លោក ​ហ៊ុន សែន​ បន្ត​ព្រមាន​រឹបអូស​ទ្រព្យសម្បត្តិ​មន្ត្រី​គណបក្ស​ភ្លើងទៀន​ណា​ដែល​ហ៊ាន​រិះគន់​រដ្ឋាភិបាល

ដោយ មាន ឫទ្ធិ
2023.01.09
លោក ​ហ៊ុន សែន​ បន្ត​ព្រមាន​រឹបអូស​ទ្រព្យសម្បត្តិ​មន្ត្រី​គណបក្ស​ភ្លើងទៀន​ណា​ដែល​ហ៊ាន​រិះគន់​រដ្ឋាភិបាល លោក ហ៊ុន សែន ថ្លែងសុន្ទរកថា បើកការដ្ឋានសាងសង់ពង្រីក និងលើកគុណភាព កំណាត់ផ្លូវជាតិលេខ៧ ពីស្គន់​ទៅក្រុងកំពង់ចាម នៅព្រឹកថ្ងៃទី៩ ខែមករា ឆ្នាំ២០២៣។
រូប៖ ហ្វេសប៊ុក SPM

លោក​នាយករដ្ឋមន្ត្រី​ ហ៊ុន សែន ​នៅតែ​បន្ត​គំរាម​គណបក្ស​ភ្លើងទៀន​ដោយ​ប្រើ​ប្រព័ន្ធ​តុលាការ​និង​ឈាន​ទៅ​រក​ការ​ប្រើ​ហិង្សា ​បន្ទាប់ពី​លោក​ចោទ​ប្រកាន់​លើ​មន្ត្រី​បក្ស​ប្រឆាំង​មួយ​នេះ​ថា ​បាន​និយាយ​វាយ​ប្រហារ​ទៅលើ​គណបក្សប្រជាជន​កម្ពុជា។ អ្នកតា​ម​ដាន​សង្គម ​ថា​ការ​គំរាមកំហែង​បែប​នេះ​នឹង​ជះ​ឥទ្ធិពល​ធ្វើ​ឱ្យ​បរិយាកាស​នយោបាយ​កាន់តែ​អាក្រក់​សម្រាប់​ការបោះឆ្នោត​ក្នុង​ពេល​ខាងមុខ ​ខណៈ​មន្ត្រី​បក្ស​ប្រឆាំង​ថា​លោក ​ហ៊ុន សែន ​កំពុង​ទាល់ច្រក។

ក្នុង​ពិធីសម្ពោធ​បើក​ការដ្ឋាន​សាងសង់​ពង្រីក ​និង​លើក​កម្រិត​គុណភាព​កំណាត់ផ្លូវ​ជាតិ​លេខ៧ ​ក្នុង​ខេត្ត​កំពង់ចាម ​នៅ​ថ្ងៃទី៩ ​ខែមករា ​លោក ​ហ៊ុន សែន ​បាន​ប្រកាស​ពី​ការព្រមាន​ប្ដឹង​រឹបអូស​ផ្ទះ​មន្ត្រី​គណបក្ស​ភ្លើង​ទៀន​ណា ​ដែល​និយាយ​វាយប្រហារ​ថា​គណបក្ស​កាន់អំណាច​ជា​ចោរលួច​បន្លំ​សន្លឹកឆ្នោត។ នៅ​ក្នុង​សុន្ទរកថា​នោះ ​លោក ​ហ៊ុន សែន ​បាន​គំរាម ​និង​ចោទប្រកាន់​ដោយ​ចំ​ឈ្មោះ ​លើ​ទីប្រឹក្សា​គណបក្ស​ភ្លើង​ទៀន​លោក ​គង់ គាំ ​ថា ​ចោទប្រកាន់​បក្ស​កាន់អំណាច​ជា​ចោរលួច​សំឡេង​ឆ្នោត។ ទន្ទឹមគ្នា​នេះ ​លោក ​ហ៊ុន សែន ​បាន​គំរាមកំហែង​រឹបអូស​ផ្ទះ​របស់​លោក ​គង់ គាំ ​និង​ចាត់​ឱ្យ​ក្រុម​មេធាវី​របស់​លោក​ពិនិត្យ​ភស្តុតាង​សំឡេង​ដើម្បី​ប្ដឹង​លោក៖

«ហើយ​អ្នក​គិត​ថា​អ្វី (ក៏អាង​តុលាការ ​ខ្ញុំ​ចង់​សួរ​អ្នក​ទៅវិញ​ថា ​ជម្រើស​មានតែ​ពីរ​ទេ ​មួយ​គឺ​ប្រើ​ផ្លូវច្បាប់ ​មួយទៀត​គឺ​ប្រើ​ដំបង​ហ្មង ​តើ​អ្នក​យក​មួយ​ណា​ពីរ​ហ្នឹង? ​អា​ហ្នឹង​អ្នក​និយាយ​ឱ្យ​ច្បាស់។ ខ្ញុំ​សុំ​ព្រមាន​ចំពោះ​អ្នក! ​ពួក​ខ្ញុំ​នេះ​មិន​ទុក​ឱ្យ​ពួក​អ្នកចោទ​ថា​ចោរ​មួយ​ជីវិត​ទេ ​ខ្ញុំ​សូម​ជម្រាប​ជូន។ ត្រូវតែ​បញ្ចប់​វប្បធម៌​ឡាំប៉ា​ក្រោយ​ការបោះឆ្នោត។ គណបក្សប្រជាជន​មិន​អាច​ទទួលយក​បាន​នូវ​ពាក្យ​ថា​ជា​ចោរលួច​បន្លំ​សន្លឹកឆ្នោត​ទេ។ អ្នកណា​ហ៊ាន​និយាយ​បែប​នេះ​យើង​ត្រូវតែ​ប្ដឹង»

អតីត​តំណាងរាស្ត្រ​គណបក្ស​សង្គ្រោះ​ជាតិ ​លោក អ៊ុំ សំអាន ​ប្រាប់​វិទ្យុ​អាស៊ី​សេរី​នៅ​ថ្ងៃទី៩ ​មករា ​ថា ​ការប្រើប្រាស់​ប្រព័ន្ធ​ច្បាប់​ដើម្បី​គំរាម​បក្ស​ប្រឆាំង​នេះ ​គឺជា​យុទ្ធសាស្ត្រ​ទាល់ច្រក​របស់​លោក ​ហ៊ុន សែន ​ក្នុងពេលដែល ​បក្ស​ភ្លើងទៀន​កាន់តែ​មាន​ប្រជាប្រិយភាព ​ដែល​ធ្វើ​ឱ្យ​រង្គោះរង្គើ​ដល់​អាសនៈ​បក្ស​ទេវតា​របស់​លោក ​ហ៊ុន សែន ​នៅ​ពេល​បោះឆ្នោត​ថ្នាក់​ជាតិ ​ខែ​កក្កដា ​ខាងមុខ។ លោក​បន្ត​ថា ​យុទ្ធសាស្ត្រ​ប្រើ​ច្បាប់ ​ដើម្បី​រឹបអូស ​អចល​ន​ទ្រព្យ​បក្ស​ប្រឆាំង ​របស់​លោក ​ហ៊ុន សែន ​នេះ ​នឹង​ធ្វើ​ឱ្យ​បក្ស​កាន់អំណាច​ខាតបង់​ទាំង​កេរ្តិ៍ឈ្មោះ ​និង​ការ​គាំទ្រ ​ដោយសារ​សហគមន៍​អន្តរជាតិ ​និង​ប្រជាពលរដ្ឋ ​មើល​ឃើញ​កាន់តែ​ច្បាស់ ​ពី​ភាព​កំសាក​របស់​បក្ស​កាន់អំណាច ​ដែល​យក​ប្រព័ន្ធ​ច្បាប់​មក​គាបសង្កត់ ​និង​គំរាម​ដៃគូ​ប្រកួតប្រជែង៖

«ច្បាប់​មិនបាន​អនុវត្ត​ឱ្យ​ស្មើភាព​គ្នា​នោះ​ទេ ​ទោះបីជា​លោក ​ហ៊ុន សែន ​គាត់​ធ្វើ​ខុសច្បាប់​ក៏ដោយ។ ទោះបី​លោក ​ហ៊ុន សែន ​ឃោសនា​មុន​ការបោះឆ្នោត​ក៏ដោយ ​ក៏​គណៈកម្មការ​រៀបចំ​ការបោះឆ្នោត ​ហ៊ាន​ចាត់វិធានការ​អ្វី​ដែរ?​គាត់​(ហ៊ុន សែន)​ឈាន​ទៅដល់​មេដឹកនាំ​ដែល​ផ្ដាច់ការ ​ដែល​យក​ច្បាប់​ទ្រាប់​អង្គុយ ​យក​ប្រព័ន្ធ​តុលាការ​ជា​ឧបករណ៍ ​ដើម្បី​ធ្វើទុក្ខបុកម្នេញ​លើ​បក្ស​ប្រឆាំង។ ព្រោះ​គាត់ ​(លោក ​ហ៊ុន សែន)​ ខ្លាច​ចាញ់​ការបោះឆ្នោត ​តាមរយៈ​ការ​បោះឆ្នោត​សេរី ​និង​យុត្តិធម៌។ ហើយ​គាត់ ​(លោក ​ហ៊ុន សែន)​ខ្លាច ​គាត់​មិនបាន​ផ្ទេរ​អំណាច​ដោយ​ជោគជ័យ​ពី​គាត់ ​ទៅដល់​កូន​របស់​គាត់ ​គឺ​លោក ​ហ៊ុន ម៉ាណែត»

ក្រុម​អ្នកឃ្លាំមើល​សង្គម ​និង​នយោបាយ​កម្ពុជា ​មើល​ឃើញ​ថា ​នៅ​ពេល​ដែល​ឥទ្ធិពល​គណបក្ស​ប្រឆាំង​កាន់តែ​រីកធំឡើង​នោះ ​គណបក្ស​កាន់អំណាច​តែងតែ​ប្រើប្រាស់​ច្បាប់​ធ្វើជា​អាវុធ ​ដើម្បី​បង្ក្រាប​អ្នករិះគន់ ​ដោយ​រឹបអូស​អចលនទ្រព្យ​របស់​ពួកគេ។ ជាក់ស្ដែង​កាលពី​ចុង​ឆ្នាំ២០១៧ ​បន្ទាប់ពី​តុលាការ​កំពូល​ដែល​ស្ថិត​ក្រោម​ឥទ្ធិពល​របស់​លោក ​ហ៊ុន សែន ​បាន​រំលាយ​គណបក្ស​សង្គ្រោះ​ជាតិ​ហើយ ​តុលាការ​បាន​សម្រេច​ដាក់​លក់​ឡៃឡុង​ទីស្នាក់ការ​កណ្ដាល​គណបក្ស​មួយ​នេះ ​ដើម្បី​យក​លុយ​សង​ជំងឺចិត្ត​លោក ​ហ៊ុន សែន ​និង​មន្ត្រី​គ្រាក់ៗ​របស់​បក្ស​កាន់អំណាច។ ករណី​មួយទៀត ​គឺ​គណបក្សប្រជាជន​កម្ពុជា​របស់​លោក ​ហ៊ុន សែន ​និង​គណៈកម្មាធិការ​ជាតិ​រៀបចំ​ការបោះឆ្នោត​ (គជប) ​បាន​ប្ដឹង​អនុប្រធាន​គណបក្ស​ភ្លើងទៀន ​លោក​ សុន ឆ័យ ​កាលពី ​ខែ​មិថុនា ​ឆ្នាំ២០២២ ​ពី​បទ​បរិហារ​កេរ្តិ៍​ជា​សាធារណៈ ​និង​ទាមទារ​សំណង​ជំងឺចិត្ត​ប្រមាណ ​១លាន​ដុល្លារ។

ជុំវិញ​រឿង​នេះ ​កូនប្រុស​របស់ ​លោក ​គង់ គាំ ​និង​ជា​មន្ត្រី​ជាន់ខ្ពស់​គណបក្ស​ភ្លើងទៀន ​គឺ​លោក ​គង់ មុនីកា ​យល់ឃើញ​ថា ​ការ​លើកឡើង​របស់​លោក ​ហ៊ុន សែន ​គឺជា​សារ​គំរាម ​ដើម្បី​បំបាក់​ស្មារតី​របស់​សមាជិក​បក្ស​ប្រឆាំង ​ដែល​លើក​យក​ភាព​មិន​ប្រក្រតី​នៅ​ក្នុង​បរិបទ​នយោបាយ​បច្ចុប្បន្ន​មក​ពិភាក្សា៖

«ហើយ​ការប្រើប្រាស់​មធ្យោបាយ ​យុទ្ធសាស្ត្រ​ថា​នឹង​គំរាម ​ជំរិត ​យក​នូវ​ទ្រព្យសម្បត្តិ ​អចលនទ្រព្យ​របស់​អ្នក​ទាំងអស់​នោះ​អី ​ដើម្បី​ធ្វើ​ឱ្យ​ពួកគេ​រាងចាល ​លែង​ហ៊ាន​ទិតៀន​រដ្ឋាភិបាល ​ឬ​គណបក្ស​កាន់អំណាច​នោះ ​គឺជា​យុទ្ធសាស្ត្រ​មួយ​កខ្វក់​សម្រាប់​ខ្ញុំ​ដែល​ជា​អ្នកនយោបាយ​បន្តវេន។ ខ្ញុំ​ចង់​ឃើញ​អ្នកនយោបាយ​ចាស់​វស្សា​នៅ​កម្ពុជា ​ធ្វើជា​គំរូ​ដល់​អ្នកនយោបាយ​ស្រករក្រោយ ​ហើយ​អ្នកនយោបាយ​ស្រករក្រោយ​ហ្នឹង ​អាច​ប្រកួតប្រជែង​គ្នា​ដោយ​ស្មើមុខ​ស្មើ​មាត់ ​ហើយ​មាន​ប្រព័ន្ធ​បោះឆ្នោត​មួយ​ដែល​សេរី ​ហើយនិង​យុត្តិធម៌»

ទាក់ទិន​រឿង​នេះ ​អ្នកស្រាវជ្រាវ​អំពី​ការ​អភិវឌ្ឍ​សង្គម ​បណ្ឌិត ​មាស នី ​មានប្រសាសន៍ថា ​វប្បធម៌​នៃ​ការ​គំរាមកំហែង ​និង​ការរិះគន់​គ្នា ​គឺជា​រឿង​ដែល​ពិបាក​កែប្រែ ​ឬ​លុបបំបាត់​ក្នុង​ការ​ធ្វើនយោបាយ​នៅ​កម្ពុជា។ លោក​មើល​ឃើញ​ថា ​សកម្មភាព​បែប​នេះ​នឹង​នៅតែ​កើតឡើង ​ហើយ​មាន​កម្ដៅ​កាន់តែ​ខ្លាំង​ជាង​មុន​រហូតដល់​ថ្ងៃ​បោះឆ្នោត​ថ្នាក់​ជាតិ​២០២៣ ​នៅ​ខែ​កក្កដា ​ខាងមុខ ​ពិសេស​ទៅលើ​គណបក្ស​ភ្លើងទៀន ​ដែល​ជា​គណបក្សប្រឆាំង​មាន​ប្រជាប្រិយភាព៖

«គណបក្ស​កាន់អំណាច​គួរតែ​ពិនិត្យមើល​ឡើងវិញ​ដែរ ​ថា​លទ្ធផល​ដែល​កើត​ចេញពី​ការ​គំរាម​បែប​ហ្នឹង ​តើ​អាច​ទទួល​បាន​ប្រជាប្រិយភាព​ពី​មហាជន​បាន​ដែរ​ឬ​អត់? ជួនកាល​វា​មិនមែន​បានន័យ​ថា​ការ​បង្ក្រាប ​ការ​គំរាម​បែប​នេះ​វា​ទទួល​បានផល​ចំណេញ​នោះ​ទេ។ ជួនកាល​គំរាម​កាន់តែ​ញឹក ​វា​ធ្វើ​ឱ្យ​ការ​ខាតបង់​ប្រជាប្រិយភាព​កាន់តែ​ច្រើន ​ហើយ​ការ​ព្រួយបារម្ភ​របស់​គណបក្ស​កាន់អំណាច​ក៏​មាន​កាន់តែ​ធ្ងន់ធ្ងរ​នៅ​ពេល​ខាងមុខ»

កាលពី​ថ្ងៃទី២២ ​ខែ​ធ្នូ ​ឆ្នាំ២០២២ ​លោក ​ហ៊ុន សែន ​បាន​ប្រកាស​ថា​ ចាប់ពី​ពេលនេះ​តទៅ​លោក​នឹង​ប្ដឹង​រាល់​អ្នក​ទាំងឡាយ​ណា​ដែល​និយាយ​ថា​គណបក្សប្រជាជន​កម្ពុជា​ជា​ចោរលួច​សន្លឹកឆ្នោត ​រាល់​ពេល​បោះឆ្នោត​ម្ដងៗ។

អ្នកតា​ម​ដាន​នយោបាយ ​និង​អង្គការសង្គម​ស៊ីវិល ​ចាត់​ទុក​យុទ្ធសាស្ត្រ​ប្ដឹង​រឹបអូស​អចលនទ្រព្យ​របស់​លោក ​ហ៊ុន សែន ​លើ​មន្ត្រី​គណបក្សប្រឆាំង​ថា ​ជា​អំពើ​ចោរកម្ម​ខុសច្បាប់ ​ដែល​ផ្ទុយពី​មាត្រា៣០៥ ​នៃ​ក្រមព្រហ្មទណ្ឌ ​ពាក់ព័ន្ធ​នឹង​ការ​ផាក​ពិន័យ​បទ​បរិហារកេរ្តិ៍ ​ដែល​មាន​ចំនួន​ទឹកប្រាក់​ត្រឹម ​១០០.០០០ ​(មួយសែន) ​រៀល ​ទៅ​១០.០០០០ ​(ដប់លាន) ​រៀល ​ឬ​ស្មើ​ប្រមាណ​២៥ ​(ម្ភៃប្រាំ) ​ទៅ ​២.៥០០​ (ពីរពាន់ប្រាំរយ)​ ដុល្លារ ​សម្រាប់​បទល្មើស​បរិហារកេរ្តិ៍​ជា​សាធារណៈ ​ប៉ុន្តែ​មិនបាន​បញ្ញត្តិ​បង្គាប់​ឱ្យ​សង​សំណង​ជំងឺចិត្ត​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។