ស្នងការពាណិជ្ជកម្មអឺរ៉ុប អ្នកស្រី សេស៊ីលីយ៉ា ម៉ាស្ត្រុម (Cecilia Malmstrom) បានគូសបញ្ជាក់ជាថ្មីម្ដងទៀត អំពីកង្វល់នានារបស់សហភាពអឺរ៉ុប ជុំវិញបញ្ហាប្រជាធិបតេយ្យ ការរំលោភសិទ្ធិមនុស្ស និងនីតិរដ្ឋនៅកម្ពុជា។ ការគូសបញ្ជាក់នេះធ្វើឡើងនៅក្នុងជំនួបទ្វេភាគីមួយរវាងអ្នកស្រី និងប្រតិភូកម្ពុជាដឹកនាំដោយលោក ប្រាក់ សុខុន រដ្ឋមន្ត្រីការបរទេសកម្ពុជា នៅមុនកិច្ចប្រជុំរដ្ឋមន្ត្រីការបរទេសអាស៊ាន-អឺរ៉ុបលើកទី ២២ នៅទីក្រុងព្រុចសែល (Brussels) ប្រទេសបែលហ្សិក (Belgium) កាលពីថ្ងៃទី២១ មករា។
ក្រោយជំនួបទ្វេភាគីមួយជាមួយប្រមុខការទូតកម្ពុជាលោក ប្រាក់ សុខុន អ្នកស្រី សេស៊ីលីយ៉ា ម៉ាស្ត្រុម ស្នងការពាណិជ្ជកម្មអឺរ៉ុប ដែលបច្ចុប្បន្នកំពុងពិចារណារឿងដកហូតប្រព័ន្ធអនុគ្រោះពន្ធ «គ្រប់មុខទំនិញទាំងអស់លើកលែងតែអាវុធ» ឬ EBA នោះ បានសរសេរនៅលើទំព័រ ទ្វីធ័រ (Twitter) របស់អ្នកស្រីថា អ្នកស្រីបានពិភាក្សារឿងកិច្ចព្រមព្រៀងផ្ដល់ប្រព័ន្ធអនុគ្រោះពន្ធ EBA របស់សហភាពអឺរ៉ុបនេះ ជាមួយនឹងលោក ប្រាក់ សុខុន ហើយក៏បានលើកឡើងអំពីលទ្ធភាពនៃការដកហូតប្រព័ន្ធអនុគ្រោះពន្ធនេះពីកម្ពុជាដែរ។ អ្នកស្រីសរសេរបន្តថា អ្នកស្រីនៅតែគូសបញ្ជាក់ឡើងវិញដដែលអំពីកង្វល់នានា របស់សហភាពអឺរ៉ុប ជុំវិញបញ្ហាលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋនៅកម្ពុជា។ យ៉ាងណាក៏ដោយ អ្នកស្រីថា សហភាពអឺរ៉ុបនៅតែបន្តរក្សាបើកចំហឲ្យមាននូវកិច្ចសន្ទនាជាមួយកម្ពុជា មុននឹងឈានទៅរកការសម្រេចជាស្ថាពរលើការដកហូតប្រព័ន្ធអនុគ្រោះពន្ធនេះនាពេលអនាគត ឬយ៉ាងណានោះ។
លោក ប្រាក់ សុខុន មិនបានឲ្យដឹងពីលទ្ធផលជាក់លាក់នៃជំនួបនោះទេ ដោយលោកគ្រាន់តែ សរសេរនៅលើទំព័រហ្វេសប៊ុកផ្លូវការរបស់លោកថា លោកបានជំនួបពិភាក្សាការងារជាមួយស្នងការពាណិជ្ជកម្មអឺរ៉ុប នៅក្រៅកិច្ចប្រជុំលើកទី ២២ នៃរដ្ឋមន្ត្រីការបរទេសអាស៊ាន-សហភាពអឺរ៉ុប។
