អង្គការ​ចំនួន​៥​ជំរុញ​ឲ្យ​កម្ពុជា​ចូលរួម​ជា​សមាជិក​ភាព​ជា​ដៃគូ​រដ្ឋាភិបាល​បើក​ទូលាយ

ដោយ ទេព សុរ៉ាវី
2014-10-17
អ៊ីម៉ែល
មតិ
Share
បោះពុម្ព
សិក្ខា​សាលា​ក្នុង​ប្រទេស​នៅ​អាស៊ី​ស្ដីពី​ភាព​ជា​ដៃគូ​រដ្ឋាភិបាល​បើក​ទូលាយ អូជីភី (OGP = Open Government Partnership) ឆ្នាំ​២០១៤-២០១៥ នា​សណ្ឋាគារ​សាន់វ៉េ (Sunway Hotel) កាល​ពី​ថ្ងៃ​ទី​១៦ ខែ​តុលា ឆ្នាំ​២០១៤។
សិក្ខា​សាលា​ក្នុង​ប្រទេស​នៅ​អាស៊ី​ស្ដីពី​ភាព​ជា​ដៃគូ​រដ្ឋាភិបាល​បើក​ទូលាយ អូជីភី (OGP = Open Government Partnership) ឆ្នាំ​២០១៤-២០១៥ នា​សណ្ឋាគារ​សាន់វ៉េ (Sunway Hotel) កាល​ពី​ថ្ងៃ​ទី​១៦ ខែ​តុលា ឆ្នាំ​២០១៤។
RFA/Tep Soravy

ក្រុម​អង្គការ​សង្គម​ស៊ីវិល ដែល​ធ្វើ​ការ​លើ​កិច្ចការ​តម្លាភាព​គណនេយ្យ​ភាព និង​អភិបាល​កិច្ច​ល្អ​នៅ​ក្នុង​ប្រទេស​កម្ពុជា វៀតណាម ហ្វីលីពីន ឥណ្ឌូនេស៊ី ម៉ាឡេស៊ី និង​ប្រទេស​ម៉ិកស៊ីកូ ជិត ១០០​នាក់ បាន​មក​ជួប​ពិភាក្សា​គ្នា​នៅ​សណ្ឋាគារ​សាន់វ៉េ (Sunway) ក្នុង​រាជធានី​ភ្នំពេញ រយៈពេល​ពីរ​ថ្ងៃ​ចាប់​ពី​ថ្ងៃ​ទី​១៦ ដល់​ថ្ងៃ​ទី​១៧ តុលា ដើម្បី​ចែក​រំលែក​បទពិសោធន៍ និង​ការ​អនុវត្ត​ល្អ​ស្ដីពី​ភាព​ជា​ដៃគូ​រដ្ឋាភិបាល​បើក​ទូលាយ (Open Government Partnership) ឬ​ហៅ​កាត់​ជា​ភាសា​អង់គ្លេស​ថា អូជីភី (OGP) ដើម្បី​ផ្សព្វផ្សាយ​ពី​គុណ​តម្លៃ យន្តការ គោល​បំណង និង​សហគមន៍​របស់ អូជីភី ជូន​ដល់​រដ្ឋាភិបាល​កម្ពុជា។

អង្គការ​សង្គម​ស៊ីវិល​ធំៗ​ចំនួន​៥ លើក​ទឹក​ចិត្ត​ឲ្យ​រាជ​រដ្ឋាភិបាល​កម្ពុជា ឲ្យ​ចូលរួម​ជា​សមាជិក ភាព​ជា​ដៃគូ​រដ្ឋាភិបាល​បើក​ទូលាយ អូជីភី។

ភាព​ជា​ដៃគូ​រដ្ឋាភិបាល​បើក​ទូលាយ​អូជីភី ជា​កម្មវិធី​មួយ​ដែល​ជួយ​លើក​កម្ពស់​ឲ្យ​មាន​ការ​ជឿ​ទុក​ចិត្ត​គ្នា​រវាង​ដៃគូ​អភិវឌ្ឍន៍​ជាមួយ​រដ្ឋាភិបាល រដ្ឋាភិបាល​ជាមួយ​អង្គការ​សង្គម​ស៊ីវិល និង​អង្គការ​សង្គម​ស៊ីវិល​ជាមួយ​អ្នក​ពាក់ព័ន្ធ​ផ្សេង​ទៀត ហើយ​អូជីភី នេះ ក៏​ធានា​ឲ្យ​មាន​តម្លាភាព គណនេយ្យ​ភាព​សង្គម និង​អភិបាល​កិច្ច​ល្អ បំបាត់​អំពើ​ពុក​រលួយ។ សព្វថ្ងៃ​នេះ មាន​ប្រទេស​ចំនួន​៦៣ នៅ​លើ​ពិភពលោក​ជា​សមាជិក​សមាគម​របស់​អូជីភី។

ក្រុម​អង្គការ​សង្គម​ស៊ីវិល រួម​មាន គណៈកម្មាធិការ​សហប្រតិបត្តិការ​ដើម្បី​កម្ពុជា (CCC) វិទ្យាស្ថាន​តស៊ូ​មតិ និង​គោល​នយោបាយ (API) សមាគម​យុវជន​ខ្មែរ (KYA) អង្គការ​សីលការ និង​អង្គការ​តម្លាភាព​អន្តរជាតិ (TI) ចង់​ឲ្យ​រដ្ឋាភិបាល​កម្ពុជា ពិចារណា​ចូល​ជា​សមាជិក​នេះ ដោយ​សង្ឃឹម​ថា កម្ពុជា អាច​មាន​តម្លាភាព គណនេយ្យ​ភាព​សង្គម និង​អភិបាល​កិច្ច​ល្អ គ្មាន​អំពើ​ពុក​រលួយ។

សារសំខាន់​ទី​១ គឺ​បង្កើន​ទំនុក​ទុក​ចិត្ត​យ៉ាង​ខ្លាំងក្លា​ក្នុង​សំណាក់​រាជ​រដ្ឋាភិបាល​ ខ្លួន​ឯង​ផ្ទាល់ និង​ប្រជាជន​ដែល​ជា​ម្ចាស់​ឆ្នោត​នៅ​ក្នុង​ការ​សម្រេច​ជោគ​វាសនា​ក្នុង​ ប្រទេស។ ទី​២ លើក​កម្ពស់​កិត្តិយស​កេរ្តិ៍​ឈ្មោះ​នៅ​ក្នុង​ប្រទេស​ជាតិ ព្រោះ​កាល​ណា​យើង​ក្លាយ​ជា​សមាជិក​អូជីភី បាន​ន័យ​ថា ជា​រដ្ឋាភិបាល​មួយ​មាន​ការ​ទទួល​ខុស​ត្រូវ ជា​រដ្ឋាភិបាល​មាន​តម្លាភាព ជា​រដ្ឋាភិបាល​មាន​ការ​ផ្ដួចផ្ដើម។ ទី​៣ លើក​កម្ពស់​នូវ​ភាព​សមភាព បាន​ន័យ​ថា ពលរដ្ឋ​កម្ពុជា ត្រូវ​បាន​គោរព​ស្រឡាញ់​ស្មើៗ​គ្នា និង​ផ្តល់​ឱកាស​ស្មើៗ​គ្នា​ក្នុង​ការ​អភិវឌ្ឍ ឬ​បាន​ផល​ពី​ការ​អភិវឌ្ឍ។ ទី​៤ គឺ​កំណើន​សេដ្ឋកិច្ច គឺ​ជា​ឱកាស​សំខាន់​បំផុត​បើក​ចំហ​យ៉ាង​សំខាន់ និង​ផ្តល់​អាទិភាព​ដល់​វិស័យ​ឯកជន​ក្នុង​ការ​ចូលរួម​អភិវឌ្ឍ​ប្រទេស​កម្ពុជា និង​ចុង​ក្រោយ គឺ​ធានា​នូវ​និរន្តរភាព​ក្នុង​ការ​អភិវឌ្ឍ។

នាយក​ប្រតិបត្តិ​គណៈកម្មាធិការ​សហប្រតិបត្តិការ​ដើម្បី​កម្ពុជា លោក សឿង សារឿន គិត​ថា ប្រសិន​បើ​កម្ពុជា ចូលរួម​ជា​សមាជិក​អូជីភី នេះ គឺ​កម្ពុជា អាច​មាន​អត្ថប្រយោជន៍​ជាច្រើន៖ «សារសំខាន់​ទី​១ គឺ​បង្កើន​ទំនុក​ទុក​ចិត្ត​យ៉ាង​ខ្លាំងក្លា​ក្នុង​សំណាក់​រាជ​រដ្ឋាភិបាល​ខ្លួន​ឯង​ផ្ទាល់ និង​ប្រជាជន​ដែល​ជា​ម្ចាស់​ឆ្នោត​នៅ​ក្នុង​ការ​សម្រេច​ជោគ​វាសនា​ក្នុង​ប្រទេស។ ទី​២ លើក​កម្ពស់​កិត្តិយស​កេរ្តិ៍​ឈ្មោះ​នៅ​ក្នុង​ប្រទេស​ជាតិ ព្រោះ​កាល​ណា​យើង​ក្លាយ​ជា​សមាជិក​អូជីភី បាន​ន័យ​ថា ជា​រដ្ឋាភិបាល​មួយ​មាន​ការ​ទទួល​ខុស​ត្រូវ ជា​រដ្ឋាភិបាល​មាន​តម្លាភាព ជា​រដ្ឋាភិបាល​មាន​ការ​ផ្ដួចផ្ដើម។ ទី​៣ លើក​កម្ពស់​នូវ​ភាព​សមភាព បាន​ន័យ​ថា ពលរដ្ឋ​កម្ពុជា ត្រូវ​បាន​គោរព​ស្រឡាញ់​ស្មើៗ​គ្នា និង​ផ្តល់​ឱកាស​ស្មើៗ​គ្នា​ក្នុង​ការ​អភិវឌ្ឍ ឬ​បាន​ផល​ពី​ការ​អភិវឌ្ឍ។ ទី​៤ គឺ​កំណើន​សេដ្ឋកិច្ច គឺ​ជា​ឱកាស​សំខាន់​បំផុត​បើក​ចំហ​យ៉ាង​សំខាន់ និង​ផ្តល់​អាទិភាព​ដល់​វិស័យ​ឯកជន​ក្នុង​ការ​ចូលរួម​អភិវឌ្ឍ​ប្រទេស​កម្ពុជា និង​ចុង​ក្រោយ គឺ​ធានា​នូវ​និរន្តរភាព​ក្នុង​ការ​អភិវឌ្ឍ»។

ទាក់ទង​បញ្ហា​នេះ អ្នក​វិភាគ​សង្គម លោក កែម ឡី ឲ្យ​ដឹង​ថា អូជីភី គឺ​ជា​ឧបករណ៍​ថ្មី​មួយ​ក្នុង​ការ​ជំរុញ​ឲ្យ​មាន​អភិបាល​កិច្ច​ល្អ ឲ្យ​មាន​តម្លាភាព គណនេយ្យ​ភាព​ក្នុង​សង្គម ដើម្បី​ឈាន​ទៅ​បំបាត់​អំពើ​ពុក​រលួយ។ លោក​បន្ត​ថា បើ​មើល​តាម​ក្របខ័ណ្ឌ​ច្បាប់ និង​គោលការណ៍​នានា កម្ពុជា មាន​លទ្ធភាព​គ្រប់គ្រាន់​ចូលរួម​ជា​សមាជិក​អូជីភី​នេះ សំខាន់ គឺ​នៅ​ត្រង់​ថា រដ្ឋាភិបាល​ព្រម​ស្ម័គ្រ​ដាក់​ចិត្ត​ចូលរួម​ក្នុង​អូជីភី នេះ ឬ​ក៏​អត់?

លោក​បន្ត​ថា រដ្ឋាភិបាល​អាច​ចំណេញ​ពី​ការ​ចូលរួម​ជា​សមាជិក​នេះ ដោយ​អាច​ជួយ​ជំរុញ​បន្ថែម​នូវ​កំណែ​ទម្រង់​រដ្ឋ​សំខាន់ៗ រួម​មាន ​កំណែ​ទម្រង់​រដ្ឋបាល​សាធារណៈ កំណែ​ទម្រង់​ហិរញ្ញវត្ថុ​សាធារណៈ ព្រោះ​អូជីភី គឺ​ជា​ឧបករណ៍​អន្តរ​ប្រទេស អន្តរ​តំបន់ ហើយ​សមាសភាព​សំខាន់ៗ​ក្នុង​អូជីភី គឺ​អាច​ជួយ​ទាំង​រដ្ឋាភិបាល និង​អាច​ជួយ​ដល់​យន្តការ​អាស៊ាន​ផង៖ «រដ្ឋាភិបាល​ត្រូវ​សិក្សា​អូជីភី ឲ្យ​ច្បាស់​ដែរ ថា​វា​ជួយ​រដ្ឋាភិបាល ឬ​សម្លាប់​រដ្ឋាភិបាល។ តាម​ពិត វា​ជា​ឧបករណ៍​មួយ​ជួយ​ពង្រឹង​ប្រសិទ្ធភាព​ការងារ​របស់​រដ្ឋាភិបាល ទាក់ទង​ទៅ​នឹង​អភិបាល​កិច្ច​ល្អ​ទូទៅ​តែ​ម្តង»

ដើម្បី​អាច​ចូល​ជា​សមាជិក​សមាគម​របស់ អូជីភី បាន កម្ពុជា ត្រូវ​មាន​លក្ខណៈ​វិនិច្ឆ័យ​សំខាន់ៗ​ចំនួន​៤។ ទី​១ ត្រូវ​មាន​តម្លាភាព​ថវិកា គឺ​ធ្វើ​យ៉ាង​ណា​ឲ្យ​ថវិកា​ជាតិ និង​ថវិកា​ថ្នាក់​ក្រោម​ជាតិ​មាន​តម្លាភាព ក្នុង​ការ​ធ្វើ​ផែនការ​ថវិកា និង​ការ​ចាត់​ចែង​គ្រប់គ្រង​ថវិកា​ជា​សាធារណៈ ដោយ​បើក​ចំហ​ឲ្យ​សាធារណជន​ដឹង។ ទី​២ ការ​ទទួល​បាន​ព័ត៌មាន និង​បើក​ចំហ​ព័ត៌មាន។ ទី​៣ ការ​ប្រកាស​ទ្រព្យ​សម្បត្តិ​ជា​សាធារណៈ និង​ទី​៤ ការ​ចូលរួម​ពាក់ព័ន្ធ​ពី​ពលរដ្ឋ។

យ៉ាង​ណា អំពើ​ពុក​រលួយ​នៅ​កម្ពុជា ត្រូវ​បាន​អង្គការ​សង្គម​ស៊ីវិល​មើល​ឃើញ​ថា កំពុង​តែ​ជា​សត្រូវ​ចំពោះ​ការ​អភិវឌ្ឍ​ប្រទេស ហើយ​អាច​ជា​ការ​រាំង​ស្ទះ​មួយ​ដល់​ដំណើរ​ចូល​ជា​សមាជិក អូជីភី។ ប្រទេស​កម្ពុជា ឈរ​លំដាប់​ទី​១៦០ ក្នុង​ចំណោម​ប្រទេស​១៧៥ លើ​ពិភពលោក ដែល​មាន​អំពើ​ពុក​រលួយ​ខ្លាំង​ជាង​គេ។ នេះ បើ​តាម​ការ​ស្រាវជ្រាវ​របស់​អង្គការ​តម្លាភាព​អន្តរជាតិ​កាល​ពី​ឆ្នាំ​២០១៣។

យ៉ាង​ណា នាយក​កម្មវិធី​នៃ​អង្គការ​តម្លាភាព​កម្ពុជា លោក ប៉ិច ពិសី គិត​ថា រដ្ឋាភិបាល​កម្ពុជា នៅ​តែ​អាច​ត្រៀម​ខ្លួន​ចូល​ជា​សមាជិក អូជីភី បាន ប៉ុន្តែ​ត្រូវ​យក​ចិត្ត​ទុក​ដាក់ និង​ធ្វើ​កំណែ​ទម្រង់​ច្បាប់​មួយ​ចំនួន ដូចជា ច្បាប់​ប្រឆាំង​អំពើ​ពុក​រលួយ​ត្រង់​ចំណុច​ប្រកាស​ទ្រព្យ​សម្បត្តិ​ជា​សម្ងាត់។ លោក​បញ្ជាក់​ថា ប្រទេស​ផ្សេងៗ​ដែល​ប្រឆាំង​អំពើ​ពុក​រលួយ​ប្រកប​ដោយ​ប្រសិទ្ធភាព មិន​ដែល​ប្រកាស​ទ្រព្យ​សម្បត្តិ​ជា​សម្ងាត់​ទេ គឺ​ត្រូវ​ប្រកាស​សាធារណៈ។ មួយ​ទៀត កម្ពុជា ត្រូវ​មាន​ច្បាប់​ស្ដីពី​សិទ្ធិ​ទទួល​បាន​ព័ត៌មាន និង​ច្បាប់​ការពារ​សាក្សី ដើម្បី​ជំរុញ​ឲ្យ​ពលរដ្ឋ​មាន​ភាព​ក្លាហាន និង​ឆន្ទៈ​ចូលរួម​ប្រឆាំង​អំពើ​ពុក​រលួយ​ជាមួយ​រដ្ឋាភិបាល។

តំណាង​រដ្ឋាភិបាល​នៅ​មិន​ទាន់​ឆ្លើយ​តប​យ៉ាង​ណា ចំពោះ​ការ​ទទូច​ចង់​ឲ្យ​រដ្ឋាភិបាល​ចូល​ជា​សមាជិក​របស់​អូជីភី នេះ​ទេ។ ប៉ុន្តែ​ជា​សញ្ញា​វិជ្ជមាន​មួយ​ដែល​រដ្ឋលេខាធិការ​ក្រសួង​មហាផ្ទៃ លោក សក់ សេដ្ឋា គ្រោង​ចូលរួម​ក្នុង​សិក្ខា​ស្ដីពី​ភាព​ជា​ដៃគូ​រដ្ឋាភិបាល​បើក​ទូលាយ អូជីភី លើក​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល