គ្រួសារសពអ្នកគាំទ្របក្សភ្លើងទៀនម្នាក់ ដែលត្រូវបានគេបាញ់សម្លាប់នៅខេត្តត្បូងឃ្មុំ អំពាវនាវដល់អាជ្ញាធរមានសមត្ថកិច្ចឱ្យជួយវែកមុខរកឃាតកយកមកផ្ដន្ទាទោសតាមផ្លូវច្បាប់។ ការអំពាវនាវនេះ កើតមានឡើងក្រោយពីជនរងគ្រោះត្រូវបានជនមិនស្គាល់មុខបាញ់សម្លាប់ ក្នុងពេលកំពុងរកត្រី កាលពីទាបភ្លឺថ្ងៃអាទិត្យ ទី១៦ ខែតុលា។ មន្ត្រីជាន់ខ្ពស់គណបក្សភ្លើងទៀន នៅមិនទាន់អាចបញ្ជាក់សំណុំរឿងនេះបានថា តើជាករណីឃាតកម្មនយោបាយ ឬយ៉ាងណានោះទេ។
ជនរងគ្រោះជាអ្នកគាំទ្រគណបក្សភ្លើងទៀន ដែលត្រូវគេបាញ់សម្លាប់នោះ មានឈ្មោះ ប៉ូ ហ៊ីនលាន ភេទប្រុស អាយុ ៤៩ឆ្នាំ ជាអ្នកភូមិព្រីង ឃុំចក ស្រុកអូរាំងឪ។ ជនរងគ្រោះមានប្រពន្ធ និងកូន ៣នាក់ក្នុងបន្ទុក។
ប្រពន្ធជនរងគ្រោះ លោកស្រី វេន គឹមយី ប្រាប់វិទ្យុអាស៊ីសេរី កាលពីល្ងាចថ្ងៃទី១៧ ខែតុលាថា ប្តីលោកស្រីត្រូវបានគេបាញ់ចំនួន ៣គ្រាប់ពីក្រោយខ្នង បណ្ដាលឱ្យស្លាប់នៅកន្លែងកើតហេតុ កាលពីម៉ោងប្រមាណ ៣កន្លះ ទៀបភ្លឺ ថ្ងៃអាទិត្យ ទី១៦ ខែតុលា។ លោកស្រីថា ករណីបាញ់សម្លាប់នេះ កើតមានឡើងក្នុងពេលដែលប្ដីលោកស្រីបានចេញទៅរកត្រីនៅតាមវាលស្រែ ចម្ងាយប្រមាណ ២គីឡូម៉ែត្រពីផ្ទះ។ ប្រពន្ធជនរងគ្រោះឱ្យដឹងថា ប្ដីលោកស្រីជាមនុស្សស្លូតត្រង់ មិនដែលមានទំនាស់ជាមួយអ្នកណាម្នាក់ទេ ហើយតែងតែទទួលបាននូវការស្រឡាញ់រាប់អានពីអ្នកជិតខាង។ លោកស្រីសំណូមពរដល់អាជ្ញាធរមានសមត្ថកិច្ចឱ្យវែកមុខរកជនល្មើសមកផ្ដន្ទាទោសតាមផ្លូវច្បាប់៖ « ខ្ញុំមិនដឹងជាសង្ស័យអ្នកណាទេ ពីព្រោះអីខ្ញុំអត់បានឃើញ។ ខ្ញុំសួរប៉ូលិសថា តើបាញ់ប្ដីខ្ញុំ តើជាអ្នកណា ? ដល់រួចទៅប៉ូលិសគាត់បាននិយាយថា សន្តិសុខភូមិអ្នកបាញ់។ ខ្ញុំថា មិនមែនសន្តិសុខភូមិអ្នកបាញ់ទេ ព្រោះអីសន្តិសុខភូមិ គាត់អត់មានកាំភ្លើងទេ។ ប៉ូលិសបានគាត់មានកាំភ្លើង។ អ៊ីចឹង គាត់អត់និយាយជាមួយខ្ញុំទៀតទេ។ និយាយតែប៉ុណ្ណឹង គាត់អត់និយាយអីវែងឆ្ងាយទៀតទេ។ ខ្ញុំចង់ឲ្យរកយុត្តិធម៌ឲ្យខ្ញុំ ដោយវែកមុខរកជនល្មើស ដែលសម្លាប់ប្ដីខ្ញុំឱ្យខាងតែបាន។ ខ្ញុំគ្មានពាក្យពេចន៍អីនិយាយទៀតទេ »។
