[អានអត្ថបទជា ភាសាអង់គ្លេស៖ French ambassador discusses shooting probe with Cambodian police official]
ឯកអគ្គរដ្ឋទូតបារាំងប្រចាំនៅកម្ពុជា លោក ហ្សាក់ ប៉ឺឡេ (Jacques Pellet) នៅថ្ងៃទី២៤ ខែកុម្ភៈ បានជួបពិភាក្សាជាមួយអគ្គស្នងការរងនគរបាលជាតិលោក ឌី វិជ្ជា ពាក់ព័ន្ធ ចំណាត់ការរបស់អាជ្ញាធរកម្ពុជាទៅលើការស៊ើបអង្កេត ក្នុងសំណុំ រឿងឃាតកម្មអតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា។ មន្ត្រីសង្គមស៊ីវិលថា ជំនួបពិភាក្សារបស់ស្ថានទូតបារាំងនេះគឺជារឿងល្អ ហើយ ភាគីកម្ពុជាត្រូវតែសហការ និងជួយពន្លឿនចាប់ និងបញ្ជូនខ្លួនជនសង្ស័យ មួយចំនួន ដែលរស់នៅកម្ពុជាប្រគល់ឱ្យទៅប៉ូលិសថៃ ដើម្បីធ្វើការស៊ើបអង្កេតបន្តឱ្យបានឆាប់។
ទូតបារាំងតាមដានករណីឃាតកម្មលោក លិម គិមយ៉ា
ស្ថានទូតបារាំងប្រចាំនៅកម្ពុជានៅថ្ងៃទី២៤ ខែកុម្ភៈ នេះ បាន បង្ហោះសារនៅលើបណ្ដាញសង្គមអ៊ិច (X) ថា ឯកអគ្គរដ្ឋទូតបារាំង លោក ហ្សាក់ ប៉ឺឡេ បានជួបពិភាក្សាជាមួយ អគ្គស្នងការរងនគរបាលជាតិលោក ឌី វិជ្ជា នៅឯស្នងការនគរបាលរាជធានីភ្នំពេញ ដើម្បីតាមដានលើចំណាត់ការរបស់អាជ្ញាធរកម្ពុជា ក្នុងសំណុំរឿងឃាតកម្មលើលោក លិម គិមយ៉ា កាលពីថ្ងៃទី៧ ខែមករា នៅកណ្ដាលទីក្រុងបាងកក ប្រទេសថៃ។ ទន្ទឹមនឹងនោះ ស្ថានទូតបារាំងបានបញ្ជាក់ថា អាជ្ញាធរបារាំងតាមដាន ការស៊ើបអង្កេតនេះយ៉ាងដិតដល់។
🇫🇷 Ambassador Pellet met with Mr. Dy Vichea, deputy Chief of the National Police, to discuss the measures taken by the Cambodian authorities in connection with the Thai investigation into the murder of French citizen Mr. Lim Kimya. <br/>France is monitoring closely the investigation.
