មេដឹកនាំរបបក្រុងភ្នំពេញលោក ហ៊ុន សែន ព្រមានបិទហ្វេសប៊ុក (Facebook) លែងឱ្យមានដំណើរការនៅស្រុកខ្មែរបាន បើសិនទំព័រហ្វេសប៊ុករបស់លោកត្រូវបានបិទ។
លោក ហ៊ុន សែន បានសរសេរនៅលើទំព័រហ្វេសប៊ុករបស់លោក នៅថ្ងៃទី២៥ ខែកុម្ភៈ ថា៖ «ក្រុមហ៊ុនហ្វេសប៊ុកបានលុប និងព្យាយាមបិទគណនីរបស់ខ្ញុំ។ តែខ្ញុំ ហ៊ុន សែន សូមប្រាប់ទៅវិញថា បើអ្នកឯង ( ហ្វេសប៊ុក ) ហ៊ានបិទហ្វេសប៊ុករបស់ខ្ញុំ ( ហ៊ុន សែន ) ខ្ញុំនឹងបិទលែងឱ្យប្រើហ្វេសប៊ុកនៅស្រុកខ្មែរ»។
លោក ហ៊ុន សែន ថា ការព្រមានបិទហ្វេសប៊ុកនៅស្រុកខ្មែរ ផ្សាយលើផេកហ្វេសប៊ុករបស់លោក គឺក្រុមឧក្រិដ្ឋកម្មបច្ចេកវិទ្យា (Hacker) បានចូលមកលួច Account Facebook របស់លោកផ្សាយព័ត៌មានអាក្រក់បំពុលសង្គម នៅថ្ងៃទី២៥ កុម្ភៈ។ ប៉ុន្តែអ្នកជំនាញផ្នែកបច្ចេកវិទ្យាយល់ថា ការលួចគណនីហ្វេសប៊ុករបស់នាយករដ្ឋមន្ត្រីមិនមានភាពងាយស្រួលទេ ហើយថា ការអះអាងរបស់លោក ហ៊ុន សែន បែបនេះ ធ្វើឲ្យមានការសង្ស័យច្រើនជាង។
នៅលើទំព័រហ្វេសប៊ុករបស់លោក ហ៊ុន សែន មានការចេញសារពីរ ដងទាក់ទងនឹងការបិទហ្វេសប៊ុក។ សារទី១ សរសេរថា លោកនឹងបិទហ្វេសប៊ុក (Facebook) នៅកម្ពុជាចោល ព្រោះក្រុមហ៊ុនហ្វេសប៊ុកបានព្យាយាមបិទគណនីរបស់ហ្វេសប៊ុករបស់លោក។
ប៉ុន្តែក្រោយផ្ទុះប្រតិកម្មពីមហាជនទូទៅតាមបណ្ដាញសង្គមហ្វេសប៊ុករិះគន់ លោក ហ៊ុន សែន ចំពោះការព្រមាននេះក៏មានបង្ហោះសារទី២ថា ការព្រមាននេះ គឺក្រុមឧក្រិដ្ឋកម្មបច្ចេកវិទ្យា (Hacker) បានចូលមកលួចគណនី (Account Facebook) របស់លោកផ្សាយ ព័ត៌មានអាក្រក់បំពុលសង្គម។ លោក ហ៊ុន សែន បញ្ជាក់យ៉ាងដូច្នេះថា នៅមុននេះបន្តិចមាន ក្រុមឧក្រិដ្ឋកម្មបច្ចេកវិទ្យា (Hacker) បានចូលមកលួចAccount Facebook លោកហើយបានលួច លុបទិន្នន័យព័ត៌មានអស់មួយចំនួនធំ។ ពេលនេះខាងក្រុមហ៊ុនFacebookកំពុងស៊ើបអង្កេតជន អគតិដែលមានចេតនាអាក្រក់បំពុល និងបំផ្លាញព័ត៌មាននៅក្នុងសង្គមជាតិ។
ប៉ុន្តែទោះមានការបញ្ជាក់ដូច្នេះក្តី លោក ហ៊ុន សែន ឬខុទ្ទកាល័យលោក ហ៊ុន សែន មិនទាន់ចេញផ្សាយព័ត៌មានបកស្រាយបញ្ជាក់ឲ្យបានច្បាស់លាស់ ដើម្បីជម្រះមន្ទិលសង្ស័យនៅឡើយទេ។
អាស៊ីសេរី កំពុងព្យាយាមទាក់ទងក្រុមហ៊ុនហ្វេសប៊ុក ដើម្បីបញ្ជាក់ថា តើហ្វេសប៊ុកផេករបស់លោក ហ៊ុន សែន ពិតជាមានការហេកចូលនៅថ្ងៃទី ២៥ កុម្ភៈនេះ យកទៅគ្រប់គ្រងពីសំណាក់ក្រុមចោរបច្ចេកវិជ្ជាដែរឬអត់ ឬក៏ថា ហេតុការណ៍នេះ គ្រាន់តែជាការប្រឌិតឡើង? ក៏ប៉ុន្តែ គិតត្រឹមម៉ោងផ្សាយនេះ នៅមិនទាន់មានការឆ្លើយតបផ្លូវការណាមួយពីក្រុមហ៊ុនហ្វេសប៊ុកនៅឡើយទេ។
ក្រោយព្រឹត្តិការណ៍បោះឆ្នោតដ៏ចម្រូងចម្រាសដែលត្រូវសហគមន៍ជាតិ និងអន្តរជាតិចាត់ទុកជាការបោះឆ្នោត «ក្លែងក្លាយ» រួចមក លោក ហ៊ុន សែន ក៏ធ្លាប់ប្រកាសម្តងដែរ កាលពីថ្ងៃទី ១០ សីហា ឆ្នាំ ២០១៨ ថា ហ្វេសប៊ុករបស់លោក ត្រូវបានក្រុមចោរបច្ចេកវិជ្ជាលួចយកទៅគ្រប់គ្រងម្តងដែរ។ កាលណោះ មានការបង្ហោះសារថា គណបក្សប្រជាជនកម្ពុជា នឹងចែករំលែកអាសនៈសភា ២ អាសនៈ ទៅឲ្យគណបក្សសម្ព័ន្ធដើម្បីលទ្ធិប្រជាធិបតេយ្យ និង ២ អាសនៈទៀតទៅឲ្យគណបក្សហ៊្វុនស៊ិនប៉ិច។ ក្រោយមកលោក ហ៊ុន សែន បដិសេធព័ត៌មាននេះ។
មន្រ្តីជាន់ខ្ពស់ផ្នែកបច្ចេកវិទ្យានៃអង្គការសម្ព័ន្ធភាពការងារនិងសិទ្ធិមនុស្សហៅកាត់ថា សង់ ត្រាល់លោក ម៉េង អេដែត និយាយថា លោកមានការសង្ស័យនៅពេលឮថា ទំព័រហ្វេសប៊ុកទូទទៅ ត្រូវគេលួចបានម្តងៗ។ លោកថាករណីនេះ អាចមានចំណុចសង្ស័យចំនួន ៣ ទី ១.អ្នកកាន់ហ្វេសប៊ុកផេក ខ្សោយ ទី ២.ក្រុមឧក្រិដ្ឋកម្មបច្ចេកវិទ្យា ( Hacker )ខ្លាំង ទី ៣.ការអះអាងថាមានគេលួចហ្វេសបុកផេកមិនមែនជាការពិត៖ « ពាក្យគេហេកផេកហ្នឹង ខ្ញុំឃើញគេប្រើច្រើនខ្ញុំឃើញស្ថាប័នខ្លះ អ្នកនយោបាយខ្លះ ឬក៏អ្នកល្បីមួយចំនួនថា ផេករបស់គាត់ត្រូវគេហេកហើយ។ ប៉ុន្តែធាតុពិតជាក់ស្ដែងមិនដឹងថា ពិត ឬក៏អត់»។
អ្នកជំនាញបច្ចេកវិទ្យារូបនេះពន្យល់ថា ការលួចចូលហ្វេសប៊ុកផេកមួយៗ មានច្រើនដំណាក់កាល និងស្មុគស្មាញខ្លាំង។ លោកបន្តថា ហ្វេសប៊ុកផេករបស់មន្ត្រីរដ្ឋាភិបាល អ្នកនយោបាយ ជាន់ខ្ពស់ ឬអ្នកដឹកនាំប្រទេស គឺមានមនុស្សជំនាញច្រើនការពារ៖ «ផេកដូចជាមិនមានគេ ( លួច ) ហេកបានទេ គឺគេហេកនៅលើគណនី (Account) ដែលជា អែតម៉ីន (Admin) របស់ផេកហ្នឹង។ ឧទាហរណ៍ថា នៅក្នុងផេក អេ (A) មួយ មានអែតម៉ីនបីនាក់ ហើយមានអ៊ីឌីតទ័រ (Editor) បីនាក់ទៀត ពេលខ្លះគេហេកបានត្រឹមតែអ៊ីឌីតទ័រទេ ហើយគេបង្ហោះរូបអីរញ៉េរញ៉ៃអ៊ីចឹងទៅ។ អ៊ីចឹងដោយសារអ៊ីឌិតទ័រគាត់មានសិទ្ធិផុស (Post) អ៊ី ចឹង បើគេលួចគណនីអ៊ីឌីតទ័របានគេផុសហើយ។ អ៊ីចឹងលុះត្រាតែដឹងថា ឧទាហរណ៍ ផេកអេមួយមានអ្នកណាម្នាក់ជាអ្នកគ្រប់គ្រងផេកអេហ្នឹង អ៊ីចឹងធ្វើម៉េចដឹងថា អ្នកណាម្នាក់ទៅគ្រប់គ្រងផេកអេ អ៊ីចឹងយើងហេកម៉េចបាន ហ្វេសប៊ុកមានរាប់លានធ្វើម៉េចដឹងថា លើគណនី (Account) ហ្វេសប៊ុកណាជាម្ចាស់របស់ផេកហ្នឹង ?»។
ហ្វេសប៊ុករបស់លោក ហ៊ុន សែន សព្វថ្ងៃមានអ្នកគាំទ្រជាងដប់លាន (10,950,438) ហើយលោកធ្លាប់អះអាងថា លោកជាអធិរាជហ្វេសប៊ុក។ ប៉ុន្តែក៏ធ្លាប់មានសារបែកធ្លាយស្តីពីការសន្ទនារបស់លោក និងកញ្ញា ធី សុវណ្ណថា ពីគម្រោងចំណាយលុយ ដើម្បីទទួលបានការគាំទ្រ ឬ Likes ដែលចំនួនអ្នកគាំទ្រទាំងនោះភាគច្រើនមានប្រភពមកពីក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។