អង្គការសិទ្ធិមនុស្សលីកាដូ (Licadho) បង្ហាញថា អ្នកទោសមនសិការរួមមាន សកម្មជននយោបាយ និងសកម្មជនការពារសិទ្ធិមនុស្ស កំពុងជាប់ឃុំនៅពន្ធនាគារ ដោយអយុត្តិធម៌អស់រាប់រយ ពាន់ថ្ងៃ នៅតែមិនទទួលបានការដោះលែង។ ទោះជាបែបនេះ មន្ត្រីបក្សកាន់អំណាចថ្លែងថា ការចោទប្រកាន់ និងឃុំខ្លួនសកម្មជន ទាំងនោះជាការអនុវត្តន៍ច្បាប់។
អង្គការសិទ្ធិមនុស្សលីកាដូ បានចងក្រងនិងរាប់ចំនួនថ្ងៃដែលអ្នកទោសមនសិការកំពុងជាប់ឃុំនៅពន្ធនាគារ។អ្នកជាប់ទាំងនោះ បានបាត់បង់សេរីភាពពី៥០ថ្ងៃ ទៅ១០០(មួយរយ) ២០០(ពីររយ) ៥០០(ប្រាំរយ)ថ្ងៃ ១.០០០(មួយពាន់)ថ្ងៃនិងអ្នកខ្លះទៀតជាប់ឃុំជាង២.០០០(ពីរពាន់)ថ្ងៃ។
មន្ត្រីសិទ្ធិមនុស្ស លើកឡើងថា ការចាប់ខ្លួន និងចោទប្រកាន់លើសកម្មជនសិទ្ធិមនុស្ស នយោបាយ ដីធ្លី ទាំងនោះ ខ្វះមូលដ្ឋានច្បាប់គ្រប់គ្រាន់ ហើយបញ្ហានេះបង្កការឈឺចាប់ដល់សកម្មជនជាប់ឃុំ និងបង្កផលប៉ះពាល់ដល់ក្រុមគ្រួសារអ្នកទាំងនោះថែមទៀតផង។
អង្គការសិទ្ធិមនុស្សលីកាដូ បានបង្ហាញពីឈ្មោះ តួនាទី ថ្ងៃដែលសមត្ថកិច្ចចាប់ខ្លួនអ្នកទោសមនសិការទាំងនោះ តាមគេហទំព័រ របស់ខ្លួន ដែលរូបភាពទាំងនោះហាក់គួរឱ្យសង្វេគ។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត ឱ្យដឹងថា ការបង្ហោះព័ត៌មានទាំងនេះ ជាការបង្ហាញថា អ្នកទោសមនសិការ មិនគួរត្រូវបានចាប់ខ្លួនព្រោះការអនុវត្តន៍សិទ្ធិ របស់ខ្លួនឡើយ។ លោកបន្តទៀតថា ការបង្ហោះព័ត៌មាននេះ ជាផ្នែកមួយនៃការតស៊ូមតិដើម្បីស្នើទៅរដ្ឋាភិបាល ឬស្ថាប័នពាក់ព័ន្ធគួរផ្ដល់សិទ្ធិសេរីភាពដល់អ្នកជាប់ឃុំទាំងនោះវិញ។ លោក អំ សំអាត ឱ្យដឹងដែរថា ការបង្ហោះនេះក៏ទទួលបានការចាប់អារម្មណ៍ពីសាធារណជន ដែលបានចូលអានព័ត៌មាននេះ។ មន្ត្រីសិទ្ធិមនុស្សរូបនេះ នៅតែយល់ថា ការចោទប្រកាន់ និងចាប់ឃុំលើសកម្មជនទាំងនោះមិនត្រឹមត្រូវតាមច្បាប់ទេ។
លោក អំ សំអាត៖ «បាទតាមការពិតទៅការបង្ហោះនៅក្នុងគេហទំព័រលីកាដូនេះ គឺយើងចង់ចូលរួមចំណែកក្នុងការពង្រឹងនីតិរដ្ឋនៅកម្ពុជា ជាពិសេសគឺការអនុវត្តច្បាប់ និងការធានា នៃការគោរពសិទ្ធិមនុស្សនៅកម្ពុជាបាទ»។
មន្ត្រីជាន់ខ្ពស់អង្គការលីកាដូ លោក អំ សំអាត កត់សម្គាល់ទៀតថា អំពើអយុត្តិធម៌ទាំងនេះ មិនត្រឹមតែធ្វើឱ្យអ្នកជាប់ឃុំទាំងនោះរងគ្រោះទេ តែបញ្ហានេះបានជះឥទ្ធិពលដល់ក្រុមគ្រួអ្នកទាំងនោះ ព្រោះអ្នកជាប់ឃុំទាំងនោះ សុទ្ធសឹងជាជនបង្គោលរកប្រាក់ចិញ្ចឹមគ្រួសារ។
លោកស្រី ទៀង ចិន្តា ជាប្រពន្ធសកម្មជនគណបក្សសង្គ្រោះជាតិលោក វឿង សំណាង ដែលកំពុងជាប់ឃុំនៅពន្ធនាគារព្រៃស ឱ្យដឹងថា ពេលនេះលោកស្រី កំពុងលក់ការ៉េមដើម្បីរកប្រាក់ចិញ្ចឹមកូន។ លោកស្រី ទៀត ចិន្តា ស្នើទៅរដ្ឋាភិបាល គួរដោះលែងប្ដីលោកស្រី សកម្មជនផ្សេងទៀត ឱ្យមានសេរីភាពឡើងវិញដើម្បីអាចរស់នៅជួបជុំគ្នា។
លោក វឿង សំណាង៖ «អ៊ីចឹងបានថា ខ្ញុំចង់ស្នើសុំឱ្យតុលាការផ្ដល់យុត្តិធម៌ដល់ប្ដីខ្ញុំដើម្បីឱ្យគាត់បានមកមានសេរីភាពដើម្បីចិញ្ចឹមប្រពន្ធកូនវិញ»។
សកម្មជនដែលកំពុងជាប់ឃុំ អ្នកទាំងនោះ តុលាការក្រុងភ្នំពេញចោទប្រកាន់ពួកគេ ភាគីច្រើនពីបទញុះញង់ និងរួមគំនិតក្បត់។ អ្នកទោសមនសិការទាំងនោះ អ្នកខ្លះជាប់ពន្ធនាគាររាប់ខែថ្ងៃ តែមិនទាន់បានកាត់ទោសទេ អ្នកខ្លះត្រូវកាត់ទោសរួចហើយ។
ទាក់ទងរឿងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា ការសម្រេចបែបណាលើសំណុំរឿងនេះ ជាសិទ្ធិរបស់តុលាការ។ លោកនៅតែអះអាងដដែលៗថា ការដែលតុលាការសម្រេចចោទប្រកាន់ និងផ្ដន្ទាទោសលើសកម្មជនទាំងនោះ គឺឈរលើមូលដ្ឋានច្បាប់ និងមានភស្តុតាងគ្រប់គ្រាន់។ អ្នកនាំពាក្យបក្សកាន់អំណាចរូបនេះ អះអាងទៀតថា នៅពេលករណីសកម្មជនទាំងនេះចូលដល់ដៃតុលាការរួចហើយ គ្មានការយោគយល់ ឬសម្របសម្រួលទៀតឡើយ។
លោក សុខ ឥសាន៖ «ពួកគាត់អ្នកធ្វើគាត់អ្នកទទួលផល មិនមែនទទួលផលតែខ្លួនឯងគ្រាន់ជាប់ពន្ធនាគារទេ រហូតទៅដល់ជះឥទ្ធិពលលំបាកវេទនាដល់ក្រុមគ្រួសារទៀត ទៅបន្ទោសអ្នកណា?យើងខំធ្វើសកម្មភាពបម្រើនយោបាយរបស់ក្រុមឧទ្ទាមក្រៅច្បាប់»។
ទោះមន្ត្រីបក្សកាន់អំណាចអះអាងបែបនេះ ប៉ុន្តែ អង្គការជាតិ និងអន្តរជាតិ រិះគន់ថា ការចាប់ខ្លួន និងចោទប្រកាន់លើអ្នកជាប់ឃុំទាំងនោះថា ជាប់ទាក់ទងនឹងហេតុផលនយោបាយ ច្រើនជាងការអនុវត្តច្បាប់។ គិតមកដល់ពេលនេះ អ្នកជាប់ឃុំមនសិការមានចំនួន៤៩នាក់។ អ្នកជាប់ឃុំទាំងនោះរួមមានសកម្មជននយោបាយ សិទ្ធិមនុស្ស ដីធ្លី សហជីព និងអ្នកសារព័ត៌មានផងដែរ។ អ្នកខ្លះត្រូវជាប់ពន្ធនាគារ ជាង១ឆ្នាំ និងអ្នកផ្សេងទៀត ត្រូវជាប់ឃុំដល់រហូត១៥ឆ្នាំក៏មាន៕