គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្ដូរកាលបរិច្ឆេទនៃការធ្វើបច្ចុប្បន្នភាព លើបញ្ជីឈ្មោះបោះឆ្នោត ពីខែតុលា មកធ្វើនៅដើមខែឧសភាវិញ សម្រាប់ឆ្នាំ២០១៩។ រយៈពេល ៤ថ្ងៃដំបូងចាប់ពីថ្ងៃទី១ ដល់ថ្ងៃទី៤ ឧសភា មានពលរដ្ឋជាង ១ម៉ឺននាក់ បានទៅចុះឈ្មោះថ្មី។
គ.ជ.ប បង្ហាញថា លទ្ធផលបណ្ដោះអាសន្ននៃការពិនិត្យមើលបញ្ជីឈ្មោះ និងចុះឈ្មោះបោះឆ្នោត ឆ្នាំ២០១៩ មានពលរដ្ឋ ១២.៧៨៣នាក់ បានទៅចុះឈ្មោះថ្មី ហើយអ្នកដែលសុំលុបឈ្មោះ និងសុំកែតម្រូវទិន្នន័យ មាន ១.៨៤៨នាក់។
លទ្ធផលបណ្ដោះអាសន្នបង្ហាញថា បញ្ជីឈ្មោះបោះឆ្នោតសម្រាប់ឆ្នាំ២០១៩ មានចំនួន ៨.៥៥៦.៨៧៨នាក់ កើនឡើងជាងឆ្នាំ២០១៨ ជាង ១ម៉ឺននាក់។ បញ្ជីឈ្មោះបោះឆ្នោតផ្លូវការឆ្នាំ២០១៨ មានចំនួន ៨.៥៤៤.៨៨៥នាក់។
អ្នកនាំពាក្យ គ.ជ.ប លោក ហង្ស ពុទ្ធា ប្រាប់អាស៊ីសេរីថា ការប្ដូរកាលបរិច្ឆេទមកខែឧសភាវិញ ដោយសារប្រតិទិនរបស់ គ.ជ.ប ជាប់រវល់នៅខែតុលា និងដោយសារខែតុលា ប្រឈមនឹងស្ថានភាពទឹកជំនន់។ លោក ហង្ស ពុទ្ធា ថា ការចុះឈ្មោះ និងពិនិត្យបញ្ជីឈ្មោះឆ្នាំ២០១៩ មានរយៈពេល ២២ថ្ងៃ ចាប់ពីថ្ងៃទី១ ដល់ថ្ងៃទី២២ ឧសភា។ លោកបញ្ជាក់ថា ៦ថ្ងៃ ដើមយុទ្ធនាការ និង ៦ថ្ងៃនៃចុងយុទ្ធនាការ គ.ជ.ប នឹងទទួលចុះឈ្មោះ តាមសាលាឃុំសង្កាត់ ឯចន្លោះថ្ងៃយុទ្ធនាការនេះ គឺ គ.ជ.ប នឹងចល័ត នៅតាមទីប្រជុំជនក្នុងមូលដ្ឋានរបស់ពលរដ្ឋ ដើម្បីទទួលការចុះឈ្មោះ។ អ្នកនាំពាក្យរូបនេះ អះអាងទៀតថា គ.ជ.ប ធ្វើបែបនេះយូរណាស់មកហើយ ដើម្បីសម្រួលដល់ពលរដ្ឋ៖ « ដោយសារប្រតិទិនពីមួយឆ្នាំ ទៅមួយឆ្នាំហ្នឹង មានការចង្អៀតពេក ដល់អ៊ីចឹងហើយ បានពេលវេលាត្រូវលើកមកពេលហ្នឹងបាទ។ សំណួរ៖ តើចុះឈ្មោះនរណាខ្លះ ? ឆ្លើយ៖ ទី១ ទទួលចុះឈ្មោះ អ្នកមានអាយុ ១៨ឆ្នាំឡើង ហើយទី២ ទទួលចុះឈ្មោះអ្នកមានទីលំនៅថ្មី ហើយទី៣ នឹងមានការលុបឈ្មោះអ្នកដែលប្ដូរចេញពីអាសយដ្ឋាន ក្នុងឃុំសង្កាត់ចាស់ហ្នឹង លុបពីហ្នឹងចេញ ដើម្បីឲ្យគាត់ទៅចុះឈ្មោះថ្មី ហើយមួយទៀត លុបអ្នកទទួលមរណៈភាព ឬក៏អ្នកដែលសាលក្រមមិនឲ្យគាត់ទទួលបាន ( សិទ្ធិបោះឆ្នោត ) ជាដើម » ។
គ.ជ.ប ប៉ាន់ស្មានថា ពលរដ្ឋចុះឈ្មោះថ្មី សម្រាប់ឆ្នាំ២០១៩ អាចមានជាង ៣សែន (៣៧២.៦២៨) បន្ថែមពីលើបញ្ជីឆ្នាំ២០១៨។ ចំណែកចំនួនពលរដ្ឋអាយុ ១៨ឆ្នាំឡើង ដែលមានសិទ្ធិបោះឆ្នោត គ.ជ.ប ប៉ាន់ស្មានថា មានជាង ១០លាន (១០.១៧៨.៨០៩) នាក់។
កាលពីយុទ្ធនាការចុះឈ្មោះ និងពិនិត្យមើលបញ្ជីឈ្មោះ នៅខែតុលា ឆ្នាំ២០១៨ គ.ជ.ប គ្រោងចុះឈ្មោះពលរដ្ឋថ្មី ជាង ៤សែន (៤៨៩.៩៦៣) នាក់ បន្ថែមពីលើបញ្ជីឈ្មោះបោះឆ្នោត ឆ្នាំ២០១៧។ ប៉ុន្តែការចុះឈ្មោះកាលណោះ គ.ជ.ប ទទួលបានអ្នកចុះឈ្មោះថ្មី មិនដល់ ៥០ភាគរយទេ នៃចំនួនប៉ាន់ស្មានទេ គឺកើនឡើងបានជាង ១សែន (១៣១.៦៦៨) នាក់ លើបញ្ជីបោះឆ្នោតឆ្នាំ២០១៧ ដែលមានចំនួនជាង ៨លាន ៣សែន (៨.៣៨០.២១៧) នាក់។
ការធ្លាក់ចុះនៃចំនួនអ្នកចុះឈ្មោះថ្មី និងអ្នកពិនិត្យបញ្ជីឈ្មោះបោះឆ្នោតកាលណោះ ត្រូវបានអ្នកឃ្លាំមើលសិទ្ធិបោះឆ្នោត នៃអង្គការ ខុមហ្វ្រែល (Comfrel) រកឃើញថា ដោយសារកត្តានយោបាយ ធ្វើឲ្យពលរដ្ឋធុញទ្រាន់ មិនចង់បន្តតាមដាន និងចូលរួមជាមួយ គ.ជ.ប។ ក្រៅពីនេះ អង្គការ ខុមហ្វ្រែល សង្កេតឃើញថា ទោះជាមានគណបក្សច្រើន បានចូលរួមប្រកួតប្រជែងការបោះឆ្នោត កាលឆ្នាំ២០១៨។ ប៉ុន្តែតំណាងគណបក្សនយោបាយទាំងនោះ មិនបានសកម្មក្នុងការឃ្លាំមើលបញ្ជីឈ្មោះ ឬពិនិត្យបញ្ជីឈ្មោះបោះឆ្នោតទេ គឺតំណាងគណបក្សនយោបាយឃើញសកម្ម តែពេលបោះឆ្នោត។ តែអ្នកនាំពាក្យ គ.ជ.ប លោក ហង្ស ពុទ្ធា អះអាងថា ពលរដ្ឋមិនសូវចាប់អារម្មណ៍ ដោយសារមិនមែនជាឆ្នាំបោះឆ្នោត។
អតីតសមាជិកបណ្ដុំអង្គការនៃបន្ទប់ស្ថានការណ៍ឃ្លាំមើលការបោះឆ្នោត និងជាប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង យល់ថា ការផ្លាស់ប្ដូរកាលបរិច្ឆេទមកចុះឈ្មោះ នៅខែឧសភា មិនទាន់អាចទាក់ទាញឲ្យមានការចូលរួមពីពលរដ្ឋច្រើនទេ ព្រោះពលរដ្ឋទើបត្រលប់មកពីបុណ្យចូលឆ្នាំខ្មែររួច។
សង្គមស៊ីវិលរូបនេះ យល់ថា គ.ជ.ប គួរជ្រើសយកពេលវេលាកៀកពិធីចូលឆ្នាំខ្មែរ ទើបអាចទាក់ទាញការចូលរួមរបស់ពលរដ្ឋ។ ចំណែកការចល័តដល់ទីប្រជុំជន ដើម្បីចុះឈ្មោះជាការល្អ ប៉ុន្តែលោកជឿថា បើកត្តានយោបាយមានភាពប្រសើរជាងនេះ ពលរដ្ឋនឹងចូលរួមកាន់តែច្រើន៖ « ខ្ញុំគិតថា ការចុះឈ្មោះ វាជារឿងមួយដោយឡែក។ វាមិនជាប់ពាក់ព័ន្ធនឹងបញ្ហាអ្វីធំដុំពេកទេ។ ប៉ុន្តែបើបញ្ហានយោបាយអាចមានការប្រែប្រួល។ បើសិនអ្នកចុះឈ្មោះថា ទាល់តែនយោបាយបែបនេះ បានទៅចុះឈ្មោះ នយោបាយបែបនោះ បានទៅចុះឈ្មោះ អាហ្នឹងគឺជាបញ្ហាវិញ គឺដល់ពេលត្រូវការបោះឆ្នោត ហើយដល់ពេលបក្សដែលគាត់ពេញចិត្ត មកចូលរួមឈរប្រជែង គាត់ ( ពលរដ្ឋ ) អត់មានឈ្មោះក្នុងបញ្ជី។ អាការចុះឈ្មោះបោះឆ្នោត គឺកុំគិតឲ្យជាប់ជំពាក់រឿងនយោបាយច្រើន » ។
ចំណែកយុវជន លោក ខាន់ ភូមិន្ទ ទាមទារឲ្យរដ្ឋាភិបាលស្ដារលទ្ធិប្រជាធិបតេយ្យឡើងវិញ ទើបលោកពេញចិត្តចូលរួមសកម្មភាពជាមួយ គ.ជ.ប វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។