សកម្មជន​បក្ស​ប្រឆាំង​ដែល​កំពុង​ភៀសខ្លួន បង្កើត​ចម្រៀង​រិះគន់​របប​លោក ហ៊ុន សែន និង​ជីវិត​តស៊ូ​របស់​ពួក​គេ

ដោយ សេក បណ្ឌិត
2020-07-23
អ៊ីម៉ែល
មតិ
Share
បោះពុម្ព

សកម្មជន​បក្ស​សង្គ្រោះ​ជាតិ​មួយ​ក្រុម​ដែល​កំពុង​រស់នៅ​ភៀសខ្លួន​នៅ​ក្រៅ​ប្រទេស ដើម្បី​គេច​ចេញពី​ការ​តាម​ចាប់ខ្លួន និង​ការ​ធ្វើទុក្ខ​បុក​ម្នេញ​ពីសំណាក់​អាជ្ញាធរ​ក្រុងភ្នំពេញ នាំគ្នា​និពន្ធ​បទចម្រៀង និង​ច្រៀង ដើម្បី​បង្ហាញ​អំពី​ទុក្ខសោក​របស់​ពួក​គេ និង​បញ្ហា​អយុត្តិធម៌​នៅក្នុង​សង្គម​ព្រមទាំង​រិះគន់​ការដឹកនាំ​របស់​របប​ក្រុងភ្នំពេញ។ ពួក​គេ​លើកឡើង​ថា នឹង​ព្យាយាម​តាក់តែង​បទចម្រៀង ឲ្យ​កាន់តែ​ច្រើន​ថែមទៀត ដើម្បី​ទាក់ទាញ​ឲ្យ​ប្រជាពលរដ្ឋ​បាន​ស្តាប់ និង​បាន​យល់ដឹង​អំពី​បញ្ហា​សង្គម និង​នយោបាយ​នៅ​ក្នុង​ប្រទេស​កម្ពុជា។

បទចម្រៀង​ដែល​សកម្មជន​បក្ស​សង្គ្រោះ​ជាតិ បាន​តាក់តែង​និពន្ធ និង​បាន​ច្រៀង​រួចរាល់​នោះ មាន​ជាង ១០បទ​ហើយ និង​ត្រូវ​បាន​ផ្សព្វផ្សាយ​នៅ​លើ​ផេក​ហ្វេសប៊ុក​ «ផលិតកម្ម​ព្រះអាទិត្យ​រះ»។ បទចម្រៀង​ទាំងនោះ មាន​ដូចជា​បទ​បណ្ដាំ​បណ្ឌិត កែម ឡី បទ​អភិវឌ្ឍន៍​ក្លែងក្លាយ បទ​អាសូរ​កោះកុង​ក្រៅ ទឹកភ្នែក​រាស្ត្រ​ខ្មែរ ឈាម​អ្នកតស៊ូ​ខេត្ត​ប៉ៃលិន និង​បទ​បំណុល​ខ្មែរ​វ័ណ្ឌក ព្រមទាំង បទចម្រៀង​មួយចំនួន​ទៀត រៀបរាប់​អំពី​រឿងរ៉ាវ​ស្មោកគ្រោក​ជាច្រើន​នៅក្នុង​សង្គម​ក្រោម​ការដឹកនាំ​របស់​រដ្ឋាភិបាល​លោក ហ៊ុន សែន និង​រៀបរាប់​អំពី​ទុក្ខសោក និង​ជីវិត​តស៊ូ​របស់​ពួក​គេ​ផង​ដែរ។

ក្រុមសកម្ម​ជន​បក្ស​សង្គ្រោះ​ជាតិ ដែល​នាំគ្នា​ផលិត​បទចម្រៀង​ទាំងនោះ​មាន​គ្នា ៦នាក់ រួម​មាន៖ លោក ឃិន សាម៉ន លោកស្រី ឡេង សុទ្ធា​រី លោក សោម សារ៉ាវុធ លោក ទុំ ប៊ុនថន រួម​ទាំង​ពលករ ២រូប​ទៀត​ ដែល​មាន​សមត្ថភាព និង​ចូលរួម​ជួយ​ដល់​ការផលិត​បទចម្រៀង​ទាំងនេះ។

លេខាធិការ​នៃ​គណៈកម្មាធិការ​ប្រតិបត្តិ​ស្រុក​ក្រគរ ខេត្ត​ពោធិ៍សាត់ លោក ឃិន សា​ម៉ន ដែល​ជា​អ្នកតែង​ចម្រៀង​ផង និង​ច្រៀង​ផង​នោះ លើកឡើង​ថា គោលបំណង​នៃ​ការ​ធ្វើ​បទចម្រៀង​នេះ​គឺ ដើម្បី​ក្រើនរំលឹក និង​ផ្សព្វផ្សាយ​ដល់​ប្រជាពលរដ្ឋ​ទាំង​ក្នុង និង​ក្រៅ​ប្រទេស​ឲ្យ​ចេះ​ឈឺចាប់​នឹង​រឿង​អយុត្តិធម៌​ដែល​កើតមាន​ក្នុង​សង្គម​ខ្មែរ ហើយ​ចូលរួម​ឈឺឆ្អាល​នឹង​រឿង​នយោបាយ។

លោក ឃិន សាម៉ន បញ្ជាក់​ថា លោក​មានបំណង​បង្កើត​បទចម្រៀង និង​កំណាព្យ​ដែល​រៀបរាប់​ពី​ជីវិត​អ្នក​ដែល​បាន​លះបង់ និង​តស៊ូ​ក្នុង​សង្គមជាតិ​ជាច្រើន​ទៀត និង​បទចម្រៀង​ដែល​អប់រំ​ដល់​ប្រជាពលរដ្ឋ​ឲ្យ​ងាក​មក​ស្រលាញ់​ជាតិ ហើយ​នឹង​ផ្សព្វផ្សាយ នៅ​ក្នុង​ផេក​ហ្វេសប៊ុក (Facebook page) ឈ្មោះ​ផលិតកម្ម ខ្មែរ​សង្គ្រោះ​ជាតិ ក្នុង​ពេល​ឆាប់​ៗ ខាង​មុខ​នេះ៖ «បទ​ដែល​ខ្ញុំ​បាន​តែង​កន្លងមក​ហ្នឹង បាន​ដប់​បទ​ជាង​ហើយដែល​ផ្ដោត​សំខាន់​ទៅលើ​ខ្លឹមសារ​អយុត្តិធម៌​នៅក្នុង​ប្រទេស​កម្ពុជា ដែល​បាន​កើតឡើង​ពីមុន​មក ហើយ​នឹង​ពេល​បច្ចុប្បន្ន ហើយ​អត្ថន័យ​នៃ​បទចម្រៀង គឺ​សុទ្ធតែ​ជា​បទ​មនសិការ​ជាតិ​ទាំង​អស់។ ហើយ​បទ​ក្រើនរំលឹក​ឲ្យ​មានការ​ចូលរួម ការ​ភ្ញាក់​រលឹក ងាក​មក​ស្រលាញ់​ជាតិ ងាក​មក​ចូលរួម​ជួយ​សង្គម កុំ​ឲ្យ​បណ្ដែត​បណ្ដោយ​ពេលវេលា​ចូលរួម​ជាមួយ​នឹង​ស្រី ស្រា ល្បែង ផឹកស៊ី ដែល​ជា​ល្បែង​ពារ​លា​អាវាសែ​នៅ​ក្នុង​សង្គម​ហ្នឹង តាម​របប​លោក ហ៊ុន សែន ហើយ​មួយទៀត វា​បាន​ឆ្លុះបញ្ចាំង​អំពី​ភាព​អយុត្តិធម៌​ដែល​ប្រជាពលរដ្ឋ​ខ្មែរ​បាន​រងទុក្ខ​នៅ​ក្នុង​របប​ដឹក​នាំ​លោក ហ៊ុន សែន កន្លងមក​ហ្នឹង»

ទោះ​ជា​យ៉ាង​ណា លោក ឃិន សា​ម៉ន រៀបរាប់​ថា ការផលិត​បទចម្រៀង​ទាំងនេះ មានការ​លំបាក​ខ្លាំង​សម្រាប់​ក្រុម​របស់​លោក ដោយសារ​តែ​ពុំ​មាន​ឧបករណ៍​គ្រប់គ្រាន់​នោះ​ទេ។ លោក​បញ្ជាក់​ថា ពួក​លោក​ថត​បទ​ចម្រៀង​ទាំង​នេះ តាម​រយៈ​កម្មវិធី ស្មូល ខារ៉ាអូខេ (Smule Karaoke​)ក្នុង​ទូរស័ព្ទ​ស្មាត​ហ្វួន (Smart Phone​) ជាមួយ​នឹង​ខ្សែ​កាស​ធម្មតា​មួយ ហើយ​ត្រូវ​រក​កន្លែង​ស្ងាត់​បំផុត និង​មិន​ឮ​សំឡេង​ខ្យល់​រំខាន។ ក្នុង​បទ​ចម្រៀង​មួយ​បទ លោក​ចំណាយ​ពេល ៣ថ្ងៃ​ទើប​ថត​បាន​មួយ​បទ ហើយ​ក្នុង​ការ​ថត​សំឡេង គឺ​ប្រមាណ ១០ ទៅ ១២ដង ​ទើប​អាច​យក​ជា​ការ​បាន ដោយសារ​ពេល​ខ្លះ​ខុស​សំឡេង ខុស​ចង្វាក់។ ដូច្នេះ​តម្រូវ​ឲ្យ​លោក​ថត​សារ​ជាថ្មី​ឡើង​វិញ ដោយសារ​ក្នុង​កម្មវិធី ស្មូល ខារ៉ាអូខេ (Smule Karaoke​)នេះ មិន​មានកម្ម​វិធី​គ្រប់គ្រាន់​ឲ្យ​កែតម្រូវ​នោះ​ទេ៖ «អ្វី​ដែល​ខ្វះខាត​សម្រាប់​ខ្ញុំ​នោះ គឺ​ផ្នែក​កុំព្យូទ័រ ទី២ ឧបករណ៍​សម្រាប់ គេ​ហៅថា​កាស​ដែល​សម្រាប់​យើង​រីខត (Record) សំឡេង​ហ្នឹង​ឲ្យ​បាន​ល្អ។ បើ​អាច យើង​នឹង​ព្យាយាម​ស្វះស្វែង​រក​សប្បុរសជន មាន​គាត់​ជួយ​ជ្រោមជ្រែង​បញ្ហា​ទិញ​ឧបករណ៍​ថត​សំឡេង​ហ្នឹង គឺ​វា​ជា​រឿង​ល្អ ប៉ុន្តែ​ខ្ញុំ​មិន​សង្ឃឹម​ទៅដល់​ថ្នាក់​ហ្នឹង​ពេក​ទេ ពីព្រោះ​ដែល​យើង​ធ្វើ​នេះ គឺ​យើង​ធ្វើ​នៅ​ក្នុង គេ​ហៅ​ភាព​ខ្វះខាត​មួយ ប៉ុន្តែ​បើ​សិន​ជា​មាន​សប្បុរសជន​គាត់​ជួយ​ជ្រោមជ្រែង​ខ្ញុំ​ដល់​ស្ទូឌីយោ​តែ​ម្ដង អា​ហ្នឹង​គឺជា​រឿង​ល្អ​មែនទែន ដែល​ងាយ​ស្រួល​នៅ​ក្នុង​ការ​ថត នៅ​ក្នុង​ការ​កាត់ត​រូបភាព ដំឡើងMix ដំឡើង​អី​សព្វ​បែប​យ៉ាង សព្វ​យ៉ាង​ធ្វើឲ្យ​បទ​ចម្រៀង​កាន់តែ​ឮ​ច្បាស់​ល្អ កាន់តែ​មាន​ការ​ចាប់​អារម្មណ៍​ពី​បងប្អូន​ប្រជា​ពលរដ្ឋ​ខ្មែរ​ថែមទៀត»

សកម្មជន​បក្ស​ប្រឆាំង​រូប​នេះ ត្អូញ​ត្អែ​ថា លោក​នៅ​ខ្វះខាត​ឧបករណ៍​ជាច្រើន​ទៀត ដើម្បី​សម្រួល​ដល់​ការ​ថត​ចម្រៀង​របស់​លោក ដូចជា កុំ​ព្យួទ័រ ឧបករណ៍​ស្រូប​សំលេង និង​ស្ទ​ឌី​យោ​ជាដើម។

សកម្មជន​គណបក្ស​សង្គ្រោះ​ជាតិ​ម្នាក់​ទៀត និង​ជា​អ្នក​ច្រៀង​បទ ជំហរ​ស្ត្រី​ភៀសខ្លួន​នយោបាយ លោកស្រី ឡេង សុទ្ធារី ឲ្យដឹង​ថា អត្ថន័យ​នៃ​បទចម្រៀង​ទាំងនេះ បង្ហាញ​អំពី​ភាព​ជូរចត់ ការ​លះបង់ ការ​ធ្វើបាប​ប្រជាជន​ស្លូតត្រង់ ភាព​អយុត្តិធម៌​ចំពោះ​សកម្មជន​គណបក្ស​សង្គ្រោះ​ជាតិ ដែល​ត្រូវ​បាន​របប​ក្រុង​ភ្នំពេញ​ចាប់ចង និង ធ្វើទុក្ខ​បុក​ម្នេញ ធ្វើ​ឲ្យ​ព្រាត់​ប្រាស់​ម្តាយ​កូន ប្រពន្ធ​ប្តី រហូត​ត្រូវ​រត់​ភៀសខ្លួន៖ «...

លោកស្រី បន្ត​ថា ប្រជាពលរដ្ឋ​ចូលចិត្ត​ចម្រៀង ដូច្នេះ​ក្រុម​លោកស្រី​សម្រេច​និពន្ធ​ពី​រឿង​សង្គមជាតិ ហើយ​ច្រៀង​តាម​លំនាំ​បទចម្រៀង​ពីដើម ដើម្បីឲ្យ​ប្រជាពលរដ្ឋ​ខ្មែរ​ទាំងអស់​បាន​ដឹង​ឮ៖ «យើង​ធ្វើ​បទចម្រៀង​ហ្នឹង ព្រោះ​យើង​មើល​ឃើញ​ថា ប្រទេស​កម្ពុជា ត្រូវ​ពលរដ្ឋ​របស់​យើង​គាត់​បាន​ភ្លើតភ្លើន​ទៅ​ជាមួយ​ហ្នឹង​សិល្បៈ និង​ការ​រាំច្រៀង ដូច្នេះ​យើង​ចង់​បញ្ជ្រាប​ចូល​ព័ត៌មាន​ទាំងឡាយ​នោះ​ដាស់​កុលបុត្រ តាមវិធី​សាស្ត្រ​យើង​និយាយ​អំពី​ស្មារតី​នៃ​ការ​តស៊ូ​របស់​យើង ការ​ដែល​យើង​បាត់បង់​ទឹកដី ជ្រៀតចូល​នូវ​ពាក្យ​ថា បាត់បង់ EBA ត្រូវ​អ្នកខ្លះ​រឹត គាបសង្កត់​សិទ្ធ​សេរីភាព​របស់​ពលរដ្ឋ​របស់​យើង​ទូទាំង​ប្រទេស ហើយ​ធ្វើឲ្យ​ពួក​យើង​ក្លាយ​ទៅ​ជា ប៉ុល ពត ម្ដង​ទៀត»

រីឯ អ្នកនាំពាក្យ​គណបក្សប្រជាជន​កម្ពុជា​លោក សុខ ឥសាន បាន​លើកឡើង​ថា ការ​តែង​ចម្រៀង និង​សកម្ម​ភាព​ផ្សេងៗ របស់​សកម្មជន​គណបក្ស​សង្គ្រោះ​ជាតិ​នេះ គឺ​ជា​ទង្វើ​ប្រព្រឹត្ត​ល្មើស​ច្បាប់​ទាំង​អស់៖ «រាល់​ទង្វើ​ទាំង​អស់​ដែល​គាំទ្រ ឬ​ទង្វើ​ដែល​បម្រើ​ឲ្យ​ក្រុម​ឧទ្ទាម​ក្រៅ​ច្បាប់​នោះ សុទ្ធតែ​ជា​ទង្វើ​ប្រព្រឹត្ត​ល្មើស​ច្បាប់​ទាំង​អស់ ពីព្រោះ​ក្រុម​អស់​នេះ​ដែល​គាំទ្រ​អតីត​បក្ស​ប្រឆាំង ឥឡូវ​នេះ គាំទ្រ​ក្រុម​ឧទ្ទាម​ក្រៅ​ច្បាប់​នេះ ដែល​ធ្វើ​ដើម្បី​បំបែកបំបាក់​ផ្ទៃក្នុង​រវាង​រាជ​រដ្ឋាភិបាល​កម្ពុជា​នៅ​ក្នុង​ប្រទេស ហើយ​នឹង​ប្រជាជន ដូចជា​បញ្ហា​ញុះញង់​កុំ​ឲ្យ​សង​បំណុល​មីក្រូហិរញ្ញវត្ថុ​ជា​ដើម។ ជាពិសេស គឺ​ញុះញង់​ឲ្យ​មាន​ការ​បែកបាក់​រវាង​ប្រទេស​កម្ពុជា​ជាមួយ​ប្រទេស​ជិត​ខាង ដោយ​យក​បញ្ហា​តូចតាច​ទៅ​ពង្រីក​ជា​រឿង​ធំ ហើយ​ញុះញង់​ដោយ​មាន​សតិអារម្មណ៍ គេ​ហៅ​ថា ប្រកាន់​ពូជសាសន៍​ទៀត​ផង»

ដោយឡែក នាយករង​ទទួល​បន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត មាន​ប្រសាសន៍​ថា ប្រជាពលរដ្ឋ​គ្រប់​រូប​មាន​សិទ្ធិ​ចូលរួម​ក្នុង​ជីវភាព​នយោបាយ​យ៉ាង​សកម្ម​ស្រប​តាម​រដ្ឋធម្មនុញ្ញ។ លោក​បន្ត​ថា ការ​បញ្ចេញ​មតិ ដើម្បី​រិះគន់​ក្នុង​ន័យ​ស្ថាបនា មិន​ថា តាម​រយៈ​បទចម្រៀង​ក្ដី គំនូរ​ក្ដី គឺ​ជា​ការ​ចាំបាច់​នៅ​ក្នុង​សង្គម​ប្រជាធិបតេយ្យ ប៉ុន្តែ​ការ​បញ្ចេញ​មតិ​នោះ ត្រូវ​ប្រកប​ដោយ​ក្រម​សីលធម៌ មិន​មាន​ការ​ជេរ​ប្រមាថ​ ឬ​ក៏​តិះដៀល​ដែល​ធ្វើ​ឲ្យ​ប៉ះពាល់​ដល់​កិត្តិយស​អ្នក​ដទៃ៖ «បើ​យើង​និយាយ​ជា​ទូទៅ សេរីភាព​ក្នុង​ការ​បញ្ចេញ​មតិ វា​មាន​ច្រើន​បែប តាម​ការ​បញ្ចេញ​មតិ​ក្ដី តាម​ចម្រៀង​ក្ដី តាម​បែប​និពន្ធ​ក្ដី តាម​សំណេរ​ក្តី អ្វី​ផ្សេងៗ ហ្នឹង គឺ​គេ​ចាត់​ទុក​ថា សេរីភាព​ក្នុង​ការ​បញ្ចេញ​មតិ អ៊ីចឹង​ការ​បញ្ចេញមតិ គឺជា​ការ​មួយ​ល្អ​សម្រាប់​រិះគន់​ក្នុង​ន័យ​ស្ថាបនា លើកលែង​តែ​ការ​បញ្ចេញ​មតិ​ហ្នឹង វា​ជា​ការ​មើលងាយ ឬក៏​ជា​ការ​ជេរប្រមាថ ដែល​ប៉ះ​ពាល់​ដល់​កិត្តិយស​អ្នក​ដទៃ»

រហូតមកដល់​ពេលនេះ មាន​សកម្មជន​គណបក្ស​សង្គ្រោះ​ជាតិប្រមាណ​ជិត ២០០នាក់​ហើយ ដែល​បាន​ភៀសខ្លួន​រស់នៅ​ក្រៅ​ប្រទេស ដោយសារ​ការ​តាម​យាយី និង​ការ​ធ្វើ ទុក្ខ​បុក​ម្នេញ ពីសំណាក់​អាជ្ញាធរ​របប​ក្រុងភ្នំពេញ ក្រោម​ហេតុផល​នយោបាយ។ ទោះ​ជា​យ៉ាង​ណា ពួក​គេ​នៅតែ​បន្ត​សកម្មភាព​នយោបាយ​ជាមួយ​គណបក្ស​សង្គ្រោះ​ជាតិ​ដដែល តាម​រូប​ភាព​ផ្សេងៗ។

សម្រាប់​ក្រុមសកម្ម​ជន​គណបក្ស​សង្គ្រោះ​ជាតិ​ដែល​មាន​ទេពកោសល្យ​ផ្នែក​តែង​និពន្ធ និង​ច្រៀង​ទាំង​នេះ ប្ដេជ្ញា​ថា ពួក​គេ​នឹង​ខិតខំ​បង្កើត​បទ​ចម្រៀង​ឲ្យ​កាន់​តែ​ច្រើន​ថែម​ទៀត​ពាក់ព័ន្ធ​នឹង​រឿង សង្គម​ជាតិ ប្រសិន​បើ​ពួក​គេ​មាន​កន្លែង និង​ឧបករណ៍​ថត​ចម្រៀង​ត្រឹម​ត្រូវ និង​គ្រប់គ្រាន់។ ពួក​គេ ក៏បាន​អះអាង​ថា មក​ដល់​ពេល​នេះ មាន​ប្រជាពលរដ្ឋ​ជា​ច្រើន បាន​ចាប់​អារម្មណ៍ និង​គាំទ្រ​បទចម្រៀង​របស់​ពួក​គេ​នៅ​តាម​បណ្ដាញ​សង្គម​ហ្វេសប៊ុក (Facebook)

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល