ចៅសង្កាត់រងទី២គណបក្សភ្លើងទៀនខេត្តបាត់ដំបង ដែលរងហិង្សាពីក្រុមប្រឹក្សាបក្សកាន់អំណាច ដាក់បណ្ដឹងទៅប៉ូលិស
2022.10.28
ចៅសង្កាត់រងទី២ គណបក្សភ្លើងទៀនខេត្តបាត់ដំបងអ្នកស្រី ស៊ិន ចាន់ពៅរ៉ូហ្សេត (រូបកណ្ដាល) ផ្សាយផ្ទាល់តាមហ្វេសប៊ុកករណីហិង្សាលើអ្នកស្រី កាលពីថ្ងៃទី២៧ ខែតុលា ឆ្នាំ២០២២។
រូប៖ ហ្វេសប៊ុកអ្នកស្រី ស៊ិន ចាន់ពៅរ៉ូហ្សេត
ចៅសង្កាត់រងទី២ គណបក្សភ្លើងទៀនខេត្តបាត់ដំបងអ្នកស្រី ស៊ិន ចាន់ពៅរ៉ូហ្សេត បានដាក់ពាក្យប្ដឹងសមាជិកក្រុមប្រឹក្សាសង្កាត់អូរចារ អ្នកស្រី យ៉ាន រ៉ាស៊ី ពាក់ព័ន្ធករណីប្រើហិង្សាលើអ្នកស្រី។ មន្ត្រីសង្គមស៊ីវិលយល់ឃើញថា អាជ្ញាធរថ្នាក់លើ គប្បីធ្វើការសម្របសម្រួល ដើម្បីបន្តធ្វើការបម្រើពលរដ្ឋជាមួយគ្នា ព្រោះរយៈពេលនៅវែងឆ្ងាយទើបចប់អាណត្តិ ប៉ុន្តែមិនអាចបង្ខំឆន្ទៈរបស់ភាគីជម្លោះបានឡើយ។
ចៅសង្កាត់រងទី២ សង្កាត់អូរចារមកពីគណបក្សភ្លើងទៀន ទាមទារឲ្យសមត្ថកិច្ចអនុវត្តច្បាប់ ទៅលើជនដៃដល់ដែលប្រព្រឹត្តហិង្សាមកលើអ្នកស្រី និងបដិសេធធ្វើការសម្របសម្រួលជាមួយភាគីអ្នកស្រី យ៉ាន រ៉ាស៊ី នៅសាលាសង្កាត់អូរចារ។
ចៅសង្កាត់រងទី២ អូរចារ អ្នកស្រី ស៊ិន ចាន់ពៅរ៉ូហ្សេត ថ្លែងក្នុងការផ្សាយផ្ទាល់លើហ្វេសបុក (Facebook) របស់អ្នកស្រីថា ចៅសង្កាត់អូរចារ បានធ្វើការប្រជុំសម្របសម្រួល ប៉ុន្តែអ្នកស្រីបានបដិសេធ ចំពោះការសម្របសម្រួល។ អ្នកស្រីក៏លើកឡើងពីករណីស្មៀន ក្នុងម៉ោងការងារ បែរជាព្យាយាមអូសទាញលោក ជា ទូច អោយចុះចូលគណបក្សប្រជាជន ដែលខុស និងច្បាប់សហលក្ខន្តិកៈមន្ត្រីរាជការ។
អ្នកស្រី ស៊ិន ចាន់ពៅរ៉ូហ្សេត អំពាវនាវដល់ក្រសួងមហាផ្ទៃឱ្យធ្វើការណែនាំ និងបណ្ដុះបណ្ដាលអំពីក្រមសីលធម៌របស់មន្ត្រីរាជការ មិនត្រូវធ្វើការលេងសើចក្នុងម៉ោងការងារ។
អ្នកស្រី ស៊ិន ចាន់ពៅរ៉ូហ្សេត៖ «ចំពោះផ្លូវច្បាប់ គឺខ្ញុំបានដាក់ទៅនគរបាលយុត្តិធម៌ហើយឱ្យគេដោះស្រាយផ្លូវច្បាប់ ហើយយើងរង់ចាំមើលទៀត តើក្នុងករណីប្រព្រឹត្តអំពើហិង្សា ដែលមានស្ថានទម្ងន់ទោស បទល្មើសជាក់ស្ដែងបែបហ្នឹង។ តើជនដៃដល់ដែលប្រព្រឹត្តអំពើហិង្សាមកលើរូបនាងខ្ញុំ ជាចៅសង្កាត់រងទី២ ហើយជនដៃដល់ គឺជាសមាជិកក្រុមប្រឹក្សាសង្កាត់ជាប់ឆ្នោតមកពីគណបក្សប្រជាជនកម្ពុជាហ្នឹង ដែលបានប្រព្រឹត្តបទល្មើសហិង្សាចំពោះខ្ញុំនៅក្នុងសង្កាត់អូរចារហ្នឹង តើនឹងទទួលទោសទណ្ឌយ៉ាងដូចម្ដេចតទៅមុខទៀត»។
ជុំវិញរឿងនេះ ចៅសង្កាត់អូរចារ លោក ឯម សុផល ប្រាប់វិទ្យុអាស៊ីសេរីនៅថ្ងៃទី២៧ តុលា ថា លោកបានធ្វើការសម្របសម្រួលករណីមានជម្លោះនៅក្នុងសង្កាត់ ព្រោះជាកន្លែងធ្វើការងារបម្រើពលរដ្ឋ។ លោកបន្តថា អ្នកស្រី យាន រ៉ាស៊ី ខឹងដោយសារអ្នកស្រី ស៊ិន ពៅរ៉ូហ្សេត ព្យាយាមថតអ្នកស្រី រ៉ាស៊ី ហើយពួកគាត់មិនបានស្តាប់លោកហាមឃាត់ ទើបបង្កជាបញ្ហាកើតឡើង។ លោកបញ្ជាក់ថា លោកបានស្នើសុំអ្នកស្រីរ៉ូហ្សេត ឱ្យដកពាក្យបណ្ដឹង ប៉ុន្តែអ្នកស្រី រ៉ូហ្សេត បដិសេធ ការសម្របសម្រួល និងប្រកាន់យកការដាក់ពាក្យបណ្ដឹងទៅនគរបាល។ លោក ឯម សុផល បន្ថែមថា មិនបានដឹងច្បាស់ពីអ្នកស្រី ដែលសតិមិនគ្រប់នោះថា មានសំបុត្រកំណើតរួចហើយ ដូចការលើកឡើងឡើយ ប៉ុន្តែគ្រាន់តែឃើញអ្នកស្រីនោះតែងចេញចូលនៅសាលាសង្កាត់ជាប្រចាំ។
លោក ឯម សុផល៖ «មីងម្នាក់! គាត់ចេះតែចេញចូលដេកនៅសង្កាត់ខ្លះ ដេកនៅឯណាខ្លះទៅ គាត់ចង់បោះឆ្នោត តែគាត់អត់មានសំបុត្រកំណើត គាត់អ្នកភូមិព្រៃកូនសេក។ ស្មៀនគាត់ថា បើអត់សំបុត្រកំណើតទាល់រកសាក្សីអីមក គាត់រៀបចំជួយឱ្យមានឈ្មោះបោះឆ្នោត។ ហៃនៅពេលហ្នឹងក៏មានអ្នកសង្កេតការណ៍គណបក្សនយោបាយភ្លើងទៀនហ្នឹង គាត់នៅហ្នឹងថា ហែងអ្នកព្រៃកូនសេកអី កូនសេកដូចគ្នាជួយធ្វើសាក្សីឱ្យគាត់ទៅ ដល់អ៊ីចឹងលោកស្រីគាត់ខឹង។ គាត់ថា មិនត្រូវមកពាក់ព័ន្ធជាមួយមន្ត្រីរបស់គាត់សង្កេតការណ៍ហ្នឹងទេ។ ប្រកែកតចុះតឡើងទៅ ទៅជារឿងខ្លាំងៗ អ៊ីចឹងហាស។ បាទម្សិលមិញខ្ញុំសម្របសម្រួល ខ្ញុំបានជម្រាបលោកស្រីរ៉ូហ្សេតហ្នឹងហើយ ខ្ញុំថា បើលោកស្រីស្គាល់តួនាទីខ្លួនឯង ហើយស្គាល់តួនាទីខ្ញុំ ស្ដាប់ខ្ញុំម្សិលមិញអត់មានរឿងអីឆឹងឆុងឆាំងអ៊ីចឹងទេ ប៉ុន្តែខ្ញុំស្នើសុំហើយអត់ព្រមស្ដាប់សោះ»។
វិទ្យុអាស៊ីសេរីមិនអាចទាន់ទាក់ទងក្រុមប្រឹក្សាសង្កាត់អូរចារ អ្នកស្រី យ៉ាន រ៉ាស៊ី ដើម្បីសុំសេចក្ដីអត្ថាធិប្បាយជុំវិញរឿងនេះបានទេ នៅថ្ងៃទី២៧ តុលានេះ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី យល់ឃើញថា ការសម្របសម្រួលពីចៅសង្កាត់ ជារឿងប្រសើរ ដែលបង្ហាញពីភាពទទួលខុសត្រូវរបស់ចៅសង្កាត់។ លោកបន្តថា ករណីនេះមិនទាន់ដឹងថា មានការបង្កដល់មានរបួសស្នាម ឬអត់នោះទេ ប៉ុន្តែបើមានស្នាម នឹងប៉ះពាល់ដល់សិទ្ធិបុគ្គល។ លោកថា ការសម្របសម្រួលមិនអាចបង្ខំឆន្ទៈរបស់ភាគីបានទេ ប៉ុន្តែបើមានប្ដឹងផ្ដល់ តែងមានការឈ្នះចាញ់ និងមានការគុំកួន និងធ្វើឱ្យប៉ះពាល់ដល់ការអនុវត្តការងារជាមួយគ្នាបន្តរយៈវែងឆ្ងាយទៀត។
លោក យិន ម៉េងលី៖ «យើងទាំងអស់គ្នា ដែលជាខ្មែរដូចគ្នា វាគ្មានអ្វី ដែលសំខាន់ជាងយើងនិយាយគ្នា យើងជជែកគ្នាទេ ព្រោះយើងធ្វើការនៅក្នុងឃុំសង្កាត់ដូចគ្នា។ ទោះបីយើងមកពីគណបក្សនយោបាយខុសគ្នាក៏ដោយ ក៏ប៉ុន្តែគោលដៅរបស់យើងរួមគ្នា គឺអភិវឌ្ឍន៍ឃុំសង្កាត់ ដើម្បីជីវភាពរបស់ប្រជាពលរដ្ឋដូចគ្នាទេ។ អ៊ីចឹងយើងគប្បីមិនត្រូវយកខ្មែរគ្នាឯងធ្វើជាសត្រូវទេ។ អ៊ីចឹងមធ្យោបាយសម្របសម្រួល សម្រាប់ខ្ញុំ ខ្ញុំគាំទ្រ ប៉ុន្តែទៅលើឆន្ទៈរបស់ភាគី អានោះទុកឱ្យភាគីគេសម្រេចចិត្តចុះ»។
កាលពីថ្ងៃទី២៦ តុលា ចៅសង្កាត់រងទី២ គណបក្សភ្លើងទៀនខេត្តបាត់ដំបង អ្នកស្រី ស៊ិន ចាន់ពៅរ៉ូហ្សេត ចោទក្រុមប្រឹក្សាសង្កាត់អូរចារអ្នកស្រី យាន រ៉ាស៊ី មកពីគណបក្សកាន់អំណាចប្រើហិង្សាលើអ្នកស្រីដោយច្របាច់ក ខ្ទប់មាត់ និងឆក់ទូរស័ព្ទពីអ្នកស្រីកំពុងតែឡាយ បន្ទាប់ពីមានការទាស់សម្ដីគ្នា។
មន្ត្រីអង្គការសង្គមស៊ីវិល ចង់ឃើញការសម្របសម្រួលគ្នា ប្រសិនបើមិនមានអំពើហិង្សាធ្ងន់ធ្ងរទេនោះ ដោយឈរលើគោលការណ៍ខ្មែរតែមួយ ដើម្បីអនុវត្តការងារបម្រើពលរដ្ឋ ហើយអ្នកប្រព្រឹត្តខុស ត្រូវចេះទទួលស្គាល់កំហុស និងធ្វើការកែប្រែ ហើយត្រូវបង្កើនការអភិវឌ្ឍន៍ភូមិឃុំ ជាការតបស្នងដល់អ្នកបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
អត្ថបទពេញនិយម
នយោបាយ
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- តុលាការឧក្រិដ្ឋកម្មអន្តរជាតិចេញដីកាចាប់ខ្លួនប្រធានាធិបតីរុស្ស៊ីពីបទឧក្រិដ្ឋកម្មសង្គ្រាម
- ចិនបញ្ជូនកងទ័ពជាង២០០នាក់មកធ្វើសមយុទ្ធនាគមាសឆ្នាំ២០២៣ជាមួយកម្ពុជា