គ្រួសារមន្ត្រីបក្សប្រឆាំងកំពុងជាប់ឃុំរិះគន់រដ្ឋាភិបាលថា អនុវត្តស្តង់ដារពីរចំពោះអ្នកទោសនយោបាយ
2024.11.05
(រូបឯកសារ) លោក ខឿន វីរ៉ាត់ (រូបឈរ) មន្ត្រីគណបក្សភ្លើងទៀន ក្នុងវគ្គបណ្ដុះបណ្ដាលសមាជិកបក្សនៅខេត្តក្រចេះ កាលពីថ្ងៃទី១៩ ខែមីនា ឆ្នាំ២០២៣។
រូប៖ ហ្វេសប៊ុក Khoeun Virath
ក្រុមគ្រួសារមន្ត្រីគណបក្សប្រឆាំង ដែលកំពុងជាប់ឃុំក្នុងពន្ធនាគារ រិះគន់រដ្ឋាភិបាលនៅតែអនុវត្តច្បាប់មានស្តង់ដារពីរ ចំពោះអ្នកទោសនយោបាយដោយពួកគាត់សង្កេតឃើញថា អាជ្ញាធរហាក់បង្ហាញការឱនលំទោន ចំពោះក្រុមឧកញ៉ាដែលស្និទ្ធនឹងគ្រួសារត្រកូល «ហ៊ុន» បើទោះបីជាពួកគេឆបោកលុយពលរដ្ឋអស់រាប់លានដុល្លារក្ដី។ មន្ត្រីឃ្លាំមើលសិទ្ធិមនុស្សយល់ឃើញថា ការអនុវត្តច្បាប់មិនស្មើភាពគ្នានេះនឹងធ្វើឱ្យមានវិសមភាពសង្គមកើតឡើង ហើយពលរដ្ឋបាត់បង់ជំនឿលើប្រព័ន្ធយុត្តិធម៌។
ក្រុមគ្រួសារអ្នកទោសនយោបាយសោកស្ដាយ ចំពោះសកម្មភាព ដែលសមត្ថកិច្ចចាប់បញ្ជូនខ្លួនគ្រួសាររបស់ពួកគាត់យកទៅដាក់ក្នុងពន្ធនាគារទាំងកម្រាល និងឃោរឃៅ ផ្ទុយស្រឡះពីក្រុមឧកញ៉ារកស៊ីទុច្ចរិត ដែលសមត្ថកិច្ចមិនហ៊ានវាយខ្នោះ និងទុកឱ្យដើរចូលក្នុងឡានតាមសម្រួល។
កូនស្រីរបស់សកម្មជនបក្សភ្លើងទៀននៅខេត្តកំពង់ចាម លោក សាន អឿន គឺលោកស្រី សាន គន្ធា ប្រាប់វិទ្យុអាស៊ីសេរីនៅថ្ងៃទី០៥ ខែវិច្ឆិកា ថា គឺជារឿងអយុត្តិធម៌ និងមិនស្មើភាពគ្នារវាងអ្នកមានលុយ និងឪពុកលោកស្រីដែលជាជនស្អាតស្នំ ប៉ុន្តែបែរជាអាជ្ញាធរចាប់ឪពុកដាក់ពន្ធនាគារទាំងគ្មានកំហុស។ លោកស្រីបន្តថា អាជ្ញាធរបានចាប់ខ្លួនឪពុកលោកស្រីយកទៅដាក់នៅពន្ធនាគារព្រៃសដោយមិនបានជូនដំណឹងឱ្យក្រុមគ្រួសារ និងប្រាប់អំពីមូលហេតុនៃការចាប់ខ្លួនឡើយ។
លោកស្រី សាន គន្ធា៖ «ខាងខ្ញុំនៅខាងក្រៅនេះ មានមន្ត្រីអធិការ ប៉ុន្តែគេមិនមកផ្ទាល់ទេ។ គេផ្តាំៗ តាមគ្នាដូចថា ផ្ដាំអ្នកមានឥទ្ធិពលអ៊ីចឹងដែរ។ គេផ្ដាំគ្នាឱ្យខ្ញុំឱ្យម៉ែខ្ញុំទៅជួបគេ ដើម្បីធ្វើកិច្ចសន្យាអីតិចតួច គេអាចនឹងឱ្យគាត់មកវិញហើយ គេឱ្យសោហ៊ុយគាត់មកវិញ។ ខ្ញុំអត់ទៅទេ ថាវាអត់មានរឿងអី ដែលខ្ញុំត្រូវទៅជួបពួកគាត់ ពេលខ្ញុំទៅជួបពួកគាត់មានតែឱ្យខ្ញុំធ្វើកិច្ចសន្យា សុំទោសសារភាពអ៊ីចឹងខ្ញុំអត់ទៅទេ»។
