កម្ពុជា​​បញ្ជាក់​ថា មីយ៉ាន់ម៉ា​​មិន​ចូលរួម​​កិច្ចប្រជុំ​ចង្អៀត​​ថ្នាក់​​រដ្ឋមន្ត្រី​​ការ​បរទេស​​អាស៊ាន​​ឡើយ

ដោយ ខែ សុណង
2022.02.15
កម្ពុជា​​បញ្ជាក់​ថា មីយ៉ាន់ម៉ា​​មិន​ចូលរួម​​កិច្ចប្រជុំ​ចង្អៀត​​ថ្នាក់​​រដ្ឋមន្ត្រី​​ការ​បរទេស​​អាស៊ាន​​ឡើយ អ្នកនាំពាក្យ​ក្រសួង​ការបរទេស លោក ជុំ សុន្ទរី ថ្លែង​ទៅ​កាន់​អ្នក​កាសែត​កាល​ពី​ថ្ងៃ​ទី​២៦ ខែ​ឧសភា ឆ្នាំ​២០១៦ នា​រាជធានី​ភ្នំពេញ។
រូប៖ RFA

កម្ពុជា​​បញ្ជាក់ថា មីយ៉ាន់ម៉ា ​(Myanmar) ឬភូមា ​(Burma) ​នឹង​​មិន​ចូលរួម​​កិច្ចប្រជុំ​​ចង្អៀត​​ថ្នាក់​​រដ្ឋមន្ត្រី​​ការ​បរទេស​អាស៊ាន​ (AMM Retreat) ​ដែល​កំពុង​​ប្រព្រឹត្ត​ទៅ​​នៅក្នុង​​សប្តាហ៍​​នេះ​ឡើយ។

អ្នកនាំពាក្យ​ក្រសួង​ការបរទេស​កម្ពុជាលោក ជុំ សុន្ទរី បញ្ជាក់​ប្រាប់​វិទ្យុអាស៊ីសេរី​តាមបណ្តាញ​សង្គម​តេឡេក្រាម​ (Telegram) ថា​កិច្ចប្រជុំ​ចង្អៀតថ្នាក់​រដ្ឋមន្ត្រី​ការបរទេស​អាស៊ាន​ដែល​កម្ពុជា​រៀបចំ​ធ្វើ​ចាប់ពី​ថ្ងៃទី១៥ ដល់​ថ្ងៃទី១៧ ខែកុម្ភៈ នៅ​រាជធានីភ្នំពេញ មាន​ការចូលរួម​ដោយផ្ទាល់​ពី​រដ្ឋមន្ត្រី​ការបរទេស​អាស៊ាន​មកពី​គ្រប់​ប្រទេស​សមាជិក​អាស៊ាន​ទាំងអស់ លើកលែងតែ​រដ្ឋមន្ត្រី​ការបរទេស​ប៊្រុយណេ ​(Brunei) ​និង​ថៃ ​(Thailand) ចេញ។ លោកថា រដ្ឋមន្ត្រី​ការបរទេស​នៃ​ប្រទេសទាំង​ពីរ​នេះ​​នឹងចូលរួម​តាម​ប្រព័ន្ធវីដេអូ។ អ្នកនាំពាក្យរូបនេះ​មិនបាន​បញ្ជាក់លម្អិត​ពី​ហេតុផល​ដែល​រដ្ឋមន្ត្រី​ការបរទេស​នៃ​ប្រទេសទាំងពីរនេះ​មិនអាច​ចូលរួម​កិច្ចប្រជុំនេះ​ដោយ​ផ្ទាល់​នោះទេ។ ដោយឡែក ចំពោះ​រឿងរ៉ាវ​ចម្រូងចម្រាស​របស់​ប្រទេសមីយ៉ាន់ម៉ា​វិញ លោកថា​ពុំមាន​តំណាង​ចូលរួម​នោះទេ។

ក្រសួងការបរទេស​នៃ​របបសឹក​ភូមា បញ្ជាក់​ក្នុងសេចក្តីថ្លែងការណ៍​មួយ​ផ្សាយកាលពី​យប់ថ្ងៃចន្ទ ថា មីយ៉ាន់ម៉ា​ពុំអាច​ចូលរួម ឬតែងតាំង​តំណាង​មិនមែន​ជាអ្នកនយោបាយ​ឱ្យ​មកចូលរួម​កិច្ចប្រជុំ​នេះបានឡើយ ដោយសារតែ​អាស៊ាន​ធ្វើ​សេចក្តីសម្រេចចិត្ត​តាមអ្វីមួយ​ដែលរបបសឹកភូមា​អះអាង​ថា ផ្ទុយទៅនឹង​គោលការណ៍ និង​ការអនុវត្ត​នៃ​ភាពជាតំណាង​ស្មើភាពគ្នា​នៅក្នុង​អាស៊ាន។

