មន្ត្រី​របប​ក្រុង​ភ្នំពេញ​ថា របប​នេះ​មិន​ធ្លាប់​បាន​ទទួល​សំណើ​ពី​ខាង​អ្នកស្រី រ៉ូណា ស្ម៊ីត សុំ​ជួប​លោក កឹម សុខា ឡើយ

ដោយ មួង ណារ៉េត
2018-10-31
Share
ផៃ ស៊ីផាន ២០១៤ ៦២២ អ្នក​នាំ​ពាក្យ​នៃ​ទីស្ដីការ​រដ្ឋមន្ត្រី លោក ផៃ ស៊ីផាន ថ្លែង​ក្នុង​សន្និសីទ​កាសែត​នា​ទីស្ដីការ​គណៈរដ្ឋមន្ត្រី នៅ​ថ្ងៃ​ទី​៤ ខែ​មេសា ឆ្នាំ​២០១៤។
RFA

មន្ត្រីនាំពាក្យរបបក្រុងភ្នំពេញ លោក ផៃ ស៊ីផាន អះអាង​ថា របប​ក្រុង​ភ្នំពេញ មិន​ដែល​ធ្លាប់​ទទួល​បាន​សំណើ​ណា​មួយ​ពី​ខាង​អ្នកស្រី រ៉ូណា ស្ម៊ីត ជុំវិញ​ករណី​សុំ​ជួប​មេ​ដឹក​នាំ​គណបក្ស​ប្រឆាំង​នេះ​ឡើយ។ យ៉ាង​ណា​ក៏​ដោយ លោក​បញ្ជាក់​ថា លោក កឹម សុខា មិន​ស្ថិត​នៅ​ក្រោម​អាណត្តិ ឬ​ការ​គ្រប់គ្រង​របស់​របប​ក្រុង​ភ្នំពេញ​ឡើយ តែ​លោក​ស្ថិត​ក្រោម​អាណត្តិ​នៃ​ការ​គ្រប់គ្រង​របស់​តុលាការ​ពី​ព្រោះ​លោក កឹម សុខា ជា​ជន​សង្ស័យ៖ «អ្វី​ដែល​ខ្ញុំ​ចង់​បញ្ជាក់​ប្រាប់​គាត់​ហ្នឹង គឺ​ថា​លោក កឹម សុខា មិន​ស្ថិត​នៅ​ក្រោម​អាណត្តិ ឬ​ការ​គ្រប់គ្រង​របស់​រាជ​រដ្ឋាភិបាល​ទេ គឺ​ស្ថិត​នៅ​ក្រោម​អាណត្តិ​នៃ​ការ​គ្រប់គ្រង​របស់​តុលាការ ពី​ព្រោះ​គាត់​ជា​ជន​សង្ស័យ ដែល​ទទួល​កាតព្វកិច្ច​ឆ្លើយ​តប​នឹង​តុលាការ ចំណុច​ទី​មួយ ហើយ​ចំណុច​ទី​ពីរ ចង់​ដឹង​ថា គាត់​ដាក់​ទៅ​ខាង​ណា ហើយ​លោកស្រី​ជា​អ្នក​បច្ចេកទេស​សុទ្ធសាធ មិន​មែន​ជា​អ្នក​នយោបាយ​ទេ។ គួរ​ដឹង​គួរ​យល់​ថា តើ​ដាក់​សំបុត្រ​យ៉ាង​ម៉េច ដើម្បី​ឲ្យ​មាន​ប្រសិទ្ធភាព។ ហើយ​ការ​សម្រេច​របស់​តុលាការ គឺ​ជា​រឿង​ដែល​ជា​អំណាច​ឆន្ទានុសិទ្ធិ​របស់​តុលាការ»

ប្រតិកម្មរបស់លោក ផៃ ស៊ីផាន នេះ ឆ្លើយ​តប​ទៅ​នឹង​ការ​បញ្ជាក់​របស់​ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​នៅ​កម្ពុជា ដែល​បាន​ឲ្យ​ដឹង​ថា សំណើ​របស់​អ្នកស្រី រ៉ូណា ស្ម៊ីត ដើម្បី​សុំ​ជួប​លោក កឹម សុខា ក្នុង​អំឡុង​ទស្សនកិច្ច​របស់​អ្នកស្រី​នៅ​កម្ពុជា ត្រូវ​បាន​បដិសេធ។ អាស៊ី​សេរី​មិន​អាច​ទាក់ទង​មន្ត្រី​នាំ​ពាក្យ​ក្រសួង​យុត្តិធម៌ លោក ជិន ម៉ាលីន ដើម្បី​សុំ​ការ​ពន្យល់​បន្ថែម ជុំវិញ​ករណី​សុំ​ជួប​លោក កឹម សុខា នេះ​បាន​ទេ ដោយ​លោក​មិន​លើក​ទូរស័ព្ទ។

លោក ផៃ ស៊ីផាន មិនយល់ថា ការ​ផ្តល់​ឱកាស​ឲ្យ​អ្នក​រាយការណ៍​ពិសេស​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា ជួប​លោក កឹម សុខា នា​ពេល​នេះ ជា​ការ​បន្ធូរបន្ថយ​ស្ថានភាព​តានតឹង​ជាមួយ​សហគមន៍​អន្តរជាតិ ជា​ពិសេស​សហភាព​អឺរ៉ុប ជុំវិញ​ចំណាត់​ការ​នីតិវិធី​ដក​ហូត​ប្រព័ន្ធ​អនុគ្រោះ​ពន្ធ EBA ពី​កម្ពុជា​នោះ​ទេ។ លោក​ថា អ្នកស្រី រ៉ូណា ស្ម៊ីត មិន​មែន​ជា​អ្នក​នយោបាយ​នោះ​ទេ ហើយ​អ្នក​ស្រី​គ្រាន់​តែ​ជា​អ្នក​បច្ចេកទេស​តំណាង​អង្គការ​សហប្រជាជាតិ​តែ​ប៉ុណ្ណោះ៖ «ខ្ញុំ​មើល​អត់​ឃើញ​មាន​ស្ថានភាព​តានតឹង​ទេ។ អ្នក​ដែល​លើក​ឡើង អ្នក​ដែល​និយាយ​ហ្នឹង ប្រហែល​ជា​គាត់​ភ្លេច​ខ្លួន​គាត់​ជា​ខ្មែរ។ គាត់​ត្រូវ​តែ​គោរព​រដ្ឋធម្មនុញ្ញ​ខ្មែរ ដែល​មាន​នៅ​ក្នុង​មាត្រា ៥២ ថា រាជ​រដ្ឋាភិបាល​ក្នុង​នាម​ជា​អ្នក​ការពារ អធិបតេយ្យ ឯករាជ្យ ការពារ​បូរណភាព។ ចំណុច​ទី​ពីរ គាត់​យល់​ច្បាស់​ណាស់​ថា ការងារ​នៃ​ការ​សម្រេច​របស់​តុលាការ​ជា​ដែន​សមត្ថកិច្ច​របស់​តុលាការ​ទេ។ គ្មាន​អ្វី​ពាក់ព័ន្ធ​នឹង​រដ្ឋាភិបាល គ្មាន​អ្វី​ពាក់ព័ន្ធ​នឹង​ការ​មក​បង្ខំ​រដ្ឋាភិបាល​ឲ្យ​ធ្វើ​តាម​នេះ​តាម​នោះ​ទេ។ លោកស្រី រ៉ូណា ស្ម៊ីត មិន​មែន​ជា​អ្នក​នយោបាយ គាត់​ជា​អ្នក​បច្ចេកទេស​តំណាង​អង្គការ​សហប្រជាជាតិ​ប៉ុណ្ណោះ»

តុលាការ​របប​ក្រុង​ភ្នំពេញ បាន​ផ្ទេរ​លោក កឹម សុខា កាល​ពី​ខែ​កញ្ញា ឆ្នាំ២០១៨ ពី​ការ​ឃុំ​ខ្លួន​បណ្តោះអាសន្ន​ក្នុង​ពន្ធនាគារ​ត្រពាំង​ផ្លុង មក​ជា​ការ​ឃុំ​ខ្លួន​បណ្តោះអាសន្ន​នៅ​គេហដ្ឋាន​វិញ និង​ដាក់​ឲ្យ​លោក​ស្ថិត​ក្រោម​ការ​ត្រួត​ពិនិត្យ​តាម​ផ្លូវ​តុលាការ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល