ក្រសួង​ការ​បរទេស​ថា ប្រសាសន៍​របស់​ទូត​អាមេរិក​ជុំ​វិញ​រឿង​ក្តី​លោក កឹម សុខា ​ប៉ះពាល់​ដល់​តុលាការ​កម្ពុជា

ដោយ​ សន ចាន់រដ្ឋា
2020-03-13
អ៊ីម៉ែល
មតិ
Share
បោះពុម្ព
លោក ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ។
លោក ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ។
រូប៖ ហ្វេសប៊ុក​​រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ

ក្រសួង​ការបរទេស​កម្ពុជា នៅ​ថ្ងៃ​ទី១៣ មីនា​នេះ សម្ដែង​ការ​ខក​ចិត្ត​ចំពោះ​មន្ត្រី​ទូត​​អាមេរិក ដែល​បាន​បញ្ចេញ​មតិ​ជុំ​វិញ​ដំណើរការ​ក្ដី​លោក កឹម សុខា។ ឯកអគ្គរដ្ឋទូត​អាមេរិក​ប្រចាំ​កម្ពុជា លោក ប៉ាទ្រីក ម័រហ្វី (Patrick Murphy) បាន​ថ្លែង​កាល​ពី​ថ្ងៃ​ទី១២ មីនា ម្សិលមិញ​ថា ​លោក កឹម សុខា សក្ដិសម​ជា​ជើងឯក​ខាង​សិទ្ធិមនុស្ស និង​សេរីភាព ហើយ​សហរដ្ឋអាមេរិក​ចង់​ឃើញ​មេ​បក្ស​ប្រឆាំង​រូប​នេះ ទទួល​បាន​សិទ្ធិ​ធ្វើ​នយោបាយ​ពេញលេញ​ឡើងវិញ។

ក្រសួង​ការ​បរទេស​កម្ពុជា​លើក​ឡើង​នៅ​ក្នុង​សេចក្ដី​ថ្លែង​ការណ៍​​ថា យោបល់​របស់​លោក ប៉ាទ្រីក ម័រហ្វី ប៉ះពាល់​ធ្ងន់ធ្ងរ​ដល់​ប្រព័ន្ធ​តុលាការ​កម្ពុជា និង​បង្ហាញ​ឱ្យ​ឃើញ​ពី​ឥរិយាបថ​គ្មាន​ការទូត និង​ខ្វះ​ការ​គោរព​ចំពោះ​អធិបតេយ្យ​របស់​កម្ពុជា​ដែល​ជា​ប្រទេស​ម្ចាស់​ផ្ទះ។ ក្រសួង​ថ្លែង​ទៀត​ថា ការ​លើកឡើង​នេះ ផ្ទុយ​ទៅ​នឹង​ស្មារតី​របស់​ថ្នាក់ដឹកនាំ​ប្រទេស​ទាំង​ពីរ​ក្នុង​​ការ​ធ្វើ​ឱ្យ​ប្រសើរ​ឡើង​នូវ​ការ​យោគ​យល់​ និង​គោរព​គ្នា​ទៅ​វិញ​ទៅមក ព្រម​ទាំង​ការ​បើក​ទំព័រ​ថ្មី​នៃ​កិច្ច​សហប្រតិបត្តិ​ការ​ជាក់ស្ដែង​លើ​គ្រប់​វិស័យ​របស់​ប្រទេស​ទាំងពីរ​ទៀត​ផង។

ក្រសួង​ការបរទេស​ថ្លែង​ការពារ​តុលាការ​កម្ពុជា​ថា ជា​ស្ថាប័ន​ឯករាជ្យ និង​ដាច់​ដោយឡែក ដូច​មាន​ចែង​ក្នុង​រដ្ឋ​ធម្មនុញ្ញ ក៏ប៉ុន្តែ ទន្ទឹម​នឹង​នេះ ក្រសួង​ការបរទេស​កម្ពុជា មិន​​បាន​ទាម​ទារ​ឱ្យ​មន្ត្រី​ទូត​អាមេរិក​កែ​តម្រូវ​ប្រសាសន៍​របស់​លោក​ត្រង់​​ចំណុច​ណាមួយ​នោះ​ឡើយ។

អាស៊ី​សេរី​បាន​ទាក់ទង​តាម​អ៊ីមែល​ទៅ​មន្ត្រី​ស្ថានទូត​អាមេរិក​ប្រចាំ​កម្ពុជា​​រួច​ហើយ ដើម្បី​សុំ​ប្រតិកម្ម​តប​ទៅ​នឹង​សេចក្ដី​ថ្លែងការណ៍​របស់​ក្រសួង​ការ​បរទេស​កម្ពុជា​នេះ​ ក៏​ប៉ុន្តែ​មិន​ទាន់​ទទួល​បាន​ការ​ឆ្លើយ​តប​នៅ​ឡើយ​ទេ គិត​ត្រឹម​ម៉ោង​ផ្សាយ​នេះ។

ឯកអគ្គរដ្ឋទូត​អាមេរិក​ប្រចាំ​នៅ​កម្ពុជា លោក ប៉ាទ្រីក ម័រហ្វី បាន​ថ្លែង​ក្រោយ​បញ្ចប់​សវនាការ​រឿង​ក្ដី​លោក កឹម សុខា នៅ​ព្រឹក​ថ្ងៃ​ទី១២ មីនា​ថា ដំណើរការ​ក្ដី​នេះ​នឹង​ប៉ះពាល់​ខ្លាំង​ដល់​​នីតិរដ្ឋ និង​​ប្រព័ន្ធ​យុត្តិធម៌​របស់​កម្ពុជា ព្រម​ទាំង​​ទំនាក់​ទំនង​រវាង​កម្ពុជា និង​ប្រទេស​ដទៃ​ទៀត​ផង​ដែរ។ លោក​បន្ត​ថា លោក កឹម សុខា សម​នឹង​ត្រូវ​បាន​គេ​ទទួល​ស្គាល់​ថា ជា​ជើង​ឯក​ខាង​​សិទ្ធិមនុស្ស និង​សេរីភាព ហើយ​សហរដ្ឋ​អាមេរិក​ចង់​ឃើញ​មេ​បក្ស​ប្រឆាំង​រូប​នេះ​ទទួល​បាន​សិទ្ធិ​ធ្វើ​នយោបាយ​ពេញលេញ​ឡើង​វិញ ហើយ​ក៏​សង្ឃឹម​ដែរ​ថា ពលរដ្ឋ​ខ្មែរ​ទាំងអស់​អាច​ចូល​រួម​បាន​នៅ​ក្នុង​ដំណើរ​ការ​នយោបាយ។

ជាមួយ​គ្នានេះ លោក ប៉ាទ្រីក ម័រហ្វី ​​មិន​ពេញ​​ចិត្ត​ឡើយ ចំពោះ​អ្វី​ដែល​លោក​ហៅ​ថា ជា​ការ​​ការ​ប្រឌិត​រឿង​ថា សហរដ្ឋ​អាមេរិក​បាន​ឃុបឃិត​ជាមួយ​លោក កឹម សុខា ក្នុង​សកម្មភាព​ដែល​អាជ្ញាធរ​ចោទ​ថា ជា​ការ​ប៉ុន​ប៉ង​ផ្ដួល​រំលំ​រដ្ឋាភិបាល។ លោក​បក​ស្រាយ​ថា ជំនួយ​របស់​សហរដ្ឋ​អាមេរិក​មាន​តម្លាភាព ហើយ​ត្រូវ​បាន​ផ្ដល់​ឱ្យ​គ្រប់​គណបក្ស​នយោបាយ ក្នុង​នោះ​ក៏​រួមមាន​ទាំង​គណបក្សប្រជាជន​កម្ពុជា​របស់​លោក ហ៊ុន សែន ផង​ដែរ។

អ្នក​​នាំ​ពាក្យ​សមាគម​អាដហុក (ADHOC) លោក ស៊ឹង សែនករុណា ជឿ​ថា ការ​លើក​ឡើង​របស់​លោក ប៉ាទ្រីក ម័រហ្វី នេះ នឹង​គ្មាន​ឥទ្ធិពល​លើ​​តុលាការ​កម្ពុជា​ឡើយ ប៉ុន្តែ​គឺ​ប្រសាសន៍​របស់​លោក ហ៊ុន សែន ទៅវិញ​ទេ ដែល​ជា​ការ​ដាក់​សម្ពាធ​លើ​តុលាការ។ លោក​យល់ថា មូលហេតុ​ដែល​ឯកអគ្គរដ្ឋទូត​អាមេរិក​ចាំបាច់​ត្រូវ​បកស្រាយ​រឿង​នេះ គឺ​ដោយសារ​កន្លងមក​ ខាង​អាជ្ញាធរ​កម្ពុជា​បាន​ភ្ជាប់​ករណី​លោក កឹម សុខា ​ជាមួយ​សហរដ្ឋ​អាមេរិក៖ «ជា​តំណាង​ឱ្យ​​ប្រទេស​របស់​លោក ខ្ញុំ​គិត​ថា ឯកអគ្គរដ្ឋទូត​សហរដ្ឋ​​អាមេរិក​មាន​សិទ្ធិ​ក្នុង​ការ​បកស្រាយ ដើម្បី​ឱ្យ​សាធារណជន​មាន​ការ​ជម្រះ​នូវ​មន្ទិល​សង្ស័យ​ដែល​មន្ត្រី​តុលាការ ទាំង​តំណាង​អយ្យការ និង​ខាង​សហ​ចៅក្រម​ជំនុំ​ជម្រះ​ទាំង​អស់​ហ្នឹង ដែល​តែង​តែ​មាន​ការ​ចោទ​សួរ​ពាក់ព័ន្ធ​ទៅ​នឹង​ទំនាក់​ទំនង​របស់​លោក កឹម សុខា ហើយ​និង​ខាង​សហរដ្ឋ​អាមេរិក។ នេះ​ជា​សិទ្ធិ​ដែល​លោក​អាច​ធ្វើ​ទៅ​បាន មិន​មែន​ជា​រឿង​ជ្រៀត​ជ្រែក​​អធិបតេយ្យ​អ្វី​ទេ»

កាល​ពី​ប៉ុន្មាន​ថ្ងៃមុន​នេះ មេ​ដឹក​នាំ​របប​ក្រុង​ភ្នំពេញ លោក ហ៊ុន សែន បាន​ប្រកាស​ទុក​ជា​មុន​ហើយ​ថា លោក កឹម សុខា ត្រូវ​តែ​មាន​ទោស ព្រោះ​មេ​បក្ស​ប្រឆាំង​រូប​នេះ​បាន​ដឹក​នាំ​ការ​តវ៉ា​​ឱ្យ​មាន​ការ​ផ្លាស់​ប្ដូរ​រដ្ឋាភិបាល​នៅ​ក្រោយ​ការ​បោះ​ឆ្នោត។ លោក​បញ្ជាក់​ថា លោក​បាន​ត្រៀម​ពន្ធនាគារ​រួច​ហើយ ហើយ​បើ​តុលាការ​ចេញ​សាលក្រម​ពេល​ណា នោះ​លោក​នឹង​ចាប់​ខ្លួន​មេ​បក្ស​ប្រឆាំង លោក កឹម សុខា ដាក់​គុក​វិញ​ភ្លាម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល