លោកនាយករដ្ឋមន្ត្រី ហ៊ុន សែន ប្ដេជ្ញាថា នឹងការពារមរតក ឬសមិទ្ធផល ថ្ងៃទី៧ ខែមករា ឆ្នាំ១៩៧៩ ដែលជាចំណងមិត្តភាពជាមួយប្រទេសវៀតណាមឲ្យបាន បើទោះជាត្រូវធ្វើសង្គ្រាមក៏ដោយ។ មន្ត្រីបក្សប្រឆាំង និងអ្នកវិភាគថា លោក ហ៊ុន សែន ចង់ផ្គាប់ចិត្តវៀតណាមវិញ ក្រោយពេលជ្រុលងាកទៅរកចិនខ្លាំងពេក។
លោក ហ៊ុន សែន ស្ដីបន្ទោសក្រុមអ្នកវិភាគថា វាយតម្លៃតែផ្ដាសចំពោះការរក្សាចំណងមិត្តភាពកម្ពុជា-វៀតណាម តាមរយៈការផ្អាកប្រារព្ធខួប ៧ មករា។
ថ្លែងក្នុងពិធីបើកការដ្ឋានសាងសង់ស្ពានអាកាសថ្មី នៅផ្លូវជាតិលេខ៥ ខណ្ឌឫស្សីកែវ នៅថ្ងៃទី៣១ ខែមករា លោក ហ៊ុន សែន បញ្ជាក់ជាថ្មីថា គ្មានពេលណាដែលគណបក្សប្រជាជនកម្ពុជា និងពលរដ្ឋខ្មែរ បំភ្លេចថ្ងៃជ័យជម្នះ ៧ មករា នោះទេ។ លោកអះអាងថា លោកប្ដេជ្ញាការពារមរតកជាមួយវៀតណាមនេះឲ្យខាងតែបាន បើទោះជាត្រូវធ្វើសង្គ្រាមការពារថ្ងៃ ៧ មករា ក៏លោកត្រូវធ្វើដែរ៖ «គ្មានពេលណាដែលគណបក្សប្រជាជន និងប្រជាជនកម្ពុជា ដែលរស់រានមានជីវិតដោយសារថ្ងៃ ៧ មករា បំភ្លេចថ្ងៃ ៧ មករា នោះទេ។ អ្នកត្រូវចាំអាកន្លែងនេះ។ បើទោះបីត្រូវធ្វើសង្គ្រាមដើម្បីការពារ ៧ មករា ក៏ហ៊ានធ្វើដែរក៏ហ៊ានធ្វើដែរ»។
ប្រតិកម្មនេះ ធ្វើឡើងក្រោយពេលដែលគណបក្សប្រជាជនកម្ពុជា បានផ្អាកប្រារព្ធមីទីង រំឰកខួប ៧ មករា ចំនួន ២ឆ្នាំជាប់គ្នា គឺនៅឆ្នាំ២០២១ និងឆ្នាំ២០២២។ ខួបថ្ងៃទី៧ ខែមករា ត្រូវបានគណបក្សកាន់អំណាចចាត់ទុកជាថ្ងៃពិសេស ឬហៅថា ជាថ្ងៃកំណើតទី២ ដែលត្រូវបានរំដោះចេញពីរបបកម្ពុជាប្រជាធិបតេយ្យ ឬសម័យខ្មែរក្រហម។ គណបក្សនេះ ក៏បានបញ្ចូលថ្ងៃ ៧ មករា ជាថ្ងៃបុណ្យជាតិដែរ ហើយតែងតែរៀបចំប្រារព្ធមីទ្ទីញអបអររំឰកខួបជាទ្រង់ទ្រាយធំនៅទីស្នាក់ការកណ្ដាល «គ៨៥» ឬកោះពេជ្រ ប៉ុន្តែ ២ឆ្នាំចុងក្រោយនេះ គណបក្សប្រជាជនកម្ពុជា គ្រាន់តែផ្សព្វផ្សាយសារលិខិតអបអរសាទរ និងអនុញ្ញាតឲ្យសមាជិកបក្សរៀបចំពិធីនេះ ជាទ្រង់ទ្រាយតូចៗ នៅតាមមូលដ្ឋានរៀងខ្លួន ដោយអះអាងថា បណ្ដាលមកពីជំងឺកូវីដ១៩។
ជាមួយនឹងការផ្អាកមីទ្ទីញ ៧ មករា នេះ រដ្ឋាភិបាលក៏បានបង្កើនសកម្មភាពរួមគ្នាជាមួយចិនយ៉ាងច្រើនទៅវិញ រួមទាំងការផ្លាស់ប្តូរទស្សនកិច្ចទៅវិញទៅមក និងការអញ្ជើញតំណាងរដ្ឋាភិបាលចិន មកសម្ពោធពហុកីឡដ្ឋានជាតិមរតកតេជោ ជាអំណោយផ្ដាច់មុខរបស់ចិនជាដើម។
ប្រធានគណៈកម្មាធិការកិច្ចការព្រំដែន និងអន្តោប្រវេសន្ត នៃគណបក្សសង្គ្រោះជាតិលោក អ៊ុំ សំអាន ជឿថា លោក ហ៊ុន សែន ចង់ដោះដៃចេញពីវៀតណាមយូរមកហើយ តែលោក ហ៊ុន សែន ធ្វើទៅអត់រួច។ លោកបន្តថា ក្នុងករណីលោក ហ៊ុន សែន ហ៊ានដោះដៃចេញពីវៀតណាមមែន នោះផែនការលើកបន្តុបកូនប្រុសច្បង គឺលោក ហ៊ុន ម៉ាណែត ឲ្យឡើងជាមេដឹកនាំបន្តនឹងត្រូវបរាជ័យ។
លោក អ៊ុំ សំអាន ពន្យល់ថា លោក ហ៊ុន សែន មិនអាចអារកាត់ចាត់ចែងកិច្ចការប្រទេសជាតិធំៗ ដោយគ្មានការយល់ព្រមពីវៀតណាមបានទេ ព្រោះថា បក្សកុំម្មុយនីស្ដ៍វៀតណាម បានដាក់មន្ត្រីផ្ទៃក្នុងគណបក្សប្រជាជនកម្ពុជាឲ្យឃ្លាំមើលលោក ហ៊ុន សែន។ លោកបន្តថា ក្នុងករណីលោក ហ៊ុន សែន ងាករ៉េទៅរកចិន ឬមិនធ្វើតាមបញ្ជាបក្សកុំម្មុយនីស្ដ៍ទេ វៀតណាមនឹងប្រើផ្ទៃក្នុងបក្សប្រជាជនកម្ពុជា ឲ្យទម្លាក់លោក ហ៊ុន សែន ដូចមេដឹកនាំបក្សប្រជាជនកម្ពុជាមុនៗដែរ៖ «បើសិនជាគាត់មិនយកចិត្តយួនទេ។ យួនប្រាកដជាប្រើផ្ទៃក្នុងគណបក្សប្រជាជនហ្នឹង ដើម្បីទម្លាក់គាត់ ហើយប្រាកដជាយួនប្រើផ្ទៃក្នុងគណបក្សប្រជាជនហ្នឹង រារាំងគាត់ មិនឲ្យគាត់បានផ្ទេរអំណាចពីគាត់ទៅឲ្យកូនរបស់គាត់ទេ»។
ពាក់ព័ន្ធនឹងរឿងការប្រកាសសង្គ្រាមការពារថ្ងៃ ៧ មករា នេះ អ្នកវិភាគនយោបាយយល់ថា លោក ហ៊ុន សែន កំពុងលេងល្បែងដៃម្ខាង ចាប់ត្រី២ គឺការធ្វើអ្វីគ្រប់យ៉ាងដើម្បីផ្គាប់ចិត្តទាំងចិន និងវៀតណាម។
