ព្រះ​មហាក្សត្រ តែង​តាំង​​សមាសភាព​រដ្ឋាភិបាល​ថ្មី ៩នាក់ តាម​សំណើ​រដ្ឋ​សភា និង​រដ្ឋាភិបាល

ដោយ ជុន ច័ន្ទបុត្រ
2020.03.30
King-Sihamoni ព្រះ​មហាក្សត្រ​ ព្រះបាទ​សម្តេច​ព្រះបរមនាថ នរោត្តម​ សីហមុនី ថ្លែង​ក្នុង​ពិធីបើ​សន្និសីទ​​អំពី​ការ​ប្រែប្រួល​អាកាសធាតុ ថ្ងៃទី ៣០ ខែ វិច្ឆិកា ឆ្នាំ ២០១៥។
AFP

ព្រះ​មហាក្សត្រ សម្រេច​តែងតាំង​សមាសភាព​រដ្ឋាភិបាល​ថ្មី​ចំនួន ៩នាក់​រួច​ហើយ ក្រោយ​មាន​ការ​អនុម័ត​ផ្ដល់​សេចក្ដី​ទុក​ចិត្ត​ពី​រដ្ឋសភា​ឯក​បក្ស។ ព្រះ​រាជ​ក្រឹត្យ​ចុះ​ថ្ងៃ​ទី៣០ មីនា គឺ​ភ្លាមៗ ក្រោយ​ការ​អនុម័ត​របស់​រដ្ឋសភា បង្ហាញ​ថា មន្ត្រី ៩រូប ដែល​ត្រូវ​តែងតាំង គឺ​ដំឡើង​រដ្ឋមន្ត្រី​ចំនួន​៥នាក់ ឡើង​ទៅជា​ទេស​រដ្ឋ​មន្ត្រី ដោយ​ក្នុង​នោះ​លោក ចម ប្រសិទ្ធិ ត្រូវ​បាន​រក្សា​ទុក​តួនាទី ជា​រដ្ឋមន្ត្រី​ក្រសួង​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍​ដដែល។ ចំណែក​រដ្ឋមន្ត្រី​៤នាក់​ទៀត គឺ​លោក អង្គ វង្ស​វឌ្ឍនា លោក ហ៊ឹម ឆែម លោក ត្រាំ អ៊ីវតឹក និង​លោក ពេជ ប៊ុនធិន ត្រូវ​បាន​ដំឡើង​ផុត​តួនាទី​រដ្ឋមន្ត្រី ក្លាយ​ទៅ​ជា​ទេស​រដ្ឋមន្ត្រី ទទួល​បន្ទុក​បេសកកម្ម​ពិសេស។

ឯ​សមាជិក​គណ​បក្ស​ប្រជាជន​កម្ពុជា ៤នាក់ ដែល​ធ្លាប់​ចេញ​មុខ​លេច​ធ្លោ ក្នុង​សកម្មភាព​នយោបាយ​ ត្រូវ​ដំឡើង​តួនាទី​ជា​រដ្ឋមន្ត្រី ជំនួស​ឲ្យ​មន្ត្រី​វ័យ​ចំណាស់​ទាំង ៤នាក់។ អ្នក​ទាំង ៤ គឺ​មាន​លោក កើត រិទ្ធិ ឡើង​ជា​រដ្ឋមន្ត្រី​ក្រសួង​យុត្តិធម៌ លោក ជា វ៉ាន់ដេត ឡើង​ជា​រដ្ឋមន្ត្រី​ក្រសួង​ប្រៃសណីយ៍ និង​ទូរគមនាគមន៍ លោក ឈិត សុខុន ​​រដ្ឋមន្ត្រី​ក្រសួង​ធម្មការ និង​សាសនា និង ​លោក ព្រំ សុខា ឡើង​ជា​រដ្ឋមន្ត្រី​ក្រសួង​មុខងារ​សាធារណៈ។

លោក​នាយក​រដ្ឋមន្ត្រី ហ៊ុន សែន បាន​ធ្វើ​សន្និសីទ​កាសែត ក្រោយ​ការ​អនុម័ត​របស់​រដ្ឋ​សភា នៅ​ព្រឹក​ថ្ងៃ​ទី៣០ មីនា​ថា ការ​ផ្លាស់ប្ដូរ​តំណែង​​រដ្ឋមន្ត្រី​ទាំង ៤ ដោយ​មូលហេតុ​ថា ពួក​គាត់​មាន​វ័យ​ចំណាស់។ ប៉ុន្តែ​កាល​ពី​ថ្ងៃ​ទី២៤ កុម្ភៈ លោក​និយាយ​ក្នុង​សន្និសីទ​កាសែត នៅ​វិមាន​សន្តិភាព​ថា លោក​ចង់​​​​រុះរើ​គណៈ​រដ្ឋមន្ត្រី ដូរ​មន្ត្រី​ស្ពឹក​ស្រពន់ និង​មន្ត្រី​ខ្វះ​ប្រសិទ្ធិ​ភាព​ចេញ​ពី​ការងារ។

មន្ត្រី​បក្ស​ប្រឆាំង និង​ក្រុម​អ្នក​វិភាគ មិន​ទាន់​ទុក​ចិត្ត​ថា ការ​ដោះដូរ​រដ្ឋ​មន្ត្រី​នេះ អាច​បង្កើន​ប្រសិទ្ធិ​ការងារ​ទេ ព្រោះ​ស្ថានភាព​កម្ពុជា កំពុង​ស្ថិត​នៅ​របត់​នយោបាយ​របប​ឯក​បក្ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។