ប្រពន្ធជនរងគ្រោះបន្តថា បច្ចុប្បន្នលោកស្រី និងក្រុមគ្រួសារកំពុងត្រៀមរៀបចំបុណ្យគម្រប់ខួប ៧ថ្ងៃឱ្យប្ដីតាមប្រពៃណី។
មេប៉ុស្តិ៍ឃុំចក លោក អន សំអុន បដិសេធមិនផ្តល់ព័ត៌មានលម្អិតជុំវិញករណីឃាតកម្មនេះទេ ដោយរុញឱ្យទៅសួរស្នងការនគរបាលខេត្តត្បូងឃ្មុំវិញ៖ « ឥឡូវ បើសិនជាបងចង់បានព័ត៌មាន បងទាក់ទងទៅខាងស្នងការដ្ឋាននគរបាលខេត្តត្បូងឃ្មុំ ពីព្រោះខ្ញុំខាងនេះ ករណីរឿងនេះ ក៏ខ្ញុំអត់បានសាកសួរទៅលើជនណាម្នាក់ឡើយ ដោយសារខាងជំនាញ គេធ្វើនីតិវិធីឡើងទៅលើអស់ហើយ »។
វិទ្យុអាស៊ីសេរី មិនអាចទាក់ទងអធិការស្រុកអូរាំងឪ លោក វង់ សុភី ដើម្បីសុំអត្ថាធិប្បាយជុំវិញរឿងនេះបាននៅឡើយទេ កាលពីល្ងាចថ្ងៃទី១៧ ខែតុលា។ រីឯស្នងការនគរបាលខេត្តត្បូងឃ្មុំ លោក ម៉ុន មាគ៌ា បានចុចផ្ដាច់ទូរស័ព្ទ នៅល្ងាចថ្ងៃដដែល។
ពាក់ព័ន្ធនឹងករណីឃាតកម្មនេះ អនុប្រធានគណបក្សភ្លើងទៀន លោក ថាច់ សេដ្ឋា ប្រាប់ វិទ្យុអាស៊ីសេរី ថា លោកនៅមិនទាន់អាចសន្និដ្ឋានករណីនេះថា ជាឃាតកម្មនយោបាយ ឬយ៉ាងណានៅឡើយទេ ដោយរង់ចាំការស៊ើបអង្កេតរបស់អាជ្ញាធរមានសមត្ថកិច្ចជាមុនសិន៖ « បើតាមយើងស្ដាប់ហេតុផលទៅ វាមិនគួរដល់ថ្នាក់បែបហ្នឹង។ ត្រឹមតែខាងប្រជាការពារអី មានកាំភ្លើងរហូតទៅដល់បាញ់ប្រជាពលរដ្ឋ វាដូចជាអនាធិបតេយ្យពេកហើយ។ ដូច្នេះ ខ្ញុំយល់ថា ត្រូវតែស៊ើបអង្កេតឱ្យច្បាស់លាស់ ដើម្បីចាប់ជនដៃដល់យកមកផ្ដន្ទាទោស កុំឱ្យធ្វើបែបនេះតទៅទៀត គ្រាន់តែប្រជាពលរដ្ឋ មិនថា សកម្មជនទេ សូម្បីតែប្រជាពលរដ្ឋ ក៏យើងមិនត្រូវធ្វើបែបនេះដែរ គ្រាន់តែគាត់ទៅរកត្រី រកអីដើម្បីចិញ្ចឹមជីវិត។ អ្នកក្រីក្រ ហើយទៅធ្វើបែបនេះ វាអយុត្តិធម៌ខ្លាំងណាស់ »។
ស្រដៀងគ្នានេះដែរ មន្ត្រីឃ្លាំមើលការរំលោភសិទ្ធិមនុស្ស និងដីធ្លីនៃសមាគមការពារសិទ្ធិមនុស្សអាដហុក ប្រចាំខេត្តត្បូងឃ្មុំ និងខេត្តកំពង់ចាម លោក ឡេង សេងហាន ទទូចដល់អាជ្ញាធរមានសមត្ថកិច្ចឱ្យស្វែងរកចាប់ជនល្មើសមកផ្ដន្ទាទោសតាមច្បាប់ជាធរមាន និងផ្តល់សំណងទៅឲ្យសាច់ញាតិជនរងគ្រោះប្រកបដោយយុត្តិធម៌៖ « យើងយល់ឃើញថា អំពើឃាតកម្មនេះ គឺជាអំពើមួយ ដែលផ្ទុយទៅនឹងគោលការណ៍ច្បាប់ ដែលបានចែង ដែលកំពុងចូលជាធរមាននៅកម្ពុជា ហើយជាការស្នើទទូចដែរ សូមឱ្យអាជ្ញាធរមានសមត្ថកិច្ចពាក់ព័ន្ធ ចាត់ការចាប់ជនល្មើសមកផ្ដន្ទាទោសតាមច្បាប់ទៅ ហើយផ្តល់សំណងទៅឲ្យសាច់ញាតិជនរងគ្រោះដោយយុត្តិធម៌ ដែលគាត់អាចទទួលយកបាន »។
កន្លងទៅ មានករណីហិង្សាជាច្រើនបានកើតឡើងជាបន្តបន្ទាប់ទៅលើសកម្មជន និងអ្នកគាំទ្រគណបក្សសង្គ្រោះជាតិ ដែលត្រូវបានតុលាការកំពូលរម្លាយចោល ព្រមទាំងគណបក្សភ្លើងទៀន ជាពិសេស នៅមុន និងក្រោយរដូវកាលបោះឆ្នោតម្ដងៗ។ ជនរងគ្រោះខ្លះបានធ្លាក់ខ្លួនពិការអស់មួយជីវិត ខ្លះទៀត ត្រូវបានគេលួចវាយធ្វើបាប រួចត្រូវអាជ្ញាធរចាប់ដាក់គុក ហើយខ្លះទៀត ត្រូវបានជនល្មើសកាប់សម្លាប់ក្នុងថ្លុកឈាម ដូចជា ករណីលោក ស៊ិន ខុន នៅភ្នំពេញ ជាដើម។ អាជ្ញាធរតែងបដិសេធករណីឃាតកម្មទាំងនោះថា មិនជាប់ពាក់ព័ន្ធនឹងរឿងនយោបាយទេ និងថា សមត្ថកិច្ចមិនអាចចាប់ជនដៃដល់បាន ដោយសារតែគ្មានព័ត៌មានគ្រប់គ្រាន់។ ក៏ប៉ុន្តែ ការបកស្រាយនេះ ត្រូវបានមន្ត្រីបក្សប្រឆាំង និងក្រុមអ្នកតាមដានស្ថានការណ៍នយោបាយ រិះគន់ថា អាជ្ញាធរគ្មានឆន្ទៈពិតប្រាកដក្នុងការស្វែងរកយុត្តិធម៌ដល់សកម្មជននយោបាយ ដែលជាជនរងគ្រោះទេ។ ពួកគេថា ហេតុការណ៍ទាំងនេះ បង្កើតឱ្យមានជាអំពើនិទណ្ឌភាពបន្ថែមទៀតនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។