លោកនាយករដ្ឋមន្ត្រី ហ៊ុន ម៉ាណែត ថា កម្ពុជាកំពុងធ្វើកែទម្រង់លើវិស័យវិនិយោគ ដើម្បីទាក់ទាញអ្នករកស៊ីជាតិ និងអន្តរជាតិ។ អ្នកវិភាគថា ករណីនេះពុំអាចទៅរួចទេ ប្រសិនបើកម្ពុជាមិនដោះស្រាយបញ្ហាអំពើពុករលួយ និងការស្ដារប្រជាធិបតេយ្យឡើងវិញ។
លោកនាយករដ្ឋមន្ត្រី ហ៊ុន ម៉ាណែត រំពឹងថា ក្រោយពីកម្ពុជាធ្វើកំណែតម្រង់នីតិវិធី វិនិយោគនឹងបង្កភាពងាយស្រួលដល់បណ្ដាអ្នកវិនិយោគមួយចំនួននៅក្នុងតំបន់អាស៊ាន។ ករណីនេះ ដើម្បីឱ្យពួកគេ ងាកមកចាប់អារម្មណ៍រកស៊ីជាមួយកម្ពុជា កាន់តែច្រើនជាងមុន ជាពិសេស លើវិស័យឧស្សាហកម្មជាដើម។
ការថ្លែងបែបនេះរបស់លោក ហ៊ុន ម៉ាណែត អំឡុងពេល ដែលលោកចូលរួមពិធីបើកកិច្ចប្រជុំកំពូលធុរកិច្ចអាស៊ាន-កម្ពុជារាជធានីភ្នំពេញ នៅថ្ងៃទី២ ខែមេសា។ លោក ហ៊ុន ម៉ាណែត និយាយជាភាសាអង់គ្លេស និងមានអ្នកបកប្រែថា បច្ចុប្បន្នកម្ពុជា កំពុងបង្កើតបរិយាកាសងាយស្រួលដល់អ្នករកស៊ី ផ្នែកវិស័យឧស្សាហកម្ម ដូចជា ការផលិតគ្រឿងបន្លាស់ផ្សេងៗ ក្នុងការនាំចេញទៅទីផ្សារជុំវិញតំបន់អាស៊ាន។
លោក ហ៊ុន ម៉ាណែត៖«រដ្ឋាភិបាលកម្ពុជាបាន និងកំពុងជំរុញយុទ្ធសាស្ត្រប្រទេសបូក តាមរយៈការ ទាក់ទាញអ្នកវិនិយោគក្នុងវិស័យឧស្សាហកម្ម ដែលប្រើបច្ចេកវិទ្យាមធ្យម ឱ្យមកសាងសង់រោងចក្រនៅកម្ពុជា ដើម្បីផ្គត់ផ្គង់គ្រឿងបន្លាស់ ទៅឱ្យរោងចក្រធំៗ នៅប្រទេសខាងក្នុងអាស៊ាន»។
អ្នកឃ្លាំមើលស្ថានការណ៍សង្គម និងនយោបាយ សង្កេតឃើញថា បើទោះបីរដ្ឋាភិបាលខំអំពាវនាវ និងប្ដេជ្ញាចិត្ត ស្វែងរកអ្នកមករកស៊ី នៅកម្ពុជាជាហូរហែក្ដី ប៉ុន្តែ នៅមិនទាន់មានប្រសិទ្ធភាពនៅឡើយទេ។ ជាក់ស្ដែង កម្ពុជាមានឈ្មោះមិនល្អ ពាក់ព័ន្ធអំពើពុករលួយ អសន្តិសុខសង្គម និងការឆបោក ដែលជាបញ្ហាចម្បងធ្វើឱ្យបាត់បង់អ្នកវិនិយោគមកពីខាងក្រៅ។
អ្នកស្រាវជ្រាវការអភិវឌ្ឍន៍ បណ្ឌិត មាស នី ប្រាប់វិទ្យុអាស៊ីសេរីនៅថ្ងៃទី២ ខែមេសា ថា ការធ្វើកំណែទម្រង់ វិស័យវិនិយោគ របស់រដ្ឋាភិបាល ដើម្បីទាក់ទាញក្រុមអ្នកអ្នកវិនិយោគ នៅតំបន់អាស៊ាន ឱ្យមកវិនិយោគ នៅកម្ពុជានេះ គឺជារឿងល្អ ក៏ប៉ុន្តែ កម្ពុជាពិបាក ដោយសារតែកម្ពុជាមានឈ្មោះមិនល្អ ពាក់ព័ន្ធបញ្ហាជួញដូរមនុស្ស និងការធ្លាក់ចុះ ប្រព័ន្ធប្រជាធិបតេយ្យ។ ដូច្នេះ លោកថា កម្ពុជាត្រូវតែបោសសម្អាតក្រុមឧក្រិដ្ឋជន និងស្ដារប្រជាធិបតេយ្យឡើងវិញ ជាមុនសិន។
បណ្ឌិត មាស នី៖«ទាក់ទងការអនុវត្តច្បាប់អំពើពុករលួយ ហើយដូចយើងឃើញហើយសព្វថ្ងៃនេះ មានបង្កើនឡើងជម្រកឧក្រិដ្ឋជនរកស៊ីឆ្លងដែនផ្សេងៗ។ ដូចជាថ្មីនេះ រឿងជនជាតិឥណ្ឌា និងចិន វាសុទ្ធតែជារឿង ដែលរដ្ឋាភិបាលកម្ពុជា តែកែតម្រូវ និងដោះស្រាយ ជាជាងដែលបដិសេធរបាយការណ៍របស់គេ ហើយមិនព្រម ការកែតម្រូវខ្លួនឯង»។
របាយការណ៍ចុងក្រោយរបស់ក្រសួងការបរទេសអាមេរិក កាលពីឆ្នាំ២០២៣ ឱ្យដឹងថា កម្ពុជាស្ថិតក្នុងចំណោមប្រទេសចំនួន២៤ ដែលជាប់ចំណាត់ថ្នាក់កម្រិតទី៣ ពាក់ព័ន្ធនឹងការជួញដូរមនុស្ស។ កម្រិតទី៣ នេះ គឺជាចំណាត់ថ្នាក់ដ៏អាក្រក់បំផុត ដែលកំណត់ដោយក្រសួងការបរទេសអាមេរិក។
ជាក់ស្ដែង កាលពីពេលថ្មីៗ នេះ ក្រសួងការបរទេសឥណ្ឌារកឃើញជនជាតិរបស់ខ្លួនជាង ៥ពាន់នាក់ ដែលត្រូវបានឃុំខ្លួន និងបង្ខំឱ្យធ្វើការឆបោកតាមអ៊ិនធឹណិត (Cyberscam)នៅប្រទេសកម្ពុជា។
ចំណែកអង្គការសហប្រជាជាតិ (UN) កាលពីខែសីហា ឆ្នាំ២០២៣ បង្ហាញថា នៅកម្ពុជា មានមនុស្សយ៉ាងហោច ១០ម៉ឺននាក់ កំពុងរងគ្រោះដោយធ្វើការជាអ្នកបោកប្រាស់តាមអ៊ិនធឹណិត ដែលជនរងគ្រោះប្រឈមមុខនឹងការរំលោភបំពាន គំរាមកំហែង ទទួលរងការធ្វើទារុណកម្ម អំពើហិង្សាផ្លូវភេទ និងការរំលោភសិទ្ធិមនុស្សផ្សេងៗ ទៀត។
អ្នកឃ្លាំមើលបញ្ហាសង្គម និងនយោបាយ លើកឡើងថាកម្ពុជាមានរឿងច្រើន ដែលត្រូវដោះស្រាយ ដើម្បីទាក់ទាញអ្នកវិនិយោគជាតិ និងអន្តរជាតិ ជាពិសេស បញ្ហាសិទ្ធិមនុស្សប្រជាធិបតេយ្យ និងការជួញដូរមនុស្សឆ្លងដែនជាដើម។
អ្នកឃ្លាំមើលថា ប្រសិនបើកម្ពុជាអាចដោះស្រាយបញ្ហាទាំងនេះបាន គឺកម្ពុជានឹងមានសេដ្ឋកិច្ចល្អប្រសើរ ព្រោះអាចទាក់ទាញអ្នកវិនិយោគពីបណ្ដាប្រទេសជាតិខាង ដោយពុំចាំបាច់ធ្វើកំណែទម្រង់ វិស័យវិនិយោគអ្វីច្រើននោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។