កាលពីថ្ងៃទី៧ ខែសីហា រដ្ឋាភិបាលលោកនាយករដ្ឋមន្ត្រី ហ៊ុន ម៉ាណែត បានចាប់ខ្លួនមន្ត្រី និងសកម្មជនគណបក្សប្រឆាំងបីនាក់ បន្ទាប់ពីពួកគាត់មិនបានចូលរួមគាំទ្រការបើកការដ្ឋានព្រែជីកហ្វូណន។ ក្នុងនោះរួមមាន ក្រុមប្រឹក្សាឃុំស្វាយទាប ស្រុកចំការលើ ខេត្តកំពង់ចាមមកពីគណបក្សភ្លើងទៀនលោក សាន អឿន និងមនុស្សពីរនាក់ទៀត គឺជាបេក្ខជនក្រុមប្រឹក្សាស្រុកបាទី ខេត្តតាកែវ មកពីគណបក្សឆន្ទៈខ្មែរគឺលោក គឹម វឿន និងលោកស្រី ញិប សារ៉ុម ដែលជាអ្នកគាំទ្របក្សប្រឆាំងនៅខេត្តបាត់ដំបង។
ស្រដៀងគ្នានេះ ប្រពន្ធសកម្មជនបក្សប្រឆាំងលោក ខឿន វីរ៉ាត់ គឺលោកស្រី ថាច់ ចន្ធូ រៀបរាប់ថា អាជ្ញាធរបានចាប់ខ្លួនប្ដីលោកស្រីវាយដាក់ខ្នោះរុញបញ្ចូលឡានទាំងមិនបង្ហាញពីដីកាចាប់ខ្លួននោះឡើយ ដែលសកម្មភាពហាក់បង្ហាញថា ប្ដីលោកស្រីគឺជាឧក្រិដ្ឋជនជួញដូរគ្រឿងញៀន។ លោកស្រីបន្តថា បច្ចុប្បន្ននេះលោកស្រីមានជំងឺមហារីកមាត់ស្បូនដំណាក់កាលទី២ ដែលពេទ្យតម្រូវឱ្យលោកស្រីត្រូវវះកាត់ជាបន្ទាន់ ប៉ុន្តែលោកស្រីបានពន្យារពេលរហូតដល់ប្ដីចេញពីពន្ធនាគារនៅខែមីនា ខាងមុខទើបលោកស្រីសម្រេចចិត្តវះកាត់។
លោកស្រី ថាច់ ចន្ធូ៖ «ខុសប្លែកពីប្ដីខ្ញុំឆ្ងាយប្ដីខ្ញុំគាត់អត់រត់ទៅណាទេគាត់នៅឱ្យគេចាប់ហើយមូលហេតុដែលចាប់ប្ដីខ្ញុំដូចអ្នកទោសស្លាប់មនុស្សអ៊ីចឹងក្រៀកដៃប្ដីខ្ញុំដាក់ខ្នោះដៃប្ដីខ្ញុំហើយអត់យកដីកាមកបង្ហាញប្ដីខ្ញុំខុសអីទេ។ និយាយរួមទៅប្ដីខ្ញុំជិតចេញអ៊ីចឹងខ្ញុំគ្រាន់តែថា ប្ដីខ្ញុំអនុវត្តទោសហ្នឹងគឺវាគ្រប់គ្រាន់ហើយសូមឱ្យកុំចោទហើយទម្លាក់ចោលបទចោទលើគាត់ទាំងស្រុង»។
ការរិះគន់របស់ក្រុមគ្រួសារអ្នកជាប់ឃុំទាំងនេះធ្វើឡើងបន្ទាប់ពីពួកគេមើលឃើញថា រដ្ឋាភិបាលលោក ហ៊ុន ម៉ាណែត អនុវត្តច្បាប់មានស្តង់ដារពីរចំពោះអ្នកជាប់ឃុំនយោបាយ និងអ្នកមានលុយមានអំណាច ដោយក្រុមអ្នកមានលុយមានអំណាច ឬក្រុមឧកញ៉ាដែលជាឧក្រិដ្ឋជនតែងតែត្រូវបានអាជ្ញាធរបង្ហាញការគោរព និងចាត់វិធានការយឺតយ៉ាវបើទោះជាក្រុមជនល្មើសទាំងនោះនៅក្នុងប្រទេសកម្ពុជាក្ដី ប៉ុន្តែផ្ទុយពីអ្នកទោសនយោបាយ និងសកម្មជនសង្គមដែលអាជ្ញាធរបង្ហាញសកម្មភាពឃោរឃៅចាប់អូស វាយដំ គំរាមកំហែង និងចាប់រុញច្រានបញ្ចូលឡាន ហើយខ្លះទៀតត្រូវបានសមត្ថកិច្ចចាប់បញ្ជូនខ្លួនពីក្រៅប្រទេសយកមកឃុំខ្លួននៅក្នុងពន្ធនាគារព្រៃសវិញជាដើម។ ករណីជាក់ស្ដែងទីប្រឹក្សាផ្ទាស់របស់ប្រធានព្រឹទ្ធសភាលោក ហ៊ុន សែន គឺឧកញ៉ា លី សាម៉េត មិនត្រូវបានសមត្ថកិច្ចចាប់វាយខ្នោះ ឬចាប់ទាំងបង្ខំឡើយ ពោលគឺឧកញ៉ារកស៊ីឆបោករូបនេះបង្ហាញសកម្មភាពស្នាក់នៅក្នុងផ្ទះធម្មតា ដោយអះអាងថា