លោកនាយរដ្ឋមន្ត្រី ហ៊ុន សែន ស្នើឱ្យក្រុមអង្គការសង្គមស៊ីវិល និងគណបក្សប្រឆាំងគោរពសិទ្ធិមនុស្ស និងប្រជាធិបតេយ្យ។ លោក ហ៊ុន សែន លើកបែបនេះ ក្រោយពីសាធារណជនរិះគន់ក្រុមយុវជនមួយចំនួនដែលបានចុះចូលបក្សកាន់អំណាចថា លក់ខ្លួនដើម្បីជាថ្នូរតំណែង និងលាភសក្ការៈ។ អ្នកវិភាគនយោបាយថា សំណើរបស់លោក ហ៊ុន សែន នេះគ្រាន់តែជាវោហារសព្ទនយោបាយ ខណៈដែលលោកខ្លួនឯងផ្ទាល់ រំលោភប្រជាធិបតេយ្យធ្ងន់ធ្ងរ។
លោក ហ៊ុន សែន ហាក់មិនសប្បាយចំពោះក្រុមអង្គការសង្គមស៊ីវិល និងបក្សប្រឆាំងដែលបានរិះគន់មកលើយុវជនទាំងនោះឡើយ។ លោកថ្លែងឌឺថា អ្នកដែលតាំងខ្លួនជាអ្នកប្រជាធិបតេយ្យ តែការពិតមិនយល់ពីគុណតម្លៃ និងមិនបានគោរពប្រជាធិបតេយ្យនោះទេ។
លោកនាយករដ្ឋមន្ត្រី ហ៊ុន សែន ថ្លែងបែបនេះ ក្នុងវិធីប្រគល់សញ្ញាប័ត្រ ជូននិស្សិតនៅវិទ្យាស្ថានបច្ចេកវិទ្យាកម្ពុជានៅ រាជធានីភ្នំពេញ នៅថ្ងៃទី១ ខែមីនា។ លោកថា ក្រុមយុវជន ដែលចូលរួមក្នុងជីវភាពនយោបាយជាមួយបក្សកាន់អំណាច បានប្រាប់លោកថា ពួកគាត់បានចាញ់បោកការញុះញង់ពីជនបរទេសមួយចំនួន ដែលមានចេតនាចង់ធ្វើបដិវត្តន៍ពណ៌នៅកម្ពុជាកន្លងទៅ។ ដូច្នេះ លោក ថាការសម្រេចចិត្តមកចូលរួមនឹងបក្សកាន់អំណាចនេះ គឺជារឿងល្អ ហើយជាសិទ្ធិរបស់ពួកគាត់ នៅក្នុងប្រទេសប្រជាធិបតេយ្យ។
លោក ហ៊ុន សែន៖«អ៊ីចឹង ចំណុចនេះខ្ញុំគ្រាន់តែជម្រាបទៅអស់លោក ដែលតាំងខ្លួនជាមនុស្សប្រជាធិបតេយ្យក៏ប៉ុន្តែមិនបានគោរពប្រជាធិបតេយ្យពិតប្រាកដ។ ទាល់តែមនុស្សគាំទ្រអ្នកឯង ទើបអ្នកឯងចាត់ទុកថា មនុស្សល្អ ប៉ុន្តែឱ្យតែមកគាំទ្ររដ្ឋាភិបាល សុទ្ធតែមនុស្សលក់ឧត្ដមគតិ។ ហើយធ្ងន់ធ្ងរជាងនេះប្រមាថថា អ្នកទាំងនេះគឺជាកញ្ចាស់បរទេស ក្នុងពេលដែលខ្លួនស៊ីលុយបរទេស ដើម្បីប្រឆាំងខ្មែរ»។
ការលើកឡើងរបស់លោក ហ៊ុន សែន នេះ ត្រូវបានអ្នកវិភាគនយោបាយរិះគន់ថា ជាការនិយាយ ដើម្បីបង្ហាញថា ខ្លួនជាមនុស្សល្អ ក៏ប៉ុន្តែ ការពិត ក្រោមការដឹកនាំរបស់ លោក ហ៊ុន សែន ជិត ៤០ឆ្នាំមកនេះ អង្គការជាតិ និងអន្តរជាតិរកឃើញថា លោក ហ៊ុន សែន បានជាប់ឈ្មោះជាមេដឹកនាំផ្ដាច់ការ និងបានធ្វើទុក្ខបុកម្នេញលើស្ថាប័នសារព័ត៌មាន អ្នកនយោបាយ និងសកម្មជនសិទ្ធិមនុស្ស តាមតែទំនើងចិត្ត។
ឧទាហរណ៍ថ្មីៗ នេះ លោក ហ៊ុន សែន បានបញ្ជាឱ្យបិទវិទ្យុសំឡេងលទ្ធិប្រជាធិបតេយ្យ (VOD) និង ប្រើប្រាស់ប្រព័ន្ធតុលាការឯកបក្ស តាមយាយីមកលើមន្ត្រីបក្សប្រឆាំងជាបន្តបន្ទាប់ ដូចជា អនុប្រធានបក្សភ្លើងទៀន លោក ស៊ុន ឆ័យ ឧត្តមទីប្រឹក្សាគណបក្សភ្លើងទៀន លោក គង់ គាំ និងបានចាប់ខ្លួន អ្នកនាំពាក្យបក្សភ្លើងទៀន លោក ថាច់ សេដ្ឋា ដាក់ពន្ធនាគារ ដោយសារតែពួកគេ រិះគន់រដ្ឋាភិបាលលោក ហ៊ុន សែន និងរិះគន់ពីភាពមិនប្រក្រតីនៃការបោះឆ្នោតឃុំ-សង្កាត់កន្លងទៅ។
អ្នកជំនាញផ្នែកវិទ្យាសាស្ត្រនយោបាយ លោក ឯម សុវណ្ណារ៉ា ប្រាប់វិទ្យុអាស៊ីសេរីថា ការលើកឡើងរបស់ លោកនាយករដ្ឋមន្ត្រី ហ៊ុន សែន ឱ្យអង្គការសង្គមស៊ីវិល និងបក្សប្រឆាំង គោរពសិទ្ធមនុស្ស និងប្រជាធិបតេយ្យនេះ គ្រាន់តែជាវោហារសព្ទនយោបាយ ក៏ប៉ុន្តែ លោកថា លោក ហ៊ុន សែន គួរតែ ប្រកាន់គោលការណ៍ច្បាប់ ល្អជាជាងដែលប្រើវោហារសព្ទ ដើម្បីតែវាយប្រហារគ្នា។ លោកបន្តថា ស្ថានភាពសិទ្ធិមនុស្ស និងប្រជាធិបតេយ្យនៅកម្ពុជា គឺចាំបាច់ណាស់ តម្រូវឱ្យមានការគោរពគ្នាទៅវិញទៅមកក្នុងនាមបក្សប្រឆាំង និងរដ្ឋាភិបាលខ្លួនឯងផ្ទាល់។
លោក ឯម សុវណ្ណារ៉ា៖«ការជំរុញឱ្យអ្នកនយោបាយ ឧទាហរណ៍ថា ទាញយកយុវជនឱ្យយុវជនមក ប្រឈមមុខគ្នា មកប្រយុទ្ធនឹងយុវជនគឺជារូបភាពមិនល្អសម្រាប់ធ្វើឱ្យសង្គមកម្ពុជាបណ្ដុះនូវវប្បធម៌គេហៅថា រុកគន ឬក៏បែកខ្ញែកគ្នា មិនមានទស្សនៈអាចរករួមគ្នាបាន។ ខ្ញុំមិនសាទរទេ យើងគួរប្រកាសគោលការច្បាប់ ហើយច្បាប់ឱ្យមានសេរី យុត្តិធម៌ត្រឹមត្រូវ កុំឱ្យឈរលើគោលការណ៍ត្រឹមតែប្រើឥទ្ធិពលអំណាចយកមកប្រើប្រាស់ក្រៀបសង្កត់លើច្បាប់»។
ចំណែក អ្នកនាំពាក្យសមាគមសិទ្ធិមនុស្សអាដហុក (Adhoc) លោក សឹង សែនករុណា លើកឡើងថា នៅក្នុងប្រទេសដែលប្រកាន់គោលការណ៍ប្រជាធិបតេយ្យ គេចមិនផុតពីការរិះគន់របស់ប្រជាពលរដ្ឋ ឬអ្នកនយោបាយនោះទេ។ លោកបន្តថា នៅក្នុងគោលការណ៍ប្រជាធិបតេយ្យ អ្នកដែលជាតួអង្គពិតប្រាកដក្នុងការរំលោភសិទ្ធិមនុស្ស និងប្រជាធិបតេយ្យ គឺអ្នកដឹកនាំរដ្ឋទាំងមូល បើសិនជាអ្នកទាំងនោះមិនគោរពច្បាប់ឱ្យបានត្រឹមត្រូវ។ ដូច្នេះលោកថា ការរិះគន់របស់ប្រជាពលរដ្ឋ គឺជាសិទ្ធិរបស់ពលរដ្ឋ ដោយមិនអាចចាត់ថា ជាការរំលោភសិទ្ធិមនុស្ស ឬប្រជាធិបតេយ្យនោះឡើយ។
លោក សឹង សែនករុណា៖«អ្នកដឹកនាំរដ្ឋធ្វើម៉េចឱ្យមានចិត្តទូលំទូលាយក្នុងការទទួលយកមតិយោបល់គ្រប់រូបភាពដែលបានលើកឡើងហ្នឹង។ បើសិនជាអ្នកហ្នឹងលើកឡើងជាមតិល្អៗ គួរតែយកទៅធ្វើការពិចារណា ក្នុងការអនុវត្តកំណែទម្រង់ធ្វើយ៉ាងម៉េចឱ្យមានភាពល្អប្រសើរទៅ ហើយបើមានការរិះគន់ខ្លាំងទៅសូមឱ្យមានការអត់ធ្មត់ ជាជាងដែលយើងទៅប្រើប្រាស់មធ្យោបាយណាមួយដែលជារូបភាពគំរាមកំហែង ជាការបន្តូចបង្អាក់ស្មារតី»។
អ្នកវិភាគនយោបាយសង្កេតឃើញថា មុនការបោះឆ្នោតជាតិជិតខិតមកដល់នេះ រដ្ឋាភិបាល លោក ហ៊ុន សែន បានប្រើប្រាស់យុទ្ធសាស្ត្រចាស់ដដែល ក្នុងការទិញទឹកចិត្ត និងគំរាមកំហែង ដើម្បីបង្ហាញពីភាពខ្លាំងរបស់លោក។ លោក ហ៊ុន សែន ថ្លែងថា អ្នកដែលធ្លាប់រិះគន់លោក ពេលនេះបានចូលស្ម័គ្រស្មោះជាមួយនឹងបក្សកាន់អំណាចជាបន្តបន្ទាប់។
គិតមកដល់ពេលនេះ យ៉ាងហោចណាស់មានយុវជន ៦ក្រុមបានប្ដូរទស្សនៈរបស់ខ្លួន ទៅគាំទ្ររដ្ឋាភិបាលវិញ។ ក្រុមយុវជនទាំងនោះ ក៏ចេញសេចក្ដីថ្លែងការណ៍គាំទ្រចំណាត់រដ្ឋាភិបាលក្នុងការបិទវិទ្យុវីអូឌី(VOD) បើទោះជាគេមើលឃើញថា ការបិទវិទ្យុ វីអូឌី នេះ ជាការបំបិទសំឡេងប្រព័ន្ធផ្សព្វផ្សាយឯករាជ្យចុងក្រោយនៅកម្ពុជាក្ដី។ ក្រុមអ្នកទាំងនោះរួមមានក្រុមយុវជន១០០រាត្រី ក្រុមយុវជនសេដ្ឋកិច្ចក្រៅប្រព័ន្ធកម្ពុជា ក្រុមអ្នកស្រាវជ្រាវវ័យក្មេង ក្រុមអ្នកស្រលាញ់បរិស្ថាននិងសង្គម ក្រុមយុវជនខ្មែរមហានគរ និងក្រុមយុវជនសន្តិភាពនិងការអភិវឌ្ឍជាដើម។
ជាទូទៅ អ្នកដែលងាកមកចុះចូលនឹងលោក ហ៊ុន សែន បានទទួលតំណែងខ្យល់ឬ ត្រឹមទទួលតួនាទីជាទីប្រឹក្សា នៅក្នុងស្ថាប័នមួយចំនួន។ រីឯអ្នកខ្លះទៀត ត្រូវបានអនុញ្ញាតឱ្យទៅបើកអង្គការការពារបរិស្ថានជាដើម។ ចំណែកយុវជនពីគណបក្សនយោបាយមួយចំនួន ដែលដើរចេញពីបក្សប្រឆាំងទៅបម្រើការឱ្យលោក ហ៊ុន សែន ដំបូងបានទទួលតួនាទីល្អគួរសម តែក្រោយមក ក៏ត្រូវលោក ហ៊ុន សែន ចាប់ដាក់គុកដូចជាករណីអតីតឯកអគ្គរាជទូតកម្ពុជា ប្រចាំប្រទេសកូរ៉េខាងត្បូង លោក ស៊ុត ឌីណា ជាដើម។ ទោះយ៉ាងណាក្ដី បញ្ហានេះរងការរិះគន់ពីអ្នកប្រើប្រាស់បណ្ដាញសង្គម និងអ្នកតាមដានស្ថានការណ៍សង្គម ថា ជាយុទ្ធសាស្ត្រចាស់គំរឹល និងមិនអាចបោកប្រាស់ប្រជាពលរដ្ឋបានទៀតនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។