មេដឹកនាំរបបក្រុងភ្នំពេញ លោក ហ៊ុន សែន ប្រកាសថា លោកមិនឲ្យប្រទេសចិនត្រួតត្រាកម្ពុជានោះឡើយ។ ប៉ុន្តែអ្នកឃ្លាំមើលសង្គមថា ប្រទេសចិនកំពុងពង្រីកឥទ្ធិពលនៅកម្ពុជា តាមរយៈលុយជំនួយ និងកម្ចី។
មេដឹកនាំឯកបក្ស លោក ហ៊ុន សែន អះអាងថា លោកស្គាល់នយោបាយរបស់ចិនច្បាស់ ថាប្រទេសមហាអំណាចមួយនេះមិនចង់ត្រួតត្រាប្រទេសណាមួយនោះឡើយ។ ផ្ទុយទៅវិញ ប្រទេសនេះក៏មិនចង់ឃើញប្រទេសណាមួយលូកដៃចូលកិច្ចការផ្ទៃក្នុងរបស់ខ្លួននោះដែរ ជាពិសេសជុំវិញរឿងកោះតៃវ៉ាន់ និងដែនដីស្វយ័តមួយចំនួនទៀត។ លោកថ្លែងថា កម្ពុជាគោរពយ៉ាងខ្ជាប់ខ្ជួនចំពោះគោលនយោបាយចិនតែមួយ និងថាការគោរពអធិបតេយ្យភាពរបស់ចិននេះ មានន័យស្មើនឹងការគោរពអធិបតេយ្យភាពរបស់កម្ពុជាយ៉ាងដូច្នេះដែរ៖ «បញ្ជាក់ចំពោះមុខឯកអគ្គរដ្ឋទូតចិន ក៏ដូចជាប្រិយមិត្តចិនទាំងអស់ ខ្មែរមិនព្រមដាច់ខាតឱ្យចិនត្រួតត្រាទេ អាហ្នឹងទីមួយ។ ទីពីរចិនក៏មិនចង់ត្រួតត្រាខ្មែរដែរ អាហ្នឹងនិយាយឱ្យច្បាស់។ គោលនយោបាយការបរទេសរបស់ចិន ចិនមិនចង់ត្រួតត្រាអ្នកណាទេ។ ចិនគ្រាន់តែចង់ធ្វើមិត្តជាមួយប្រទេសនានានៅលើពិភព លោក»។
លោក ហ៊ុន សែន ថ្លែងបែបនេះនៅក្នុងពិធីបើកការដ្ឋានសាងសង់មន្ទីរពេទ្យ “មិត្តភាពកម្ពុជា-ចិន” នៅខេត្តត្បូងឃ្មុំ នៅថ្ងៃទី១ មីនា។ លោកបន្តថា ទំនាក់ទំនងកម្ពុជាចិន គឺជាទំនាក់ទំនងក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ និងបាននាំមកនូវការរីកចម្រើនផ្នែកហេដ្ឋារចនាសម្ពន្ធ និងការអភិវឌ្ឍនៅកម្ពុជា។ លោកបន្ថែមទៀតថា នេះជាមោទនភាពដែលកម្ពុជាមានចិនជាមិត្តជិតស្និទ្ធ ខណៈចិនជាប្រទេសអ្នកមាន និងបានបោះទុនរកស៊ីនៅគ្រប់ទីកន្លែងលើពិភពលោក រួមទាំងកម្ពុជាផងដែរ។
ទោះជាយ៉ាងណា អ្នកឃ្លាំមើលសង្គមមានការយល់ឃើញផ្សេងពីលោក ហ៊ុន សែន ទាក់ទងនឹងឥទ្ធិពលចិននៅកម្ពុជានេះ។
ប្រធានអង្គការសម្ពន្ធគណនេយ្យភាពសង្គមកម្ពុជា លោក សន ជ័យ ថ្លែងថា ប្រទេសចិនមិនបានយកកម្លាំងទ័ពមកត្រួតត្រាកម្ពុជាឡើយ ក៏ប៉ុន្តែចិនបានពង្រីកឥទ្ធិពលរបស់ខ្លួនយ៉ាងខ្លាំងនៅកម្ពុជា តាមរយៈជំនួយ និងកម្ចីដ៏ច្រើនសន្ធឹកសន្ធាប់ ដែលរដ្ឋាភិបាលចិនបានផ្ដល់ជាបន្តបន្ទាប់ដល់រដ្ឋាភិបាលកម្ពុជា។ លោកបន្តថា ស្របពេលនៃការមានទំនាក់ទំនងល្អជាមួយប្រទេសចិន រដ្ឋាភិបាលកម្ពុជាក៏ត្រូវប្រឹងប្រែងពង្រឹងទំនាក់ទំនងជាមួយក្រុមប្រទេសប្រជាធិបតេយ្យផងដែរ ដើម្បីប្រយោជន៍សេដ្ឋកិច្ច សង្គម និងការអភិវឌ្ឍ៖ «កាលណាទឹកលុយគេច្រើន ទឹកមាត់គេប្រៃ ហើយគេចេះតែសុំនេះ សុំនោះ ហើយប្រទេសដែលជំពាក់បំណុលគេហ្នឹង ពេលខ្លះទៅព្រមព្រៀង ពេលខ្លះទៅក៏ឯកភាព ពេលខ្លះទៅក៏មិនឯកភាពជាដើម។ អ៊ីចឹងទៅទំនាក់ទំនងរវាងកម្ពុជា និងចិននេះ យើងបារម្ភអំពីរឿងបំណុលចិនកាន់តែកើនឡើង។ កាលណាគេមានឥទ្ធិពល គេអាចធ្វើឱ្យអ្នកនយោបាយហ្នឹងជឿគេស្ទើរតែគ្រប់បែបយ៉ាងទាំងអស់ ហើយរហូតដល់ទៅថា មហាមិត្តធ្វើអ្វីក៏មិនចេះខុស»។
ប្រទេសចិនកុម្មុយនិស្ត គឺជាប្រទេសនាំមុខគេក្នុងការវិនិយោគនៅកម្ពុជា។ កាលពីឆ្នាំ ២០១៨ កន្លងទៅ ទំហំទុនវិនិយោគសរុបរបស់ចិនមានប្រមាណ ៣ពាន់ ៦រយលានដុល្លារ ឬស្មើនឹង ៥៣ភាគរយ នៃទំហំវិនិយោគសរុបចំនួន ៦ពាន់ ៨រយលានដុល្លារអាមេរិក។
ទោះជាយ៉ាងណា ស្របពេលដែលទំហំពាណិជ្ជកម្ម និងការវិនិយោគរបស់ចិនមានចំនួនកាន់តែច្រើននោះបំណុលដែលកម្ពុជាជំពាក់ចិនក៏បានកើនឡើងខ្ពស់ផងដែរ។ គិតត្រឹមចុងឆ្នាំ២០១៨ កម្ពុជាជំពាក់បំណុលចិនជាង ៤ពាន់លានដុល្លារ ក្នុងចំណោមបំណុលបរទេសសរុបជាង ៩ពាន់លានដុល្លារ។
ស្ថាប័នអន្តរជាតិ និងអ្នកតាមដានសង្គមអះអាងថា កម្ពុជានឹងធ្លាក់ក្នុងអន្ទាក់បំណុលរបស់ចិន តាមរយៈជំនួយ និងកម្ចីដ៏ច្រើនសន្ធឹកសន្ធាប់ពីរបបក្រុងប៉េកាំង ហើយនិន្នាការបែបនេះនឹងឱ្យកម្ពុជាបាត់បង់ឯករាជ្យភាពលើវិស័យសេដ្ឋកិច្ច និងនយោបាយរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។