លោក ទៀ បាញ់ អំពាវនាវ​ឱ្យ​រក្សា​វប្បធម៌​ផ្សះផ្សា ខណៈ លោក ហ៊ុន សែន ប្រកាស​ធ្វើ​សង្គ្រាម​ជាមួយ លោក សម រង្ស៊ី

ដោយ ថន ថារ៉ូ
2019-05-31
អ៊ីម៉ែល
មតិ
Share
បោះពុម្ព
លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ​កម្ពុជា
លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ​កម្ពុជា
រូប៖ ហ្វេសប៊ុក General Tea Banh

រដ្ឋមន្ត្រី​ក្រសួងការពារជាតិ លោក ទៀ បាញ់ អំពាវនាវ​ឱ្យ​រក្សា​វប្បធម៌​ផ្សះផ្សា និង​បង្រួបបង្រួម​ជាតិ​។ ការ​អំពាវនាវ​របស់ លោក ទៀ បាញ់ ធ្វើឡើង​មួយថ្ងៃ បន្ទាប់​ពី​លោក ហ៊ុន សែន ថ្លែង​នៅ​ប្រទេស​ជប៉ុន ថា លោក​កំពុង​រង់ចាំ​ធ្វើសង្គ្រាម​ជាមួយ លោក សម រង្ស៊ី។

លោក ទៀ បាញ់ សរសេរ​ក្នុង​បណ្ដាញ​សង្គម​ហ្វេសប៊ុក (Facebook) ថា ការផ្សះផ្សា និង​បង្រួបបង្រួម​ជាតិ ជា​គោលការណ៍​សំខាន់ ដែល​នាំមក​សន្តិភាព​ជូន​សង្គមជាតិ និង​បន្ត​រក្សា​សន្តិភាព ដែល​យើង​ទទួល​បាន​យ៉ាង​លំបាក បន្ទាប់ពី​សង្គ្រាមស៊ីវិល​អស់​ជាង ៣​ទសវត្សរ៍។ លោក ទៀ បាញ់ អំពាវនាវ​ឱ្យ​រួមគ្នា​រក្សា​ឱ្យ​បាន​នូវ​វប្បធម៌​ផ្សះផ្សា និង​បង្រួបបង្រួម​ជាតិ។

ការ​លើកឡើង​នេះ ក្រោយ​ពេល​ដែល លោក ហ៊ុន សែន ប្រកាស​នៅ​ប្រទេស​ជប៉ុន កាលពី​ថ្ងៃ​ទី​៣១ ឧសភា ថា សុំ​ឱ្យ​ពិភពលោក ដឹង​លឺ ថា លោក​កំពុង​រង់ចាំ​ធ្វើសង្គ្រាម​ជាមួយ លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ ព្រោះ​លោក សម រង្ស៊ី អំពាវនាវ​ឱ្យ​កងទ័ព និង​ពលរដ្ឋ ចាប់ខ្លួន​លោក៖ «អ៊ីចឹង​ខ្ញុំ​សុំ​ប្រកាស​ដោយ​ចំហ​ពី​ទីនេះ ឱ្យ​ពិភពលោក​បាន​ដឹង​ថា ខ្ញុំ​កំពុង​រង់ចាំ​សង្គ្រាម​មួយ ដែល​វា​នឹង​កើតឡើង តាមរយៈ​ការប្រកាស​របស់​ជន​ក្បត់ជាតិ គេ​ហៅថា ឆ្កែ​មួយ​ក្បាល ដែល​ស្រែក​ពី​ក្រៅ​ប្រទេស ប្រកាស​ឱ្យ​ប្រជាពលរដ្ឋ​ចាប់ ហ៊ុន សែន»

ជុំវិញ​ការ​អំពាវនាវ​ឱ្យ​រក្សា​វប្បធម៌​ផ្សះផ្សា និង​បង្រួបបង្រួម​ជាតិ​របស់ លោក ទៀ បាញ់ អ្នកវិភាគ និង​សង្គម​ស៊ីវិល​ផ្នែក​សិទ្ធិមនុស្ស យល់ថា ជា​រឿង​ល្អ ហើយ​អ្នកនយោបាយ មិន​គួរ​ប្រើ​កំហឹង​ផ្ទាល់ខ្លួន យក​លេស​បង្កើត​សង្គ្រាម​ឡើយ។

សមាជិក​ក្រុម​អ្នកវិភាគ​វ័យក្មេង លោក បុង ដែត ជឿ​ថា មេដឹកនាំ​គណបក្ស​កាន់អំណាច​មាន​ឥទ្ធិពល​មួយ​ចំនួន ក្រៅពី​លោក ហ៊ុន សែន មាន​ឆន្ទៈ​ចង់​ផ្សះផ្សា​ជាតិ ដើម្បី​កុំ​ឱ្យ​មានការ​ផ្ដាច់ការ​អនុគ្រោះ​ពន្ធ និង​ខ្លាច​ផុងខ្លួន​ជាប់​ក្នុង​អន្លង់​អន្ទាក់​បំណុល​របស់​ចិន​។ លោក​ថា ក្នុង​នោះ ក៏​មាន លោក ទៀ បាញ់ ជា​ក្បាលម៉ាស៊ីន​បក្ស​មាន​ឥទ្ធិពល​ម្នាក់​ដែរ​។ លោក បុង ដែត យល់ថា ទោះ​បែប​ណា មនុស្ស​មាន​ឥទ្ធិពល​ទាំងឡាយ​ក្នុង​បក្ស​កាន់អំណាច នឹង​មិន​បណ្ដោយ​ឱ្យ លោក ហ៊ុន សែន យក​កំហឹង​ផ្ទាល់ខ្លួន​មក​បង្កើត​ជា​សង្គ្រាម​ផ្ដេសផ្ដាស​ទេ។

អ្នកវិភាគ​រូប​នេះ សង្កេត​ឃើញ​ថា ការវិវត្តន៍​ចុងក្រោយ​នេះ របប​ក្រុងភ្នំពេញ ហាក់​បង្ហាញ​ជំហរ​ទន់ភ្លន់ ដូចជា ទម្លាក់​ចោល​បទ​ចោទ​លើ​មេ​សហជីព​ធំ​ទាំង​៦ នេះ​ជា​ចេតនា ក្នុង​ការ​ឈាន​ទៅ​រក​ការ​ដោះលែង លោក កឹម សុខា ប្រធាន​គណបក្ស​សង្គ្រោះ​ជាតិ និង​ជំហាន​នៃ​ការចរចា​រក​ការផ្សះផ្សា​ជាតិ៖ «យើង​កម្រ​ឃើញ លោក ទៀ បាញ់ ថ្លែង​សារ​នយោបាយ​បែប​ហ្នឹង​ណាស់​។ កាត់​មានតែ​ថ្លែង​សារ​នយោបាយ​គំរាមកំហែង​ទេ ភាគច្រើន​។ អ៊ីចឹង​បាន​ន័យ​ថា ការផ្សះផ្សា​ជាតិ​របស់​គាត់​នៅ​ពេល​នេះ គឺ​អាច​ឈាន​ដល់​ការចរចា​ជាមួយ​គណបក្សប្រឆាំង ដើម្បី​ឱ្យ​មានការ​បង្រួបបង្រួម​ជាតិ​ឡើងវិញ ជាពិសេស​គឺ​ការ​ដោះលែង​លោក កឹម សុខា តែម្ដង​។ យើង​មើល​ផល​វិជ្ជមាន​យើង​អាច​ថា ជា​សេនារីយ៉ូ ឈាន​ទៅ​រក​ផ្លូវ​ហ្នឹង ពី​ព្រោះ​ថា កម្ពុជា គឺ​កៀក​កិត​ខិត​ជិត​មកដល់​ហើយ ការ​ផ្ដាច់​ការ​អនុគ្រោះ​ពន្ធ EBA»

អាស៊ីសេរី បាន​ព្យាយាម​ទូរស័ព្ទ​សុំ​ការ​បំភ្លឺ​ពី​អ្នកនាំពាក្យ​ក្រសួងការពារជាតិ លោក ឈុំ សុជាត និង​លោក អ៊ុន សុវណ្ណ នៅ​ថ្ងៃ​ទី​៣១ ឧសភា ច្រើនដង ដើម្បី​សុំ​ការ​បញ្ជាក់​បន្ថែម និង​ជំហរ​របស់ លោក ទៀ បាញ់ លើ​ការ​បង្ហោះ​សារ​ឱ្យ​រក្សា​វប្បធម៌​ផ្សះផ្សា និង​បង្រួបបង្រួម​ជាតិ​នេះ តែ​គ្មាន​អ្នកទទួល​ទូរស័ព្ទ។

ប្រធាន​ផ្នែក​សិទ្ធិមនុស្ស នៃ​សមាគម​អាដហុក (Adhoc) លោក នី សុខា យល់ថា មានតែ​ការ​អនុវត្ត​តាម​គោលការណ៍​លទ្ធិប្រជាធិបតេយ្យ សេរី​ពហុបក្ស និង​គោរព​សិទ្ធិមនុស្ស​ឱ្យ​បាន​ពេញលេញ​ទេ ទើប​អាច​រក្សា​វប្បធម៌​ផ្សះផ្សា និង​បង្រួបបង្រួម​ជាតិ​បាន។ លោក​ថា បទពិសោធន៍​កន្លងមក គឺ ចុងក្រោយ​នៃ​ជម្លោះ ជាមួយ​ជាតិ​សាសន៍​គ្នាឯង​នេះ គឺ ដាច់ខាត​ត្រូវតែ​ដោះស្រាយ​តាម​ការសន្ទនា​គ្នា។ លោក នី សុខា ជំរុញ​ឱ្យ​អ្នកនយោបាយ​ទាំងពីរ​ភាគី​ហ៊ាន​បោះដៃ​ស្វែងរក​ការសន្ទនា​ផ្សះផ្សា​ជាតិ ប្រកបដោយ​ឆន្ទៈ​ពិត រៀងៗ​ខ្លួន ដើម្បី​ធ្វើជា​គំរូ៖ «ដូច្នេះ​គន្លង​ប្រជាធិបតេយ្យ​សេរី​ពហុបក្ស និង​ការ​គោរព​សិទ្ធិមនុស្ស ហ្នឹងហើយ​ជា​គោលការណ៍​រួម ដើម្បី​យើង​ងាក​មក​រក​សន្ទនា​គ្នា ដោយ​ឈរ​លើ​ការសន្ទនា​គ្នា គោរព​លទ្ធិប្រជាធិបតេយ្យ សិទ្ធិមនុស្ស និង​ច្បាប់»

ទោះ លោក ហ៊ុន សែន ប្រកាស​រង់ចាំ​ធ្វើសង្គ្រាម​ជាមួយ លោក សម រង្ស៊ី ប៉ុន្តែ លោក សម រង្ស៊ី អះអាង​ថា នឹង​មិន​ធ្វើសង្គ្រាម តាម​ការ​បបួល​របស់​លោក ហ៊ុន សែន ឡើយ ព្រោះ​គោលការណ៍​របស់​គណបក្ស​ប្រឆាំង គឺ​មិន​យក​ខ្មែរ​ណា​ម្នាក់​ជាស​ត្រូវ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Ge.TBanh and S.Kheng should setup new pm condidates to run against tmil HS

Ge.TBanh and S.Kheng's characterized are much better that the last ones in 4 decades"HS"+best morality+well known right or wrong,bad or good,and both can standup high to take over bad comrade"HS"and lead the country to a right direction.If,tmil HS still in power there is no one khmer unity at all,because he has no envision to lead the pple and country"only his power and face world economic sanctions coming".

Jun 09, 2019 06:35 PM

Ge.T Banh,S.Kheng+others would tramsform Cambodia to another high level and god bless to all of u

Mr.T Banh all khmer political parties and khmer pple are 100% support your wisdom and to see more of all khmer leadership like u come out to speak up what's going on national issues today and know how to solve it?.In the last 4 decades if Mr.Pen Sovann,Chan Sy,and Chea Sim still alive and hold in office today,might be everything change for along-times ago,and Cambodia is not became like this today"no war,no bleed".Sir,the entire country want to see the great man like u to speak up the truth to make your pple feeling good and comfortable with u when the pple need u as necessary.All khmer pple need peace more than war,peace is good and war is very bad,so every khmer's leadership must avoid all kind of war that against its own pple and destroy the whole country,just learn all lessons in the past and make a right direction to the future of generations to come"no one live in one day".Sir,your short word of wisdom is so powerful to all khmer pple's feeling that everybody awaiting this for the last 4 decades"much better than a horrible man who lead by one-man-rule".God bless u sir and all khmer pple who love justice,freedom,democracy,liberty,prosperity,happiness and peace"Khmer loves Khmer".

Jun 02, 2019 10:54 AM

គេហទំព័រ​ទាំងមូល