ងារ​សង្កេត​ការណ៍​របស់​គណបក្ស​ភ្លើង​ទៀន​ រង​ការ​គំរាម​កំហែង​បំភិតបំភ័យ​ និង​ធ្វើ​ទុក្ខបុកម្នេញ​កាន់​តែ​ខ្លាំង​ពី​សំណាក់​អាជ្ញាធរ​ពាក់ព័ន្ធ ដែល​មាន​និន្នាការ​ទៅ​រក​បក្ស​កាន់​អំណាច​ ខណៈ​ការ​បោះឆ្នោត​កាន់​តែ​ជិត​មក​ដល់។អ្នកនាំ​ពាក្យ​បក្ស​កាន់​អំណាច ច្រានចោល​ការ​ចោទ​ប្រកាន់​នេះ ។ មន្ត្រី​សង្គម​ស៊ីវិល​លើក​ទឹក​ចិត្ត ដល់​គណបក្ស​ដែល​ជន​រង​គ្រោះ​ទាំង​អស់ ឲ្យ​ធ្វើ​ការ​ប្តឹង​ដោយ​មាន​អំណះអំណាង​ច្បាស់​លាស់ ។

បេក្ខជន​ឈរ​ឈ្មោះ និង​ភ្នាក់​ងារ​សង្កេត​ការណ៍​បោះឆ្នោត​របស់​គណបក្ស​ភ្លើង​ទៀន​ ត្អូញត្អែរ​ថា ពួក​គាត់​ពិបាក​អនុវត្ត​ការងារ ដោយ​សារ​អាជ្ញាធរ​ដែល​ស្ថិត​ក្រោម​ឥទ្ធិពល​របស់​គណបក្ស​កាន់​អំណាច បង្កើន​ការ​គំរាម​កំហែង និង​បំភិត​បំភ័យ​ដល់​ពួកគាត់ ។ មន្ត្រី​ជាន់​ខ្ពស់​ គណបក្ស​ភ្លើង​ទៀន​អះអាង​ថា មក​ទល់​ពេល​នេះ មាន​ភ្នាក់​ងារ​សង្កេតការណ៍​មួយ​ចំនួន​របស់​គណបក្ស​ បាន​លា​ឈប់​ជា​បន្តបន្ទាប់​ដោយ​សារ តែ​ភ័យ​ព្រួយ​ពី​សុវត្ថិភាព ក្រោយ​មាន​ការ​គំរាម​កំហែង​ពី​អាជ្ញាធរ ។

អនុប្រធាន​គណបក្ស​ភ្លើង​ទៀន លោក ថាច់ សេដ្ឋា ប្រាប់​វិទ្យុអាស៊ីសេរី​នៅ​ថ្ងៃ​ទី២៦​ខែឧសភា ថា​ការ​លើក​ឡើង​របស់​ភ្នាក់ងារ​ និង​បេក្ខជន​នៅ​តាម​ឃុំ​សង្កាត់ ដែល​ថា​មាន​ករណី​គំរាមកំហែង ការ​បំភិតបំភ័យ ការ​បំផ្លាញ​ស្លាក​សញ្ញា និង​ការ​ធ្វើ​ទុក្ខបុកម្នេញ​ដល់​ក្រុមការងារ សកម្មជន បេក្ខជន និង​ភ្នាក់ងារ​សង្កេត​ការណ៍​សឹង​គ្រប់​ឃុំ​នៅ​ទូទាំង​ប្រទេស​គឺ​ជា​ការ​ពិត ។ លោក​បញ្ជាក់​ថា ករណី​គំរាម​កំហែង និង​ការ​ធ្វើ​ទុក្ខបុកម្នេញ​ទាំង​នេះ មិន​ដែល​ឃើញ​អាជ្ញាធរ និង​គ..ប ចាត់​វិធាន​ការ​ច្បាប់​ឡើយ៖«នេះ​ការ​លើក អោយ​ល្អ​ស្តាប់​របស់​ពួក​គាត់​ទេ តាម​ពិត​ទៅ​គាត់​មិន​មាន​វិធាន​ការ​អី​ដែល​ជាក់​ស្តែង ដើម្បី​បង្ក្រាប​នូវ​ការ​គំរាម​កំហែង​ទាំង​អស់​នោះ​ទេ​ ឧទាហរណ៍​ដូច​ជា​រឿង​ការ​លួច​កាប់​បំផ្លាញ​ស្លាក​គណបក្ស​ក្តី លួច​វាយ​សកម្មជន​អី គឺ​មិន​ដែល​រក​ឃើញ​មួយ​ផង​ហ្នឹង»

ឆ្លើយ​តប​ករណី​នេះ អ្នក​នាំ​ពាក្យ​គណបក្ស​កាន់​អំណាច លោក សុខ ឥសាន លើក​ឡើង​ថា នេះ​គ្រាន់​តែ​ជា​ការ​បំប៉ោង​របស់​គណបក្ស​ភ្លើងទៀន​ ដើម្បី​ធ្វើ​អោយ​បរិយាកាស​មុន​ការ​បោះឆ្នោត​អាប់អួរ ។ លោក​បន្ត​ថា បើ​មាន​ករណី​ទាំង​នេះ​កើត​ឡើង ហេតុ​អ្វី​មិន​ប្តឹង​តាម​នីតិវិធី​ នៃ​ការ​បោះឆ្នោត ៖«អឺ ការ​ចោទ​នេះ ខ្ញុំ​យល់​ថា​គ្រាន់​តែ​ជា​ការ​ចោទ​ទេ ​បើ​គាត់​ដាក់​មាន​អ្នក​ណា​ហ៊ាន​ទៅ​ដក​របស់​គាត់ ពី​ព្រោះ​ដាក់ មិន​មែន​ដាក់​មក​រដ្ឋ​អំណាច​ណា គឺ​ដាក់​ទៅគជប នុះ​ បើ​គជប​ទទួល​ស្គាល់​ជា​បេក្ខជន ឬ​មួយ​ជា​អ្នក​សង្កេត​ការ​ហើយ សួរ​ថា​អ្នក​ណា​មាន​សិទ្ធិ​ទៅ​ដក​ អ្នក​ណា​មាន​សិទ្ធិ​គំរាម​កំហែង អត់ទេ តែ​យើង​យល់​ថា​គាត់​បាន​តែ​ថា ​ក៏​ប៉ុន្តែ​បើ​មាន​បាតុភាព​អសកម្ម​ដូច​គាត់​ថា គាត់​ម្តេច​មិន​ដាក់​ពាក្យ​ប្តឹង»

ជុំ​វិញ​រឿង​នេះ មន្ត្រី​សង្គម​ស៊ីវិល​ផ្នែក​ឃ្លាំ​មើល​ការ​បោះឆ្នោត​មើល​ឃើញ​ថា​ ប្រសិន​បើ​ទង្វើ​របស់​គណបក្ស​កាន់​អំណាច​ជា​ការ​ពិត គឺ​ជា​រូប​ភាព​ធ្វើ​ទុក្ខបុកម្នេញ​ផ្នែក​នយោបាយ​ម្តង​ហើយ​ម្តង​ទៀត លើ​សកម្មជន​គណបក្ស​ភ្លើង​ទៀន ដែល​ធ្វើ​ឱ្យ​ប៉ះ​ពាល់​ដល់​បរិយាកាស​នយោបាយ​មិន​ល្អ​ នៅ​មុន​ពេល​បោះឆ្នោត​ឃុំ-សង្កាត់។

អ្នក​សម្រប​សម្រួល​ផ្នែក​អង្កេត​និង​តស៊ូ​មតិ​នៃ​អង្គការ​ខុមហ្វ្រែល (COMFREL) លោក កន សាវាង្ស​ លើក​ឡើង​ថា​ ខាង​លោក​មិន​ទាន់​បាន​ទទួល​ព័ត៌មាន​លំអិត​អំពី​ភាព​មិន​ប្រក្រតី​ទាក់ទង​រឿង​នេះ​ទេ ប៉ុន្តែ​លោក​យល់​ឃើញ​ថា អ្នក​រងគ្រោះ គួរ​ធ្វើ​កំណត់​ហេតុ ​ហើយ​លោក​ក៏​លើក​ទឹក​ចិត្ត និង​គាំទ្រ​អោយ​មាន​ការ​ប្តឹង​នៅ​ពេល​មាន​ករណី​រំលោភ​សិទ្ធិ គំរាមកំហែង បំភិតបំភ័យ ឬ​ធ្វើ​ទុក្ខបុកម្នេញ​គ្រប់​រូប​ភាព​កើត​ឡើង ៖ «ជា​អ្នក​រង​គ្រោះ​ យើង​មិន​អាច​និង​លើក​ឡើង​តាម​តែ​មាត់​អោយ​គេ​ដោះ​ស្រាយ​បាន​ទេ ការ​ដោះ​ស្រាយ​ទាល់​តែ​មាន​អំណះអំណាង​អញ្ចឹង​អឺ...​ទាល់​តែ​គណបក្ស​នយោបាយ​ហ្នឹង​ចេះ​ធ្វើ​អំពី​ការ​កំណត់​ហេតុ ឬ​ក៏​ស្ថានភាព​អោយ​បាន​ច្បាស់​លាស់​ ទោះ​បី​ថា​ដំណើរការ​ភាព​ដោះ​ស្រាយ​ហ្នឹង វា​មិន​បាន​លទ្ធផល បាន​លទ្ធ​ផល​ក៏ដោយ ចៀស​ជាង​យើង​លើក​ឡើង​ដែល​វា​អត់​មាន អត់​មាន​អំណះអំណាង អីចឹង​សំរាប់​ខ្ញុំ ការ​យល់​ឃើញ​របស់​ខ្ញុំ សាក្សី ឬ​ក៏​កំណត់​ហេតុ ឬ​ក៏​ការ​ដាក់​ពាក្យ​បណ្តឹង​នេះ វា​ជា​រឿង​មួយ​ដែល​សំខាន់»

ទោះ​ជា​យ៉ាង​ណា មន្ត្រី​គណបក្ស​ភ្លើង​ទៀន និង​ក្រុម​អង្គ​ការ​សង្គម​ស៊ីវិល ពិនិត្យ​ឃើញ​ថា​ មក​ទល់​ពេល​នេះ បរិយាកាស​នយោបាយ នៅ​តែ​ស្ថិត​ក្នុង​ភាព​បែប​អាប់អួ​នៅឡើយ ដែល​ធ្វើ​ឲ្យ​ពួក​គេ ព្រួយ​បារម្ភ​ថា ការ​បោះឆ្នោត​នៅ​ពេល​ខាង​មុខ នឹង​មិន​អាច​ប្រព្រឹត្ត​ទៅ​ដោយ​សេរី ត្រឹមត្រូវ និង​យុត្តិធម៌​នោះ​ទេ ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក គា សុគន្ធ អ្នក​និពន្ធ​គំរូ​ក្នុង​ការ​ឆ្លុះ​បញ្ចាំង​ការ​ពិត និង​បណ្ដុះ​ស្មារតី​ស្នេហា​ជាតិ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។