អ្នកវិភាគនយោបាយលោក គឹម សុខ អះអាងថា ចិនមិនពេញចិត្តនឹងមរតកថ្ងៃ ៧ មករា ប៉ុន្មានទេ ព្រោះជាថ្ងៃដែលវៀតណាមផ្ដួលរលំរបប ប៉ុល ពត ជាសម្ព័ន្ធមិត្តរបស់ចិន កាលនោះ។ លោកបន្តថា ដើម្បីផ្គាប់ចិត្តចិន លោក ហ៊ុន សែន បានប្រើលេសជំងឺកូវីដ១៩ ដើម្បីផ្អាករំលឹកខួប ៧ មករា ហើយយកថ្ងៃពិសេសជាមួយវៀតណាមនោះ ធ្វើដំណើរទៅជួបមេដឹកនាំរបបសឹកភូមា តាមបញ្ជារបស់ចិនវិញ។
ទោះជាយ៉ាងណា លោក ហ៊ុន សែន មិនអាចស្រវ៉ាចាប់ចិន ហើយអាចបោះបង់វៀតណាម បានភ្លាមៗ ទេ ដូច្នេះលោកត្រូវកសាងស្ដូបមិត្តភាពជាមួយវៀតណាមឲ្យបានច្រើន ដើម្បីបញ្ជាក់ចិត្តស្មោះ។ លោក គឹម សុខ ជឿជាក់ថា លោក ហ៊ុន សែន មានសមត្ថភាពទប់ទល់ការប្រជែងអំណាចនេះបាន ដោយយកផលប្រយោជន៍របស់ខ្មែរ ផ្ដល់ឲ្យចិនតាមរយៈដែនសមុទ្រ និងផ្ដល់ប្រយោជន៍ឲ្យវៀតណាមតាមរយៈការបើកដៃឲ្យមករកស៊ី ឬផ្ដល់សម្បទានក្នុងដែនព្រៃនៅភាគឦសាន្ត។
អ្នកវិភាគរូបនេះ លើកឡើងទៀតថា លោក ហ៊ុន សែន នៅត្រូវការវៀតណាមដើម្បីធានាដល់ដំណើរការផ្ទេរអំណាចទៅឲ្យកូនប្រុស។ លោកបារម្ភថា ទង្វើការពារអំណាចរបស់លោក ហ៊ុន សែន ពេលនេះអាចបង្កើតជាវិបត្តិធំធេងសម្រាប់កម្ពុជាទៅថ្ងៃមុខ៖ «បើលោក ហ៊ុន សែន នៅមានអំណាចគាត់អាចទប់ស្ថានការណ៍នេះបាន។ ក៏ប៉ុន្តែបើលោក ហ៊ុន សែន ផ្ទេរអំណាចទៅកូនប្រុសរបស់គាត់ ខ្ញុំយល់ថា ហ៊ុន ម៉ាណែត ទំនងជាគ្មានសមត្ថភាពក្នុងការទប់ស្ថានការណ៍នេះទេ ហើយអំណាចរបស់លោក ហ៊ុន ម៉ាណែត អាចនឹងក្លាយទៅជាការបង្កើតវិបត្តិធំធេង នៅក្នុងព្រះរាជាណាចក្រកម្ពុជា»។
ចំណែកប្រធានស្ដីទីគណបក្សសង្គ្រោះជាតិលោក សម រង្ស៊ី វិញ លោកធ្លាប់អះអាងថា ក្រៅពីបញ្ហានេះហើយ គណបក្សប្រជាជនកម្ពុជាកំពុងខ្វែងគំនិតផ្ទៃក្នុងរឿងគម្រោងលើកបន្តុកលោក ហ៊ុន ម៉ាណែត ឲ្យបន្តវេនពីឪពុក ទើបគណបក្សនេះ មិនអាចប្រារព្ធខួប ៧ មករា ឆ្នាំនេះបាន។ លោក សម រង្ស៊ី លើកឡើងថា លោក ហ៊ុន សែន ចង់ឲ្យលោក ហ៊ុន ម៉ាណែត ចេញមុខដឹកនាំមីទ្ទីញខួប ៧ មករា ជំនួសលោក ប៉ុន្តែថ្នាក់ដឹកនាំគណបក្សកាន់អំណាចផ្សេងទៀតជំទាស់ ទើបកម្មវិធីខួបថ្ងៃទី៧ ខែមករា ឆ្នាំ២០២២ មិនអាចដំណើរការទៅបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។