វិទ្យុអាស៊ីសេរីពុំអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន និងតំណាងស្ថានទូតបារាំងប្រចាំនៅកម្ពុជា ដើម្បីបញ្ជាក់បន្ថែមពីលទ្ធផលនៃជំនួបនេះបាននៅឡើយទេ នៅថ្ងៃទី២៤ ខែកុម្ភៈ ដោយហៅទូរស័ព្ទចូល តែគ្មានអ្នកទទួល។
ទោះជាយ៉ាងណាកាលពីថ្ងៃទី០៩ មករា កន្លងមក បារាំងក៏បានចេញសេចក្ដីថ្លែងការណ៍ ថ្កោលទោសចំពោះការបាញ់សម្លាប់ ពលរដ្ឋខ្មែរសញ្ជាតិបារាំងគឺលោក លិម គិមយ៉ា ម្ដងរួចមកហើយ។ ទន្ទឹមនឹងនោះ ពួកគេក៏បង្ហាញឆន្ទៈ ប្ដេជ្ញាចិត្ត បន្តតាមដានលើករណីនេះដោយយកចិត្តទុកដាក់ជាទីបំផុត ជាពិសេសចំពោះការស៊ើបអង្កេតរបស់សមត្ថកិច្ចថៃ។
មន្ត្រីសិទ្ធិមនុស្សស្នើឱ្យកម្ពុជាពន្លឿននីតិវិធីស៊ើបអង្កេតឱ្យបានត្រឹមត្រូវ
ទាក់ទិនរឿងនេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី លើកឡើងថា ការតាមដានរបស់ស្ថានទូតបារាំងលើករណីឃាតកម្ម លោក លិម គិមយ៉ា នេះ គឺជារឿងល្អ ដូច្នេះ អាជ្ញាធរកម្ពុជាត្រូវតែសហការ ដើម្បីធ្វើយ៉ាងណាជួយពន្លឿននីតិវិធីស៊ើបអង្កេតឱ្យបានត្រឹមត្រូវ។ ជាពិសេស លោកថា អាជ្ញាធរកម្ពុជាត្រូវតែចាប់ខ្លួនជនសង្ស័យ ដែលជាពលរដ្ឋខ្មែរ ពីរនាក់ទៀត ប្រគល់ឱ្យទៅប៉ូលិសថៃ ដើម្បីធ្វើយ៉ាងណាបង្ហាញថា អាជ្ញាធរកម្ពុជា ពិតជាមានឆន្ទៈពិតប្រាកដក្នុងការស្វែងរកការពិតនៃឃាតកម្មមួយនេះ។
លោក យិន ម៉េងលី៖«បើទោះជាមានឆន្ទៈ ឬគ្មានឆន្ទៈ ចង់មិនចង់គឺត្រូវតែសហការដែរ នៅក្នុងឆាក់អន្តរជាតិនេះ។ ប្រសិនបើមិនសហការ មិនបង្ហាញឱ្យច្បាស់លាស់ទេ យើងនឹងមានការលំបាកពាក់ព័ន្ធនឹងកេរ្តិ៍ឈ្មោះរបស់រដ្ឋាភិបាលរបស់យើង នៅលើឆាក់អន្តរជាតិ ព្រោះថារដ្ឋាភិបាលមិនអាចនៅឯកោតែឯងទេ ត្រូវមានការទំនាក់ទំនងជាអន្តរជាតិនេះឯង»។
អត្ថបទដែលទាក់ទង៖
លោក ហ៊ុន សែន បញ្ចេញសារសំឡេង ដែលប៉ុនប៉ងធ្វើឃាតលោក
តំណាងជនភៀសខ្លួននៅថៃចោទលោក ហ៊ុន សែន ថា ជាអ្នកបញ្ជាឱ្យសម្លាប់លោក លិម គិមយ៉ា
ប្រវត្តិលោក លិម គិមយ៉ា អតីតតំណាងរាស្ត្របក្សសង្គ្រោះជាតិ ដែលគេធ្វើឃាតនៅប្រទេសថៃ
មកទល់ពេលនេះរដ្ឋាភិបាលកម្ពុជា នៅមិនទាន់ចាប់ខ្លួនជនសង្ស័យចំនួន ២នាក់ គឺទីប្រឹក្សាប្រធានព្រឹទ្ធសភា លោក ហ៊ុន សែន លោក លី រតនរស្មី និងលោក ពេជ្រ គឹមស្រ៊ិន ដែលជាកូនចៅរបស់អភិបាលរាជធានីភ្នំពេញ លោក ឃួង ស្រេង ដើម្បីបញ្ជូនឱ្យទៅអាជ្ញាធរថៃ អនុវត្តនីតិវិធីនៅឡើយ។ ករណីនេះ ធ្វើឱ្យអ្នកឃ្លាំមើល និងពលរដ្ឋខ្មែរ ភាគច្រើនដាក់ការសង្ស័យថាឃាតកម្មលើលោក លិម គិមយ៉ា អាចជាប់ពាក់ព័ន្ធនឹងបក្សកាន់អំណាចនៅកម្ពុជាបច្ចុប្បន្ន ទើបអាជ្ញាធរកម្ពុជាហាក់មិនសូវយកចិត្តទុកដាក់ ឬខ្នះខ្នែងស្វែងរកយុត្តិធម៌ជូនជនរងគ្រោះ និងគ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។