លោកនាយករដ្ឋមន្ត្រី ហ៊ុន សែន ចោទការផ្សាយព័ត៌មានរបស់វិទ្យុវីអូឌី (VOD) ដែលថា លោក ហ៊ុន ម៉ាណែត ចុះហត្ថលេខាជំនួសលោកដើម្បីផ្ដល់ជំនួយដល់ប្រទេសតួកគី (Turkey) នោះ គឺជាកំហុសដ៏ធ្ងន់ធ្ងរ និងមិនអាចលើកលែងបាន។ សង្គមស៊ីវិលថា ការផ្សាយព័ត៌មានរបស់ វីអូឌី គឺធ្វើឡើងទៅតាមវិជ្ជាជីវៈសារព័ត៌មាន និងមិនមែនជាកំហុសធ្ងន់ធ្ងរឡើយ ហើយព័ត៌មាននោះ គឺបានស្រង់សម្ដីលោក ផៃ ស៊ីផាន ទៀតផង។
លោកនាយករដ្ឋមន្ត្រី ហ៊ុន សែន អះអាងថា ការផ្សាយព័ត៌មានរបស់វិទ្យុ វីអូឌី អំពីកូនប្រុសច្បងរបស់លោក គឺលោក ហ៊ុន ម៉ាណែត ចុះហត្ថលេខាជំនួសលោកដើម្បីផ្ដល់ជំនួយដល់ប្រទេសតួកគី (Turkey)នោះ គឺជាការវាយប្រហារ មិនអាចលើកលែងបាន ដោយបានប្រមាថ និងបង្កើតការមិនជឿទុកចិត្តគ្នានៅក្នុងជួររដ្ឋាភិបាល។
ថ្លែងក្នុងពិធីប្រគល់សញ្ញាប័ត្រដល់និស្សិតសាកលវិទ្យាល័យធនធានមនុស្ស ជិត២ពាន់នាក់ នៅថ្ងៃទី២០ ខែកុម្ភៈ លោក ហ៊ុន សែន លើកឡើងថា ច្បាប់ថវិកាជាតិនៅកម្ពុជា អនុញ្ញាតឱ្យតែនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុប៉ុណ្ណោះ ដែលអាចចុះហត្ថលេខាលើការចាយវាយថវិកាបែបនេះបាន។ លោកបញ្ជាក់ថា ព្រះមហាក្សត្រទ្រង់មិនលូកព្រះហស្តទេ ហើយសូម្បីតែប្រធានរដ្ឋសភា និងប្រធានព្រឹទ្ធសភា ក៏មានសិទ្ធិត្រឹមលើកសំណើប៉ុណ្ណោះ។
លោក ហ៊ុន សែន អះអាងទៀតថា ការចុះផ្សាយរបស់ វិទ្យុវីអូឌី រឿងលោក ហ៊ុន ម៉ាណែត ចុះហត្ថលេខាជំនួសលោក ផ្ដល់ជំនួយឱ្យតួកគី (Turkey) បានក្លាយទៅជាប្រធានបទដែលគេជជែកគ្នា ស្របពេលដែលលោក ហ៊ុន ម៉ាណែត មិនបានធ្វើ និងមិនបានដឹងអ្វីទាំងអស់។ លោក ហ៊ុន សែន បានប្រកាសដោយច្បាស់ៗថា រដ្ឋាភិបាលរបស់លោក នឹងមិនអនុញ្ញាតឱ្យ សារព័ត៌មានវីអូឌី មានជីវិតវិញឡើយ ទោះក្នុងតម្លៃណាក៏ដោយ៖
«រឿងនេះជាការវាយប្រហារ ដែលមិនមែនជាបញ្ហា ហ៊ុន ម៉ាណែត ដោយឡែកទេ តែជាការប្រមាថចំពោះរាជរដ្ឋាភិបាល និងបង្កើតការមិនជឿទុកចិត្តគ្នាក្នុងរដ្ឋាភិបាល ហើយខុសនឹងច្បាប់ថវិកាយ៉ាងធ្ងន់ធ្ងរដែលយើងមិនអាចអត់ឱនឱ្យបានទេ។ តើខ្ញុំក្នុងនាមម្ខាងជានាយករដ្ឋមន្ត្រី ម្ខាងជាឪពុក តើឱ្យទទួលការប្រមាថបែបនេះទេ?»។
ទោះជាយ៉ាងណា ការអះអាងរបស់លោក ហ៊ុន សែន បែបនេះ ត្រូវបានអ្នកឃ្លាំមើលស្ថានការណ៍សង្គមយល់ឃើញថា ខុសពីបុព្វហេតុខាងដើម ដែលដំបូងឡើយលោក ហ៊ុន សែន ចង់បានត្រឹមតែឱ្យ សារព័ត៌មានឯករាជ្យវីអូឌី សុំទោសតែប៉ុណ្ណោះ ហើយករណីនេះបញ្ជាក់ថា វិទ្យុ វីអូឌី មិនបានប្រព្រឹត្តកំហុសធ្ងន់ធ្ងរអ្វីឡើយ។ ពួកគេយល់ថា ដោយសារការលុបអាជ្ញាបណ្ណ វិទ្យុវីអូឌី មិនមានហេតុផលសមរម្យ ដែលធ្វើឱ្យលោក ហ៊ុន សែន ទទួលរងការរិះគន់ធ្ងន់ធ្ងរពីប្រជាពលរដ្ឋ សហគមន៍អន្តរជាតិ និងអង្គការសង្គមស៊ីវិល ទើបបានជាលោកចោទប្រកាន់លើស្ថាប័នមួយនេះ។
អ្នកស្រាវជ្រាវពីការអភិវឌ្ឍសង្គម លោក មាស នី មើលឃើញថា ការផ្សាយព័ត៌មានរបស់វិទ្យុវីអូឌី មិនមែនជាកំហុសធ្ងន់ធ្ងរ និងប៉ះពាល់ដល់ផលប្រយោជន៍របស់រដ្ឋាភិបាល រហូតដល់ថ្នាក់បែកបាក់ផ្ទៃក្នុងនោះឡើយ។ លោកយល់ឃើញថា ការលុបអាជ្ញាប័ណ្ណសារព័ត៌មានវីអូឌី គឺជាការដាក់ទណ្ឌកម្មដែលលើសពីទម្ងន់ទោស និងកំហុសជាក់ស្ដែង៖
«និយាយរឿងដែលធ្វើឱ្យបែកបាក់ក្នុងគណបក្សអីហ្នឹង ខ្ញុំគិតថាមិនមែនជាចេតនារបស់ វីអូឌី ដែលមានឥទ្ធិពលអី ទៅដល់ថ្នាក់បំបែកបំបាក់ផ្ទៃក្នុងទេ។ ប៉ុន្តែយើងអត់ដឹង ថាតើមានរឿងអ្វីនៅខាងក្នុង បានជារដ្ឋាភិបាលគាត់លើកឡើងថា វាជាកំហុសធ្ងន់ធ្ងរ។ អ៊ីចឹងការមើលឃើញពីជ្រុងម្ខាងម្នាក់លើបញ្ហានេះ យើងឃើញថាមើលខុសគ្នាឆ្ងាយ»។
ក្រសួងព័ត៌មានបានប្រកាសលុបចោលអាជ្ញាបណ្ណរបស់សារព័ត៌មាន វីអូឌី ដែលជាផ្នែកមួយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យហៅកាត់ថា (CCIM) នៅថ្ងៃទី១៣ ខែកុម្ភៈ តាមបញ្ជាដ៏តក់ក្រហល់របស់លោក ហ៊ុន សែន ដោយប្រើពេលមិនដល់ ២៤ម៉ោង ដោយលោក ហ៊ុន សែន ចោទប្រកាន់ថា បានរំលោភលើវិជ្ជាជីវៈសារព័ត៌មាន និងធ្វើឱ្យប៉ះពាល់ដល់កិត្តិយសរដ្ឋាភិបាល និងកូនប្រុសរបស់លោក បន្ទាប់ពីចុះផ្សាយព័ត៌មានទាក់ទងនឹង លោក ហ៊ុន ម៉ាណែត ផ្ដល់ជំនួយឱ្យតួគី ជំនួសលោក ហ៊ុន សែន ដែលជាឪពុក។
លោក ហ៊ុន សែន បានផ្ដល់ឱកាសឱ្យ វិទ្យុវីអូឌី សុំទោស តែការសុំទោសជាច្រើនលើករបស់ វីអូឌី នេះ ហាក់មិនត្រូវចិត្ត និងសមតាមបំណងរបស់ លោក ហ៊ុន សែន ឡើយ ទើបបណ្ដាលឱ្យលោកខឹងសម្បា រហូតដល់ថ្នាក់លុបអាជ្ញាប័ណ្ណសារព័ត៌មានវីអូឌី ទាំងកណ្ដាលយប់ដូច្នេះ។ ការលុបអាជ្ញាប័ណ្ណ វីអូឌី ដោយតក់ក្រហល់នេះ បានបង្កើតភាពចម្រូងចម្រាសនៃមតិអ្នកគាំទ្រការសម្រេចរបស់រដ្ឋាភិបាល ដោយក្រុមមន្ត្រី ឧកញ៉ា ហែហមលោក ហ៊ុន សែន និងមតិមិនគាំទ្រយ៉ាងដូច្នេះ របស់ប្រជាពលរដ្ឋ មន្ត្រីសង្គមស៊ីវិល និងអន្តរជាតិ។
ជុំវិញរឿងនេះ អ្នកនាំពាក្យសមាគមអាដហុក លោក សឹង សែនករុណា យល់ឃើញថា រដ្ឋាភិបាលគួរតែស្ដាប់ការបកស្រាយពីភាគី វីអូឌី ឱ្យច្បាស់លាស់ជាមុនសិន ដើម្បីស្វែងរកដំណោះស្រាយ និងកែប្រែខ្លឹមសារការផ្សាយ ជាជាងលុបអាជ្ញាប័ណ្ណទាំងយប់ ហើយបកស្រាយនៅពេលក្រោយ៖
«យើងមិនចង់ឃើញឱ្យមានការលុបបំបាត់សំឡេងណាមួយនោះទេ។ ហើយយើងគួរតែមានការបើកឱ្យទូលំទូលាយពីសេរីភាពសារព័ត៌មាននេះ។ ពីព្រោះសេរីភាពសារព័ត៌មានជាអំណាចទី៤ នៅក្នុងសង្គមប្រជាធិបតេយ្យ»។
ការលុបអាជ្ញាបណ្ណវិទ្យុ វីអូឌី ក្រោមហេតុផលមិនសមរម្យរបស់លោកនាយករដ្ឋមន្ត្រី ហ៊ុន សែន បានធ្វើឱ្យកក្រើកពិភពលោក ដោយរងការរិះគន់និងថ្កោលទោស ពីសំណាក់ប្រជាពលរដ្ឋ ក្រុមប្រទេសប្រកាន់របបប្រជាធិបតេយ្យ អង្គការសង្គមស៊ីវិល សហគមន៍ជាតិ និងអន្តរជាតិ ថាប្រើអំណាចរឹតត្បិតសេរីភាពសារព័ត៌មាន ប្រាសចាកពីគោលការណ៍ច្បាប់។ អ្នកតាមដានសង្គម មើលឃើញថា រដ្ឋាភិបាលលោក ហ៊ុន សែន កំពុងព្យាយាមលាងជម្រះខ្លួនឱ្យស្អាតតាមរយៈហេតុផលផ្សេងៗ ក្រោយដិតដាមស្នាមប្រឡាក់ជាមួយនឹងអំពើពុករលួយ ការបំផ្លាញប្រជាធិបតេយ្យ និងនីតិរដ្ឋ ការរំលោភសិទ្ធមនុស្ស និងរំលាយប្រព័ន្ធផ្សព្វផ្សាយឯករាជដែលផ្សាយធ្វើឱ្យប៉ះពាល់ប្រយោជន៍របស់បក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។