ក្រោយរង​ការរិះគន់​ពីរឿង​ធ្វើឱ្យ​អាស៊ាន​បែកបាក់ និង​បរាជ័យ​មិនអាច​រៀបចំ​កិច្ចប្រជុំ​បើកឆាក​ដំបូង​របស់​អាស៊ាន​បាន​ដោយត្រូវ​ពន្យាពេល​អស់​ជិតមួយខែ​រួចមក ដោយសារ​បញ្ហា​ដ៏ចម្រូងចម្រាស​ដែល​កម្ពុជា​ចង់ទទួលស្គាល់​មេដឹកនាំ​រដ្ឋប្រហារ​ភូមា​រួចមក កម្ពុជា​បាន​សម្រេច​​បន្ទន់​ឥរិយាបថ​ងាកមក​ធ្វើតាម​ជំហរ​របស់​ប្រធាន​ប្តូរវេនអាស៊ាន​ចាស់​កាលពី​ឆ្នាំទៅ​វិញ ដោយសម្រេច​មិនអញ្ជើញ​មេដឹកនាំ​របបសឹកភូមា​ឱ្យ​មកចូលរួម​កិច្ចប្រជុំអាស៊ានឡើយ។ កម្ពុជា​សម្រេច​តាមជំហរ​របស់​អាស៊ាន​ជារួម​ថា តំណាង​របស់​ភូមា​ត្រូវតែ​មិនមែន​ជាអ្នកនយោបាយ​ទើបអាចចូលរួម​កិច្ចប្រជុំ​នេះបាន។ ទន្ទឹមនឹងនេះ ក្រុមមេដឹកនាំ​នៃ​បណ្តាប្រទេស​អាស៊ាន ជាពិសេស សិង្ហបុរី (Singapore) ឥណ្ឌូនេស៊ី (Indonesia) និង​ម៉ាឡេស៊ី (Malaysia) នៅតែ​បន្ត​ទាមទារ​ឱ្យ​របបសឹកភូមា​បញ្ឈប់​ការប្រើប្រាស់​អំពើហិង្សា​មកលើ​ពលរដ្ឋភូមា និង​អនុញ្ញាតឱ្យ​ប្រេសិត​ពិសេស​អាស៊ាន​អាចជួប​សន្ទនា​ជាមួយ​គ្រប់ភាគី​ពាក់ព័ន្ធ​នៅក្នុង​ប្រទេសភូមា​ដើម្បី​​ដោះស្រាយ​វិបត្តិ​នៅប្រទេស​នេះ​ក្រោយពី​​រដ្ឋប្រហារ​យោធា​កាលពី​ខែកុម្ភៈ ឆ្នាំ២០២១។

នៅក្នុងកិច្ចប្រជុំ​ចង្អៀត​ថ្នាក់​រដ្ឋមន្ត្រី​ការបរទេស​អាស៊ាន​នេះ ក្រុមរដ្ឋមន្ត្រី​ការបរទេស​អាស៊ាន​នឹង​ពិនិត្យ​មើលឡើងវិញ​នូវ​ការសម្រេច​នានា​របស់​ថ្នាក់ដឹកនាំ​អាស៊ាន​នៅក្នុង​កិច្ចប្រជុំ​កំពូល​អាស៊ាន​កាលពី​ឆ្នាំកន្លងទៅ។ ក្រុមមន្ត្រី​ជាន់ខ្ពស់​អាស៊ាន​ក៏នឹង​ផ្លាស់ប្តូរ​ទស្សនៈគ្នា​ឆ្លើយតប​ទៅនឹង​បញ្ហា​ប្រឈម​ជា​យុទ្ធសាស្ត្រ​ដែលកំពុង​កើតឡើង​ក្នុង​តំបន់ រួមមាន​ដូចជា ការគ្រប់គ្រង​ជំងឺកូវីដ១៩ ការប្រកួតប្រជែង​ភូមិសាស្ត្រនយោបាយ និង​បញ្ហាសន្តិសុខ​ក្នុង​តំបន់ជាដើម។

អ្នកនាំពាក្យ​ក្រសួងការបរទេស​កម្ពុជាលោក ជុំ សុន្ទរី ពុំឆ្លើយតប​ទៅនឹង​សំណួរ​របស់​វិទ្យុអាស៊ីសេរី ថាតើ​អាចនឹង​មាន​ការលើកឡើងនៅ​ក្នុង​កិច្ចប្រជុំនេះ ពី​ប្រធានបទ​ជុំវិញ​ការសង្ស័យ​ពី​រឿងមូលដ្ឋាន​កងទ័ព​ចិន​នៅកម្ពុជា ដែល​ជា​កង្វល់​របស់​អាមេរិក​ថាអាចប៉ះពាល់​ដល់​សន្តិសុខតំបន់ នៅក្នុង​កិច្ចប្រជុំ​នេះដែរឬយ៉ាងណា​នោះទេ។

ទោះយ៉ាងណា កន្លងទៅ ក្រុមអ្នកជំនាញកិច្ចការអន្តរជាតិ​ពុំមាន​ជំនឿថា ក្នុងនាម​ជា​ប្រធានប្តូរវេន​អាស៊ាន កម្ពុជា​អាចដោះស្រាយ​បញ្ហា​ប្រឈមសំខាន់ៗ​ជាពិសេស​បញ្ហា​សន្តិសុខ និង​នយោបាយ​ក្នុង​តំបន់​បាននោះទេ។ ពួកគេថា កម្ពុជា​ដឹកនាំ​អាស៊ាន​ឆ្នាំ២០២២នេះ ក៏​ទំនងជា​មិនសូវសុខគ្នា​ពីពេល​មុនដែរ ដែល​កម្ពុជា​​ចេញមុខ​គាំទ្រ​ប្រទេសចិន​នៅក្នុង​រឿង​ជម្លោះ​ដណ្តើម​អធិបតេយ្យ​លើ​ប្រជុំ​កោះ​នៅសមុទ្រចិន​ខាងត្បូង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
ពលករខ្មែរនៅប្រទេសកូរ៉េខាងត្បូងត្រៀមធ្វើបាតុកម្មប្រឆាំងលោក ហ៊ុន ម៉ាណែត
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។