ស្របពេលដែលមានកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុបលើកទី ២២ នេះ តំណាងសភាពាណិជ្ជកម្មកម្ពុជា ដឹកនាំដោយលោក គិត ម៉េង រួមទាំងក្រុមមេដឹកនាំមកពីវិស័យឯកជនរបស់បរទេសមួយចំនួន សមាគមកាត់ដេរនៅកម្ពុជា ហៅកាត់ថា GMAC សមាគម និងសហជីពស្និទ្ធនឹងរបបក្រុងភ្នំពេញ បានសរសេរលិខិតរួមគ្នាមួយចុះថ្ងៃទី ២១ មករា ផ្ញើទៅកាន់ស្នងការពាណិជ្ជកម្មអឺរ៉ុបអ្នកស្រី អ្នកស្រី សេស៊ីលីយ៉ា ម៉ាស្ត្រុម ដោយអំពាវនាវទៅដល់គណៈកម្មការអឺរ៉ុប និងបណ្ដារដ្ឋសមាជិកអឺរ៉ុបទាំងអស់ កុំឲ្យដកហូតប្រព័ន្ធអនុគ្រោះពន្ធពិសេសនេះពីកម្ពុជា និងឲ្យបន្តផ្តល់ការគាំទ្ររបស់ខ្លួនដល់ដំណើរការអភិវឌ្ឍនៅកម្ពុជា ដោយមិនត្រូវចាត់ចំណាត់ការណាមួយដែលពួកគេយល់ថា ជាការធ្វើឲ្យប៉ះពាល់ដល់អត្ថប្រយោជន៍ និងជីវភាពរស់នៅរបស់ប្រជាពលរដ្ឋខ្មែរនោះទេ។ ក្រុមតំណាងវិស័យឯកជន សមាគម និងសហជីពទាំងនោះ ទទួលស្គាល់ថា បន្ទាប់ពីគណៈកម្មការអឺរ៉ុបបានប្រកាសយកពន្ធលើអង្ករកម្ពុជា ជាផ្លូវការកាលពីថ្ងៃទី១៧ ខែមករា ឆ្នាំ២០១៩ កន្លងទៅ ការគំរាមដាក់ទណ្ឌកម្មនានាបានក្លាយជាការពិត ហើយបានធ្វើឲ្យមានការភ័យខ្លាចថា សហភាពអឺរ៉ុបអាចនឹងត្រៀមខ្លួនរួចរាល់ បែរខ្នងចេញពីកម្ពុជា ដែលហេតុការណ៍នេះបង្កឲ្យមានភាពមិនប្រាកដប្រជាអំពីអនាគតនៅកម្ពុជា ដែលពួកគេថានឹងប៉ះពាល់ធ្ងន់ធ្ងរបំផុតដល់វិស័យនាំចេញ និងការងារនៅកម្ពុជា។
ដោយឡែកប្រធានស្ដីទីគណបក្សសង្គ្រោះជាតិ លោក សម រង្ស៊ី ក៏បានចេញសេចក្ដីថ្លែងការណ៍ដាច់ដោយឡែកមួយ រំឭកដល់សហភាពអឺរ៉ុប ស្របពេលដែលស្ថាប័ននេះ កំពុងរៀបចំកិច្ចប្រជុំរដ្ឋមន្ត្រីការបរទេសអាស៊ាន-អឺរ៉ុបលើកទី ២២។
លោក សម រង្ស៊ី បញ្ជាក់នៅក្នុងសេចក្ដីថ្លែងការណ៍នោះថា របបក្រុងភ្នំពេញបច្ចុប្បន្ននៅតែជារបបខុសច្បាប់ ដែលពុំទទួលបានភាពស្របច្បាប់ជាអន្តរជាតិនោះទេ ដោយសារតែរបបនេះបានរៀបចំការបោះឆ្នោតផ្ទុយពីក្របខ័ណ្ឌរដ្ឋធម្មនុញ្ញកម្ពុជា ហើយប្រឆាំងនឹងកិច្ចព្រមព្រៀងសន្តិភាពក្រុងប៉ារីសឆ្នាំ១៩៩១។
លោក សម រង្ស៊ី ជំរុញឲ្យរដ្ឋមន្ត្រីការបរទេសអឺរ៉ុបទាំងអស់ ត្រូវតែទទូចឲ្យទាំងភាគីសហភាពអឺរ៉ុប និងទាំងភាគីកម្ពុជា ត្រូវតែគោរពឲ្យបានពេញលេញ និងទាំងស្រុងនូវគ្រប់បទប្បញ្ញត្តិទាំងអស់ដែលមានចែងនៅក្នុងកិច្ចព្រមព្រៀងពាណិជ្ជកម្មរួមគ្នារវាងកម្ពុជា និងសហភាពអឺរ៉ុប ដែលតម្រូវឲ្យមាននូវការអនុវត្តលទ្ធិប្រជាធិបតេយ្យនៅកម្ពុជា និងការគោរពសិទ្ធិមនុស្ស និងសិទ្ធិចូលរួមក្នុងសង្គមរបស់ពលរដ្ឋខ្មែរគ្រប់រូប។ លោក សម រង្ស៊ី ថា គណបក្សសង្គ្រោះជាតិ ដែលតំណាងឲ្យពលរដ្ឋខ្មែរភាគច្រើននៅកម្ពុជា នៅតែគូសបញ្ជាក់អំពីសារសំខាន់នៃក្របខ័ណ្ឌច្បាប់ដែលមានស្រាប់សម្រាប់កិច្ចសហប្រតិបត្តិការរវាងកម្ពុជា និងសហភាពអឺរ៉ុប និងថា ខ្លួនប្ដេជ្ញាធ្វើការដើម្បីអនុវត្តឲ្យបានពេញលេញនូវបទប្បញ្ញត្តិដែលមានស្រាប់ទាំងអស់ តាមរយៈយន្តការដែលមានការទទួលស្គាល់ជាអន្តរជាតិ និងក្នុងស្មារតីប្រកបដោយសន្តិភាព កិច្ចសន្ទនា ប្រជាធិបតេយ្យ និងការបង្រួបបង្រួមជាតិ។
កាលពីដើមខែតុលា ឆ្នាំ២០១៨ សហភាពអឺរ៉ុប បានជូនដំណឹងដល់ភាគីកម្ពុជា ជាផ្លូវការអំពីចំណាត់ការនីតិវិធីដកហូតប្រព័ន្ធអនុគ្រោះពន្ធ «គ្រប់មុខទំនិញទាំងអស់លើកលែងតែអាវុធ» ឬ EBA ពីកម្ពុជា ក្រោយរបបក្រុងភ្នំពេញនៅតែរឹងទទឹងមិនព្រមស្ដារប្រជាធិបតេយ្យ និងគោរពសិទ្ធិមនុស្សឡើងវិញនៅកម្ពុជា ដោយបានរៀបចំព្រឹត្តិការណ៍បោះឆ្នោតដែលត្រូវសហគមន៍ជាតិ និងអន្តរជាតិចាត់ទុកថា «ជាការបោះឆ្នោតក្លែងក្លាយ» រួចមក។ សហភាពទុកពេលវេលាឲ្យកម្ពុជា ៦ខែចាប់ពីថ្ងៃជូនដំណឹងនេះ ដើម្បីធ្វើការកែលម្អស្ថានភាពប្រជាធិបតេយ្យរបស់ខ្លួន ហើយបើមិនដូច្នោះទេ ខ្លួននឹងធ្វើការសម្រេចជាផ្លូវការក្នុងការដកហូតប្រព័ន្ធអនុគ្រោះពន្ធនេះ ដែលអាចឲ្យកម្ពុជាខាតបង់ជិត ៧០០លានដុល្លារអាមេរិកក្នុងមួយឆ្នាំៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។