អគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា កាលពីថ្ងៃទី ១៤ ខែមករា បានជួបជាមួយតំណាងនយោបាយចំនួន៣ និងមន្ត្រីអង្គការសង្គមស៊ីវិល ដើម្បីចូលរួមពិភាក្សាលើអនុសាសន៍ របស់គណបក្សនយោបាយ ពាក់ព័ន្ធនឹងកំណត់ហេតុនៃការរាប់សន្លឹកឆ្នោត(ទម្រង់បែបបទ ១១០២)។
គណបក្សទាំងនោះរួមមាន រួមមានគណបក្សប្រជាធិបតេយ្យមូលដ្ឋាន គណបក្សកម្ពុជានិយម គណបក្សកែទម្រង់កម្ពុជា និងតំណាងអង្គការខុមហ្វ្រែល (Comfrel)។
សេចក្តីប្រកាសព័ត៌មានរបស់គ.ជ.ប ឲ្យដឹងថា កំណត់ហេតុនៃការរាប់សន្លឹកឆ្នោត ទម្រង់បែបបទ ១១០២ គណបក្សនយោបាយអាចទៅថតយក នៅមុខការិយាល័យបោះឆ្នោតនៅពេលបិទផ្សាយជាសាធារណៈ និងអាចទៅទទួលយកទម្រង់បែបបទនេះ ពីគណៈកម្មការឃុំសង្កាត់រៀបចំការបោះឆ្នោត ដែលបានស្កេនដោយផ្ទាល់ រួចបោះពុម្ពចេញពីម៉ាស៊ីនកុំព្យូទ័រ។ ទម្រង់បែបបទ ១១០២ គ្រោងចែកចាយជូនដល់តំណាងគណបក្សនយោបាយ ដែលមានវត្តមាននៅការិយាល័យនៃគណៈកម្មការឃុំសង្កាត់រៀបចំការបោះឆ្នោត។
ពាក់ព័ន្ធនឹងការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញ ពីបញ្ជីបោះឆ្នោត ឆ្នាំ២០២១ នៃក្រុមប្រឹក្សាឃុំ-សង្កាត់ (កបឃស) គណៈកម្មាធិការជាតិរៀបចំការបោះឆ្នោត (គ.ជ.ប.) ទទួលបានពាក្យបណ្តឹងចំនួន២៦បណ្តឹង នៅទូទាំងប្រទេស រហូតមកដល់ថ្ងៃទី១២ ខែមករា។ បណ្តឹងទាំងនេះ សុទ្ធសឹងតែជាពាក្យបណ្ដឹងតវ៉ា នៅតាមឃុំសង្កាត់ក្នុងរាជធានីនិងខេត្តមួយចំនួន ប៉ុន្តែសំរាប់ ការិយាល័យគ.ជ.ប និងក្រុមប្រឹក្សាធម្មនុញ្ញវិញ គឺនៅពុំទាន់ទទួលបានពាក្យបណ្ដឹងណាមួយឡើយ។
គណបក្សនយោបាយមួយចំនួន ស្នើឲ្យកែប្រែសមាសភាពគ.ជ.ប ដែលមកពីគណបក្សកាន់អំណាចតែមួយ មិនអាចធ្វើឲ្យដំណើរការបោះឆ្នោតក្រុមប្រឹក្សាឃុំសង្កាត់នៅខែមិថុនាខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌ បានឡើយ។ ពួកគាត់ព្រមានធ្វើពហិការ មិនចូលរួមការបោះឆ្នោត ប្រសិនបើ គ.ជ.ប មិនបានកែទម្រង់សមាសភាពនេះ។
ចំណែក ប្រធានស្តីទីគណបក្សភ្លើងទៀនលោក ថាច់ សេដ្ឋា វិញធ្លាប់បញ្ជាក់ថា ប្រសិនបើបរិយាកាសដំណើរការបោះឆ្នោតមានភាពល្អប្រសើរ គ្មានការគំរាមកំហែង និងការគាបសង្កត់ គណបក្សប្រឆាំងមួយនេះ មានគម្រោងដាក់បេក្ខភាពឈរឈ្មោះបោះឆ្នោតក្រុមប្រឹក្សាឆ្នាំ២០២២ នៅគ្រប់ឃុំសង្កាត់ទូទាំងប្រទេស ទៅឲ្យគណៈកម្មាធិការជាតិរៀបចំការបោះឆ្នោត (គ.ជ.ប) នៅត្រឹមខែមីនាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។