កំពុងព្យាបាលជំងឺនៅផ្ទះកូនរបស់លោកនៅខេត្តព្រះសីហនុ ហើយមិនបានរត់គេចទៅណានោះទេ។ កាលពីថ្ងៃទី៤ ខែវិច្ឆិកា សមត្ថកិច្ចបានបញ្ជូនខ្លួនឧកញ៉ា លី សាម៉េត ពីខេត្តព្រះសីហនុមកស្នងការដ្ឋាននគរបាលរាជធានីភ្នំពេញ និងបន្តនីតិវិធីនៅសាលាដំបូងរាជធានីភ្នំពេញ ប៉ុន្តែតុលាការនៅមិនទាន់សម្រេចចោទប្រកាន់ឧកញ៉ារូបនេះពីបទអ្វីនៅឡើយទេ។
វិទ្យុអាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលក្រុងភ្នំពេញ លោក សំ វិច្ឆិកា និងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដើម្បីសុំការបកស្រាយជុំវិញរឿងនេះបានទេ នៅថ្ងៃទី៥ ខែវិច្ឆិកា។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា កត់សម្គាល់ឃើញថា ការចាប់ខ្លួនសកម្មជននយោបាយ និងសកម្មជនសង្គមបច្ចុប្បន្នហាក់មានការបែងចែកខុសគ្នាពីរឿងឧក្រិដ្ឋជន និងក្រុមឧកញ៉ារកស៊ីឆបោក ពោលគឺសកម្មជនសង្គមរងការចាប់ខ្លួនទាំងបង្ខំដោយសកម្មភាពឃោរឃៅ។ លោកបន្តថា រដ្ឋាភិបាលគួរតែដោះលែងអ្នកជាប់ឃុំមនសិការទាំងអស់ឱ្យមានសេរីភាពឡើងវិញដើម្បីលើកមុខមាត់កម្ពុជាលើឆាកអន្តរជាតិ។
លោក នី សុខា៖ «អ្នកជាប់ឃុំមនសិការនេះ គឺយើងស្នើជារឿយៗ ហើយទាំងសហគមន៍ជាតិទាំងសហគមន៍អន្តរជាតិ គេបានស្នើឱ្យរដ្ឋាភិបាលដោះលែងអ្នកទាំងអស់ហ្នឹងឱ្យមានសេរីភាពឡើងវិញ។ ដើម្បីបង្កលក្ខណៈធ្វើយ៉ាងណាឈានទៅដល់ការលើកកម្ពស់ការគោរពសិទ្ធិមនុស្ស គោរពឱ្យបាននូវលទ្ធិប្រជាធិបតេយ្យសេរីអ៊ីចឹងអាហ្នឹងដែលយើងនៅតែស្នើឱ្យរដ្ឋាភិបាលពិចារណាដោះលែងអ្នកទាំងអស់នោះឱ្យមានសេរីភាពឡើងវិញ»។
ក្រុមសាច់ញាតិអ្នកជាប់ឃុំមនសិការស្នើឱ្យរដ្ឋាភិបាលដោះលែងក្រុមគ្រួសាររបស់ពួកគាត់ឱ្យមានសេរីភាពឡើងវិញដោយឥតលក្ខខណ្ឌ ពីព្រោះការចាប់ខ្លួនគ្រួសាររបស់ពួកគាត់កន្លងមកគឺជាការរើសអើងនិន្នាការនយោបាយមិនមែនជាការអនុវត្តច្បាប់នោះទេ ហើយរដ្ឋាភិបាលគួរតែបញ្ឈប់យកអ្នកជាប់ឃុំធ្វើជាចំណាប់ខ្មាំងដើម្បីដាក់សម្ពាធមកលើគ្រួសារតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
អត្ថបទពេញនិយម
នយោបាយ
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- អ្នកវិភាគថា របបផ្ដាច់ការត្រកូលហ៊ុន នឹងដួលរលំដូចរបបផ្ដាច់ការនៅស៊ីរីដែរ
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ
- អ្នកឃ្លាំមើលនិងបក្សប្រឆាំងថា គម្រោងធ្វើច្បាប់ដាក់មនុស្សមួយក្រុមជាភេរវកម្មនឹងឡងទៅក្រុមលោក ហ៊ុន សែន វិញ