ពលករ​ខ្មែរ​មួយ​ចំនួន​នៅ​ថៃ​បន្ត​តាម​ដាន​ស្ថានការណ៍​នយោបាយ ដើម្បី​ចូល​រួម​ស្ដារ​ប្រជាធិបតេយ្យ​នៅ​កម្ពុជា

ដោយ ទីន ហ្សាការីយ៉ា
2019-11-12
អ៊ីម៉ែល
មតិ
Share
បោះពុម្ព

ពលករ​ខ្មែរ​មួយ​ចំនួន​​ធ្វើ​ការ​នៅ​ប្រទេស​ថៃ​នៅ​តែ​បន្ត​តាម​ដាន​ស្ថានការណ៍​នយោបាយ​នៅ​កម្ពុជា​យ៉ាង​ដិត​ដល់​ដដែល។ ពួក​គេ​យល់​ថា ​ស្ថានការណ៍​នយោបាយ​នៅ​ក្នុង​ស្រុក​នឹង​មិន​​បាន​ធូរស្រាល​​ឡើយ​ ល្គឹកណា​ប្រធាន​ស្ដី​ទី​គណបក្ស​សង្គ្រោះ​ជាតិ​លោក សម រង្ស៊ី មិន​ទាន់​ទៅ​ដល់​កម្ពុជា​ ដើម្បី​ស្ដារ​ប្រជាធិបតេយ្យ​ឱ្យ​រស់​ឡើង​វិញ​នោះ។

ពលករ​ខ្មែរ​ធ្វើ​ការ​នៅ​ប្រទេស​ថៃ​លើក​ឡើង​ថា​ មេ​ដឹក​នាំ​របប​ក្រុង​ភ្នំពេញ​លោក​ ហ៊ុន សែន ​បន្ធូរ​បន្ថយ​លក្ខខណ្ឌ​ត្រួតពិនិត្យ​​​ដល់​ប្រធាន​គណបក្ស​សង្គ្រោះ​ជាតិ​ លោក​ កឹម សុខា​ គឺ​ជា​ការ​បង្វែរ​​ស្ថានការណ៍​ ដើម្បី​កុំ​ឱ្យ​ប្រជាពលរដ្ឋ​ចាប់​អារម្មណ៍​មក​លើ​លោក សម រង្ស៊ី និង​ដើម្បី​រក្សា​​ការ​អនុគ្រោះ​ពន្ធEBA ពី​សហភាព​អឺរ៉ុប​ប៉ុណ្ណោះ។

ពលករ​ខ្មែរ​ធ្វើ​ការ​រោងចក្រ​នៅ​ទីក្រុង​បាងកក​លោក វិន មករា ថ្លែង​នៅ​ថ្ងៃ​ទី១២ វិច្ឆិកា​ថា ពលករ​ខ្មែរ​ធ្វើ​ការ​ជា​មួយ​លោក​ប្រមាណ ១០០​នាក់ មិន​ពេញ​ចិត្ត​របប​ដឹក​នាំ​សព្វ​ថ្ងៃ​ឡើយ។ លោក​បន្ត​ថា ពួក​គេ​តាម​ដាន​ស្ថានការណ៍​នយោបាយ​ក្នុង​ស្រុក​ជា​រៀងរាល់​ថ្ងៃ​ និង​​ដឹង​ច្បាស់​ពី​ល្បិច​កល​របស់​លោក ហ៊ុន សែន ទៀត​ផង។​ លោក​កត់​សម្គាល់​ថា លោក ហ៊ុន សែន កំពុង​តែ​ប្រើ​ល្បិច​បោក​បញ្ឆោត​ប្រជា​ពលរដ្ឋ និង​សហគមន៍​អន្តរជាតិ ដើម្បី​បាន​ដឹក​នាំ​ប្រទេស​បន្ត​ទៀត។ លោក​បញ្ជាក់​ថា ការ​បន្ធូរ​បន្ថយ​លក្ខខណ្ឌ​ខ្លះៗ មក​លើ​លោក កឹម សុខា​ នៅ​ពេល​នេះ គឺ​ជា​យុទ្ធសាស្ត្រ​បំបែក​បំបាក់​គណបក្ស​សង្គ្រោះ​ជាតិ ដើម្បី​កេង​ចំណេញ​នយោបាយ​ប៉ុណ្ណោះ៖ «ខ្ញុំ​ផ្ដែផ្ដាំ​ទៅ​ដល់​ថ្នាក់​ដឹក​នាំ​គណបក្ស​សង្គ្រោះ​ជាតិ​សូម​កុំឱ្យ​ចូល​ទៅ​ធ្វើ​តាម​លោក​ ហ៊ុន សែន ព្រោះ​លោក​កំពុង​តែ​ប្រើ​ល្បិច​អូសទាញ​សកម្មជន​បក្ស​ប្រឆាំង​ទៅ​ខាង​គាត់។ លោក​ហ៊ុន សែន​ រាល់​ថ្ងៃ​ហ្នឹង​ គឺ​គាត់​ធ្វើ​ដើម្បី​តែ​អំណាច​របស់​គាត់​ មិន​មែន​ជា​ប្រយោជន៍​រួម​ទេ​។អីចឹង​ពលករ​នៅ​ប្រទេស​ថៃ​ភាគ​ច្រើន​មិន​គាំទ្រ​លោក ហ៊ុន សែន ដឹក​នាំ​ប្រទេស​នោះ​ទេ»

រីឯ​ពលការិនី​ធ្វើ​ការ​ផ្នែក​កាត់​ដេរ​នៅ​ខេត្ត​សាមុទ្រ​ប្រាកាន (Samut Prakan) ឯណោះ​វិញ កញ្ញា លុយ ថុនា ថ្លែង​ថា ពលករ​ខ្មែរ​នៅ​តំបន់​កញ្ញា​ធ្វើ​ការ​ប្រហែល ៩៥ភាគ​រយ​ស្អប់​ខ្ពើម​របប​ក្រុង​ភ្នំពេញ ដែល​បាន​ដឹក​នាំ​ប្រទេស​ប្រព្រឹត្តិ អំពើ​ពុករលួយ​ បក្សពួកនិយម បំផ្លាញ​ធនធាន​ធម្មជាតិ និង​គាបសង្កត់​គ្រប់បែប​យ៉ាង​ធ្វើ​បាប​ប្រជាពលរដ្ឋ​ក្រីក្រ ដូច​ជា​រុះរើ​ផ្ទះ​និង​ការ​រំលោភ​ដីធ្លី​របស់​ពលរដ្ឋ​ ជា​ដើម។កញ្ញា​បន្ត​ថា ដើម្បី​ឱ្យ​ប្រជាពលរដ្ឋ​មាន​ជីវភាព​ធូរធារ​ មាន​តែ​ដូរ​មេ​ដឹក​នាំ​សព្វ​ថ្ងៃ​ដែល​ដឹក​នាំ​លោក​ ហ៊ុន សែន ចេញ​ពី​អំណាច​ ហើយ​ដាក់​មេ​ដឹក​នាំ​ថ្មី​ដែល​មាន​ចំណេះ​ដឹង​ពិតប្រាកដ​ដឹក​នាំ​ប្រទេស​ជំនួស​វិញ៖ «និយាយ​ឱ្យ​ខ្លី​គឺ​ខ្ញុំ​ចង់​ដូរ​របប​ដឹក​នាំ​តែ​ម្ដង ព្រោះ​ដឹក​នាំ​ជា​ច្រើន​ឆ្នាំ​មាន​តែ​ធ្វើ​ឱ្យ​ប្រទេស​ជាតិ​រលាយ​ មិន​មាន​ការ​រីក​ចំរើន​អី​ផង​​។ខ្ញុំ​មក​នៅ​ស្រុក​គេ​ខ្ញុំ​ច្រណែន​ប្រទេស​គេ​ណាស់​ ឃើញ​គេ​រីក​ចំរើន​ ហើយ​ខ្មែរ​មាន​ក្រ​ទៅ​។ខ្ញុំ​មើល​មិន​ឃើញ​រីក​ចំរើន​កន្លែង​ណា​បើ​ប្រជាពលរដ្ឋ​មាន​តែ​ទឹក​ភ្នែក​ទាមទារ​រក​យុត្តិធម៌​ ហើយ​មើល​ប្រទេស​គេ​មិន​មាន​ប្រជាពលរដ្ឋ​តវ៉ា​រក​យុត្តិធម៌​ដូច​នៅ​ស្រុក​ខ្មែរ​ទេ​។ហើយ​ប្រទេស​យើង​រីក​ចំរើន​ក៏​មិន​មាន​ពលរដ្ឋ​ក្ដៅក្រហាយ​ដែរ»

ក្រុម​ពលករ​ទាំង​នេះ​អះអាង​ថា​ ពលករ​ខ្មែរ​នៅ​ប្រទេស​ថៃ​ស្ទើរ​គ្រប់​ទីកន្លែង​នៅ​ក្នុង​ប្រទេស​នេះ​តាម​ដាន​ព័ត៌មាន​តាម​ហ្វេសប៊ុក​ បាន​ដឹង​អំពី​​ស្ថានការណ៍​នយោបាយ​របស់​ស្រុកទេស។​ពួកគេ​បន្ត​ថា​ ពលករ​ភាគ​ច្រើន​នៅ​តែ​ត្រៀម​ខ្លួន​ទៅ​ទទួល​លោក សម រង្ស៊ី វិល​ចូល​ស្រុក​វិញ​ដដែល​ ដើម្បី​ចូលរួម​ស្ដារ​ប្រជាធិបតេយ្យ​នៅ​កម្ពុជា​ឱ្យ​រស់​ឡើង​វិញ។

អ្នក​នាំ​ពាក្យ​គណបក្ស​ប្រជាជន​កម្ពុជា​លោក សុខ ឥសាន ប្រាប់​អាស៊ី​សេរី​ថា ស្ថានការណ៍​នៅ​ក្នុង​ប្រទេស​​មាន​សុខ​សន្តិភាព​ដោយ​គ្មាន​អ្វី​គួរ​ឱ្យ​ព្រួយបារម្ភ​ឡើយ។ លោក​អះអាង​ថា ប្រជាពលរដ្ឋ​មាន​សេចក្ដី​សុខ​គ្រប់​គ្នា ហើយ​ម្នាក់ៗ កំពុង​ដើរ​កម្សាន្ត​បុណ្យ​អុំទូក​យ៉ាង​សប្បាយ​រីក​ទៀត​ផង។លោក សុខ ឥសាន នៅ​តែ​មាន​ជំនឿ​ថា លោក សម រង្ស៊ី មិន​អាច​វិល​ចូល​ស្រុក​វិញ​បាន​ឡើយ៖ «ហើយ​យើង​ដឹង​ហើយ​ថ្ងៃ​ទី​៩​ជា​ថ្ងៃ​ឱសានវាទ​ចុង​ក្រោយ​ហើយ​ ហើយ​គាត់​ផ្ដាំ​ទៀត​ថា ថ្ងៃ​ទី៩ វិច្ឆិកា​ហ្នឹង គាត់​ត្រូវ​តែ​វិល​ចូល​ស្រុក​វិញ។ តែ​ជាក់​ស្ដែង​ថ្ងៃ​ទី១២ វិច្ឆិកា ហើយ​គាត់​មិន​បាន​ចូល​ស្រុក​ទេ​ គាត់​មក​នៅ​ទើរ​ត្រឹម​តែ​ប្រទេស​ម៉ាឡេស៊ី​ប៉ុណ្ណឹង​ទេ»

អ្នក​សម្រប​សម្រួល ​និង​អង្កេត​អង្គការ ខុមហ្វ្រែល (comfrel) លោក កន សាវាង្ស មាន​ប្រសាសន៍​ថា ថ្វី​ត្បិត​តែ​តុលាការ​បាន​បន្ធូរ​បន្ថយ​លក្ខខណ្ឌ​ត្រួត​ពិនិត្យ​ដល់​លោក កឹម សុខា ក៏​ដោយ​ក៏​ស្ថានការណ៍​នយោបាយ​នៅ​កម្ពុជា​នៅ​តែ​អាក្រក់​ដដែល ពី​ព្រោះ​លោក កឹម សុខា នៅ​តែ​មាន​ទោស​មិន​មាន​សិទ្ធិ​ពេញលេញ ដើម្បី​ធ្វើ​ការងារ​នយោបាយ​បាន​នៅ​ឡើយ៖ «ខ្ញុំ​យល់​ថា​វា​គ្រាន់​តែ​បន្ធូរបន្ថយ​ស្ថានភាព​​ឱ្យ​បាន​ធូរ​ខ្លះ​។ខ្ញុំ​នៅ​តែ​ចង់​បាន​ការ​ចូល​រួម​ផ្នែក​នយោបាយ​​ដោយ​សេរី​ពីព្រោះ​មក​ដល់​ពេល​នេះ​លោក​ កឹម សុខា​ គាត់​អត់​ទាន់​មាន​សេរីភាព​ផ្នែក​នយោបាយ​នៅ​ឡើយ​ទេ»

មន្ត្រី​អង្គការ​សង្គម​ស៊ីវិល​រូប​នេះ​ បន្ត​ថា ដើម្បី​ឱ្យ​ស្ថានការន៍​នយោបាយ​បាន​ធូរ​ស្រាល​ឡើង​វិញ លុះ​ត្រា​តែ រដ្ឋាភិបាល​ដោះ​លែង​អ្នក​ទោស​នយោបាយ និង​អ្នក​សារ​ព័ត៌មាន​ទាំង​អស់​ឱ្យ​មាន​សេរីភាព​ឡើង​វិញ​ ហើយ​ត្រូវ​រៀបចំ​ឱ្យ​គណបក្ស​សង្គ្រោះ​ជាតិ​បាន​ចូល​រួម​ប្រកួត​ប្រជែង​បោះ​ឆ្នោត​ឡើង​វិញ។លោក កង សាវាង្ស នៅ​តែ​ទទូច​ដល់​មេ​ដឹក​នាំ​គណបក្ស​កាន់​អំណាច​និង​គណបក្ស​ប្រឆាំង​ រក​ផ្លូវ​ចរចា​ត្រូវ​រ៉ូវ​គ្នា​ឡើង​វិញ​ ដើម្បី​ជា​ប្រយោជន៍​ដល់​​សេដ្ឋកិច្ច​ជាតិ​ និង​ភាព​ភាព​សុខសាន្ត​របស់​ប្រជា​ពលរដ្ឋ ជា​ពិសេស​ដើម្បី​រក្សា​ការ​អនុគ្រោះ​ពន្ធ EBA និង​ GSP របស់​សហភាព​អឺរ៉ុប និង សហរដ្ឋ​អាមេរិក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល