លោករដ្ឋមន្ត្រីការបរទេស ប្រាក់ សុខុន អះអាងថា រដ្ឋាភិបាលនឹងជំរុញការងារខណ្ឌសីមា និងបោះបង្គោលព្រំដែន ៦% បន្ថែមទៀត ដែលថ្នាក់ដឹកនាំកម្ពុជា-វៀតណាម បានឯកភាពគ្នារួចហើយ ឱ្យបានសម្រេចឆាប់ៗ នាពេលខាងមុខ។ ការបញ្ជាក់របស់ប្រមុខការទូតកម្ពុជានេះ ធ្វើឡើងកាលពីថ្ងៃទី២៤ ខែមិថុនា ក្នុងឱកាសខួបលើកទី៥៥ នៃការបង្កើតទំនាក់ទំនងការទូត រវាងប្រទេសកម្ពុជា-វៀតណាម និងឆ្នាំមិត្តភាពកម្ពុជា-វៀតណាម ២០២២។
លោក ប្រាក់ សុខុន មានប្រសាសន៍ប្រាប់កាសែតក្នុងស្រុកថា ការងារខណ្ឌសីមា និងការបោះបង្គោលព្រំដែនជាមួយវៀតណាម-កម្ពុជា សម្រេចបានវឌ្ឍនភាពការងារទៅដល់ ៨៤% ហើយកំពុងតែខិតខំចរចា ដើម្បីជំរុញការងារនេះឲ្យបានចប់ជាស្ថាពរនាពេលឆាប់ៗខាងមុខ។
បច្ចុប្បន្ននេះ កម្ពុជាមានច្រកទ្វារព្រំដែនជាមួយវៀតណាមសរុបចំនួន៤៣ ក្នុងនោះមានច្រកទ្វារកំពង់ផែសមុទ្រចំនួន៤ ច្រកទ្វារព្រំដែនអន្តរជាតិចំនួន១៤ ច្រកទ្វារព្រំដែនទ្វេភាគីចំនួន១៣ និងច្រកទ្វារតំបន់ចំនួន១២។
លោកបន្តថា ចំពោះវិស័យសន្តិសុខ និងការពារជាតិ កងកម្លាំងនៃប្រទេសពីរ រួមទាំងប៉ូលិស និងយោធា បានបន្តសហការគ្នាចាត់វិធានការយ៉ាងម៉ឺងមាត់ និងដោយប្រសិទ្ធភាព ក្នុងការទប់ស្កាត់រាល់សកម្មភាពនៃបទល្មើសនិងឧក្រិដ្ឋកម្មឆ្លងដែន រួមមាន ភេរវកម្ម ការជួញដូរគ្រឿងញៀន ការជួញដូរមនុស្ស ការរត់ពន្ធទំនិញ ការកាប់ព្រៃឈើខុសច្បាប់ ជាដើម។
ពាក់ព័ន្ធនឹងវិស័យសេដ្ឋកិច្ចវិញ លោក ប្រាក់ សុខុន ឲ្យដឹងថា ទំហំពាណិជ្ជកម្មទ្វេភាគីនៃប្រទេសទាំងពីរ មានការកើនឡើងគួរឱ្យកត់សំគាល់។ ក្នុងឆ្នាំ២០២១ កំណើនពាណិជ្ជកម្មនៃប្រទេសទាំងពីរ បានកើនឡើងដល់ចំនួនទឹកប្រាក់ជិត ១០ពាន់លានដុល្លារ (៩,៥ ប៊ីលាន)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។